Mateo 6
6
Bilongesha bya ha shishemo
1 #
Mat 23:5. “Keyenu ngayi mubule kutenda milimo yenu yakwoloka ku meho a bantu, ngayi mwanga bamimone. Ndi mukwinga noho kukatambula ncungu kuli Tatiyenu wa muyilu mufwako.
2“Nohobene ndi ukupana shuma ku wakuyanda, hinga umonesha, ngonehe batendanga bakashishweka mu mashinangonge, na mu zimbanza ngayi bayemeziwe ku bantu. Mwashikuma nikumitongweza ngayi batambula kale ncungu yabo. 3Ngoboni ndi ukuyavwa wakuyanda, liboko lyobe lya shimoho hinga lilimuka eshe likutenda liboko lya shilyo, 4ngayi shishemo shinge shakulimba, pe obe Tatiyobe ou ukumona bya kulimba ukakupana ncungu.
Bilongesha bya ha malombelo
(Luka 11:2-4)
5 #
Luk 18:10-14. “Oho mukulombela, hinga mufweka ngonehe bakashishweka, ndaba bahaka kwima na kulombela mu mashinangonge na mu zimbanza, ngayi mwanga bantu babamone. Mwashikuma nikumitongweza ngayi batambula kale ncungu yabo. 6Ngoboni oho ndi ukulombela, ingina ku kampenci kobe, kami Tatiyobe ou wamonanga bya kuwi, ukakupana ncungu yobe.
7“Oho mukulombela, hinga mufweka ngonehe batendanga bakamatunga, ndaba nibo bahanganikanga ngayi bakayuvwiwa ndaba ya mazu abo amengi. 8Ngoboni hinga mubahembwiliza, ndaba Tatiyenu ukulimuka ebye mukushinga shilolo mumulombe. 9Haya lombelenu nehi ngayi,
“Tatiyetu uli muyilu,
lizina lyobe lilemekiwe.
10Wene wobe wize,
shifungo shobe shitendiwe hano hanci,
ngonehe shatendiwa muyilu.
11Tupanike lelo byakulya watu panikanga
ha mutena ha mutena.
12Tuyatile milandu yetu,
ngonehe etu twayatilanga bakakutubipishila.
13Hinga utwingiza mu byezeko,
ngoboni utulame ku mukawubi.
Ndaba wene wenga wobe
na ngovu na wuwahe,
myaka nimwayo. Ameni.*
14 #
Mak 11:25-26. Ndaba ndi mukuyatila bantu milandu yabo, Tatiyenu wa muyilu kami ukamiyatila. 15Ngoboni ndi mukubula kuyatila bantu milandu yabo, Tatiyenu kukamiyatila milandu yenu wufwako.
Bilongesha bya kuzila kulya
16“Pe oho mukuzila kulya, hinga mwinga bakuhomba ngonehe bakashishweka, ndaba bakukanyanyana ku zimpala zabo ngayi bantu balimuke ngayi banazili kulya. Mwashikuma nikumitongweza ngayi batambula kale ncungu yabo. 17Ngoboni oho mukuzila kulya, uliwabe mazi ku mutwe wobe, pe uyowele ku lupala lwobe. 18Ngayi bantu hinga balimuka ngayi unazili kulya, ngoboni ulimukiwe tuhu kuli Tatiyobe, ou wakubula kumoneka. Kami Tatiyobe ou wamonanga bya kuwi, ukakupana ncungu yobe.
Wuheti wa muyilu
(Luka 12:33-34)
19 #
Yako 5:2-3. “Hinga mulikongela wuheti hano hanci, haya hali tunzembule na ndala bikuwulobesha, kami bezi bakutubula na kuyiba. 20Ngoboni likongelenu wuheti muyilu, oku kwabula tunzembule na ndala bikutwesha kuwulobesha, kami bezi kutwesha kutubula na kuyiba bafwako. 21Ndaba oku kuli wuheti wobe, na mutima wobe kami niko uli.
Lumuni lwa lutu
(Luka 11:34-36)
22“Liho nilyo lyenga lumuni lwa lutu. Nohobene liho lyobe ndi likumona shiwahe, na lutu lwobe nimwalwo lukekala na lumuni. 23Ngoboni ndi liho lyobe kaliha lilishiwahe, lutu lwobe nimwalwo lukekala mu mincimpwe. Ndi lumuni luli mumwobe lunengi mincimpwe, pe mincimpwe yikenga yayinene shikuma!
Nyambi na wuheti
(Luka 16:13, 12:22-31)
24“Kowa muntu ukutwesha kwinga mukamulimo wa bahekulyendi babili. Ndaba ukazimba umo nakuhaka wamina, hinge hamina ukenga wa kulunga ku umo na kulimbulula wamina. Kutwesha kutendela milimo Nyambi na wuheti mufwako.
25“Nohobene nikumitongweza ngayi, hinga mulikekula ndaba ya wumi wenu ngayi, mukalya bishini, hinge ngayi mukanwa bishini, hinge ha lutu lwenu ngayi mukavwala bishini. Kati wumi kupitakana bivwalo na lutu kupitakana byakulya bifwako ndi? 26Monenu ku tuyoni twa muyilu, ndaba kukuna, hinge kuteza tufwako, kami kulonga mu bishete tufwako, ngoboni Tatiyenu wa muyilu watulishanga. Kati enu kaliha munapitakana shikuma tuyoni ndi? 27Kati yani hakati kenu hakulikekula ukutwesha kutalihisha ku mwimo wendi na utali wakulingana nkokola yendi?
28“Ndaba ngani mukulikekula ndaba ya bivwalo? Monenu ntemo za mu lishaka eshe zakulanga. Kutenda milimo zifwako, hinge kulitendela bivwalo zifwako. 29#1 Bamy 10:4-7; 2 Bya 9:3-6. Ngoboni nikumitongweza ngayi, hinge Mwene Sholomoni na wuheti wendi nimwawo, kekalileha na bivwalo byabiwahe shikuma bya kufwanikiza na yimo yaneze ntemo. 30Haya ndi Nyambi ukuvwika nahiyo mwila wa mu lishaka, owe uliko lelo, pe nzona hiukuyumbiwila mu liziko, kati ukabula kumivwalika byabingi ndi? Enu bakakukulupila kwakushe!
31“Nohobene hinga mulikekula ngayi, ‘Tukalya bishini?’ Hinge ‘Tukanwa bishini?’ Hinge ‘Tukavwala bishini?’ 32Ndaba ebye nimwabyo bakubishinga bakamatunga, pe Tatiyenu wa muyilu ukulimuka ngayi mukufwanina kwikala na byuma ebye nimwabyo. 33Ngoboni hakutatika shingenu Wene wa Nyambi na kwoloka kwendi, pe byuma ebye nimwabyo ukamipanabyo. 34Nohobene hinga mulikekula habya nzona, ndaba mutena wa nzona ukalimonena byuma byawo. Lehenu mutena ulimonene binawufwanini.
Currently Selected:
Mateo 6: KK2008
Highlight
Share
Copy
Want to have your highlights saved across all your devices? Sign up or sign in
New Testament in Nkoya © The Bible Society of Zambia, 2008.