Luka 20
20
Liyipu lya ha ngovu za Yeshu
(Mateo 21:23-27; Mako 11:27-33)
1Ha mutena umo oho Yeshu alongeshelenga bantu mu shipango sha Litala lya Nyambi na kushimikila ncango zaziwahe, bakankombela ba bakulwane na bakakulongesha ndayano, hamo na bakulwane ba Bayunda bezile kukwendi, 2pe bambile ngayi, “Kati ukutenda byuma ebye na ngovu ngani? Kami yani wakupanine eze ngovu?”
3Yeshu wakumbwile ngayi, “Ami kami nikumipula liyipu. Ntongwezenu, 4kati kuzubilisha kwa Yowano kwafumine muyilu ndi kwafumine ku bantu?”
5Batatikile kulikanganisha mukati kabo ngayi, “Ndi tukwamba ngayi, kwafumine muyilu, pe niye ukatwipula ngayi, ‘Ndabangani mwabulile kumukulupila?’ 6Ngoboni ndi tukwamba ngayi, ‘Kwafumine ku bantu,’ pe bantu nimwabo bakatupuha mamanya, ndaba bakulimuka shiwahe ngayi Yowano wengile muluwe.” 7Bakumbwile ngayi, “Kulimuka tufwako oku zafumine.”
8Yeshu wambile kukwabo ngayi, “Nami kami kumitongweza eze ngovu nikutenda nazo byuma ebye nifwako.”
Nguli ya bandimi ba mu mfuba ya shinyanca
(Mateo 21:33-46; Mako 12:1-12)
9 # Isha 5:1. Niho Yeshu atongwezele bantu eye nguli ngayi, “Kwekalile muntu wamina wakunine mfuba ya shinyanca, pe wayakilemo bandimi, niho ayile ku litunga lyamina na kwikalako shikati shashitali. 10Oho shikati shakubuya mikabo shakumine, watumine mukamulimo wendi ku bandimi ngayi akashimbeko mikabo. Ngoboni bandimi bamukamine, niho bamutandile kwakubula shamina. 11Watumine kami mukamulimo wamina, naniye bamukamine, bamutendele shibi, kami bamutandile kwakubula shamina. 12Watumine wa wuhatu, naniye kami bamulemekele niho bamutandile. 13Niho mwine mfuba ambile ngayi, ‘Nikwinga nahiti? Nikatuma mwanami ou nahaka shikuma, kampe bakamupana maleema oho bakamumona!’ 14Oho bandimi bamumonene, balyambashanine ngayi, ‘Niye ncwana, tumuzihenu, ngayi likona linge lyetu.’ 15Nohobene bamuyumbilile ku nciza ya mfuba, pe bamuzihile.
Yeshu wambile ngayi, “Haya mwine mfuba ya shinyanca ukatenda nahiti ku bandimi bayo? 16Ukeza na kuziha bayo bandimi, na kupanika mfuba ku bandimi bamina.”
Oho bantu bayuvwile eshe, bambile ngayi, “Eshe hinga shitendiwa!”
17 # Nyi 118:22. Yeshu wabatilaminine, wambile ngayi, “Haya bikutontoloka nahiti ebye byatikitiwile ngayi,
‘Limanya liya bakanine bakakutenda matala,
nilyo linafutuku kwinga limanya lya kushuma lya mu mbango.’
18“Nimwendi ukawila ha limanya liyo, ukapokoka. Ngoboni ou likawila, likamucancola.
Liyipu lya ha kutela mutelo
(Mateo 22:15-22; Mako 12:13-17)
19Bakakulongesha ndayano na bakakombela ba bakulwane bashingile kukwata Yeshu, ndaba balimukile ngayi nibo atoyelenga mu yiyo nguli, ngoboni batinine bantu. 20Niho bashingilenga shikati shinafwanini. Bapanine lizikakanwa ku bantu, ngayi balimonekeshe ngo babawahe, mwanga bakwate Yeshu na mazu wendi, pe bamupanike mu maboko a Kalela wa Baloma* ndaba niye wekalile na ngovu na nyala nimwazo. 21Bepwile Yeshu ngayi, “Mulongeshi, tukulimuka ngayi ebye ukwamba nanebye ukulongesha byakwoloka, kami kuhota muntu wamina wufwako, ngoboni ukulongesha nzila ya Nyambi na kupwisha. 22Kati shikufwanina ngayi tutele mutelo kuli Nkeshali ndi hinga tutela?”
23Ngoboni Yeshu walimukile kushoshoka kwabo, niho ambile kukwabo ngayi, 24“Moneshenu mali.” Pe wabepwile ngayi, “Shifwekesha shiliho na lizina linatikitiwiho byayani?”
Bambile ngayi, “Bya Nkeshali.”
25Yeshu wambile kukwabo ngayi, “Haya panikenu Nkeshali byuma bya Nkeshali, kami panikenu Nyambi byuma bya Nyambi.”
26Kaliha batweshele kumukwata na mazu aya ambile mukati ka bantu, pe bamwenene tuhu na kukomoka ku nkumbwilo yendi.
Liyipu lya ha kushanguka ku bafu
(Mateo 22:23-33; Mako 12:18-27)
27 #
Mil 23:8. Niho Bashanduki bamo, baya bambanga ngayi kowa kushanguka ku bafu bezile kuli Yeshu, pe bamwipwile ngayi, 28#Nday 25:5. “Mulongeshi, Moshesha watikitile kukwetu ngayi, ‘Ndi yaya muntu unafu, hinga ekala na mukazendi wakubula bana, mukonzowendi nafwanini kuyeka uya mfwile, mwanga abelekeleko kawushinda wendi bana.’ 29Nohobene kwekalile balume mutanu na babili, bana ba muntu umo. Wa mukulwane wayekele mukazi, ngoboni wafwile hinga abula bana. 30Wa wubili wamuyekele, naniye wafwile kwakubula bana. 31Na wa wuhatu wamuyekele, kwengile noho ku nimwabo ba mutanu na babili, bafwile kubula kushiya bana. 32Kunyima yabo, na uya mukazi kami wafwile. 33Nohobene ha mutena wa kushanguka ku bafu, uya mukazi ukenga wa yani? Ndaba ba mutanu na babili nimwabo bamuyekele.”
34Yeshu wakumbwile kukwabo ngayi, “Balume na bakazi ba litunga lino bakuyeka na kuyekiwa, 35ngoboni obo bakalabiwila ku litunga lya kumbili na ku kushanguka ku bafu, nibo kukayeka, hinge kuyekiwa bafwako. 36Bakenga ngo mangeloyi, pe kukafwa bafwako. Bengakale bana ba Nyambi, ndaba banashanguku ku bafu. 37#Kut 3:6. Moshesha naye wamoneshele shiwahe ngayi bafu bakashanguka ku wumi mu mazu akwamba ha kubanga kwa lipukumuna, Moshesha ukutoya Mwene ngayi, ‘Nyambi wa Abulahama, Nyambi wa Ishake na Nyambi wa Yakobo.’ 38Kaliha wenga Nyambi wa bafu, ngoboni Nyambi wa babomi, ndaba kukwendi bantu nimwabo benga babomi.”
39Bamo Bakakulongesha ndayano bakumbwile ngayi, “Hekulu, unamba shiwahe!” 40Ndaba kaliha batweshele kumwipula liyipu lyamina.
Kilishitu wenga Mwana yani?
(Mateo 22:41-46; Mako 12:35-37)
41Yeshu wabepwile ngayi, “Haya bakwamba nahiti ngayi Kilishitu wenga mwana Ndavita? 42#Nyi 110:1. Ndaba Ndavita niye mwine wambile ku libuka lya Nyimbo ngayi,
‘Mwene wambile kuli Mwene yami ngayi,
yikala ku liboko lyami lya shilyo,
43hantu natende bakankole bobe
malyatilo a mawulu wobe.’
44Ndavita wamutoyele ngayi, ‘Mwene,’ haya ukwinga mwanendi nahiti?”
Yeshu ukunyanca bakakulongesha ndayano
(Mateo 23:1-36; Mako 12:38-40)
45Oho bantu nimwabo bekalile na kumuyuvwilila, Yeshu wambile ku bandongesha bendi ngayi, 46“Keyenu na bakakulongesha ndayano. Bashinga kwenda hinga bavwala bivwalo byabitali na kuhaka ku shangwishiwa mu myanya yakulandishila na kwikala ha bipona bya kumbili mu mashinangonge na myanya ya maleema ku bimbo bya mayambwayambwa. 47Bakuyibila bakazi ba bamfwile byuma byabo, kami bakulyongeza na malombelo a matali. Bantu banoho bakatambula kashushwilo kakanene.”
Currently Selected:
Luka 20: KK2008
Highlight
Share
Copy
Want to have your highlights saved across all your devices? Sign up or sign in
New Testament in Nkoya © The Bible Society of Zambia, 2008.