Luka 15
15
Mbelele wakuyongala
(Mateo 18:12-14)
1 #
Luk 5:29, 30. Oho bakakutelesha na bakawubi nimwabo bezilenga kuli Yeshu na kuyuvwilila, 2Bafwalishi na bakakulongesha ndayano bangungutile ngayi, “Ou muntu ukutambula bakawubi na kulya nabo hamo.” 3Niho Yeshu abatongwezele eye nguli ngayi,
4“Yani kukwenu ndi uli na bambelele ba mwanda, ndi kunayongala yimo ukubula kushiya bambelele makumi mutanu na anaa na mutanu na banaa mu libelelengwa, hakuya na kushinga uya mbelele nayongala hantu namuwana? 5Oho anamuwana, ukumuyaka ha bifuzi byendi na kuwahilila 6na kuya ku munzi wendi. Niho ukukungula bahoni bendi hamo na bandambo bendi hamo nakwamba kukwabo ngayi, ‘Wahililenu nanami, ndaba nawana mbelele wami wayongalile!’ ” 7Nohobene nikumitongweza ngayi, kukekala kuwahilila muyilu ndaba ya mukawubi umo ukutenguluka, kupitakana bakakwoloka ba makumi mutanu na anaa na ba mutanu na banaa bakubula kushinga kutenguluka.
Nguli ya mali akuyongala
8“Hinge ndi yani mbuyama uli na mali likumi lya muwayawaya wa shiliva, ndi nayongesheho yimo, hakubula kumunika mumuni na kukomba mu litala lyendi na kuyishinga shiwahe hantu nayiwana? 9Oho anayiwana, ukukungula bahoni bendi na bandambo bendi hamo nakwamba kukwabo ngayi, ‘Wahililenu nanami, ndaba nawana mali yami yayongalile!’ 10Nohobene nikumitongweza ngayi, muli kuwahilila muyilu ku meho a mangeloyi a Nyambi ndaba ya mukawubi umo ukutenguluka.”
Nguli ya mwana wakuyongala
11Yeshu wambile kami ngayi, “Muntu wamina wekalile na bana bendi ba balume babili. 12Mwanendi wa kanuke wambile kuli tatiyendi ngayi, ‘Tate, mpanike likona lyami lya wuheti wobe.’ Niho tatiyabo atapililile wuheti ku bana bendi babili. 13Kwapitile matena amashe, niho mwanendi wa kanuke alandishile byuma byendi nimwabyo, wayile ku litunga lya kwakutali, oko akapanzanishile wuheti wendi mu nyoyelo ya lwiholwiho. 14Oho amanishile byendi nimwabyo, kwezile nzala yayinene mu litunga liyo nimwalyo, kami niye kaliha wekalile na byamina. 15Niho ayile na kushinga milimo ku wamina wa mu litunga liyo, ou wamutumine ku mafuba wendi mukulisha bangulube. 16Niye washingilenga kulya byakulya biya balilenga bangulube, ngoboni kowa muntu wamupanikilebyo ngayi alye.
17“Oho alihanganikile, wambile mu mutima wendi ngayi, ‘Bakamilimo nimwabo kuli tate bakulya na kubikwangilako, ngoboni ami nilinakufwa ku nzala! 18Nakukatuka niye kuli tate, nikamba kukwendi ngayi, tate, nabipishi ku meho a Nyambi na ku meho wobe. 19Kufwanina kwihaniwa ngayi mwanobe nifwako, untende ngo umo wa bakamilimo bobe.’ 20Niho akatukile, wayile kuli tatiyendi.
“Oho ushili kwakutali tatiyendi wamumonene, wamuyuvwilile nceshe, niho amwitukilile na kumubumbatila mu ncingo yendi, pe wamuzupezele.
21“Mwanendi wambile kukwendi ngayi, ‘Tate, nabipishi ku meho a Nyambi na ku meho wobe, kufwanina kwihaniwa ngayi mwanobe nifwako.’ 22Ngoboni tatiyendi wambile ku bakamilimo bendi ngayi, ‘Letenu shawangu shivwalo shashiwahe shikuma mumuvwalikesho. Mulete na kambalamunwe mukayake ku munwe wendi, mumuvwalike ncangwa ku mawulu. 23Letenu namani ya kushuwa muyizihe, mwanga tutende shimbo na kuwahilila! 24Ndaba ngayi ou mwanami wafwile, haya unayoyo, wayongele haya unawaniwi.’ Niho batatikile kuwahilila.
25“Hashikati shiyo mwanendi wa mukulwane wekalile mu mfuba. Ha kuboka kwendi oho akumine hahepi na litala, wayuvwile bantu hibembila na kushinda. 26Wehanine umo wa bakamilimo, wamwipwile ngayi, ‘Kati bishini bikutendiwa?’ 27Mukamilimo wamukumbwile ngayi, ‘Mukonzowobe nezi, kami tatiyobe nazihi namani ya kushuwa, ndaba unaboko kukwendi hinga enga wamumi.’
28“Yayiyendi wapilamine, na kukana kwingina mu litala. Niho Tatiyendi atutikile, wamulombele ngayi engine mukati. 29Ngoboni niye wakumbwile tatiyendi ngayi, ‘Mona, ninakutendele milimo myaka yayingi kwakubula kukiluka ndayano zobe hinge mutena umo, shilolo umpanike hinge mpongo wamushe ngayi niwahilile na bahoni bami. 30Ngoboni ou mwanobe, unakabipishi wuheti wobe na bakalwiholwiho, aha anakumu unamuzihili namani ya kushuwa!’ 31Tatiyendi wambile kukwendi ngayi, ‘Mwanami, obe wekala nami myaka nimwayo, kami byuma byami nimwabyo byenga byobe. 32Ngoboni shinafwanini ngayi tuwahilile na kutangala, ndaba ou mukonzowobe wafwile, haya unayoyo, wayongalile haya unawaniwi.’ ”
Currently Selected:
Luka 15: KK2008
Highlight
Share
Copy
Want to have your highlights saved across all your devices? Sign up or sign in
New Testament in Nkoya © The Bible Society of Zambia, 2008.