Yowano Kutontolola
Kutontolola
Ncango zaziwahe atikitile Yowano zikumonesha Yeshu ngayi niye Lizu lya mwayile myaka lya Nyambi ou “Wengile muntu uya wekalile hakatiketu” (1:14). Ngonehe likwamba elye libuka, eze ncango zaziwahe zatikitiwa ngayi aba bakuzilaba, mwanga betabile ngayi, Yeshu niye Mupulwishi uya wakulupishiwile, niye Mwana Nyambi, pe ndi bakukulupila mumwendi, bekale na wumi (20:31).
Munyima ya kutontolola biya bikumonesha Lizu lya Nyambi lya mwayile myaka lili hamo na Yeshu, ntandila ya muntanzi ya ncango zaziwahe yinamoneshe bilimukisho byabingi bikumonesha ngayi Yeshu niye Mupulwishi na Mwana Nyambi uya wakulupishiwile. Munyima yanebye mwatikitiwa biya bikutontolola kulubulula kwa biya binaholoko ha bilimukisho. Eye ntandila ya libuka yikwamba ha bantu bamo eshe betabilile muli Yeshu, na neshe bafutukile kwinga bandongesha bendi, ngoboni bamina bamukananganishile, pe bakanine kumwitabila. Matapululo 13–17 anamba mu wutali bya kulilumikila kwa Yeshu hamo na bandongesha bendi ha wushiku uya bamukwatile na mazu endi a kuliwahishila nanawa a kubashumankanisha ku mazolo a mutena wakokele uya bamukolekele. Litapululo lya mamaninino likwamba bya kukwatiwa na kuyatishiwa kwa Yeshu. Kukolekiwa kwendi na kushanguka kwendi na neshe alimonekeshele ku bandongesha bendi munyima ya kushanguka.
Byambo bya mbuyama wakwatiwile hatenda wunjenge (8:1-11) bili mu bifunda ... ndaba mu mabuka amengi na bakakunungulula ba muntanzi, kaliha babitikita, ngoboni bamina bayakabyo mu zimbalila zamina.
Yowano unashumishi ha wumi wa mwayile myaka kupitila muli Kilishitu, ngayi unengi bishemo biya bikutatika ha shikati shino, byezanga kubaya bakutambula Yeshu ngayi niye nzila na kupwisha na wumi. Yowano unatikiti shiwahe, ha kutontolola bya wumi wa moyo, unaliyavwishi bimonekesho byalimukiwa mukuyoya kwa ha mutena na mutena, byakufweka ngo mema, linkende, lumuni, mulishani na bambelele bendi, na mikolobozi ya shinyanca na mikabo yayo.
Biya bili munebye byatikitiwa
Bya muntanzi 1:1-18
Yowano Mukakuzubilisha na bandongesha bakutatika ba Yeshu 1:19-51
Milimo ya Yeshu ku bantu babengi 2:1–12:50
Matena a mamaninino mu Yelushalema 13:1–19:42
Mwene ukushanguka na kulimonekesha 20:1-31
Mamaninino na kulimonekesha kami mu Ngalileya 21:1-25
Currently Selected:
Yowano Kutontolola: KK2008
Highlight
Share
Copy
Want to have your highlights saved across all your devices? Sign up or sign in
New Testament in Nkoya © The Bible Society of Zambia, 2008.