Neto'te 38
38
Yuda bo Tamar
1A lo be yen ngelaṅ nà Yuda fagte boa fèt tse, nswe' nèn la' mo' ze Adullam, lén se Hira. 2Yuda tsho bwe, njen ngon mo' ze Kanaan lén se Shua; Yuda so ngon nà, ndo' i. 3A be jùm, mbwe mén mandum, bo tswi lén se ndù Er. 4A bèn njùme, mbwe mén mandum, ntswi lén se ndù Onan. 5A bèn jùm mo' yoṅ i, mbwe mén mandum, ntswi lén se ndù Shéla. Yuda na' mb'a Kezib ndùse nzwi i bwe Shéla là.
6Yuda diag nzwi tuswe i Er, lén se Tamar. 7Er tuswe Yuda lo b'a mèn kebwô num miag Tshùaben; Tshùaben ghù a kwù. 8Ndùlala Yuda tshob Onan ndù: So nzwi mfèl o, ndo' i mb'o b'a mfèt ndu i là, mbwe ta' mén bin yi, ndo' ngù tunndà mfèl o yi. 9Là, Onan na' lèn ndù a bwe mén bo nzwi mfèl i mba bo ke yen i mba ze là. Ndùlala njoṅ ngelaṅ fa z'a lo' nzwi mfèl i là, a ghù ntse wut mi fètt'a nsi ndù k'a bwe mén ngù tunndà mfèl i yi. 10Ju z'a ke ngù là bag num miag Tshùaben, a ghù mba yi kwù. 11Ndùlala Yuda tshob nzwi mén i Tamar ndù: Bèn ndà tàan ntswe mbe mfôg bwe, tà nkum ndùse nshum àm Shéla be ndùb là. A tshob ndùlili à nummb'a lo ke mbwôg ndù kà Shéla kwù mba fèt tse là. Tamar nèn nke ntswe ndà tàab.
12A lo be tshùa tsemo' lé'njù, ngon Shua, nzwi Yuda kwù. Ngelaṅ ze bo fite ntù Yuda là, a ko' nèn Timna, mbaṅ ghakebte nyiaṅ njùmbwe tse bo nshum i Hira ze Adullam. 13Bo soṅ Tamar, ntshob yi ndù: Tshù tà ndu o là z'a nèn kebte nyiaṅ njùmbwe tse Timna là. 14Ndùlala, a sô nzwe mfôg num i, ndam wul i kam nzwe, mbomte se i, ntswe ntshu ngô Enaim, num manze z'a nèn Timna là. A ghù ndùlal'a nummb'a lo yen ndù Shéla ku'u, bo ke fà i yi ndù a be nzwi i.
15Yuda yen i, nke ntsiaṅ kattù mènnzwi, nummb'a lo bomte se i. 16A kù'te nèn mbaṅ i num manze, ntshob ndù: Bam ndù be be. Nummb'a lo ke lèn ndù a b'a nzwi mén i. A tshob ndù: Ke z'o nsi fà me kà be be à? 17A bùnte ndù: Me nsi lo' mén mbwe num mbwe tshàm tum wù. A tshob Yuda ndù: O nsi yab tshwèt, tà kum ndùs'o tum i me là. 18Yuda bùnte ndù: Ke ze me fà wù mba ju tshwèt l'à? A bùnte ndù: Fà mbwô mu me, mfà ntàmtu' mba kôg s'a bu o là me. Yuda fà tshen tshu li yi, ndo' i, a be jùm. 19A lo nsi mbù' kam nzwe se i, mbèn ma' nzwe mfôg tse num i nène.
20Yuda tum mén mbwe nshum i ze Adullam, ndù a nèn mfà mènnzwi là, nkwé tshu tshwèt nse' mfà yi. Là, a nèn ke yen i. 21A bètte ba la' ntshob ndù: Kattù mènnzwi z'a ke ntsin num manze Enaim nà yà? Bo bùnte, ntshob yi ndù: Sàm kattù mènnzwi ke' to' be nsen ni. 22A bèn njam mbaṅ Yuda, ntshob yi ndù: Me ke' yen mènnzwi là, ba la' bèn ntshob me ndù kattù mènnzwi ke' to' be la' bo. 23Yuda tshob ndù: A lo' ju z'a ghù là! A ke' bwô ndù be ghù bo wag be. Tshù là, me tum mén mbwe yi, o tsho ke yen i.
24A lo be tshùa nguan ṅwù tat, bo se' ntshob Yuda ndù Tamar, nzwi mén i kat, ntshùa njam kal i tà njùm mba nejùme. Yuda tshob ndù: Bin lo' i ntum yi nèn nton i. 25Ndùse bo ke ndo' i ntum yi là, a ghù bo tshob tà ndu i ndù: Mènntùn ze tshen tshu li be tse là bèn ngù kà me jùm; me le't'o ndù o lôte, ndèn mènntùn ze men mbwô li, men ntàmtu' li bo sen kôg li be tshu tse là. 26Yuda lèn tshen tshu là, ntshob ndù: Ze nefàn ke' ta mba yàm nà, nummbe me lo ke fà i nshum àm Shéla. Yuda ke bèn nelo' i.
27Ndùs'a ke mbwe là, bo yen ndù a ghù bonfag bam i. 28A be bwe mo' ta' mén tshag bu i njù, ngakwé mén tshùb, ntaṅ nkù meba bwe, ntshob ndù: Yen mén ni bèn mbwôg tum. 29Là, a fiag bu i mbèn yi njam, mfèl i tum. Ndùlala ngakwé mén tshob ndù: O to yu nz'à yà? A yab lén mén ndù Péréts. 30Mfèl i z'a ghù nkù meba num bu i là yôg ntum ze, bo yab lén se ndù Zérak.
Currently Selected:
Neto'te 38: BMa
Highlight
Share
Copy
Want to have your highlights saved across all your devices? Sign up or sign in
La Sainte Bible en Bamiléké-Medùmba © Alliance Biblique du Cameroun, 1993. All rights reserved.