Neto'te 29
29
Yakob bumte bo Rashél
1Yakob tam manze, nèn ntùm ngô bon bag ntumnyam. 2Tshù, a yen mo' tôntse mà tshwèt, ndù bwoṅ mbwe tat nôte mbaṅ bwe. A b'a mum sen tôntse ze mbwe ke nu ntse là. Loṅ se bo kabte ntshu i yi là lo ghu' neshu. 3A lo ke mbe ndùse njoṅ bwoṅ nyàm fa tse'te bwe là, ghabéb mbwe bwoṅte loṅ ntshu tôntse nyàm nu ntse, bo bèn mbwoṅte loṅ mbèn yi dù' i, ntshu tôntse.
4Yakob bètte ghabéb mbwe ndù: Fèt tshàm, bin b'a bon yà? Bo tshob ndù: Bag b'a bon Karan. 5A bètte yub ndù: Bin lèn Laban, nshum Nakor ké? Bo tshob ndù: Ṅ, 6a b'a ndùke? A tswe mebwô, tshù mba kua' ngon i Rashél là z'a tshwèt nse' boa mbwe là. 7Yakob tshob ndù: A ke' à kua' mbwôgtshù, a ke' b'a ngelaṅ ze nyàm be mbumte li. Bin ghù mbwe nu ntse, bin lo' yub nèn yi kônga bo fèt nenà. 8Bo tshob ndù: Be bag ke ghù ndùlala ke be ndù njoṅ bwoṅ nyàm fa bumte, ke be ndù bo bù' loṅ ntshu tôntse, kà bag njôg mfà nze nyàm nu ntse.
9Ndùse bo ke nke' ntshobte là, Rashél ṅwag boa mbwe tàab, nummb'a na' mb'a ngabéb mbwe. 10Ndùse Yakob yen Rashél ngon Laban, mfèt màab mba mbwe Laban mfèt màab là, Yakob kù' nèn mbwoṅte loṅ ntshu tôntse, ngù mbwe Laban mfèt màab nu ntse. 11Yen nà be tôge, Yakob tate Rashél, ntshag nz'é tù, ṅwate. 12Yakob soṅ Rashél ndù a b'a mfèt tàab, mbe nshum Rébéka. Rashél kù nde nèn ntshob tàab. 13Ngelaṅ Laban ju' yen tshô là, ndù a b'a Yakob nshum mfèl i ze mènnzwi là, a kù nde nèn mbumte bo yi, ntsiag i, ntat'é, ngù a tsho ndà i. Yakob soṅ Laban njoṅ yen nu là fa. 14Laban tshob yi ndù: Kua' nenùn o b'a lem tshàm! Yakob tswe la' i ta' ṅwù ndaṅndaṅ.
Mba Yakob bèn nandà là
15Laban tshob Yakob ndù: Mb'o be mfèl àm nà, o nsi fa' m'a banban ké? Tshob njoṅ z'a bwô ndù me ke mbé o là. 16Laban lo ghù bonngon bàa: Lén ze mbwe be Léa, lén ntù'njam be Rashél. 17Miag Léa ziag neshu, là Rashél lo bwô num mbaṅ wut mba num se i. 18Yakob lo ke nkô Rashél, ntshob ndù: Me nsi fa' wù num tu Rashél ngon ze njam ngu'njù sammbàa. 19Laban tshob ndù: A be mebwô ndù me fà i wù ntshùa nefà i mo' mandum ze ghua. Bag wù tswe. 20Ndùlala Yakob fa' num ngu'njù sammbàa num tu Rashél, a nke ntswe yi à mba bon lé'njù là, nummb'a lo ke nkô i neshu. 21Yakob tshob Laban mo' lé'njù ndù: Fà nzwi àm me, nummbe lé'njù tse be tshob là bumte, me kô nelo' i ndonni.
22Laban tse'te njoṅ benntùn fa tse bo be yen dù' là là, ngù jùa ndùb bo. 23A be mfetnjù, a lo' ngon i Léa, nèn mfà Yakob, a lo' i. 24Laban fà kua' ze ngafa' ze mènnzwi lén se Zilpa ngon i Léa, ndù a ke mfa' yi. 25Njù be làne, Yakob yen ndù a lo mba Léa, a tshob Laban ndù: Ke z'o ghù m'à? Me lo ke ke fa' wù à num tu Rashél ké? Numk'o ntatt'àm à? 26Laban tshob ndù: A ke' be matnu nsen ni nebwôg na ntù'njam ntshùambwe! 27Miagte ze ngabnjù yen mén ni, me nsi fà mba yen nà wù num fa' ngu'njù sammbàa s'o nsi bèn fa' là. 28Yakob ghù ndùlala, miagte ze ngabnjù Léa, Laban fà ngon i Rashél yi, a tù' nzwi i. 29Laban fà kua' ngafa' i ze mènnzwi lén se Bila ngon i Rashél ndù a ke mfa' yi. 30Yakob lo' Rashél, nkô i ntshùa mba kua' Léa. Ndùlala Yakob bèn mfa' ju Laban ngu'njù sammbàa.
Bon Yakob
31Tshùaben be yen mba bo me'te Léa là, ngù a lét; là Rashél be kebwe. 32Léa jùm, mbwe mén mandum. Léa tswi lén se Rubèn, nummb'a lo tshob ndù: Tshùaben yen mba bo me't'àm nà, ndonni ndu àm nsi kô àm. 33Léa bèn njùme, mbwe mén mandum, ntshob ndù: A b'a ndù Tshùaben yen ndù bo ke' be kô àm, mbèn mfà mba yen mén ni me. A tswi lén se ndù Siméon. 34A bèn njùm mbwe mén mandum, ntshob ndù: Ndu àm nsi so wul i num àm yen yoṅ i li, nummbe me bwe bon bandum yi tat. A ndùlala bo nsi tsiaṅ mén ndù Lévi. 35Léa bèn njùme, mbwe mén mandum, ntshob ndù: Me nsi nyàmte Tshùaben yen yoṅ i li. Ndùlala, a tswi lén se Yuda. A keb bwe, ke bèn nebwe.
Currently Selected:
Neto'te 29: BMa
Highlight
Share
Copy
Want to have your highlights saved across all your devices? Sign up or sign in
La Sainte Bible en Bamiléké-Medùmba © Alliance Biblique du Cameroun, 1993. All rights reserved.