लुका 23
23
येसुत पीलातस्ज बोर्बल
(मत्ती २७:१-२,११-१४; मर्कुस् १५:१-५; युहन्न १८:२८-३८)
1हुजु लीप्चे सभारी मुबे जम्म म्हीमाचे येसुत पीलातस् पङ्बे रोमी सर्कार्की हाकीम्ज बोर्ज्यी। 2ओसेम् थेङ्यीमाचे थेङ्त चोले पङ्ज्यीम् दोस् लब तीप्ज्यी, “चु म्हीचे थे मुक्ती पीन्बे ख्रीस्ट् ग्यल्बो य्हीन्ब, ओसेम् रोमी सर्कार्त तीरो फाअतो पङ्ज्यीम् ङ्य्हङ्की म्हीमात भ्यु तम् लोप्टीबल ङ्यीमाचे यङ्ज्यी।”
3होत्तज्यीम् पीलातस्चे येसुत, “ए यहुदीमाकी ग्यल्बो य्हीन्ब?” बी ङ्योत्ज्यी। येसुचे सुङ्ज्यी, “हुजुमी र्हङ्चेनो सुङ्ज्यी।” 4हुजु लीप्चे पीलातस्चे ङ्हच्छ्यङ् लम्बुमातेङ् य्हक्को म्हीमात पङ्ज्यी, “चु म्हीचे अतबे लक् स्य्हेङ्बल ङचे तेएनो अय्हङ्।” 5तर थेङ्यीमाचे नासेन्लेनो पङ्ज्यी, “चुजे यहुदीय प्रदेस्की जम्म ग्लाइ म्हीमा ओसेम् गालील् प्रदेस् य्हङ्से तीप्ज्यीम् चु ग्ला सम्मनो लोप्ज्यीम् फुलीतीटीबल मुब।” 6पीलातस्चे चु थ्येःब बीसेम्, “चु म्ही गालीली य्हीन्ब?” बी ङ्योत्ज्यी।
येसुत हेरोद्की ङोन्री बोर्बल
7येसु हेरोद्की प्रदेस्ल टीम् बी स्येःब बीसेम् पीलातस्चे थेङ्त हेरोद्ज पीत्लाज्यी। हुजु बेलोरी हेरोद्एनो यरुस्लेम्री मुबल। 8ओसेम् येसुत म्रङ्ज्यीम् हेरोद् य्हक्को तङ्ज्यी। तलेपङ्सम् थेचे थेङ्की बारेरी थ्येःबल तज्यीम् य्हक्को बेलो ङोन्ग्यम् य्हङ्सेनो थेङ्त च्याबे सेम् लबल मुबल। थेचे थेइ ङोन्री येसुचे तेःङेन्की लक् स्य्हेङ्बल च्याबे आस् लबल मुबल। 9हेरोद्चे थेङ्त य्हक्को तम्मा ङ्योत्ज्यी, तर थेङ्चे तेएनो जोहप् अन्हङ्। 10ओसेम् ङ्हच्छ्यङ् लम्बुमातेङ् धर्म लोप्पोन्माचे रप्ज्यीम् झेन् क्रीङ्ज्यीम् थेङ्त दोस् लइदीज्यी। 11हेरोद्तेङ् थेइ स्यीपाइमाचे येसुत ङोःज्यीम् पेत्न लज्यी। हुजु लीप्चे येसुत ग्यल्बोचे येन्ब र्हङ्बे वल येन् येन्पीन्ज्यीम् पीलातस्जनो दोःज्यीम् पीत्ज्यी। 12हुजु दीन् य्हङ्से हेरोद्तेङ् पीलातस् थुन्ज्यी। हुजु दीन् बीमम् ङोन्ग्यम् थेङ्य्हीनो अथुन्बल मुबल।
येसुत स्यीबे सजाय पीन्बल
(मत्ती २७:१५-२६; मर्कुस् १५:६-१५; युहन्न १८:३८-१९:१६)
13हुजु लीप्चे पीलातस्चे ङ्हच्छ्यङ् लम्बुमा ओसेम् अगुवामातेङ् म्हीमात र्हुब्ले ङ्होत्ज्यीम् 14थेङ्यीमात पङ्ज्यी, “म्हीमात भ्यु तम् लोप्पल पङ्ज्यीम् एङ्यीमाचे चु म्हीत ङइज बज्यी। एङ्यीमाइ ङ्होन्सङ्नो ङचे थेत ङ्योत्प थीःब लज्यी। तर एङ्यीमाचे थेत ल्हइतीबे दोस् ङचे तेएनो अयङ्। 15हेरोद्चेएनो तेइ दोस्एनो अयङ्ज्यीम् चुत ङ्य्हङ्माज दोःपीत्खबल मुब। चु म्हीचे स्यीथोःबे सजाय यङ्बे लक् तेएनो स्य्हेङ्बल अरे। 16होत्तज्यीम् ङ थेत कोर्रचेकीनो ग्यङ्ज्यीम् पीत्लास्ये मुब।” 17रोमी सर्कार्की पेठीम् अनुसार्, [जेल्री च्युप्पे म्ही गीत पर्बइ बेलोरी पीत्थोब मुबल#२३:१७ चु पद् य्हक्को बर्स ङोन्ग्यम्की बाइबल्मारी ब्रीबल अरे।।] 18तर जम्म म्हीमाचे क्रीङ्ज्यीम् पङ्ज्यी, “चुत सेतो! बरु ङ्यीमाइ लागीरी बारब्बत पीत्लागो!” 19(बारब्बामी सर्कार्की बीरोद्री अज्यबे लक् स्य्हेङ्बतेङ् म्ही सेत्पल तज्यीम् जेल्री च्युप्पल मुबल।)
20पीलातस्चे येसुत पीत्लाबे सेम् लज्यीम् म्हीमात देबेएनो व्हम्च्याज्यी। 21तर थेङ्यीमा देबेएनो क्रीङ्ज्यीम् पङ्ज्यी, “थेत क्रुस्री च्योलागो! क्रुस्री च्योलागो!” 22ओसेम् पीलातस्चे सोम्ख्यप् कुनोएनो थेङ्यीमात पङ्ज्यी, “तले? चुजे ता अतबे लक् स्य्हेङ्ज्यी? चु म्हीचे स्यीथोबे सजाय यङ्बे लक् स्य्हेङ्बल ङचे तेएनो अयङ्। होत्तज्यीम् थेत कोर्रचे ग्यङ्ज्यीम् पीत्लास्ये मुब।” 23तर म्हीमाचे केत् ङ्हच्छ्यङ् तेत्ज्यीम् क्रीङ्ज्यीम् पङ्ज्यी, “येसुत क्रुस्री च्योनोथोब!” चोलेनो थेङ्यीमा क्रीङ्ज्यीम् डाज्यी। 24होत्तज्यीम् पीलातस्चे येसुत म्हीमाचे पङ्ब र्हङ्लेनो स्य्हेङ्पुङ्ज्यी। 25ओसेम् म्हीमाचे पीत्लागो पङ्बे बारब्बाचेम् रोमी सकारकी बीरोद्री अज्यबे लक् स्य्हेङ्बतेङ् म्ही सेत्पल मुबल। थेत पीलातस्चे जेल्न्हङ्से पीत्लाज्यी। तर येसुतमी म्हीमाचे पङ्ब र्हङ्लेनो थेङ्यीमाइ यारी सोप्तीपीन्ज्यी।
येसुत क्रुस्री च्योलाबल
(मत्ती २७:३२-४४; मर्कुस् १५:२१-३२; युहन्न १९:१७-२७)
26ओसेम् स्यीपाइमाचे येसुत बोर्टीमम् कुरेनी नम्सइ सीमोन् पङ्बे म्हीत खतु तज्यी। स्यीपाइमाचे थेत चुङ्ज्यीम् क्रुस् नापुङ्ज्यी, ओसेम् नाज्यीम् येसुइ लीप्-लीप् ब्रपुङ्ज्यी। 27ओसेम् य्हक्को म्हीमा येसुइ लीप्-लीप् ङ्यीज्यी। हुजुमा न्हङ्री कुत्तो र्हब्ज्यीम् क्राबे अमकोलमाएनो मुबल। 28येसुचे थेङ्यीमा पट्टीचे दोःज्यीम् सुङ्जेत्ज्यी, “यरुस्लेम्की जमेमा ङइ लागीरी थक्राको। तर एङ्यीमा र्हङ्की लागीरी ओसेम् र्हङ्की कोलमाइ लागीरी क्राको! 29तलेपङ्सम् चोतेबे दीन्एनो खस्ये मुब, म्हीमाचे, ‘कोल अन्हबे अमकोलमातेङ् ङ्य्हे ख्वाअतोबे अमकोलमा पर्मेस्वर् ग्यम्चे मोलम् यङ्बलमा य्हीन्ब’ बी पङ्स्ये मुब। 30हुजु बेलोरी म्हीमाचे पङ्स्ये मुब ङ्हच्छ्यङ् गङ्मा ‘ङ्यीमा जोरी फुप्युउ’ ओसेम् ज्यीद गङ्मा ‘ङ्यीमात गबो।’#होसे १०:८ 31तलेपङ्सम् दोङ्बो पीङ् मुबे बेलोरीनो चोतेब स्य्हेङ्ब पङ्सम् दोङ्बो खर्सम् ता लल?”
32थेङ्यीमाचे अज्यबे लक् स्य्हेङ्बे म्ही ङ्य्हीतेएनो थेङ्तेङ् बक्च्या सेत्परी बोर्ज्यी। 33थेङ्यीमा खप्पर् पङ्बे ग्लारी#२३:३३ खप्पर् पङ्बे ग्ला- म्ही क्रइ खप्पर् रहङ्ब म्रङ्बल तज्यीम् हुजु ग्लात खप्पर् पङ्बल य्हीन्ब। हुजुरी रोमीमाचे अपराधीमात क्रुस्री च्योलाब मुबल। दोखज्यी। हुजुरी थेङ्यीमाचे येसुत क्रुस्री ठोक्ज्यीम् च्योलाज्यी। ओसेम् अज्यबे लक् स्य्हेङ्बे म्ही ङ्य्हीतेएनो गीत थेङ्की केत्पट्टीचे गीत थेङ्की ल्होम्पट्टीचे क्रुस्री च्योलाज्यी। 34ओसेम् येसुचे सुङ्ज्यी, “अप! थेङ्यीमात क्षमा न्हङ्जेतो। तलेपङ्सम् थेङ्यीमाचे ता स्य्हेङ्टीब बी थेङ्यीमाचे स्येःबल अरे।” ओसेम् स्यीपाइमाचे थेङ्की न्हम्ज चीठ्ठ युःज्यीम् जुज्यी। 35म्हीमा रप्ज्यीम् च्याटीब मुबल। तर यहुदी अगुवामाचे थेङ्त ङोःज्यीम्, “थेचे ल्हो-ल्होत थर्नलज्यी। थे पर्मेस्वर्चे दम्जेत्पे मुक्ती न्हङ्बे ख्रीस्ट् य्हीन्सम् र्हङ्चे र्हङ्त थर्न लखइ” बी पङ्ज्यी।
36ओसेम् स्यीपाइमाचेएनो थेङ्त अङ्गुर्की क्युङ्बे नीङ्गु ख्वाज्यीम् ङोःज्यी। 37थेङ्यीमाचे, “ए यहुदीमाकी ग्यल्बो य्हीन्सम् र्हङ्चे र्हङ्तनो थर्नलोउ” बी पङ्ज्यी। 38थेङ्की क्रइ जोरी “चु यहुदीमाकी ग्यल्बो य्हीन्ब” बी दोस् ङोन्बे तम् ब्रीज्यीम् थेन्बल मुबल। 39अज्यबे लक् स्य्हेङ्ज्यीम् च्योलाबल ङ्य्ही न्हङ्री गीचे थेङ्त ङोःज्यीम्, “ए मुक्ती पीन्बे ख्रीस्ट् अय्हीनो स्यीम? य्हीन्ब पङ्सम् र्हङ्चे र्हङ्त थर्नलोउ। ओसेम् ङ्यीङ्य्हीतेएनो थर्नलोउ!” बी पङ्ज्यी। 40तर अज्यबे लक् स्य्हेङ्बे गीबचे थेत बराज्यीम् पङ्ज्यी, “ए पर्मेस्वर्तेङ्एनो लोङ्ब अख? थेङ्चे यङ्ब र्हङ्बे सजाय एचेएनो यङ्बल मुब। 41ङ्य्हङ् ङ्य्हीचेमी अज्यबे लक् स्य्हेङ्बल तज्यीम् चोतेबे सजाय यङ्थोस्येनो मुबल। तर थेङ्चेमी अतबे लक् तेएनो स्य्हेङ्जेत्बल अरे।” 42ओसेम् थेचे येसुत, “येसु, थेङ् र्हङ्की य्हुल्री दोःबतेङ् ङतेएनो व्हल् लजेतो” बी पङ्ज्यी। 43येसुचे थेत, “ङ एत देमेन्नो पङ्ब, तीङ्यीनो ए ङतेङ् बक्च्य स्वर्गरी तस्ये मुब” बी सुङ्ज्यी।
येसु स्यीबल
(मत्ती २७:४५-५६; मर्कुस् १५:३३-४१; युहन्न १९:२८-३०)
44दीन् गुङ् तयम्ब य्हङ्से प्रोः बेलो सम्मा य्हुल्की जम्म ग्लारी म्हुन्दुङ् तज्यी। 45दीनीइ य्हल् म्हज्यी। ओसेम् पर्मेस्वर्त तेन्बे दीम्न्हङ् च्योबे र्हीङ्बे येन्#प्रस्थान् २६:३१-३३ गुङ्री जोय्हङ्से दुङ् सम्मा डेःय्हर्ज्यीम् ङ्य्ही तज्यी। 46ओसेम् येसुचे केत् ङ्हच्छ्यङ् तेत्ज्यीम् सुङ्ज्यी, “अप, ङ ङइ आत्मा थेङ्की फ्यारी सोप्तीब!”#भजन्सङ्ग्रह ३१:५ चोदे सुङ्ब बीसेम् थेङ्की बुः य्हर्ज्यी।
47चोतेब तब म्रङ्ज्यीम् स्यीपाइमाकी कप्तान्चे पर्मेस्वर्त तोप्ज्यीम्, “चु म्ही देमेन्नो धर्मी मुबल टीम्” बी पङ्ज्यी। 48हुजुरी च्याबरी र्हुब् तबे म्हीमाचे चोतेब तबल म्रङ्ज्यीम् कुत्तो र्हब्ज्यीम् क्राज्यीम् दीम्री दोःय्हर्ज्यी। 49तर थेङ्की लीप्-लीप् गालील्चे खबे अमकोलमातेङ् येसुत स्येःबलमा जम्मनो चेक्पजकी थारीङ् रप्ज्यीम् हुजुरी तबे तम्मा च्याटीब मुबल।
येसुत दुर्सरी थेन्बल
(मत्ती २७:५७-६१; मर्कुस् १५:४२-४७; युहन्न १९:३८-४२)
50-51हुजुरी यहुदीया प्रदेस्की ज्यीद सहर् अरीमाथीयाचे खबे योसेफ् पङ्बे म्ही गी मुबल। थे ज्यबतेङ् धर्मी ओसेम् यहुदीमाकी सभाकी सदस्य मुबल। थे पर्मेस्वर्की य्हुल्त ब्रेन्टीबल मुबल। सभाकी म्हीमाचे येसुत सेत्परी सल्लह स्य्हेङ्बे बेलोरी थे थेङ्यीमातेङ् अडीः। 52थे पीलातस्ज ङ्यीज्यीम् येसुइ ल्हीः र्हीत्ज्यी। 53हुजु लीप्चे थेचे येसुइ ल्हीःत क्रुस् ग्यम्से प्लोक्ज्यीम् सुतीइ येन्चे तुन्ज्यी, ओसेम् युङ्बरी ठाज्यीम् स्य्हेङ्बे दुर्सरी थेन्ज्यी। हुजु दुर्सरी ङोन्ग्यम् खलेएनो स्यीबे म्ही थेन्बल अरेबल। 54हुजु दीन् सुक्रबार् मुबल। ओसेम् दुःब न्हबे दीन् खयम्बल मुबल। 55गालील्चे येसुइ लीप्-लीप् खबे अमकोलमाएनो योसेफ्की लीप्-लीप् ङ्यीज्यी। ओसेम् येसुइ ल्हीःत दुर्सरी थेन्बल च्याज्यी। 56हुजु लीप्चे अमकोलमा दीम्री दोःय्हर्ज्यीम् येसुइ ल्हीःरी फोर्पीन्बरी य्हक्को ङोर्थङ् खबे छ्युकुतेङ् अत्तर् टोप् लज्यी। ओसेम् मोसाचे ब्रीबे पर्मेस्वर्की नीयम् र्हङ्लेनो दुःब न्हबे दीन्री दुःब न्हज्यी।
Currently Selected:
लुका 23: WTDG
Highlight
Share
Copy
Want to have your highlights saved across all your devices? Sign up or sign in
© 2025 by Mother Tongue Translators Society, Nepal Bible Society
and Wycliffe Bible Translators, Inc.