युहन्न 2
2
काना पङ्बे ग्लारी तबे भ्या
1ङ्य्हीरेत् लीप्चे गालील् प्रदेस्की काना पङ्बे ज्यीद सहर्री भ्या मुबल। येसुइ अम हुजुरी मुबल। 2ओसेम् येसुतेङ् थेङ्की डबमातेएनो हुजु भ्यारी ङ्होत्पल मुबल।
3भ्यारी अङ्गुर्की नीङ्गु बेब बीसेम् थेङ्की अमचे थेङ्त पङ्ज्यी, “अङ्गुर्की नीङ्गुम् बेनेम्।” 4ओसेम् येसुचे जोहप् न्हङ्ज्यी, “अम, ङचे ता स्य्हेङ्थोब बी थसुङो, तलेपङ्सम् दवम् लक् स्य्हेङ्बरी ङइ बेलो खबल अरे।” 5ओसेम् येसुइ अमचे योक्पोमात, “एङ्यीमाचे येसुचे पङ्ब र्हङ्ले स्य्हेङो” बी पङ्ज्यी।
6हुजुरी युङ्ब ठाज्यीम् स्य्हेङ्बे फुम्बुमा डुः मुबल। हुजुमारी सय लीटर्ते यी वङ्ब मुबल। हुजु फुम्बुमा यहुदीमाचे सुद्द स्य्हेङ्बे लक्री कोल्ब मुबल। 7येसुचे योक्पोमात सुङ्ज्यी, “चु जम्मनो फुम्बुमा यीचे प्लीङ्न लउ।” थेङ्यीमाचे हुजु फुम्बुमा जम्मइ सुङ् सम्मनो यीचे प्लीङ्न लज्यी।
8ओसेम् थेङ्चे थेङ्यीमात, “चु चेक् बोर्ज्यीम् डोन्की मुग्यत म्य्हङ्पुङो” बी सुङ्ज्यी। थेङ्यीमाचे बोर्ज्यीम् मुग्यत पीन्ज्यी। 9मुग्यचे हुजु यी म्य्हङ्मम् अङ्गुर्की नीङ्गु तज्यीन्बल मुबल। हुजु नीङ्गु खनचे बबल बी थेचे स्येःबल अरेबल। (हुजुम् नीङ्गु बबे योक्पोमाचेकीनो स्येःब मुबल।) ओसेम् डोन्की मुग्यचे दुलहत ङ्होत्ज्यी, 10ओसेम् पङ्ज्यी “ल्हो-ल्होमाचेम् ङोन्ग्यम् अङ्गुर्की य्हक्को रोङ्बे नीङ्गु पीन्ब, ओसेम् डोम्बोमाचे नीङ्गु य्हक्को थुङ्ज्यीम् ङ्य्हेःब बीसेम् अङ्गुर्की अरोङ्बे नीङ्गु पीन्ब। तर एचेम् देरेसम्म य्हक्को रोङ्बे नीङ्गु थेन्बल टीम्।”
11येसुचे गालील् प्रदेस्की काना पङ्बे सहर्री स्य्हेङ्जेत्पे चु तेःङेन्की लक् गोदोब्न्हङ् ङोन्ग्यम् स्य्हेङ्जेत्पल मुबल। चोले थेङ्चे र्हङ्की महीमा ङोन्जेत्ज्यी, ओसेम् थेङ्की डबमाचे थेङ्त बीस्वास् लज्यी। 12हुजुलीप्चे येसु र्हङ्की अमतेङ् अलेमा ओसेम् डबमातेङ् बक्च्य कफर्नहुम् सहर्री स्येःजेत्ज्यीम् तोव दीन्सम्म हुजुरीनो स्य्हुःजेत्ज्यी।
येसुचे पर्मेस्वर्की दीम्री छोङ् स्य्हेङ्बलमात ल्हब्लाजेत्पल
(मत्ती २१:१२-१३; मर्कुस् ११:१५-१७; लुका १९:४५-४६)
13यहुदीमाकी नीस्तार् पर्बइ बेलो खय्हम्बल मुबल। ओसेम् येसु यरुस्लेम्री स्येःजेत्ज्यी। 14थेङ्चे हुजुरी पर्मेस्वर्की दीम्री म्हीमाचे म्हे-ग्लब्तेङ् ग्युःमा ओसेम् परेवामा छोङ् लटीबल म्रङ्जेत्ज्यी। ओसेम् टेबल्मारी टीज्यीम् टङ देब्टीबलमातेएनो म्रङ्जेत्ज्यी। 15होत्तज्यीम् येसुचे छोःतचे कोर्र गी स्य्हेङ्जेत्ज्यीम् हुजुरी मुबे सेम्ज्येन्मातेङ् ग्युःमा जम्मतनो पर्मेस्वर्की दीम् ग्यम्से ल्हब्लजेत्ज्यी। ओसेम् टङ देब्टीपलमाकी टङमा ठम्लाजेत्ज्यीम् टेबल्मा दोलाजेत्ज्यी। 16ओसेम् थेङ्चे परेवा चुङ्बलमात बराज्यीम्, “एङ्यीमाकी चु जम्मनो स्हेःमा बोरो, ङइ अपइ दीम्त छोङ् लबे ग्ला थस्य्हेङो!” बी सुङ्ज्यी।
17ओसेम् थेङ्की डबमाचे धर्म छ्येःरी ब्रीबे चु तम् व्हल् लज्यी, “ङइ म्होइबचे थेङ्की दीम्की लागीरी ङइ सेम् य्हक्को क्रोब।”#भजन्सङ्ग्रह ६९:९
18हुजु लीप्चे यहुदी अगुवामा खज्यीम् पङ्ज्यी, “थेङ्तेङ् चोतेबे लक् स्य्हेङ्बे अधीकार् मुब बी ङ्यीमात तेःङेन्की लक्की चीनो ङोन्जेत्प खम्ब?” 19येसुचे थेङ्यीमात जोहप् न्हङ्ज्यी, “चु पर्मेस्वर्की दीम्त स्हीःलागो, ओसेम् ङचे सोम्रेत्री देबेएनो स्य्हेङ्स्ये मुब।” 20थेङ्यीमाचे पङ्ज्यी, “चु दीम् स्य्हेङ्बरी ल्हेगोर् सोम् स्यी च्यीतीङ् गेःबल मुबल। थेङ्चे सोम्रेत्रीनो स्य्हेङ्ब खम्ब स्यीम्?”
21तर येसुचे सुङ्जेत्पे पर्मेस्वर्की दीम्मी थेङ्की र्हङ्की ल्हीः मुबल। 22येसु स्यीब ग्यम्से सोजेत्प बीसेम् थेङ्की डबमाचे थेङ्चे सुङ्बे चु तम्त व्हल् लज्यी। ओसेम् थेङ्यीमाचे धर्म छ्येःतेङ् येसुचे सुङ्बे फ्रोइत बीस्वास् लज्यी।
23नीस्तार् पर्बइ बेलोरी येसु यरुस्लेम्री मुबल। हुजुरी मुबे बेलोरी थेङ्चे स्य्हेङ्बे तेःङेन्की लक्मा म्रङ्ज्यीम् य्हक्को म्हीमाचे थेङ्की छेन्री बीस्वास् स्य्हेङ्ज्यी। 24तर येसुचे र्हङ्चेम् थेङ्यीमाकी भर् लअजेत्, तलेपङ्सम् थेङ्चे जम्मनो म्हीमात ज्यनले खेम्जेत्पल मुबल। 25थेङ्चे म्हीमाकी सेम्न्हङ्की तम्मा खेम्जेत्पल तज्यीम् खल्चेएनो थेङ्त खलइ बारेरीएनो स्येत्अथोब मुबल।
Currently Selected:
युहन्न 2: WTDG
Highlight
Share
Copy
Want to have your highlights saved across all your devices? Sign up or sign in
© 2025 by Mother Tongue Translators Society, Nepal Bible Society
and Wycliffe Bible Translators, Inc.