Lúkási 6
6
Leghʉ Yɛɛ́so ánɛ aleʼé aswite
(Mat 12.1-8; Mlk 2.23-28)
1Á lɛ amɔ̄ʼ aleʼé aswite, Yɛɛ́so pɔ́ nnɔ yí é nɔŋ ntɔ́kɔ á ntē ŋkāʼ mmɔʼ ntií ŋgesáŋ, nnɔ yí é pwɔ́ʼ mmɔʼ, éshʉ́ʼne á mbū pɔ́p, ḿpfɛ́t. 2Emɔ̄ʼ epuɔ Falísia é jʉ́ɔ, ńzɛ́tte á wɔ́p ŋ́gɛ: «Akɔ̄ azi pɛ ghʉɛ aleʼé aswite lá a? Pɛ é si ŋghʉ̄ɛ azō, lepé tsímpɛ é piŋ nnɔ̄ŋ te mvéŋɛ épúp ɔ́. » 3Yɛɛ́so á pwɛt ndé ŋ́gɛ: «Pɛ laá nzi mbū ńtɔ́ŋ á ntē aŋwaʼne Ndém, tɛ njúʼ anu zīi, nzi e le záŋ á Efɔ Ndavít pɔ́ a epuɔ pí, á ghʉ ɛ́ lɛ̄? 4A le kó á ntē ntap mbotɛ́, á ajʉʼ zīi mɛ́ nɔŋɔ etsō Ndém éwú, ḿbɛ́ ecū mīi mɛ́ nnɔ̄ŋ á mvhɔ Ndém, ḿpfɛ́t, ńzéŋ ŋgyá etsi epuɔ pí, tɛ́ lepé é nɔŋ nzɛ́ttɛ ŋ́gɛ wɔ nɔŋ‑epɔʼ ndaʼ mé gɔ epfɛ́t. » 5Yɛɛ́so á zéŋ ndé á mbū pɔ́p ŋ́gɛ: «Méŋ‑Ŋiŋnɔŋ mé pɔŋteé á leshūŋ ajū mīi, mɛ́ gɔ eghʉ̄ʉ, ánɛ aleʼé aswite. »
Yɛɛ́so a á ega mbɛ́tɛ á ŋiŋ aleʼé aswite
(Mat 12.9-14; Mlk 3.1-6)
6Á le zéŋ ŋgɔ́ amɔ̄ʼ aleʼé aswite, Yɛɛ́so á gʉɔ ŋkó á ntē mmɔʼ ŋgyā aswiŋte, ńnɔŋ nzíʼnɛ epuɔ, mmɔʼ ŋiŋ á gɔ́ éwú, mbɔ apū ete zí á lē ŋkwhʉ́. 7Epuɔ Falísia pɔ́ a wɔ kɛ́ʼte‑mbé Ndém, pɔ́ nɔŋ efāʼa ajū mīi, pɔ́ e zápa éwú tɛ́ etshí anu á athū Yɛɛ́so. Ḿbápne á yí ŋ́gɛ, a elɛ ŋghʉ̄, ŋiŋ á tē ayáʼa aleʼé aswite, mɛ́ zhɛ́ ŋ́gɛ, a á kó á mbū. 8Táʼ, Yɛɛ́so á lɛ nzhɛ́ anu zīi, pɔ́ é kwaŋte á ntɔ̄ŋ pɔ́p, ńdé á mbū ŋiŋ yīi, apū zí á lē ŋkwhʉ́ lā ŋ́gɛ: «Lu á esī ntshí á ajʉʼ, á mvhɔ epuɔ. » Á lu á esī ŋgʉɔ ntshí éwú. 9Yɛɛ́so á piŋ ndé á mbū epuɔ mɛ́t ŋ́gɛ: «Pɛ eshúŋ á gá, lepé tsímpɛ é veéŋ ŋ́gɛ, mɛ́ eghʉ̄ anu mbɔŋ aleʼé aswite, kɛ á azi tepɔŋ ŋ̄? Ŋ́gɛ mɛ́ eghʉ̄ ŋiŋ a etē, kɛ mɛ́ ecʉ́ʼ a ekwhʉ́ ʉ́?» 10Yɛɛ́so á cʉ awíɛ awíɛ á ndo eshhʉ̄ yí, ḿbiŋ ndé á mbū ŋiŋ yīi, apū zí á lē ŋkwhʉ́ lā ŋ́gɛ: «Seŋte apū jú. » Á seŋte, apū zí á lɛ mbīŋ. 11Ntɔ̄ŋ wɔ́p é fuʼ, pɔ́ zi á lesap á tsetsɛlɛ pɔ́p afʉʼ mɛ́t, páʼ pɔ́ e piŋ eghʉ épúp, tɛ́ ekuʼ ánɛ yí.
Yɛɛ́so a á ega ntsɔ́ʼɔ meziŋ‑ntō pí ntsɔp pīa mé legēm
(Mat 10.1-4; Mlk 3.13-19)
12Á lɛ ánɛ meleʼé mɛ́t, Yɛɛ́so á pe mé ndo lekwɛ̄t á eswíŋte Ndém, ńdáʼ éwú eswíŋtɛ á yí. 13Njhʉ̄ é lá, á pú ncúʼte epuɔ pīi, é le nɔ̄ŋ nzhɛnɛ á yí á lezēŋ yí, ńtsɔ́ʼ emɔ̄ʼ éwú ntsɔp pīa mé legēm, ńtɔ́ŋ á wɔ́p lɛ, meziŋ‑ntō pí. 14Nzēŋ mɔ́p é gɔ́ lɛ: Simɔŋ, Yɛɛ́so á zéŋ ntswhī á yí lɛ Piɛ, pɔ́ ntsiʼnzem yi Aŋdlɛya, ŋ́ghʉ̄ á Jáak, Jáaŋ, Fílíio mbɔɔ Baatelemi. 15Matío pɔ́ Tomási, Jáak méŋ Alfɛ, ŋ́ghʉ̄ á Simɔŋ éyi mɛ́ lɛɛ́ ntɔ́ŋɔ á yí lɛ Nzɔŋɔ‑alāʼ. 16Yúdas méŋ Jáak pɔ́ Yúdas Iskaliɔt, á ŋiŋ yīi a le shʉ̄ʼ njhʉ́ mezoʼ Yɛɛ́so.
Yɛɛ́so a á ega ntékɛ alāʼ, ńzéŋɛ ŋghʉ̄ɛ, megɔ é tʉɛ
(Mat 4.23-25)
17Yɛɛ́so pɔ́ a pɔ́p é fhó á ndo lekwɛ̄t, ésóʼo ŋkó á ajʉʼ apepɔ, pɔ́ a mmɔʼ mía nnɔ epuɔ pí, é pote éwú, mbɔɔ amɔ̄ʼ atʉtʉ epuɔ tɛ nzáne pīi, pɔ́ efhó á Yelósalɛm pɔ́ mekap alāʼ mīi, é ntē ŋgɔŋ Yudéa ntsem, ńzéŋ efhó á ŋgɔŋ Tíi pɔ́ ŋgɔŋ Sidɔŋ, é mīi é akʉŋɛ́ mía ntshi, éshʉ̄ʼ á njúʼ ntekné Yɛɛ́so, a ekó ŋghʉ̄, egɔ tsɔ́p e emī. 18Epuɔ pīi mesī e le nɔ̄ŋ ŋgenɛ á wɔ́p, pɔ́ nɔŋ eshʉ̄ʼɛ azɔ́p, á púu ŋghʉ̄ɛ pɔ́ tʉɛ. 19Epuɔ metsem é le nɔ̄ŋ efāʼa á lepfeŋ á yí, melaʼ mīi, mmɔʼ mbʉʼ e le nɔ̄ŋ ntúɔ́ ánɛ yí, ŋ́ghʉ̄ɛ, ŋiŋ yīi a á pfeŋ á yí, á tʉɛ.
Eshhʉ̄ mbɔŋ pɔ́ eshhʉ̄ tepɔŋ
(Mat 5.1-12)
20Yɛɛ́so á náŋ tɛ mbʉ́ʼɛ menēk mí, ńtshí ánɛ nnɔ yí, ńdé á mbū pɔ́p ŋ́gɛ:
«Eshhʉ̄ mbɔŋ a á wɛ́ wɔ te kuʼ ánɛ azō, melaʼ mīi,
pɛ é ndáʼ nzī á lejūʼ á mbɔŋɔ́ á ntē Lefɔ Ndém.
21Eshhʉ̄ mbɔŋ a á wɛ́ pīi, nzi é si nzáŋa á wɛ́ tsetsɔŋɔ,
melaʼ mīi, pɛ e shʉʼ ejhʉ́ etsō páʼ pɛ é kɔŋ.
Eshhʉ̄ mbɔŋ a á wɛ́ pīi, pɛ é tsetsɔŋɔ ndāa,
melaʼ mīi, pɛ e shʉʼ ezwi tɛ ekʉɔ́ʼte.
22«Epuɔ é nɔŋ mbāa á wɛ́ mélaʼ Méŋ‑Ŋiŋnɔŋ wuɔ, ńnɔ̄ŋ ŋkʉ̄ŋnɛ á wɛ́, ńnɔ̄ŋ eshúŋnɛ tépɔŋ ánɛ pɛ, ńnɔ̄ŋ nzɔ̄tɛ á wɛ́, mbɔ pɛ é meshhʉ̄ mbɔŋ. 23Á shʉʼɛ ŋgɔ́ épúp, pɛ enáŋ mé lekāk, ŋ́gáŋte melaʼ mīi, Ndém a le féŋ á mía mía ntaŋá á mbū pɛ, á athʉ́ lephū. Pɛ ekímte páʼ memɔʼɔ́ epuɔ puɔ mɛ́t, é lɛ efʉʼ mvhɔ, ńdʉɔ́ʼ metswi‑ŋke Ndém épúp.
24«Ḿbiŋ ŋgɔ́ á mbū pɛ megaŋ azō, pɛ é wɔ eshhʉ̄ mbekɛ́,
melaʼ mīi, pɛ é ndáʼ ŋgwɛ̄
etsɛ́ lepɔŋ tsetsɔŋɔ tɛ é kuʼ.
25Eshhʉ̄ tepɔŋ a á wɛ́ pīi, pɛ é tsetsɔŋɔ wuɔ, ḿpfɛ́tɛ nzwɛ́tɛ,
melaʼ mīi, nzi e shʉʼ
ezáŋ á wɛ́.
Eshhʉ̄ tepɔŋ a á wɛ́ pīi, pɛ é tsetsɔŋɔ wuɔ,
ńnáŋa mé lezwi,
melaʼ mīi, pɛ e shʉʼ ezém mbū, énáŋ mé lela.
26«Epuɔ é nɔŋ ŋgūʼtɛ á wɛ́ efʉʼ metsem, ŋ́gɛ pɛ é ghʉ á mbɔŋɔ́, mbɔ pɛ é wɔ eshhʉ̄ tepɔŋ. Á páʼa nzéŋ ndɔk ŋ́gɔ́ páʼ, memɔʼɔ́ epuɔ mɛ́t, é lɛ afʉʼ mvhɔ, ŋ́gūʼtɛ epuɔ pīi pɔ́ lɛ si ŋgē egɛ, pɔ́ é metswi‑ŋke Ndém, ńdɔkɔ ntáŋa mela.
Epuɔ menɔŋ e ewɛ̄ ŋkɔŋne, mbɔɔ á mbū megaŋ mbo
(Mat 5.38-48; 7.12)
27«Tɛ́ meŋ ké eshúŋɔ á wɛ́, pɛ pīi pɛ júʼɔ ntekné zá. Pɛ ekɔ̄ŋ megaŋ mbo pɛ́, ŋ́ghʉ̄ anu mbɔŋ á mbū epuɔ pīi, pɔ́ é si efāʼa á lewhʉ̄ wɛ. 28Pɛ elɔ́ ŋ́gɛ, Ndém a enéŋ mbwɛ́né á athū epuɔ pīi, pɔ́ é si nnéŋɛ ndɔ á athū pɛ. Ḿbiŋ eswíŋte ŋ́gɛ, Ndém a etsá mezeŋɛ epuɔ pīi, pɔ́ yáa á wɛ́ ŋgʉɔ̄ʼ. 29Ŋiŋ a témɛ apū á letuúŋ wu, o ezéŋ mbēkne mmɔ̄ʼ ŋkɔʼɔ́, ŋ́gyá á mbū yí ŋ́gɛ, a epú mmakne ntém. Ŋiŋ a gɔɔ á wú, ŋ́kú nzhó efwɔ̄k ju, o epú ncʉ́ʼ, á zéŋ mmākne ezi ntē éwú, ńtswí. 30Mbɔɔ awɔ́ lɛ́, a lɔ́ɔ á ŋiŋ azō, ŋgaŋ á yá á yí. Ŋiŋ a piŋɛ ndɔ̄k ete tɛ́ ŋgɔ̄ ajūɔ ŋiŋ ŋkú, ŋgaŋ á tshi nnéŋ á mbū yí. 31Pɛ nɔŋ ŋghʉ̄ɛ azō á mbū epuɔ, á gɔ́ azi mɛ́ ghʉɛ á mbū pɛ, á pɔŋ á wɛ́. 32Pɛ nɔŋ ŋkɔ̄ŋɔ áa ndaʼ epuɔ pīi, pɔ́ é si ŋkɔ̄ŋɔ á wɛ́, mbɔ pɛ é tswhi ŋghʉ̄ akɔ̄ zīi, mɛ́ gɔ elɔ̄ɔk ŋgūʼte á wɛ́ ɛ́? Epuɔ pīi pɛ ŋyaŋnɛ á wɔ́p ŋ́gɛ epuɔ tepɔŋ, é té zéŋ ŋghʉ̄ azɔ́p áa épúp ɔ́ kɛ? Pɔ́ kɔɔ̄ŋ azɔ́p áa epuɔ pīi, é si ŋkɔ̄ŋɔ á wɔ́p. 33Pɛ́ nɔŋɔ ŋghʉ̄ɛ anu mbɔŋ áa mbū epuɔ pīi, pɔ́ é si ŋghʉ̄ɛ á mbū pɛ, mbɔ pɛ é tswhi ŋghʉ̄ akɔ̄ zīi, mɛ́ gɔ elɔ̄ɔk ŋgūʼte á wɛ́ ɛ́? Tɔ́ŋ ŋ́gɛ epuɔ pīi, pɛ ŋyaŋnɛ á wɔ́p, ŋ́gɛ epuɔ tepɔŋ, é zéŋ ŋghʉ̄ azɔ́p áa épúp. 34Pɛ nɔŋɔ efūu azō áa mbū epuɔ pīi, pɔ́ e shʉʼ ezéŋ etsɔ́ʼe, mbɔ pɛ é tswhi ŋghʉ̄ akɔ̄ zīi, mɛ́ gɔ elɔ̄ɔk ŋgūʼte á wɛ́ ɛ́? Epuɔ pīi pɛ ŋyaŋnɛ á wɔ́p ŋ́gɛ, epuɔ tepɔŋ, é zéŋ nnɔŋ efūu azō áa mbū nnɔ wɔ́p, ŋ́gɛ pɔ́ eshʉʼ nzéŋ ńtsɔ́ʼ ajūɔ azɔ́p ŋgyá. 35Á gɔ́ áa lɛ, pɛ ekɔ̄ŋ megaŋ mbo pɛ́, ŋ́ghʉ̄ anu mbɔŋ á mbū pɔ́p, ḿbiŋ ŋgē efu azō á mbū ŋiŋ, pɛ é le nzwíʼtɛ ŋ́gɛ, a eshʉʼ ntsɔ́ʼ ɔ́. Pɛ ghʉɛ épúp, mbɔ Ndém a a shʉʼ eyá á mía mía ntaŋá á mbū pɛ, pɛ epiŋ eswhí á yí méŋwɛ̄t Ndém Mɔʼɔ́ wɛ yīi, á athʉ́ lephū, melaʼ mīi pɛ é ghʉ azɛ́ ndeŋ ndeŋ páʼ, a gɛ ŋghʉ̄ɛ épúp. A ghʉʉ̄ á mbɔŋɔ́ á mbū epuɔ tepɔŋ páʼā, a te zóko nzwíʼtɛ ŋ́gɛ, pɔ́ esyákne á yí í, 36Pɛ etsá mezeŋɛ epuɔ, ńdeŋ ndeŋ páʼ Mɔʼɔ́ wɛ Ndém, a gɛ ntsáa mezeŋɛ mɛ́ épúp.
Ndɛ́ʼ ŋiŋ á thú alɔ́ʼ ŋiŋ
(Mat 7.1-5)
37«Ndɛ́ʼ ŋiŋ á thú alɔ́ʼ ŋiŋ tɛ mbā á yí, tɛ́ Ndém a eláʼ le azí thú. Ndɛ́ʼ pɛ elé ŋ́gɛ, ŋiŋ a á ŋgaŋ mefa, tɛ́ Ndém a eláʼ le lé ŋ́gɛ, pɛ é azɛ́ megaŋ mefa á. Pɛ elēkne mefa epuɔ, Ndém á epiŋ ndēkne emɛ́. 38Gap ajū mīi o wɛ̄ɛ, á mbū epuɔ, Ndém a epiŋ ŋgyá ajú. A nɔɔ̄ŋ ŋgyáa azō á mbū ŋiŋ, ńnéŋ á ntē apa, ńtsɛ̄t tɛ á ló tɛ ŋgwhʉ̄te á esī. Efʉʼ zīi pɛ lɔkɔ efʉ̄ʼɛ azō tɛ́ ŋgyáa á mbū ŋiŋ, Ndém a a shʉʼ elɔk efʉʼ mɛ́t, tɛ́ lɔk efʉʼ azɛ́. »
39Yɛɛ́so á zéŋ mbɛ́te ashuŋne lepúʼ jʉɔ á mbū pɔ́p ŋ́gɛ: «Afʉʉ́‑menēk á gɔ le amɔ̄ʼ tsaŋ, a fʉʼnɛ épúp, pɔ́ mémpīa é le pú ŋgwhʉ̄ á ntē lephʉ̄ ɛ kɛ? 40Nziʼnɛ afaʼ, a te zhɛ́ afaʼ ntsyā á mɔʼɔ́ afaʼ yi í. Táʼ, ewiɛ́ nziʼnɛ afaʼ lɛ́ yīi, mɛ́ é zíʼne á yí tɛ á zhɛ́, a a shʉʼ eghʉ azí afaʼ páʼ mɔʼɔ́ afaʼ yi lā. 41O gɔ egaá, akem awɛ á fɔ́ne á lezēk wu, o ó le jʉ́ɔ, ḿbiŋ nnɔ̄ŋ njʉ́ɔ lenɔŋ ntsɔʼ tsīi, é kó á lezēk méŋ mɔ́ wu ū? 42Akem awɛ á gɔ efɔ́ne á lezēk wu, tɛ o nɔ̄ŋ le njʉ́ɔ ejʉʼ ɛ́, o epīiŋ ndé á mbū méŋ mɔ́ wu ŋ́gɛ, a ecʉ́ʼ o efók lenɔŋ ntsɔʼ tsīi é lezēk yí i? Ŋgaŋ ŋkɔŋ menēk, zi mvhɔ efók akem awɛ zīi, á lezēk wu lā, tɛ lezēk cú e elíɛ, tɛ́ o epiŋ njʉ́ɔ lenɔŋ ntsɔʼ tsīi é lezēk méŋ mɔ́ wu, éfók.
Athʉ́ pɔ́ ntá zí
(Mat 7.16-20; 12.33-35)
43«Athʉ́ zīi mɛ́ gɛ njhʉ́ɛ, á gɔ le zém ntá zīi mɛ́ gɔ le jhʉ́ ɛ́. Ndeŋ ndeŋ épúp, athʉ́ zīi mɛ́ gɛ te njhʉ́ɛ ɛ́, á gɔ le zém ntá zīi, mɛ́ gɔ ejhʉ́ ɛ́. 44Mɛ́ zhɛɛ́ athʉ́ áa ánɛ ntá zí. Mɛ́ gɛ te ŋkápa á shʉ́shhʉ́ ánɛ athʉ́ menzɔ̄ŋ ɔ́. Ḿbiŋɛ te ŋkápa levho ánɛ athʉ́ mɛfúʼ ɔ́. 45Pɛ gē ezhɛ́ á leghʉ lɛ, ŋiŋ mbɔŋ a wuɔ, ńjʉ́ɔ menu mbɔŋ mīi, é fhó á ntē yí, ńtó á nchu yí. Ḿbiŋ gē ezhɛ́ á légɛ, ŋiŋ tepɔŋ a wuɔ, ńjʉ́ɔ menu tepɔŋ mīi, é fhó á ntē yí, ńtó á nchu yí. Anu zīi á toó á nchu ŋiŋ, mé tswiī ajū mīi, ŋgaŋ a á aziɛ́. »
Ŋiŋ yīi a juúʼ ŋghʉ̄, pɔ́ ŋiŋ yīi a juúʼ a te ghʉ
(Mat 7.24-27)
46Yɛɛ́so á zéŋ ndé ŋ́gɛ: «Pɛ gɛ ntɔ́ŋɔ á gá lɛ, “Ndi Ndi” efʉʼ metsem, ḿbiŋ nnɔ̄ŋ te ŋghʉ̄ɛ ajū mīi, meŋ á si ndʉ́ɛ́, melaʼ akɔ̄? 47Pɛ ecʉ́ʼ meŋ ekɛ́ʼte eshúŋ á wɛ́. Meŋ a tswi á wɛ́ á ŋiŋ yīi, ŋiŋ a shʉʼɛ á mbū meŋ, ńjúʼ ashuŋne zá, ŋ́kó ŋghʉ̄ ndeŋ ndeŋ épúp, á swhí á yí. 48Mbɔ a a swhí mmɔʼ ŋiŋ yīi, a le nɔ̄ŋ ŋgɔ̄ á mbɔ́ ŋgyā zi á legʉ̄ŋ ntshi, ńtúŋ atseŋ tɛ á sɛh, tɛ́ á lɔk metɔ́ ntʉʉ́ ŋkɔ́ʼne á mbɔŋɔ́, tɛ́ mbɔ́ ŋgyā. Ntshi é shʉʼ nnáŋ tɛ ŋkɔ́ʼ, éshʉʼ nnʉ̄ʼ ŋgyā mɛ́t, e te kēmmɛ, melaʼ mīi, mɛ́ le chʉ́ nnɛ̄t ŋkwɛ́t. 49Táʼ, ŋiŋ a júʼɔ meshuŋne má, ḿbiŋ ŋkó te ghʉ̄ páʼ meŋ á si ndʉ́ɛ́ épúp ɔ́, á piŋ eswhí á ŋiŋ yīi, a le nɔ̄ŋ ŋgɔ̄ á ŋkwɛ́t ŋgyā zi á legʉ̄ŋ ntshi, ńdɛ ŋkwɛ́t té túŋ á atseŋ. Ntshi é shʉʼ nnáŋ tɛ ŋkɔ́ʼ, éshʉʼ nnʉ̄ʼ ŋgyā mɛ́t, é kemɛ lɛ wúuu, ḿbwɛ̄t á esī. »
Currently Selected:
Lúkási 6: ybb
Highlight
Share
Copy
Want to have your highlights saved across all your devices? Sign up or sign in
© CABTAL