Jáaŋ 6
6
Yɛɛ́so a á ega nzékɛ atʉtʉ epuɔ
(Mat 14.13-21; Mlk 6.30-44; Lúk 9.10-17)
1Emuɔ menu é tɔ́k, Yɛɛ́so á tó á mía mía ntshi Ŋgaliléa, mɛ́ zéŋ ntɔ́ŋ ntshi mɛ́t lɛ Tibeliade, ŋgʉ̄ɔ mé nzéŋ mmɔʼ, pɔ́ a megaŋ nnɔ pí é gɔ́ nnɔ. 2Nnɔ alāʼ é gɔ́ á nzem nzhɛ̄nɛ á yí, melaʼ mīi, pɔ́ lɛ si njʉ́ɔ meŋkʉʼne menu mīi, a ghʉɛ ánɛ megaŋ agɔ. 3Yɛɛ́so pɔ́ a megaŋ nnɔ pí, é kɔ́ʼ mé mmɔʼ ndo lekwɛ̄t, ńnáŋ éwú á esī. 4Á ge egɔ́ épúp, aleʼé Páska á nɔŋ ŋgɔ̄ á ŋkuʼɔ, ŋ́gɔ́ lekāk epuɔ Yúda. 5Yɛɛ́so á náŋ tɛ mbʉ́ʼɛ menēk, ńjʉ́ɔ, atʉtʉ epuɔ á nɔŋ eshʉ̄ʼɛ mé lezēŋ tsí. Á lé á mbū Fílíio ŋ́gɛ: «Ḿpɛ egɔ ezó mblɛ egɔ́, tɛ́ ndɔk nzék á alāʼ jʉɔ ɔ̄?» 6A le gē elé épúp, ńdɔkɔ nzwíʼɛ á Fílíio, ŋ́gɔ̄ á njʉ́ɔ páʼ a a ghʉ épúp. Yí méŋwɛ̄t é nɔŋ nzhɛ́ɛ páʼ, yí gɔ eghʉ épúp. 7Fílíio á pwɛt á mbū yí ŋ́gɛ: «Mɛ́ zi mbú ndɔ̄k ŋkāp#6.7 Taʼ ndenía e lɛ si ŋgɔ́ ŋkāp, á lelɔk mbɛ́ á taʼ ŋgaŋ afaʼ, ánɛ aleʼé alāʼ afaʼ. ndenía ŋkhʉ pīa, ńzó mblɛ, e é le kūʼ epuɔ puɔ, tɛ ŋgɔ́ yīi, taʼ ŋiŋ a gɔ epfɛ́t á méŋ atsém ɛ́. »
8Mmɔʼ ŋiŋ nnɔ Yɛɛ́so, lezēŋ tsí é gɔ́ lɛ Aŋdlɛya, ŋ́gɔ́ á ŋgik Simɔŋ Piɛ, á lé á mbū Yɛɛ́so ŋ́gɛ: 9«Mmɔʼ mɔ́ mbaŋa a á ega, ŋ́gwɛ̄ mblɛ ntāʼ táa, mɛ́ lɔk á ɔlje tɛ́ ncūŋte, ńzéŋ ŋgwɛ̄ mesōh ntāʼ pīa. E gɔ eké mbīŋ ŋkūʼ akɔ̄, ánɛ atʉtʉ epuɔ jʉɔ ɔ̄?» 10Yɛɛ́so á lé ŋ́gɛ: «Pɛ etswī epuɔ metsem e enáŋte á esī. » Mvēŋ e lɛ á ajʉʼ mɛ́t tɛʼ. Pɔ́ náŋte á esī. Mbaŋa zīi é ŋgɔ́ éwú, é lɛ ajūɔ ntsāʼ táa. 11Yɛɛ́so á lɛ ntswí mblɛ jɔ̄, ésyákne á Ndém éwú, ńtswī mɛ́ gapte á mbū epuɔ pīi, é ŋgɔ́ éwú. Ńzéŋ ŋghʉ̄ ndeŋ ndeŋ épúp, ánɛ mesōh. Ŋ́gyá mé alāʼ, pɔ́ pfɛ́t páʼ pɔ́ kɔŋ. 12Pɔ́ pfɛ́t tɛ nzwɛ́t, Yɛɛ́so á lé á mbū megaŋ nnɔ pí ŋ́gɛ: «Pɛ epú ncúʼte epwɔ̄ʼ tsīi é vuʼɔ, tɛ azō á le pí. » 13Pɔ́ cúʼte epwɔ̄ʼ tsīi, é vuʼɔ ánɛ mblɛ ntāʼ táa zīi, epuɔ é pfɛ́t, é ló metúŋ ntsɔp pīa mé legēm.
14Epuɔ é jʉ́ɔ ŋkʉʼne anu zīi, Yɛɛ́so a á ghʉ, ńdé ŋ́gɛ: «Ŋiŋ wuɔ, a á si ŋgɔ́ á kwaʼ ntswi‑ŋke Ndém. Á ŋiŋ yīi, aŋwaʼne Ndém á le lé ŋ́gɛ, a a fú eshʉʼ á ŋgɔŋ ega. » 15Yɛɛ́so á zhɛ́ á légɛ, epuɔ é si eshʉ̄ʼɛ á ŋgɔɔ̄ á yí, élɔk echʉ́ á efɔ, ńdɛ nzéŋ mbē yíléyī, mé ndo lekwɛ̄t.
Yɛɛ́so a á ega nzīŋɛ á ndo ntshi
(Mat 14.22-33; Mlk 6.45-52)
16Á kó ŋgɔ́ eseéŋ‑njhʉ̄, megaŋ nnɔ Yɛɛ́so é gʉɔ mé akʉŋɛ́ mía ntshi. 17Ŋ́kɔ́ʼ ŋkó á ntē akɛnūʼ, ńnɔŋ ŋgʉ̄ɔ mé tésɔŋ Kafaanawum á nzéŋ mmɔʼ. Mbɔ nzém e é ndáʼ nzī á lesēŋ. Yɛɛ́so á zɛ́t áa te shʉʼ tɛ ntswɛ́tte á wɔ́p. 18Pɔ́ nɔŋ ŋgʉ̄ɔ épúp, mmɔʼ mía mía afēm, á pú ntúʼ á ndo ntshi, tɛ ntshi é kɔ́ʼ menē menē. 19Pɔ́ lɔk akɛnūʼ nzīŋ á ajūɔ mekílo métáa tɛ ŋkó ntokó, ńjʉ́ɔ á Yɛɛ́so, á nɔŋ nzīŋɛ á ndo ntshi, éshʉ̄ʼɛ mé lezēŋ tsɔ́p. Ecɔʼ é pú ŋgɔ̄ á wɔ́p. 20Tɛ́ Yɛɛ́so, á lé á mbū pɔ́p ŋ́gɛ: «Ndɛ́ʼ pɛ ezéŋ mbɔ́k, a gɔ́ áa gá. » 21Pɔ́ nɔŋ efāʼa á lelɔk akɛnūʼ ntswíʼ á yí, ńdɛ njʉ́ɔ mbɔ pɔ́ ndáʼ ŋkó á akʉŋɛ́ ntshi, ájʉʼ zīi, pɔ́ nnɔŋ ŋgʉ̄ɔ mé éwú.
Yɛɛ́so a á si ŋgɔ́ etsō lejhʉ̄ tsīi, é ghʉɛ mɛ́ gɔ́ɔ éwú
22Njhʉ̄ é lá, alāʼ zīi á nzɛ́t á nzéŋ ntshi yīi, nnɔ Yɛɛ́so é ke fhó éwú ŋgʉ̄ɔ, mé ndaʼ akɛnūʼ zīi, á lɛ éwú lā. Pɔ́ nɔŋ nzhɛ́ɛ á légɛ, Yɛɛ́so pɔ́ nnɔ yí mé kaá ŋkó á ntē akɛnūʼ ŋgʉ̄ɔ ɔ́. Ŋ́gɛ nnɔ yí pɔ́plépɔ̄p mé ŋgʉ̄ɔ. 23Táʼ, emɔ̄ʼ mekɛnūʼ, é fhó á tésɔŋ Tibeliade, éshʉ̄ʼ mé lezēŋ tsɔ́p, á ajʉʼ zīi, Yɛɛ́so a ke syakné á Ndém éwú ánɛ mblɛ, ŋ́gyá pɔ́ pfɛ́t lā. 24Alāʼ á jʉ́ɔ páʼ Yɛɛ́so a te zɛ́t éwú ú, megaŋ nnɔ pí é zéŋ te zɛ́t éwú ú, ŋ́kɔ́ʼ ŋkó á ntē mekɛnūʼ, ŋgʉ̄ɔ mé Kafaanawum, á efaāʼ yí. 25Pɔ́ gʉɔ tɛ ŋkó ezi mmɔʼ nzéŋ, ńjʉ́ɔ á yí, ńdé á mbū yí ŋ́gɛ: «Ńziʼnɛ, o ó ŋgʉɔ tɛ ŋgɔ́ ega eséŋɛ́ ɛ́?» 26Á tsɔ́ʼ á mbū pɔ́p ŋ́gɛ: «Kwaʼ anuúnē anuúnē, meŋ shúŋɔ á wɛ́ ŋ́gɛ, é té melaʼ mīi, pɛ é júʼ anu zīi, ŋkʉʼne anu zīi meŋ ke ghʉ̄ʉ̄, e lɔkɔ ndʉ́ɛ́, tɛ́ pɛ efāʼa á gá á. É gɔ́ áa melaʼ mīi, pɛ ke pfɛ́t mblɛ tɛ nzwɛ́t. 27Ndɛ́ʼ pɛ efók mbʉʼ ndɔ̄k ŋghʉ̄ afaʼ zīi, a yá á wɛ́ etsō lejhʉ̄ tsīi, é gɔ epék. Pɛ efók mbʉʼ ndɔ̄k ŋghʉ̄ afaʼ zīi, a yá á wɛ́ áa etsō lejhʉ̄ tsīi, é gɔ le mīi, étsi ŋiŋ a pfɛ́tɛ, á láʼ ntā á lezēŋ Ndém. Ecʉɔ etsō mɛ́t, Méŋ‑Ŋiŋnɔŋ wuɔ mé shʉʼ eyá á mbū pɛ, melaʼ mīi, yí tɛ́ Ndém Mɔʼɔ́, a á si mvéŋɛ a ajū mīi a ghʉɛ. » 28Pɔ́ zɛ́tte á yí ŋ́gɛ: «Pek gɔ eghʉ̄ʉ lɛ akɔ̄, tɛ́ ŋghʉ̄ ajū mīi, Ndém a á si ŋkɔ̄ŋɔ ɔ́?» 29Á tsɔ́ʼ á mbū pɔ́p ŋ́gɛ: «Leghʉ ajū mīi, Ndém a á si ŋkɔ̄ŋɔ, a á si ŋgɔ́ á lefɛ̄ nnɛ̄t ŋgyá mé ŋiŋ yīi, Ndém mɛ́t a ke tó á yí á ŋgɔŋ. » 30Pɔ́ zéŋ nzɛ́tte á yí ŋ́gɛ: «Ŋ́gɔ́ mé wu, mbɔ o o ghʉ eziɛ́ ŋkʉʼne anu, tɛ́ pek ejʉ́ɔ, éfɛ́ nnɛ̄t ŋgyá á mbū wu ū? Ajū mīi o o ghʉ, á si ŋgɔ́ akɔ̄? 31Wɔ maŋgānjʉʼ pék, é le gʉ̄ɔ tɛ ŋkó á késáatswɛt, ḿpfɛ́t á máane#6.31 E si ŋgɔ́ mmɔʼ ntií etsō lejhʉ̄ tsīi, é lɛɛ́ efhɔ́ɔ á lephū á mbū Ndém esóʼo, á lɔkɔ nzékɛ epuɔ Islaɛl á késáatswɛt. Jʉ́ɔ́ Aŋwaʼne Letō 16.13-15, 31.. Púp tɛ́, mɛ́ le tí á ntē aŋwaʼne Ndém ŋ́gɛ: “Ndém a le yá á wɔ́p etsō lejhʉ̄ tsīi, é fhó á lephū esóʼo, pɔ́ pfɛ́t.”» 32Yɛɛ́so á pwɛt á mbū pɔ́p ŋ́gɛ: «Kwaʼ anuúnē anuúnē, meŋ shúŋɔ á wɛ́ ŋ́gɛ, Mɔɔ́sɛ mé lɛ te yá á wɛ́ etsō lejhʉ̄ tsīi, é le fhó á lephū ɔ́. Mɔʼɔ́ ga mé yaá á wɛ́ á kwaʼ etsō lejhʉ̄ tsīi, é fhɔ́ɔ á lephū. 33Etsō lejhʉ̄ tsīi, Ndém a yáa, é si ŋgɔ́ etsi, é fhɔ́ɔ á lephū esóʼo, ŋ́ghʉ̄ɛ mɛ́ kwaʼa ŋgɔ́ɔ éwú.
34Pɔ́ lé á mbū yí ŋ́gɛ: «Ndi, lɛ nnáŋa ŋgyáa etsiɛ́ etsō lejhʉ̄ mɛ́t, á mbū pek efʉʼ metsem. » 35Yɛɛ́so á lé á mbū pɔ́p ŋ́gɛ: «Meŋ mé si ŋgɔ́ etsō lejhʉ̄ tsīi, é ghʉɛ mɛ́ gɔ́ɔ éwú. Ŋiŋ a shʉʼɛ á mbū meŋ, mbɔ nzi e te eláʼ ezéŋ á yí ezáŋ á. Ŋiŋ yīi a á fɛ́ nnɛ̄t ŋgyá á mbū meŋ, nzi ntshi, e é le láʼ nzéŋ á yí nzáŋ á. 36Táʼ, meŋ á shúŋ á wɛ́, pɛ é si njʉ́ɔ á gá, ḿbiŋ ŋké te nɔ̄ŋ efíɛ́ nnɛ̄t ŋgyáa á mbū meŋ ɛ́. 37Epuɔ metsem pīi, Mɔʼɔ́ ga a á yá á mbū meŋ, e shʉʼ eshʉʼ á mbū meŋ. Ŋiŋ a piŋɛ eshʉ̄ʼ á mbū meŋ, mbɔ meŋ gɔ le á yí wáʼ. 38Meŋ ndɛɛ́ efhɔ́ɔ á lephū eshʉ̄ʼɛ á ŋgɔŋ ega, á ŋghʉʉ̄ ajū mīi, ŋiŋ yīi a le tó á gá, a á si ŋkɔ̄ŋɔ. Meŋ ndɛɛ́ te eshʉ̄ʼɛ, á ŋghʉʉ̄ ajū mīi, meŋ méŋwɛ̄t mé si ŋkɔ̄ŋɔ ɔ́. 39Lepiŋ ŋghʉ̄ ajū mīi, ŋiŋ yīi a le tó á gá, a á si ŋkɔ̄ŋɔ, á si ŋgɔ́ á gá á legɔ̄ le cʉ́ʼ, taʼ ŋiŋ ánɛ epuɔ pīi a le yá me meŋ, á pí í. A gɔ́ áa gá á leghʉ, pɔ́ zím ánɛ lewhʉ̄ ánɛ nzoknzem aleʼé. 40Ajū mīi Mɔʼɔ́ ga a á si ŋkɔ̄ŋɔ, a ajʉɔ: ŋiŋ ntsem yīi, a á jʉ́ɔ á gá meŋ Méŋ yi, éfɛ́ nnɛ̄t ŋgyá mé meŋ, a a fú eta á lezēŋ Ndém. Meŋ ndáʼ ánɛ nzoknzem aleʼé, ŋ́ghʉ̄ a ezím ánɛ lewhʉ̄. »
41Yɛɛ́so á shúŋne épúp, epuɔ Yúda é lɛ nzī á lezwɛ̄tte ánɛ yí, melaʼ mīi a á lé ŋ́gɛ, yí é si ŋgɔ́ etsō lejhʉ̄ tsīi, é fhɔ́ɔ á lephū tɛ́ esóʼo. 42Ńzwɛ́tte ndé ŋ́gɛ: «Ŋiŋ wuɔ, a te á Yɛɛ́so méŋ Yosɛ́p ɛ́ lɛ̄? Nɔ́ŋ ŋ́gɛ ḿpɛ é si nzhɛ́ɛ á mɔʼɔ́ yi pɔ́ mɛ́ wɔp. A gɔ epīiŋ ŋgā, ńdé tsetsɔŋɔ ŋ́gɛ, yí fhɔ́ɔ á lephū tɛ́ esóʼo ó?»
43Yɛɛ́so á pwɛt á mbū pɔ́p ŋ́gɛ: «Ndɛ́ʼ pɛ ezéŋ nzwɛ́tte á tsetsɛlɛ pɛ. 44Ŋiŋ a gɔ le shʉ̄ʼ á mbū meŋ, té gɔ́ yīi Mɔʼɔ́ ga, páʼ a le tó á gá, mé tshóne á yí í. Éshʉ̄ʼ épúp, meŋ mbiŋ ndáʼ ánɛ nzoknzem aleʼé, ŋ́ghʉ̄ a ezím ánɛ lewhʉ̄. 45Mɛ́ le tí á ntē aŋwaʼne metswi‑ŋke Ndém ŋ́gɛ: “Ndém a a láʼ ezíʼne epuɔ metsem anu zí.” Tɛ mbɔɔ awɔ́ lɛ́ yīi, a á júʼ ashuŋne zīi, á fhɔ́ɔ á mbū Mɔʼɔ́, ḿvéŋ ajū mīi ashuŋne mɛ́t á zíʼnɛ á yí, ŋgaŋ a shʉʉ̄ʼ á mbū meŋ. 46Ŋiŋ a la Ndém jʉ́ɔ ɔ́. Tɛ ndaʼ ŋiŋ yīi, a fhɔ́ɔ á mbū yí. Ŋgaŋ mé ŋiŋ yīi, a lé jʉ́ɔ á yí. 47Kwaʼ anuúnē anuúnē, meŋ shúŋɔ á wɛ́ ŋ́gɛ, ŋiŋ yīi a á fɛ́ nnɛ̄t ŋgyá mé meŋ, a á ndáʼ nzī á leta á lezēŋ Ndém. 48Meŋ á si ŋgɔ́ etsō lejhʉ̄ tsīi, é ghʉɛ mɛ́ gɔ́ɔ éwú. 49Wɔ maŋgānjʉʼ pɛ́, é le gʉ̄ɔ tɛ ŋkó á késáatswɛt, ḿpfɛ́t á máane, éshʉʼ nzéŋ ŋ́kwʉ́te kwhʉ́te. 50Etsō lejhʉ̄ tsīi, é piŋɛ efhɔ́ɔ á lephū tɛ́ esóʼo, é páʼa ŋgɔ́ yīi, ŋiŋ a pfɛ́tɛ, a á le fú ŋkwhʉ́ ɛ́.
51Meŋ mé si ŋgɔ́ etsō lejhʉ̄ tsīi, é ghʉɛ mɛ́ gɔ́ɔ éwú. Mbɔ é le fhó á lephū tɛ́ esóʼo. Ŋiŋ a pfɛ́tɛ etsō lejhʉ̄ cʉɔ mɛ́t, mbɔ a a fú eta á lezēŋ Ndém. Ecʉɔ etsō lejhʉ̄ mɛ́t tsīi, meŋ a shʉʼ eyá, é si ŋgɔ́ mbap nnɛ̄t za. Éyá, tɛ́ a etsīa épúp, ŋgɔŋ epuɔ metsem e elɔk ŋgɔ́ éwú. »
52Yɛɛ́so á lé páʼa mɛ́t, epuɔ Yúda é zi á lefōk mbʉʼ, ŋ́ŋāk á tsetsɛlɛ pɔ́p ndé ŋ́gɛ: «Ŋiŋ wuɔ a gɔ egaá, ŋ́gyá mbap nnɛ̄t zi ŋ́gɛ, ḿpɛ epfɛ́t é?» 53Yɛɛ́so á lɛ ndé á mbū pɔ́p ŋ́gɛ: «Kwaʼ anuúnē anuúnē, meŋ shúŋɔ á wɛ́ ŋ́gɛ, pɛ gɔ te pfɛ́t mbap nnɛ̄t Méŋ‑Ŋiŋnɔŋ wuɔ ɔ́, ŋ́gɔ́ te nú metshi mí í, mbɔ pɛ te eláʼ egɔ́ éwú ú. 54Ŋiŋ yīi a á pfɛ́t mbap nnɛ̄t za, ńnú metshi má, a á ndáʼ nzī á leta á lezēŋ Ndém, meŋ mbiŋ ndáʼ ánɛ nzoknzem aleʼé, ŋ́ghʉ̄ a ezím ánɛ lewhʉ̄. 55Mbap nnɛ̄t za, e é si ŋgɔ́ á kwaʼ etsō lejhʉ̄. Metshi má é gɔ́ á kwaʼ meluʼ. 56Ŋiŋ a pfɛ́tɛ mbap nnɛ̄t za, ńnú metshi má, mbɔ pek ŋgaŋ é temte, meŋ gɔ́ ánɛ yí, á gɔ́ ánɛ meŋ. 57Mɔʼɔ́ ga a le tó á gá á ŋgɔŋ, yí mé si ŋghʉ̄ɛ, mɛ́ gɔ́ɔ éwú, yí mé zéŋ nnɔ̄ŋ ŋghʉ̄ɛ, meŋ gɔ́ɔ éwú. Ndeŋ ndeŋ épúp, ŋiŋ a pfɛ́tɛ mbap nnɛ̄t za, mbɔ meŋ a shʉʼ eghʉ, ŋgaŋ a egɔ́ éwú. 58Ecʉɔ é páʼa, ŋ́gɔ́ etsō lejhʉ̄ tsīi, é fhɔ́ɔ á lephū tɛ́ esóʼo. É tswhiī ánɛ etsi, wɔ maŋgānjʉʼ pɛ́ é le pfɛ́tē. Pɔ́ le pfɛ́t épúp, éshʉʼ nzéŋ ŋ́kwhʉ́te kwhʉ́te. Ŋiŋ a piŋɛ mpfɛ́t etsō lejhʉ̄ cʉɔ, mbɔ a a fú eta á lezēŋ Ndém. » 59É páʼa ŋgɔ́ menu mīi, Yɛɛ́so a le ziʼné á mbū epuɔ, páʼ a lɛ á ŋgyā aswiŋte á tésɔŋ Kafaanawum.
Awiɛ́ a á ega ŋkāŋa ezi nzhɛ
60 Megaŋ nnɔ Yɛɛ́so tɛ nzá, é júʼ ashuŋne zí, emɔ̄ʼ é lɛ nzī á lelē ŋ́gɛ: «Ashuŋne jʉɔ mɛ́t, á anu ntē tɛʼ. Awɔ́ a gɔ evéŋ á yí á lejūʼ ē?» 61Yɛɛ́so á zhɛ́ á ntē yí á légɛ, megaŋ nnɔ pí é si nzwɛ́ttɛ, ánɛ anu zīi a á shúŋ, ńdé á mbū pɔ́p ŋ́gɛ: «Meŋ á jʉ́ɔ ŋ́gɛ, anu jʉɔ mɛ́t á záŋ á wɛ́, tɛ pɛ te zɛ́t ŋkɔ̄ŋɔ á lefɛ̄ nnɛ̄t ŋgyá mé meŋ ɛ́? 62Tɛ pɛ é ŋgɔ́ péʼe njʉ́ɔ Méŋ‑Ŋiŋnɔŋ wuɔ, á kɔ́ʼ ŋgʉ̄ɔ mé ajʉʼ zīi, a lɛɛ́ nzi ŋgɔ́ éwú, mbɔ pɛ e ghʉ páʼ lā? 63Azwakne Ndém mé si ŋghʉ̄ɛ mɛ́ gɔ́ɔ éwú. Ŋiŋnɔŋ a gɔ le kūʼ á yí á lepū ŋghʉ̄ amɔ̄ʼ azō ɔ́. Meshuŋne mīi meŋ á shúŋ á wɛ́, é fhɔ́ɔ á mbū Azwakne Ndém. Emiɛ́ mé zéŋ nɔŋ ŋghʉ̄ɛ, mɛ́ gɔ́ɔ éwú. 64Táʼ, emɔ̄ʼ epuɔ é tsetsɛlɛ pɛ, ńnɔŋ te mvéŋ ɛ́. » Yɛɛ́so a le nɔ̄ŋ nzhɛ́ɛ tɛ efhó á nzií, épuɔ pīi é te shʉʼ efɛ́ nnɛ̄t eyá á mbū yí í, ńnɔŋ nzhɛ́ɛ á ŋiŋ yīi, a a shʉʼ eswiŋ á yí. 65Yɛɛ́so á zéŋ ndé ŋ́gɛ: «É melaʼ épúp, meŋ ke lé á mbū pɛ ŋ́gɛ, ŋiŋ a gɔ le shʉ̄ʼ á mbū meŋ, té gɔ́ yīi, Mɔʼɔ́ ga mé ghʉ, tɛ́ á shʉʼ ɛ́. »
66Á fhó épúp, lelʉɛ epuɔ pīi, é nnɔŋ nzhɛ̄nɛ á Yɛɛ́so, pɔ́ fhó á nzem yí ntó, pɔ́ té zéŋ ŋkɔ̄ŋ á wɔ́p á legɔ̄ á nzem yí í. 67Yɛɛ́so á zɛ́tte epi emɔ̄ʼ megaŋ nnɔ pí ntsɔp pīa mé legēm ŋ́gɛ: «Ŋ́gɔ́ mé pɛ, pɛ te gʉɔ azɛ́ lɛ̄?» 68Simɔŋ Piɛ á pwɛt á mbū yí ŋ́gɛ: «Mɔʼɔ́ wek, o ó páʼā ŋ́gɛ, pek egʉɔ njʉ́ɔ á awɔ́? O wɛɛ̄ meshuŋne mīi, é ghʉɛ mɛ́ taa á lezēŋ Ndém. 69Ŋ́gɔ́ mé pek, mbɔ pek lē ndáʼ mvéŋ, ńnɔŋ nzhɛ́ɛ á légɛ, o ó ŋiŋ yīi, a fhɔ́ɔ á mbū Ndém. » 70Yɛɛ́so á pwɛt á mbū pɔ́p ŋ́gɛ: «Meŋ mé lɛ te tsɔ́ʼ á wɛ́ pwɔ̄ ntsɔp pīa mé legēm ɛ́ kɛ? Táʼ, taʼ ŋiŋ a ké ŋgɔ́ á tsetsɛlɛ pɛ, ŋ́gɔ́ á Sɛ́ta. 71A lɛɛ́ ndʉ́ɛ́ épúp, ńdʉ́ɛ́ á Yúdas, méŋ Simɔŋ Iskaliɔt. Yí mé lɛ taʼ ŋiŋ, á nnɔ meziŋ‑ntō ntsɔp pīa mé legēm, éyi a le shʉ̄ʼ eswiŋ á Yɛɛ́so.
Currently Selected:
Jáaŋ 6: ybb
Highlight
Share
Copy
Want to have your highlights saved across all your devices? Sign up or sign in
© CABTAL