Yemba - 2017 CABTAL (NT) Non Drama

Yemba - 2017 CABTAL (NT) Drama

Emuɔ menu é tɔ́k, Yɛɛ́so á tó á mía mía ntshi Ŋgaliléa, mɛ́ zéŋ ntɔ́ŋ ntshi mɛ́t lɛ Tibeliade, ŋgʉ̄ɔ mé nzéŋ mmɔʼ, pɔ́ a megaŋ nnɔ pí é gɔ́ nnɔ. Nnɔ alāʼ é gɔ́ á nzem nzhɛ̄nɛ á yí, melaʼ mīi, pɔ́ lɛ si njʉ́ɔ meŋkʉʼne menu mīi, a ghʉɛ ánɛ megaŋ agɔ. Yɛɛ́so pɔ́ a megaŋ nnɔ pí, é kɔ́ʼ mé mmɔʼ ndo lekwɛ̄t, ńnáŋ éwú á esī. Á ge egɔ́ épúp, aleʼé Páska á nɔŋ ŋgɔ̄ á ŋkuʼɔ, ŋ́gɔ́ lekāk epuɔ Yúda. Yɛɛ́so á náŋ tɛ mbʉ́ʼɛ menēk, ńjʉ́ɔ, atʉtʉ epuɔ á nɔŋ eshʉ̄ʼɛ mé lezēŋ tsí. Á lé á mbū Fílíio ŋ́gɛ: «Ḿpɛ egɔ ezó mblɛ egɔ́, tɛ́ ndɔk nzék á alāʼ jʉɔ ɔ̄?» A le gē elé épúp, ńdɔkɔ nzwíʼɛ á Fílíio, ŋ́gɔ̄ á njʉ́ɔ páʼ a a ghʉ épúp. Yí méŋwɛ̄t é nɔŋ nzhɛ́ɛ páʼ, yí gɔ eghʉ épúp. Fílíio á pwɛt á mbū yí ŋ́gɛ: «Mɛ́ zi mbú ndɔ̄k ŋkāp ndenía ŋkhʉ pīa, ńzó mblɛ, e é le kūʼ epuɔ puɔ, tɛ ŋgɔ́ yīi, taʼ ŋiŋ a gɔ epfɛ́t á méŋ atsém ɛ́. »
Mmɔʼ ŋiŋ nnɔ Yɛɛ́so, lezēŋ tsí é gɔ́ lɛ Aŋdlɛya, ŋ́gɔ́ á ŋgik Simɔŋ Piɛ, á lé á mbū Yɛɛ́so ŋ́gɛ: «Mmɔʼ mɔ́ mbaŋa a á ega, ŋ́gwɛ̄ mblɛ ntāʼ táa, mɛ́ lɔk á ɔlje tɛ́ ncūŋte, ńzéŋ ŋgwɛ̄ mesōh ntāʼ pīa. E gɔ eké mbīŋ ŋkūʼ akɔ̄, ánɛ atʉtʉ epuɔ jʉɔ ɔ̄?» Yɛɛ́so á lé ŋ́gɛ: «Pɛ etswī epuɔ metsem e enáŋte á esī. » Mvēŋ e lɛ á ajʉʼ mɛ́t tɛʼ. Pɔ́ náŋte á esī. Mbaŋa zīi é ŋgɔ́ éwú, é lɛ ajūɔ ntsāʼ táa. Yɛɛ́so á lɛ ntswí mblɛ jɔ̄, ésyákne á Ndém éwú, ńtswī mɛ́ gapte á mbū epuɔ pīi, é ŋgɔ́ éwú. Ńzéŋ ŋghʉ̄ ndeŋ ndeŋ épúp, ánɛ mesōh. Ŋ́gyá mé alāʼ, pɔ́ pfɛ́t páʼ pɔ́ kɔŋ. Pɔ́ pfɛ́t tɛ nzwɛ́t, Yɛɛ́so á lé á mbū megaŋ nnɔ pí ŋ́gɛ: «Pɛ epú ncúʼte epwɔ̄ʼ tsīi é vuʼɔ, tɛ azō á le pí. » Pɔ́ cúʼte epwɔ̄ʼ tsīi, é vuʼɔ ánɛ mblɛ ntāʼ táa zīi, epuɔ é pfɛ́t, é ló metúŋ ntsɔp pīa mé legēm.
Epuɔ é jʉ́ɔ ŋkʉʼne anu zīi, Yɛɛ́so a á ghʉ, ńdé ŋ́gɛ: «Ŋiŋ wuɔ, a á si ŋgɔ́ á kwaʼ ntswi‑ŋke Ndém. Á ŋiŋ yīi, aŋwaʼne Ndém á le lé ŋ́gɛ, a a fú eshʉʼ á ŋgɔŋ ega. » Yɛɛ́so á zhɛ́ á légɛ, epuɔ é si eshʉ̄ʼɛ á ŋgɔɔ̄ á yí, élɔk echʉ́ á efɔ, ńdɛ nzéŋ mbē yíléyī, mé ndo lekwɛ̄t.


Á kó ŋgɔ́ eseéŋ‑njhʉ̄, megaŋ nnɔ Yɛɛ́so é gʉɔ mé akʉŋɛ́ mía ntshi. Ŋ́kɔ́ʼ ŋkó á ntē akɛnūʼ, ńnɔŋ ŋgʉ̄ɔ mé tésɔŋ Kafaanawum á nzéŋ mmɔʼ. Mbɔ nzém e é ndáʼ nzī á lesēŋ. Yɛɛ́so á zɛ́t áa te shʉʼ tɛ ntswɛ́tte á wɔ́p. Pɔ́ nɔŋ ŋgʉ̄ɔ épúp, mmɔʼ mía mía afēm, á pú ntúʼ á ndo ntshi, tɛ ntshi é kɔ́ʼ menē menē. Pɔ́ lɔk akɛnūʼ nzīŋ á ajūɔ mekílo métáa tɛ ŋkó ntokó, ńjʉ́ɔ á Yɛɛ́so, á nɔŋ nzīŋɛ á ndo ntshi, éshʉ̄ʼɛ mé lezēŋ tsɔ́p. Ecɔʼ é pú ŋgɔ̄ á wɔ́p. Tɛ́ Yɛɛ́so, á lé á mbū pɔ́p ŋ́gɛ: «Ndɛ́ʼ pɛ ezéŋ mbɔ́k, a gɔ́ áa gá. » Pɔ́ nɔŋ efāʼa á lelɔk akɛnūʼ ntswíʼ á yí, ńdɛ njʉ́ɔ mbɔ pɔ́ ndáʼ ŋkó á akʉŋɛ́ ntshi, ájʉʼ zīi, pɔ́ nnɔŋ ŋgʉ̄ɔ mé éwú.

Njhʉ̄ é lá, alāʼ zīi á nzɛ́t á nzéŋ ntshi yīi, nnɔ Yɛɛ́so é ke fhó éwú ŋgʉ̄ɔ, mé ndaʼ akɛnūʼ zīi, á lɛ éwú lā. Pɔ́ nɔŋ nzhɛ́ɛ á légɛ, Yɛɛ́so pɔ́ nnɔ yí mé kaá ŋkó á ntē akɛnūʼ ŋgʉ̄ɔ ɔ́. Ŋ́gɛ nnɔ yí pɔ́plépɔ̄p mé ŋgʉ̄ɔ. Táʼ, emɔ̄ʼ mekɛnūʼ, é fhó á tésɔŋ Tibeliade, éshʉ̄ʼ mé lezēŋ tsɔ́p, á ajʉʼ zīi, Yɛɛ́so a ke syakné á Ndém éwú ánɛ mblɛ, ŋ́gyá pɔ́ pfɛ́t lā. Alāʼ á jʉ́ɔ páʼ Yɛɛ́so a te zɛ́t éwú ú, megaŋ nnɔ pí é zéŋ te zɛ́t éwú ú, ŋ́kɔ́ʼ ŋkó á ntē mekɛnūʼ, ŋgʉ̄ɔ mé Kafaanawum, á efaāʼ yí. Pɔ́ gʉɔ tɛ ŋkó ezi mmɔʼ nzéŋ, ńjʉ́ɔ á yí, ńdé á mbū yí ŋ́gɛ: «Ńziʼnɛ, o ó ŋgʉɔ tɛ ŋgɔ́ ega eséŋɛ́ ɛ́?» Á tsɔ́ʼ á mbū pɔ́p ŋ́gɛ: «Kwaʼ anuúnē anuúnē, meŋ shúŋɔ á wɛ́ ŋ́gɛ, é té melaʼ mīi, pɛ é júʼ anu zīi, ŋkʉʼne anu zīi meŋ ke ghʉ̄ʉ̄, e lɔkɔ ndʉ́ɛ́, tɛ́ pɛ efāʼa á gá á. É gɔ́ áa melaʼ mīi, pɛ ke pfɛ́t mblɛ tɛ nzwɛ́t. Ndɛ́ʼ pɛ efók mbʉʼ ndɔ̄k ŋghʉ̄ afaʼ zīi, a yá á wɛ́ etsō lejhʉ̄ tsīi, é gɔ epék. Pɛ efók mbʉʼ ndɔ̄k ŋghʉ̄ afaʼ zīi, a yá á wɛ́ áa etsō lejhʉ̄ tsīi, é gɔ le mīi, étsi ŋiŋ a pfɛ́tɛ, á láʼ ntā á lezēŋ Ndém. Ecʉɔ etsō mɛ́t, Méŋ‑Ŋiŋnɔŋ wuɔ mé shʉʼ eyá á mbū pɛ, melaʼ mīi, yí tɛ́ Ndém Mɔʼɔ́, a á si mvéŋɛ a ajū mīi a ghʉɛ. » Pɔ́ zɛ́tte á yí ŋ́gɛ: «Pek gɔ eghʉ̄ʉ lɛ akɔ̄, tɛ́ ŋghʉ̄ ajū mīi, Ndém a á si ŋkɔ̄ŋɔ ɔ́?» Á tsɔ́ʼ á mbū pɔ́p ŋ́gɛ: «Leghʉ ajū mīi, Ndém a á si ŋkɔ̄ŋɔ, a á si ŋgɔ́ á lefɛ̄ nnɛ̄t ŋgyá mé ŋiŋ yīi, Ndém mɛ́t a ke tó á yí á ŋgɔŋ. » Pɔ́ zéŋ nzɛ́tte á yí ŋ́gɛ: «Ŋ́gɔ́ mé wu, mbɔ o o ghʉ eziɛ́ ŋkʉʼne anu, tɛ́ pek ejʉ́ɔ, éfɛ́ nnɛ̄t ŋgyá á mbū wu ū? Ajū mīi o o ghʉ, á si ŋgɔ́ akɔ̄? Wɔ maŋgānjʉʼ pék, é le gʉ̄ɔ tɛ ŋkó á késáatswɛt, ḿpfɛ́t á máane. Púp tɛ́, mɛ́ le tí á ntē aŋwaʼne Ndém ŋ́gɛ: “Ndém a le yá á wɔ́p etsō lejhʉ̄ tsīi, é fhó á lephū esóʼo, pɔ́ pfɛ́t.”» Yɛɛ́so á pwɛt á mbū pɔ́p ŋ́gɛ: «Kwaʼ anuúnē anuúnē, meŋ shúŋɔ á wɛ́ ŋ́gɛ, Mɔɔ́sɛ mé lɛ te yá á wɛ́ etsō lejhʉ̄ tsīi, é le fhó á lephū ɔ́. Mɔʼɔ́ ga mé yaá á wɛ́ á kwaʼ etsō lejhʉ̄ tsīi, é fhɔ́ɔ á lephū. Etsō lejhʉ̄ tsīi, Ndém a yáa, é si ŋgɔ́ etsi, é fhɔ́ɔ á lephū esóʼo, ŋ́ghʉ̄ɛ mɛ́ kwaʼa ŋgɔ́ɔ éwú.
Pɔ́ lé á mbū yí ŋ́gɛ: «Ndi, lɛ nnáŋa ŋgyáa etsiɛ́ etsō lejhʉ̄ mɛ́t, á mbū pek efʉʼ metsem. » Yɛɛ́so á lé á mbū pɔ́p ŋ́gɛ: «Meŋ mé si ŋgɔ́ etsō lejhʉ̄ tsīi, é ghʉɛ mɛ́ gɔ́ɔ éwú. Ŋiŋ a shʉʼɛ á mbū meŋ, mbɔ nzi e te eláʼ ezéŋ á yí ezáŋ á. Ŋiŋ yīi a á fɛ́ nnɛ̄t ŋgyá á mbū meŋ, nzi ntshi, e é le láʼ nzéŋ á yí nzáŋ á. Táʼ, meŋ á shúŋ á wɛ́, pɛ é si njʉ́ɔ á gá, ḿbiŋ ŋké te nɔ̄ŋ efíɛ́ nnɛ̄t ŋgyáa á mbū meŋ ɛ́. Epuɔ metsem pīi, Mɔʼɔ́ ga a á yá á mbū meŋ, e shʉʼ eshʉʼ á mbū meŋ. Ŋiŋ a piŋɛ eshʉ̄ʼ á mbū meŋ, mbɔ meŋ gɔ le á yí wáʼ. Meŋ ndɛɛ́ efhɔ́ɔ á lephū eshʉ̄ʼɛ á ŋgɔŋ ega, á ŋghʉʉ̄ ajū mīi, ŋiŋ yīi a le tó á gá, a á si ŋkɔ̄ŋɔ. Meŋ ndɛɛ́ te eshʉ̄ʼɛ, á ŋghʉʉ̄ ajū mīi, meŋ méŋwɛ̄t mé si ŋkɔ̄ŋɔ ɔ́. Lepiŋ ŋghʉ̄ ajū mīi, ŋiŋ yīi a le tó á gá, a á si ŋkɔ̄ŋɔ, á si ŋgɔ́ á gá á legɔ̄ le cʉ́ʼ, taʼ ŋiŋ ánɛ epuɔ pīi a le yá me meŋ, á pí í. A gɔ́ áa gá á leghʉ, pɔ́ zím ánɛ lewhʉ̄ ánɛ nzoknzem aleʼé. Ajū mīi Mɔʼɔ́ ga a á si ŋkɔ̄ŋɔ, a ajʉɔ: ŋiŋ ntsem yīi, a á jʉ́ɔ á gá meŋ Méŋ yi, éfɛ́ nnɛ̄t ŋgyá mé meŋ, a a fú eta á lezēŋ Ndém. Meŋ ndáʼ ánɛ nzoknzem aleʼé, ŋ́ghʉ̄ a ezím ánɛ lewhʉ̄. »
Yɛɛ́so á shúŋne épúp, epuɔ Yúda é lɛ nzī á lezwɛ̄tte ánɛ yí, melaʼ mīi a á lé ŋ́gɛ, yí é si ŋgɔ́ etsō lejhʉ̄ tsīi, é fhɔ́ɔ á lephū tɛ́ esóʼo. Ńzwɛ́tte ndé ŋ́gɛ: «Ŋiŋ wuɔ, a te á Yɛɛ́so méŋ Yosɛ́p ɛ́ lɛ̄? Nɔ́ŋ ŋ́gɛ ḿpɛ é si nzhɛ́ɛ á mɔʼɔ́ yi pɔ́ mɛ́ wɔp. A gɔ epīiŋ ŋgā, ńdé tsetsɔŋɔ ŋ́gɛ, yí fhɔ́ɔ á lephū tɛ́ esóʼo ó?»
Yɛɛ́so á pwɛt á mbū pɔ́p ŋ́gɛ: «Ndɛ́ʼ pɛ ezéŋ nzwɛ́tte á tsetsɛlɛ pɛ. Ŋiŋ a gɔ le shʉ̄ʼ á mbū meŋ, té gɔ́ yīi Mɔʼɔ́ ga, páʼ a le tó á gá, mé tshóne á yí í. Éshʉ̄ʼ épúp, meŋ mbiŋ ndáʼ ánɛ nzoknzem aleʼé, ŋ́ghʉ̄ a ezím ánɛ lewhʉ̄. Mɛ́ le tí á ntē aŋwaʼne metswi‑ŋke Ndém ŋ́gɛ: “Ndém a a láʼ ezíʼne epuɔ metsem anu zí.” Tɛ mbɔɔ awɔ́ lɛ́ yīi, a á júʼ ashuŋne zīi, á fhɔ́ɔ á mbū Mɔʼɔ́, ḿvéŋ ajū mīi ashuŋne mɛ́t á zíʼnɛ á yí, ŋgaŋ a shʉʉ̄ʼ á mbū meŋ. Ŋiŋ a la Ndém jʉ́ɔ ɔ́. Tɛ ndaʼ ŋiŋ yīi, a fhɔ́ɔ á mbū yí. Ŋgaŋ mé ŋiŋ yīi, a lé jʉ́ɔ á yí. Kwaʼ anuúnē anuúnē, meŋ shúŋɔ á wɛ́ ŋ́gɛ, ŋiŋ yīi a á fɛ́ nnɛ̄t ŋgyá mé meŋ, a á ndáʼ nzī á leta á lezēŋ Ndém. Meŋ á si ŋgɔ́ etsō lejhʉ̄ tsīi, é ghʉɛ mɛ́ gɔ́ɔ éwú. Wɔ maŋgānjʉʼ pɛ́, é le gʉ̄ɔ tɛ ŋkó á késáatswɛt, ḿpfɛ́t á máane, éshʉʼ nzéŋ ŋ́kwʉ́te kwhʉ́te. Etsō lejhʉ̄ tsīi, é piŋɛ efhɔ́ɔ á lephū tɛ́ esóʼo, é páʼa ŋgɔ́ yīi, ŋiŋ a pfɛ́tɛ, a á le fú ŋkwhʉ́ ɛ́.
Meŋ mé si ŋgɔ́ etsō lejhʉ̄ tsīi, é ghʉɛ mɛ́ gɔ́ɔ éwú. Mbɔ é le fhó á lephū tɛ́ esóʼo. Ŋiŋ a pfɛ́tɛ etsō lejhʉ̄ cʉɔ mɛ́t, mbɔ a a fú eta á lezēŋ Ndém. Ecʉɔ etsō lejhʉ̄ mɛ́t tsīi, meŋ a shʉʼ eyá, é si ŋgɔ́ mbap nnɛ̄t za. Éyá, tɛ́ a etsīa épúp, ŋgɔŋ epuɔ metsem e elɔk ŋgɔ́ éwú. »
Yɛɛ́so á lé páʼa mɛ́t, epuɔ Yúda é zi á lefōk mbʉʼ, ŋ́ŋāk á tsetsɛlɛ pɔ́p ndé ŋ́gɛ: «Ŋiŋ wuɔ a gɔ egaá, ŋ́gyá mbap nnɛ̄t zi ŋ́gɛ, ḿpɛ epfɛ́t é?» Yɛɛ́so á lɛ ndé á mbū pɔ́p ŋ́gɛ: «Kwaʼ anuúnē anuúnē, meŋ shúŋɔ á wɛ́ ŋ́gɛ, pɛ gɔ te pfɛ́t mbap nnɛ̄t Méŋ‑Ŋiŋnɔŋ wuɔ ɔ́, ŋ́gɔ́ te nú metshi mí í, mbɔ pɛ te eláʼ egɔ́ éwú ú. Ŋiŋ yīi a á pfɛ́t mbap nnɛ̄t za, ńnú metshi má, a á ndáʼ nzī á leta á lezēŋ Ndém, meŋ mbiŋ ndáʼ ánɛ nzoknzem aleʼé, ŋ́ghʉ̄ a ezím ánɛ lewhʉ̄. Mbap nnɛ̄t za, e é si ŋgɔ́ á kwaʼ etsō lejhʉ̄. Metshi má é gɔ́ á kwaʼ meluʼ. Ŋiŋ a pfɛ́tɛ mbap nnɛ̄t za, ńnú metshi má, mbɔ pek ŋgaŋ é temte, meŋ gɔ́ ánɛ yí, á gɔ́ ánɛ meŋ. Mɔʼɔ́ ga a le tó á gá á ŋgɔŋ, yí mé si ŋghʉ̄ɛ, mɛ́ gɔ́ɔ éwú, yí mé zéŋ nnɔ̄ŋ ŋghʉ̄ɛ, meŋ gɔ́ɔ éwú. Ndeŋ ndeŋ épúp, ŋiŋ a pfɛ́tɛ mbap nnɛ̄t za, mbɔ meŋ a shʉʼ eghʉ, ŋgaŋ a egɔ́ éwú. Ecʉɔ é páʼa, ŋ́gɔ́ etsō lejhʉ̄ tsīi, é fhɔ́ɔ á lephū tɛ́ esóʼo. É tswhiī ánɛ etsi, wɔ maŋgānjʉʼ pɛ́ é le pfɛ́tē. Pɔ́ le pfɛ́t épúp, éshʉʼ nzéŋ ŋ́kwhʉ́te kwhʉ́te. Ŋiŋ a piŋɛ mpfɛ́t etsō lejhʉ̄ cʉɔ, mbɔ a a fú eta á lezēŋ Ndém. » É páʼa ŋgɔ́ menu mīi, Yɛɛ́so a le ziʼné á mbū epuɔ, páʼ a lɛ á ŋgyā aswiŋte á tésɔŋ Kafaanawum.

Megaŋ nnɔ Yɛɛ́so tɛ nzá, é júʼ ashuŋne zí, emɔ̄ʼ é lɛ nzī á lelē ŋ́gɛ: «Ashuŋne jʉɔ mɛ́t, á anu ntē tɛʼ. Awɔ́ a gɔ evéŋ á yí á lejūʼ ē?» Yɛɛ́so á zhɛ́ á ntē yí á légɛ, megaŋ nnɔ pí é si nzwɛ́ttɛ, ánɛ anu zīi a á shúŋ, ńdé á mbū pɔ́p ŋ́gɛ: «Meŋ á jʉ́ɔ ŋ́gɛ, anu jʉɔ mɛ́t á záŋ á wɛ́, tɛ pɛ te zɛ́t ŋkɔ̄ŋɔ á lefɛ̄ nnɛ̄t ŋgyá mé meŋ ɛ́? Tɛ pɛ é ŋgɔ́ péʼe njʉ́ɔ Méŋ‑Ŋiŋnɔŋ wuɔ, á kɔ́ʼ ŋgʉ̄ɔ mé ajʉʼ zīi, a lɛɛ́ nzi ŋgɔ́ éwú, mbɔ pɛ e ghʉ páʼ lā? Azwakne Ndém mé si ŋghʉ̄ɛ mɛ́ gɔ́ɔ éwú. Ŋiŋnɔŋ a gɔ le kūʼ á yí á lepū ŋghʉ̄ amɔ̄ʼ azō ɔ́. Meshuŋne mīi meŋ á shúŋ á wɛ́, é fhɔ́ɔ á mbū Azwakne Ndém. Emiɛ́ mé zéŋ nɔŋ ŋghʉ̄ɛ, mɛ́ gɔ́ɔ éwú. Táʼ, emɔ̄ʼ epuɔ é tsetsɛlɛ pɛ, ńnɔŋ te mvéŋ ɛ́. » Yɛɛ́so a le nɔ̄ŋ nzhɛ́ɛ tɛ efhó á nzií, épuɔ pīi é te shʉʼ efɛ́ nnɛ̄t eyá á mbū yí í, ńnɔŋ nzhɛ́ɛ á ŋiŋ yīi, a a shʉʼ eswiŋ á yí. Yɛɛ́so á zéŋ ndé ŋ́gɛ: «É melaʼ épúp, meŋ ke lé á mbū pɛ ŋ́gɛ, ŋiŋ a gɔ le shʉ̄ʼ á mbū meŋ, té gɔ́ yīi, Mɔʼɔ́ ga mé ghʉ, tɛ́ á shʉʼ ɛ́. »
Á fhó épúp, lelʉɛ epuɔ pīi, é nnɔŋ nzhɛ̄nɛ á Yɛɛ́so, pɔ́ fhó á nzem yí ntó, pɔ́ té zéŋ ŋkɔ̄ŋ á wɔ́p á legɔ̄ á nzem yí í. Yɛɛ́so á zɛ́tte epi emɔ̄ʼ megaŋ nnɔ pí ntsɔp pīa mé legēm ŋ́gɛ: «Ŋ́gɔ́ mé pɛ, pɛ te gʉɔ azɛ́ lɛ̄?» Simɔŋ Piɛ á pwɛt á mbū yí ŋ́gɛ: «Mɔʼɔ́ wek, o ó páʼā ŋ́gɛ, pek egʉɔ njʉ́ɔ á awɔ́? O wɛɛ̄ meshuŋne mīi, é ghʉɛ mɛ́ taa á lezēŋ Ndém. Ŋ́gɔ́ mé pek, mbɔ pek lē ndáʼ mvéŋ, ńnɔŋ nzhɛ́ɛ á légɛ, o ó ŋiŋ yīi, a fhɔ́ɔ á mbū Ndém. » Yɛɛ́so á pwɛt á mbū pɔ́p ŋ́gɛ: «Meŋ mé lɛ te tsɔ́ʼ á wɛ́ pwɔ̄ ntsɔp pīa mé legēm ɛ́ kɛ? Táʼ, taʼ ŋiŋ a ké ŋgɔ́ á tsetsɛlɛ pɛ, ŋ́gɔ́ á Sɛ́ta. A lɛɛ́ ndʉ́ɛ́ épúp, ńdʉ́ɛ́ á Yúdas, méŋ Simɔŋ Iskaliɔt. Yí mé lɛ taʼ ŋiŋ, á nnɔ meziŋ‑ntō ntsɔp pīa mé legēm, éyi a le shʉ̄ʼ eswiŋ á Yɛɛ́so.

Listen to Jáaŋ 6