Jáaŋ 4
4
Yɛɛ́so pɔ́ mmɔʼ mɔ́ Samalía eyi menzwí, é ega eshúŋnɛ
1Yɛɛ́so á shʉʼ nzhɛ́ páʼ epuɔ Falísia é ke júʼ á légɛ, yí é si ŋghʉ̄ɛ, epí megaŋ nnɔ é tswiʼnɛ nzáa, yí zéŋ nnɔ̄ŋ nnōʼo epuɔ á ntshi, é zánɛ ntsyāa epi Jáaŋ. 2Ńzi ndʉ́ɛ́ épúp páʼā, Yɛɛ́so yí méŋwɛ̄t á nɔŋ te nnōʼo epuɔ á ntshi ɛ́. Megaŋ nnɔ pí mé le nɔ̄ŋ nnōʼo. 3Yɛɛ́so á zhɛ́ épúp páʼā, éfhó á ntē apak ŋgɔŋ Yudéa, ńtsé á mɛnzhɛ, ŋgʉ̄ɔ mé apak ŋgɔŋ Ŋgaliléa. 4Ḿbɔ́ŋte á lezāpa áa ntē apak ŋgɔŋ Samalía, tɛ́ ŋgʉ̄ɔ mé éwú. 5Púp, ŋ́gʉɔ tɛ ŋkó ánɛ mmɔʼ tésɔŋ Samalía mɛ́t, mɛ́ tɔ́ŋ lɛ Sikaa. Tésɔŋ wuɔ mɛ́t á gɔ́ á ŋkɔʼɔ́ atsáʼ zīi, Yakɔ́p a le yá á mbū méŋ yi Yosɛ́p. 6Yɛɛ́so á gɔ́ á kwaʼ ajʉʼ zīi, aphʉ̄ ntshi Yakɔ́p á lɛ éwú. Mbɔ a á ziŋ tɛ ŋká, ńnáʼ ndɛ nnáŋ á legʉ̄ŋ aphʉ̄ ntshi mɛ́t. Á ge egɔ́ épúp, ŋ́gɔ́ ajūɔ efʉʼ táŋ‑azokó.
7Mmɔʼ menzwí, ŋ́gɔ́ á mɔ́ Samalía mɛ́t, á shʉʼ á ntúʼ ntshi. Yɛɛ́so á lé á mbū yí ŋ́gɛ: «Lɛ ŋgyá á gá ntshi, meŋ enú. » 8Á ge egɔ́ épúp, mbɔ megaŋ nnɔ pí é ŋgʉ̄ɔ mé tésɔŋ, á njúɔ ajūɔ mpfɛ́ɛt. 9Menzwí mɛ́t, á mɔ́ Samalía wɔ̄, á lé á mbū yí ŋ́gɛ: «Ɔɔ, wu ŋiŋ Yúda, o ega ndɔ́ɔ á gá ntshi, ŋ́gɔ̄ á nnú u? Á gá menzwí, ŋ́gɔ́ á mɔ́ Samalía a?» Á ge egɔ́ mbɔ, epuɔ Yúda é gɛ te ŋkɔ̄ŋɔ á wɔ́p a epuɔ Samalía á lezēŋne azō ɔ́. 10Yɛɛ́so á pwɛt á mbū yí ŋ́gɛ: «Á ŋgwíʼe ŋgɔ́ yīi, o gɔ ezhɛ́ afuʼ zīi, Ndém a gɔ́ eyá á ŋiŋ, ŋ́gɔ́ éyi o gɔ ezhɛ́ á ŋiŋ yīi, a lʉ́ɛ́ á mbū wu ŋ́gɛ, o eyá á yí ntshi yí enú, mbɔ a ke gɔ́ wu mé lɔ́ á yí, á piŋ ŋgyá á wú ntshi yīi, é ghʉʉ̄, mɛ́ gɔ́ éwú. » 11Menzwí mɛ́t á pwɛt á mbū yí ŋ́gɛ: «Ndi, o zi te atʉ̄ɔ́ ntshi wɛ̄ɛ, aphʉ̄ ntshi á piŋ esɛ̄h tɛʼ. O gɔ epiŋ elɔk ewuɔ ntshi yīi, é ghʉɛ mɛ́ gɔ́ɔ éwú lā égɔ́? 12Ńdɔkɔ ŋ́gɛ wu, o faáŋ ntsya á Yakɔ́p, á maŋgānjʉʼ wek lɛ́? Yí mé le yá aphʉ̄ ntshi jʉɔ á mbū pek. Yí méŋwɛ̄t é nú ntshi yīi, é tó éwú, ewɔŋkhʉ̄ pí mbɔɔ mena pí, é zéŋ nnú azɔ́p. » 13Yɛɛ́so á pwɛt á mbū yí ŋ́gɛ: «Ŋiŋ ntsem yīi a á nú ewuɔ ntshi mɛ́t, nzi ntshi é shʉʼ ezéŋ ezáŋ á yí. 14Ŋiŋ a ke mbīŋ nnú ntshi yīi, meŋ mé yá á yí, mbɔ nzi ntshi e te eláʼ ezéŋ á yí ezáŋ á. A cʉ́ʼɛ épúp, mbɔ ntshi yīi, meŋ á yá á yí, e kó ánɛ yí, écʉ́ʼ lesaʼá‑ntshi tsīi, é ghʉɛ mɛ́ taa á lezēŋ Ndém. » 15Menzwí wɔ̄ á gɛ: «Ndi, lɛ ŋgyá á gá ntshi mɛ́t, tɛ́ nzi ntshi e é le láʼ nzéŋ á gá nzáŋ á, meŋ ńde zéŋ eshʉ̄ʼ ega ntúʼ ntshi ɛ́. »
16Yɛɛ́so á tsɔ́ʼ á mbū yí ŋ́gɛ: «Gʉɔ ntɔ́ŋ á ndō wu, pɛ yí e eshʉ̄ʼ. » 17Á lé á mbū yí ŋ́gɛ: «Meŋ te á ndō wɛ. » 18Yɛɛ́so á lé á mbū yí ŋ́gɛ: «O ó lé ŋ́gɛ, o te á ndō wɛ, ńdʉ́ɛ́ á gɔ́ anuúnē. O lé wɛ melō métáa. Ŋiŋ mbaŋa yīi, pɛ yí é piīŋ nnáŋ tsetsɔŋɔ, a te á ndō wu ú. » 19Á lé á mbū yí ŋ́gɛ: «Ndi, meŋ á jʉ́ɔ ŋ́gɛ, o ó si ŋgɔ́ á taʼ ntswi‑ŋke Ndém. 20Wɔ maŋgānjʉʼ pék, é le wuʼtē á Ndém á ndo lekwɛ̄t ega. Pɛ epuɔ Yúda é si mbiŋɛ ndʉ́ɛ́ ŋ́gɛ, ajʉʼ zīi mɛ́ pɔŋteé á lewuʼte á Ndém éwú, á gɔ́ áa Yelósalɛm. » 21Yɛɛ́so á lé á mbū yí ŋ́gɛ: «Maá, meŋ shúŋɔ anuúnē, amɔ̄ʼ afʉʼ á shʉʼ ekuʼe, pɛ é le zéŋ ŋgūʼte á Ndém Mɔʼɔ́, á ndo lekwɛ̄t ega, ká á Yelósalɛm ɛ́. 22Pɛ epuɔ Samalía é si ŋgūʼtɛ á Ndém, nzi nnɔ̄ŋ te nzhɛ́ɛ á yí í. Pek epuɔ Yúda, é piŋ ŋgē ewuʼte á yí, ńnɔŋ nzhɛ́ɛ á yí, melaʼ mīi Ndém a a láʼ ezápa ánɛ epuɔ Yúda, tɛ́ ghʉ, epuɔ menɔŋ e etswɛ́t. 23Táʼ, afʉʼ á si eshʉ̄ʼɛ, tɛ mbɔ á nzi ndáʼ ŋ́kūʼ, ázi kwaʼ wɔ wuʼte‑Ndém Mɔʼɔ́, é ge ewuʼte á yí, Azwakne Ndém mé etshóne á wɔ́p, pɔ́ ewūʼte á yí, páʼ mɛ́ pɔŋteé á lewuʼte á yí épúp. É si ŋgɔ́ á kwaʼ wɔ wuʼte‑Ndém Mɔʼɔ́ pīi, a á si ŋkɔ̄ŋɔ. 24Ndém a gɔ́ áa Azwakne, melaʼ épúp tɛ́, á pɔɔ̄ŋ ŋ́gɛ, Azwakne zí mé etshóne wɔ wuʼte á yí, pɔ́ ewūʼte á yí, páʼ mɛ́ pɔŋteé á lewuʼte á yí épúp. » 25Menzwí wɔ̄ á lé á mbū yí ŋ́gɛ: «Meŋ á si nzhɛ́ɛ á légɛ,Nzaʼ‑Ŋkhʉ a a shʉʼ eshʉʼe, á ŋiŋ yīi mɛ́ tɔɔ́ŋ á yí lɛ Klísto. A a shʉʼ eshʉʼe, ékɛ́ʼte ajūɔ tsem, éshúŋ á wék. » 26Yɛɛ́so á lé á mbū yí ŋ́gɛ: «Meŋ yīi, meŋ shúŋnɛ á mbū wu lāa, meŋ mé á yí. »
27Yɛɛ́so á nɔŋ eshúŋnɛ épúp, nnɔ yí é lɛ eshʉ̄ʼ. Á pú ŋkʉ̄ʼne á wɔ́p tɛʼ, páʼ pɔ́ menzwí é nnɔŋ eshúŋnɛ. Táʼ, ŋiŋ á ke te zɛ́tte á yí ajū mīi, a faʼa á. Ŋiŋ a te zɛ́tte á yí ŋ́gɛ, a shúŋnɛ á mbū yí melaʼ akɔ̄ lɛ́ ɛ̄. 28Menzwí mɛ́t á lɛ ntshī á atʉ̄ɔ́ ntshi zí nnéŋ, éswáŋ nnɛ̄t mé tésɔŋ, ńdé á mbū epuɔ ŋ́gɛ: 29«Pɛ eshʉʼ njʉ́ɔ emɔ̄ʼ ŋiŋ yīi, a á shúŋ á gá ajūɔ tsem zīi, meŋ ndé ghʉ. A gɔ́ aleʼé mbɔ, ŋiŋ wuɔ mɛ́t a á Nzaʼ‑Ŋkhʉ yīi mɛ́ gɛ nzwíʼtɛ. » 30Á lé épúp, epuɔ metsem é pú efhó á tésɔŋ ntó, ŋ́gʉɔ njʉ́ɔ á Yɛɛ́so.
31Á ge egɔ́, mbɔ nnɔ yí é nnɔŋ ŋkōnɛ á yí ndʉ́ɛ́ ŋ́gɛ: «Mɔʼɔ́ wek, lɛ mpfɛ́t azō. » 32Á pwɛt á mbū pɔ́p ŋ́gɛ: «Meŋ á pfɛ́t emɔ̄ʼ ecū mīi, pɛ te si nzhɛ́ɛ ɛ́. » 33Ńdé épúp, nnɔ yí é zɛ́tte á tsetsɛlɛ pɔ́p ŋ́gɛ: «Élɛ ŋiŋ a á lɔk etsō, éshʉʼ ŋgyá á mbū yí, ŋ́gɛ a epfɛ́t e?» 34Yɛɛ́so á lé á mbū pɔ́p ŋ́gɛ: «Etsá etsō lejhʉ̄, é si ŋgɔ́ á leghʉ ajū mīi, ŋiŋ yīi a le tó á gá, a á si ŋkɔ̄ŋɔ. Ŋ́gɔ́ á gá á lelɔk afaʼ zīi, a ke tsekné á mbū meŋ, ŋ́gʉ̄ɔ mé mvhɔ, tɛ nzōko. 35Pɛ méŋwɛ̄t é gɛ te ndʉ́ɛ́ ŋ́gɛ, á zɛɛ́t mesaŋ lekua, mɛ́ efāʼ ecūɔ kɛ? Meŋ á ké mbiŋ ndé mé pɛ ŋ́gɛ: pɛ epʉ́ʼɛ menēk mɛ́, ńcʉ̄te meŋkāʼ. Etsō é ndáʼ ntswhí tɛ ŋkūʼ á lefaʼ. 36Efaʼ‑etsō, a á ndáʼ nzī á letswī ntsɔʼɔ́ afaʼ yí, a á si ndāka etsō, ńtáŋa á lezēŋ Ndém. Púp, mbhi‑etsō pɔ́ efaʼa, é si mbúu ŋkáka. 37Á gɔ́ épúp páʼā, ashuŋne lepúʼ zīi á leé ŋ́gɛ: “Ŋiŋ a phīi, mmɔʼ á shʉʼ efāʼ.” Á lɔkɔ ŋgɔ́ anuúnē. 38Meŋ ke tó á wɛ́, ŋ́gɛ pɛ egʉɔ efāʼ etsō á ŋkāʼ, té gɔ́ yīi pɛ le jʉ́ɔ ŋgʉɔ̄ʼ éwú. Emɔ̄ʼ epuɔ é le jʉ́ɔ ŋgʉɔ̄ʼ, pɛ é piŋ eshʉ̄ʼ, ńjhʉ́ apɛ ánɛ ecū mīi, pɔ́ le jʉ́ɔ ŋgʉɔ̄ʼ éwú. »
39Á le fhó ánɛ ashuŋne menzwí wɔ̄, páʼ a le nɔ̄ŋ ndʉ́ɛ́ ánɛ Yɛɛ́so ŋ́gɛ: «A á shúŋ á gá ajūɔ tsem zīi, meŋ ndé ghʉ. » Epuɔ tésɔŋ wɔ̄ tɛ nzáne, á Samalía, é fɛ́ nnɛ̄t ŋgyá á mbū Yɛɛ́so. 40Éshʉʼ tɛ ŋkó á lezēŋ Yɛɛ́so, ḿbúʼ mbū á mbū yí ŋ́gɛ, pɔ́ a pɔ́p e enáŋ. Yɛɛ́so á véŋ, pɔ́ a pɔ́p é náŋ eleʼé pīa. 41Epuɔ tɛ nzáne, é zéŋ efhó ánɛ ashuŋne Yɛɛ́so, éfɛ́ nnɛ̄t ŋgyá á mbū yí. 42Ńdé á mbū menzwí mɛ́t ŋ́gɛ: «É té lɛ ŋgɔ́ áa melaʼ ashuŋne jú, tɛ́ pek é fɛ́ nnɛ̄t ŋgyá á mbū yí í. Pek méŋwɛ̄t é júʼ á yí á leshūŋne. Tɛ pek é tsetsɔŋɔ, ńnɔŋ nzhɛ́ɛ á légɛ, a á Ŋghʉɛ, ŋgɔŋ ntsem é tswɛ́t. »
Yɛɛ́so a á ega ŋghʉ̄ɛ mbáte epīa ŋkʉʼne anu á Kána
(Mat 8.5-13; Lúk 7.1-10)
43Eleʼé pīa mɛ́t é tɔ́k, Yɛɛ́so á fhó á ajʉʼ mɛ́t, ńnɔŋ ŋgʉ̄ɔ mé apak ŋgɔŋ Ŋgaliléa. 44Mbɔ yí méŋwɛ̄t é ndé ŋ́gɛ: «Mɛ́ té yá mekuʼ á mbū ntswi‑ŋke Ndém, á alāʼ pɔ́p ɔ́. » 45Táʼ, á ké ŋgʉ̄ɔ tɛ ŋkó á apak ŋgɔŋ Ŋgaliléa, epuɔ alāʼ mɛ́t, é kókne á yí á mbɔŋɔ́ tɛʼ. Éfhó ánɛ páʼ, pɔ́p azɔ́p, é ke gʉ̄ɔ lekāk á Yelósalɛm, ŋ́kó éwú, ńjʉ́ɔ menu ntsem mīi Yɛɛ́so a ghʉɛ.
46Yɛɛ́so á gʉɔ tɛ ŋkó á Kána, á ntē Ŋgaliléa, á tésɔŋ yīi a le zī ŋkó éwú, ŋ́ghʉ̄, ntshi é sɛt nnɛ̄t ncʉ́ʼ meluʼ. Mmɔʼ ŋwɛ́t alāʼ á gɔ́ éwú, méŋ yi á gɔ́ á tésɔŋ Kafaanawum, ńnɔŋ ŋgɔ̄ɔ. 47Á júʼ á légɛ, Yɛɛ́so a á efhó á Yudéa, eshʉ̄ʼ mé Ŋgaliléa, éshʉʼ ntswɛ́tte á yí, ḿbúʼ mbū á mbū yí ŋ́gɛ, a elɛ̄ ncú á Kafaanawum, ŋ́ghʉ̄ méŋ yi, páʼ a á lwɛt, a etē. 48Yɛɛ́so á pwɛt á mbū yí ŋ́gɛ: «Pɛ gɔ te jʉ́ɔ meyiŋne mīi, é tswii mete Ndém ɛ́, ŋ́gɔ́ te jʉ́ɔ mendajʉ́ɔ menu ú, mbɔ pɛ gɔ le láʼ efɛ́ nnɛ̄t zɛ, ŋ́gyá á mbū meŋ ɛ́ lɛ̄?» 49Ŋwɛ́t alāʼ wɔ̄ á lé á mbū yí ŋ́gɛ: «Ndi, lɛ ncú ŋgʉɔ ńjʉ́ɔ á méŋ ga mɛ́t, tɛ́ a ekwhʉ́. » 50Yɛɛ́so á pwɛt á mbū yí ŋ́gɛ: «Gʉ̄ɔ́, méŋ wu a á te. » Á lɛ mvéŋ anu zīi Yɛɛ́so a á lé mé yí. Ńdɛ ntsé á mɛnzhɛ. 51Ńnɔŋ ncúu ŋ́gʉ̄ɔ épúp, megaŋ afaʼ pí é pote á yí á mɛnzhɛ, ńdé á mbū yí ŋ́gɛ: «Méŋ wu a á ntē. » 52Á zɛ́tte á wɔ́p njhʉ̄ zīi, mɔ́ mɛ́t, á nzī á lejūʼ á mbɔŋɔ́. Pɔ́ pwɛt á mbū yí ŋ́gɛ, á kɛ ezɔ́, ánɛ taʼ anu, tɛ́ nnɛ̄t é záʼa ánɛ yí. 53Mɔʼɔ́ mɔ́ á kímte páʼ, á ke zéŋ ŋgɔ́ áa ánɛ njhʉ̄ mɛ́t, tɛ́ Yɛɛ́so á lé ŋ́gɛ: «Méŋ wu a á te. » Ńdɛ efɛ́ nnɛ̄t zi ŋgyá á mbū Yɛɛ́so, mbɔɔ epuɔ ŋgyā pí metsem. 54Á páʼa, ŋ́gɔ́ mbáte pīa ŋkʉʼne anu zīi, Yɛɛ́so a ghʉɛ, páʼ a le fhó á Yudéa mbīŋ nzem mé Ŋgaliléa.
Currently Selected:
Jáaŋ 4: ybb
Highlight
Share
Copy
Want to have your highlights saved across all your devices? Sign up or sign in
© CABTAL