Lûk 20
20
Ghɨə Njûsghè tè ke va luʼ vɛ ə Njisə̀s njì tyaʼa vəynke ə təyn
(Matyò 21.23-27; Mâk 11.27-33)
1Tuʼ fîfe, Njisə̀s e sè zaʼlə̂ əghɨ ə Ndɛ Ètsə̀mə, ndàʼà tom èchùŋ sê ghənə. Ghɨə kɔʼsə nə eshyə̀ engaŋtəghe yî tyə̀ynsè sə alàŋsè, paʼsə̂ è chəʼse ə fɨə pə̂ 2ə ke pfɨf sê vəyn nə, “Tsàyn sê ghàs nə ò nə̀ əghɛ ghɨ̀yn è tyaʼa mə ke ndò ghayn zə? Ə̀ fo nde tyaʼa nə kɨ̂yn sê ghò ə?”
3Njisə̀s ə piə sê ghənə nə, “M pɔŋə pfɨfə eghɛ sê ghàyn. Ghàyn tsàyn sê mi nə̂, 4ə tè fo Fezhə̀ è tyaʼa sê Njɔyn nə è və fo m̀mo sê ghɨ mə, mə ə̀ fo əghɨ ə?”
5Ghənə kayntə̂ eghɛ ətəyn ə ghənə əfètəyn ə piə nə, “Ə ghâsènì pi nə, ‘Ə̀ fo Fezhə̀ è tyaʼa sê vəyn,’ ə è pfɨf nə, ‘Ghàyn tè se tə̂ se pomə eghɛ zɛ ə è tè piə kûmə̀ ghè?’ 6Pîza ə ghâsènì pi nə, ‘Ə̀ fo əghɨ è tyaʼa sê vəyn,’ ə ghɨghe əkɨ̂m tɨmne zhwi ghâsènì è chîə kûmə̀ nə ghənə ke nə Njɔyn tè nyi fɨ̀aʼtè.” 7Kə ghənə kwàʼtə̀ zâ, ə piə kə nə ghənə ke va luʼ vɛ ə tyaʼa ə vəynke tè ndò ətəyn.
8Njisə̀s ə se pì sê ghənə nə, “M nə̀ pɔŋə tsâ va luʼ vɛ ə m nji tyaʼke sə̂ nə̂ əghɛ nə ghɨ̂yn ətəyn.”
Njisə̀s ə mɛ̀ ngàyn, è ze è ko ghɨə se saʼə
(Matyò 21.33-46; Mâk 12.1-12)
9Kə è wàmnè za ə ke mɛ̀ ngàyn sê ghənə nə, “Wùə è viu tè chwiə àfùʼ ə se lamas ə vəynke ə fo nə ghɨ nə fɨ̂aʼà, chyâtə̀ fo vəyn è fɨa vɛ ə ve fɨə ətəyn. È və fo za ə ndùə ekwî endaʼ zhize se ndam sə aghaf. 10Shɨ̂ŋə̀ e kɔyntə ke ə kwəyn, è və tomə wufɨ̀aʼa ə̀ vəyn viu nə è ndù pi sê ghɨ ghɛ ə è tè fo fûʼ nə kɛ sê ghənə nə ghe fo twɔm viu sê vəyn. Ghɨ e fɨaʼa nə ghɨyn ə ndùə kyiə vɛ ə è tom za ə pusə vəyn ə chûmə̀, è və kɛse kwɨlə̂ kə è gho e zomə. 11È və fɨnə tomə kwəynsə̂ wufɨ̀aʼa ə̀mɔ̀ʼɔ̂, ghənə fɨnə pusə kə ndo vəyn ə fɨnə nyâplə̀ è vəyn endom e ghoməve ə fɨnə chûmə̀ vəyn, è və ndò kə è gho e zomə. 12È və fɨnə tomə vîvè nə ə̀ se nyi əghɨ ə̀ ta, ghənə pusə ndəmsə̂ vəyn ə chiynə fɨsə̂ vəyn afùʼ nə kɛ. 13Pɛ̀ àfùʼ ə kwàʼtə̀ nâʼà eghɛ zɛ ə è kàʼa ə è nə̀yn ə piə kə sə və ə ngɨŋ nə, ‘M nə̀ tomə nâʼà vayn èkɔ̀ŋ vɨ̂mè, zho fife ə ghənə ndù fayn vəyn.’ 14Va vəyn nə vɛ ə ndùə, ghənə ə fe vəyn ə pìə nə, ‘Ə̀ vɨ̀nə nyi ke nâʼà zhîndɛ̂ ə̀ pɛ̀ àfùʼ nə vɨ̂yn nyi. Ə ghâsènì kyi zhwi vəyn kə ə kyi fɨa vɛ ə è tè nyi se nə kyî.’ 15Ghənə piə za ə kyiə fɨə è vəyn ə afûʼ fu ə ndùə zhwiə.”
Njisə̀s ə ke pfɨf sê ghənə nə, “E za kyàyn nyi, pɛ̀ àfùʼ nə vɨ̂yn kàʼa è nə̀yn nâʼà ghè sê ghɨ nə ghɨyn ə? 16E nyi za, ə è pə̀yn zhwite əghɨ efɨaʼa nə ghɨyn ə è kɛse nji afûʼ ətəynke ə fo sê ghɨə ndô ghè.”
Njisə̀s ə mɨ̀sè ngàyn nə zɨ̀yn, ghɨ ghɛ ə zɨtə̂ nyi ə piə nə kə Zhə̀fè tə pomə nə wùə mɔm kyi eghɛ zɛ ə ghɨə efɨaʼa nə ghɛ tè mɔ̀mə̀.
17Njisə̀s ə naynə̂ kə ghənə nyi ə pfɨfə nə, “Luʼ ə Ŋwàʼlè ə̀ Fèzhə̀ vɨnə tyə̀nə̀ nə ghe, ə ke pi nə:
18Ə za tyamte pi ndè ə echi epòlə̀ ə ndɛ nə zɨ̂yn, ə è pfɨ kəmtê ke ə mtimə̀ mtimə̀, mə ə ze pfɨ naʼapi ə ndè ətu, ə ze nyayle ke ndò vəyn.”
Ghɨə se saʼa pfɨf eghɛ kûmə̀ èmâʼ ə tâksè
(Matyò 22.15-22; Mâk 12.13-17)
19Njisə̀s ə mɛ̀ mɨ̀sə̀ ngàyn nə̂ zɨ̂yn, tyə̀ynsè sə esaʼse yî ghə̀ ghɨ ekɔʼsə nə eshyə̀ ə ngaŋtəghe ə ke kyiə kə ndò nə è fè mɛ̂ zâ kûmə̀ kə ghənə tè se mɔ̂msə̀ se kyiə vəyn kè ashìŋə̀ nə kɛ ə fɨnə fânə̀ kə əshi ə ghɨ̀ə. 20Ghənə ndə̀mə̀ eshi ə vəyn ewiyn ə fɨnə ndâʼà əghɨ ə tomə ə vəyn epàm nə ghe ə kaŋa kyaʼà kə ghe nyi əghɨ echûŋə̀, sè zɨtə̂ kə è pi ghɛe kə ə ko vəyn ə fo sê wùə endaʼ ə Lûm vɛ ə è tè saʼa pâs endaʼ nə kɛ. 21Ghənə ə piə sê vəyn nə, “Tyə̀ynsè, ghàs nə̂ ke nə ò wàmnə̀ kə səmɔʼ, zaʼlə̂ kə əghɛ ghɛ ə ghe nyi səmɔʼ, tyə̂nə̀ va nə wùə tsɛ̂ ndò vîvè, lotə̂ sô zaʼlə̂ kə tèsaʼ tə Fezhə̀tè kə te nyi. 22Saʼa e nə̂ pomə̂ nə ghâsènì ə mâʼà tâks sê fɔ̀yn è ghaʼa ə endaʼ ə Lûm mə mə ze pomə̂ va ə?”
23Kè sə ashìŋə̀, Njisə̀s ə ko etɔf ə ghənəè ə se pi nə, 24“Ghàyn tyəyn pə̀yn èkɛ akasve sê mi nyi.” Ghənə ə tyə̂nə̀, è və pfɨfə nə, “Ə nyi anyɨ̂ŋsè ekyàʼ ə ndeke ətəyn nyi è zəze ə?”
Ghənə piə nə, “Ə nyi ekyâʼ ə fɔ̀yn e ghaʼa ə endaʼ ə Lûm è zə ə vəynze.”
25Njisə̀s ə se pi nə, “E za nyi nə, ghàyn nə fo kə efɨa ə fɔ̀yn sê fɔ̀yn, fo kə efɨa ə Fezhə̀e sê Zhə̀fè.”
26Ze ə ghaʼa ghənə, ghənə tàʼa fe eghɛ se kyiə vəyn əfetə̂ynè ə̀ ghɨ kûmə̀ zəynze. Choze ə zomə ghənə, ghənə kɨmə̂ kə mɔŋ.
Ghɨə Sandùsîə pfɨf eghɛ kûmə̀ ezômə̀ ekwue
(Matyò 22.23-33; Mâk 12.18-22)
27Ghɨə Sandùsîə ə pə̀ sê Njisə̀s, ə nyi ə̀ghɨ ghɛ ə ghe pomə va nə wùə tə zômə̀, ə pfɨfə sê vəyn nə, 28“Tyə̀ynsè, piə Mosîs tè nyàʼ sê ghâsènì nə, ‘Ə va wùə kwu, kyi zhwi, pîza kyi va ghɔnə, ə ànyìə wùə è kwuə nji zhwìə kwu ətəyn, ə yî vəyn piə ghɔnə sê ànyìə vəyn ve kwuə nə vɛ’ ə? 29Ghɔ nyi əmɔ̀ʼɔ̂ tè nyi, əsɛ̀mbɛ̂, və shi ə njiə zhwi ə kwuə, kyi va ghɔynghe. 30Tsɨ̀m ə̀ vəyn ə njiə wùzhɔyn ətəyn ə fɨnə kwuə kəpi zâ. 31Kùmteke ə fɨnə njîə wùzhɔyn ətəyn ə fɨnə pɔŋɔ kwuə kəpi za, kyi va ghɔynghe. Ghənə əkɨ̂m ə tə njiə wùzhɔyn nə vɛ ə kwutə̂ kə nyi ə mɨ̀sə̀ kyi va ghɔynghe, 32tsɔ̀fə kə nâʼà wùzhɔyn ətəyn pɔŋ kwu. 33Ə tə nə̂ ə nyi etuʼ nə vɛ ə zômə̀, ə wùzhɔyn ətəyn ə nyi zhwiə ndè, kûmə̀ nə ghɔ nyi nə ghɨ̂yn tè kyi kè vəyn sə zhwìə ghɨ̀ əkɨ̂m ə?”
34Njisə̀s ə piə sê ghənə nə, “Ghɨ mbiə zôyn nə̂ njiə ə̀zəyn, pomə̂ ə̀ndômnè, 35pîza ghɛ ghe kwəynə se nə nə̀yn se ə̀ nyi etuʼ nə vɛ, ezhoghɛ ghɨ zômə̀ va sə nji ezəyn pi se pomə̂ ə̀ndômnè. 36E tə nə̂ ə ze ə nyi nyî kûmə̀ nə ghənə tə nə̂ ə fɨnə kwuə va. Ghənə tə nə̂ ə nyi kepî eghɨ kə setsì, fɨyn nyi ə̀ghɔ Fezhə̀ kûmə̀ nə ghənə ə zòmə̀. 37Naʼapi Mosîs ə tə tyəyn ghɛe nə zɨ̂nə̀ nə ə ndwisə̀ ndò ghɨə ekwu elùʼ ə Ŋwàʼlè ə̀ Fèzhə̀ vɛ ə ve wâmnə̀ kûmə̀ fèkâʼ fɛ ə wuse tè pɛ ətəyn zâ. Ə nyi elùʼ ə ŋwàʼlè nə vɨ̂yn mə è və tɔŋtê Pɛ̂ Zhə̀fè nə Zhə̀ fə ə Aplàghâm è Azɨ̀k è Njàkɔ̂p tè kɔʼsə. 38Zhə̀fè va chi Fèzhə̀ fə ghɨə ekwutəghe, fe nyi Fezhə̀ fə ghɨ̀ ghɛ ə ghe ndamə kûmə̀ nə fe tè nyi Fezhə̀ naʼapi sê ndè, ə wùə nə vɛ nyi mə è və ndam faŋ.”
39Njisə̀s ə wàmnə̀ mɨ̂sè, tyə̀ynsè sə esaʼ shise ə piə sê vəyn nə, “O wàmnè kè nâʼà achûŋ ə tyə̀ynsè.” 40Ghənə ə piə za, nâʼà wùə èmɔ̀ʼ ə tàʼa fɨnə mɔ̀msè se pfɨf eghɛ sê vəyn. (Matyò 22.41-46; Mâk 12.35-37.)
41È və se pfɨf sê ghənə nə, “Wùə za kàʼa ə è fɨyn pi nə wùə vɛ ə nyi mə chɔʼ ndəm tè nyi va Ndàfît ə? 42Piə nâʼà Ndàfît piə ə ŋwàʼlè ə sè Njàŋ nə: 43se zaʼâ ashîŋə̀ kɛ M tə nə̂ ə o tsəle pàyn sɛse è ghol ghɛghe.’ 44Ə za tè se nyi mə Ndàfît nə̂ tɔŋtə̂ vəyn nə Pɛ̂pɛ, è və fɨyn nyi zàyn vayn sê Ndàfît ə?” (Matyò 23. 1-36; Mâk 12.38-40.)
45È və tè piə è wàmnə̀ sê chùmtè epàm sə vəynse ə wàmnə̀ endom kə naʼapi ndè zɨ, ə piə sê ghənə nə, 46“Ghàyn e tɔ̂ʼnə̀ ghâynghə̀ tyə̀ynsè sə alàŋ sɨ̂nə̀. Ghənə nə̂ kɔ̂ŋɔ̀ sə̂ kwîə tsɛ̂ è tàlase, se ghaʼlə̂ kə nyi, ə̂ fɨ ndùə afàf ghɨghe nyɨŋə pə̀ tɔŋtə̂ ghənə, ə̂ ndùə ə sendɛ sə atsɨ̀yntese, ghə kɔʼɔ tsɨsə̂ kə əshi, ə̂ ndùə elùʼ azhi, ghə tè kɔ̂ŋɔ̀ kə se kɔʼɔ tsɨsə̂ elùʼ ə engaŋtəu. 47Ghənə e kyiə fiə èfɨa ə zhwiə kwuve, kaŋa tsə̂mə̀ tètsə̂m te tyâtè se tyə̀yn ewiyn. Zhə̀fè tə tsə̀fsə̀ ghənə nâʼà sə ŋaŋ.”
Currently Selected:
Lûk 20: bfm
Highlight
Share
Copy
Want to have your highlights saved across all your devices? Sign up or sign in
©2022 CABTAL