Lûk 19
19
Njisə̀s yî Sàkyə̂
1Njisə̀s ə ndùə njiə ə Njèlikò sè tɔynə̂ tsɛ̂. 2Wùə viu e nyi fuə tə̀ʼ, e tɔŋtə̂ nə Sàkyə̂, ə̀ nyi àtu ə ghɨ̀ ghɛ ə ghe tənə tâksè, kyi ekɛ nâʼà àchûŋ. 3È və sè mɔmsè se fe Njisə̀s, fɨmə se fe kûmə̀ nə ghɨə tè tsɨ̀ə, è və fɨnə tɨmsə̂. 4È və nyɨŋə ndùə əshi ə kɔʼɔ etûə fèkàʼ fə sycamòfè kə Njisə̀s pə̀yn ə è piə è tsɛ̀ ndò ə è fe kûmə̀ nə Njisə̀s tè ndùə se tsɛ̀ èndom fu. 5Njisə̀s ə pə̀ tânə̀ fu ə naynə̂ kɔʼsə̂ etûə fèkàʼ fɛ ə Sàkyə̂ tè nyi ətəyn ə piə sê vəyn nə, “Sàkyə̂, zàŋse tso pə, m kyi se pɨəyn ə ghò ndɛ ndàyn.”
6È və zàŋsè tso ndùə nyi è saŋnê ə se njiə ndù è Njisə̀s ə və ndɛ. 7Ghɨghe ə fe sè tɨmnə̂ zɔ̂, piə nə, “È kotə̂ pìə wùə əghɛ piə, səʼə kə èmô ə və ndɛ.”
8Sàkyə̂ ə nə̀ ə ndwìə tyəmə̂ ə pìə sê Pɛ̂pɛ nə, “Fekə, Pɛ̂pɛ, m chyâtə̀ èfɨa vɛ ə m kyi ghasè ghɨafɨfə kè eghɨ, ə̀ fɨyn nyi mə mə lesê wùə ə fiə àfɨa ə vəynke amɔ̀ʼ, ə m kɛse fo ekwàʼ.”
9Njisə̀s ə piə sê vəyn nə, “Ghɨə ndɛ fâ ə zhi fɨ ndàyn. Ə̀ vɨ̀nə nyi kepî va Aplàghâm. 10Va Wùə te pə̀yn se kyiŋə əghɨ ghɛ ə ghe njise se sɔ̀sè əghənə.”
Ə ngàyn kûmə̀ ekɛ
(Matyò 25.14-30)
11Ghɨ tè pa zɨtə̂ kə èwâmnè ə Njisə̀s nə zɛ, è və mɛ̀ ngàyn sê ghənə kûmə̀ nə è tè se paʼsə̂ ndùə ə Njèlusalɛ̀m, ghənə tè kwâʼtə̀ kə nə Zhə̀fè nə̂ zhə̂tə̀ se saʼ efɔ̂yn ə fəynfe kè sə ashìŋə̀ nə kɛ. 12Njisə̀s ə mɛ̀ ngàyn nə zɛ̂ ə piə nə, “Va tɔʼ vîvè tè ndùə elùʼ viu, ghaf ətəynke e tyàfə̀ kə nyi, nə ə fo tyaʼa ə è kɛse pə̀yn ə è və saʼa àpâs endaʼ ə ghənə̂kè, 13ə tɔŋnə̂ əghɨ efɨaʼa ə vəyn ghe eghɨm se chyâtè ndùə ə kam ekɛ èmɔ̀ʼ èmɔ̀ʼ sê ghənə ə piə nə ghənə nə nə̂ pə̂ʼlè è ekɛ nə vɛ se zaʼâ etuʼ vɛ kə zhi kɛse pə̀yn. 14Ə̀ tè nyi za, ghɨ apàs endaʼ fu e panə̀ vəyn. È və ndò za, ghənə tomə nə ə ndù pi elùʼ vɛ ə è tè ndùə zə ətəyn nə ghənə kɔ̂ŋɔ̀ va nə è və saʼa ghənə.
15È və kɛsə̂ pə̀ mə ə ndù fo tyaʼa nə è və saʼa əghɨə vəyn ghe ə ke pi nə ə tɔŋne ghɨə efɨaʼa ə vəyn ghɛ ə è fo kɛu sê ghənə za, ə ghe pə̀yn ə è zɨ nə ghənə te zɨse nə̀yn pə̂ʼlè, pòlofis e nyi ghè ə. 16Və shi ə pə̀ ə piə nə, ‘Pɛ̂, kam zɛ̂ zɛ èmɔ̀ʼ ə tə pə̀ è pòlofis, ə nyi sèkam èghɨm.’ 17È və piə sê wufɨ̀aʼa ətəyn nə, ‹Ò nə̀yn kè nâʼà àchûŋ! Ò nyi ke nâʼà wufɨ̀aʼa ə èchùŋ! Ò tə nə̂ ə ò saʼa sètə̀ʼ seghɨm zôyn kûmə̀ nə mə fe nə ò nə̂ ke se tɔ̀ʼnə̀ è fɨ̂atə̀ mə ètətə̂m.› 18Kùmtè ə wùə fɨaʼake ə pə̀ ə piə nə, ‘Pɛ̂, kam zɛ zɛ èmɔ̀ʼ ə tə pə̀yn è pòlofis, ə nyi sèkam sè tâyn.’ 19È və piə sê vəyn nə, ‘Ò nə saʼa sètə̀ʼ se tâyn.’ 20Vəmɔ̀ʼɔ ə pə̀ ə piə nə, ‘Pɛ̂, ə̀ nyiə nyi kam zɛ zɛ m tè koyte ndəm ke apàs afɨa, 21kûmə̀ nə m tè nyîə fànə̀ ghò. Ò nyi za kwə̂mə̀, ke se nji afɨa ndɔ̀ʼɔ ò ndəm, ke se kwiə mə ò tè pâʼà zho.’ 22Va tɔʼ vɛ ə piə sê vəyn nə, ‹M saʼa ghò ke e ndom vɛ ə ò wàmnè ətəyn. Ò nyi ke nâʼà wufɨ̀aʼa ə pi! Ò za tè se ke ke nâʼà nə m kwə̂mə̀ ndò, njiə ndɔ̀ʼɔ m ndəm, kwiə ndɔ̀ʼɔ m zho, 23ə̀ za tè nə̀yn ghè nə kə ò ndə̀m kɛ vɨmve ə ndɛ ekɛ, m nə piə m pə̂ se nji, m nji paʼsê è pòlofis ə?› 24È və se pi sê ghɨ ghɛ ə ghe tè tyəm paʼsê fu nə, ‘Ghàyn fi kam ətəyn sê vəyn ə fo kwəynsê sê wùə vɛ ə è kyi kam seghɨm zâ.’ 25Ghənə pfɨfə sê vəyn nə, ‹Kepî sê vəyn ə pɛ̂, mə è se kyi sekam eghɨm ə?› 26‹M piə sê ghàyn nə, ə̂ kyi pi ndè, ə fo kwəynsê sê vəyn, ə lâʼà pî ndè, ə fi naʼapi ketətə̂ kɛ ə è kyi. 27Sê pàyn sɨmse sɛ ə se kyîə tə nə kə ə fo tyaʼa nə mə saʼa ghənə zâ, ghàyn nji pə̀yn è ghənə, ə zhwite ke ə mìə shi fayn.›”
Kə Njisə̀s tè nji ə Njèlusalɛ̀m kə fɔ̀yn
(Matyò 21.1-11; Mâk 11.1-11; Njɔyn 12.12-19)
28Njisə̀s ə wàmnə̀ nyi ə tsɛ̀ ghɨghe əshi sè kɔʼɔ ndùə ə Njèlusalɛ̀m, 29ə nə̀ ndùə paʼsə̂ ə sètə̀ʼ sɛ ə tè tɔŋtə nə Petfàs è Petanì, ə pfɨ̀ynə̀ sè Olìfs ə tomə chùmtè epàm sə vəynse, se pɛ̀, 30ə piə nə, “Ghàyn nji ndù əfètə̂ tə̀ʼ fayn ə ghàyn əshi. Ghàyn nə piə njiə ndùə ndò, ə ghàyn fe va njàkâs kə ə faŋa, mə wùə pâʼà tyəm kɔʼ etu ətəyn. Ghàyn fe, ə ghàyn zhə̀yn pə̀yn è zə̂yn fayn. 31Ə ghàyn piə zhə̂nə̀ ndò, ə pfɨfə pîndè nə ghàyn zhə̀nə̀ se ghaghe è zə̂ynzè ə, ghàyn ə pìə nə, ‹Pɛ̂pɛ kyi eghɛ se nə̀yn è zə̂yn.›”
32Ghɨ nə ghɛ ə è tom zâ ə ndo ndùə, naʼapi ghè ə kyanə̂ kə za kə è fè pì. 33Ghənə ə ndùə ə piə zhə̀nə̀ ndò, ghɨ ghɛ ə ghe tè kyi nyàm ətəyn ə pfɨfə sê ghənə nə, “Kûmə̀ ghè ə ghàyn zhə̀nə̀ njàkâs ətəyn ə?”
34Ghənə piə nə, “Pɛ̂pɛ kyi eghɛ se nə̀yn è zəyn.” 35Kə ghənə pi zâ ə njìə pə̀ è zə̂yn sê Njisə̀s ə se lafsê ə zə̂ynzè è laf ə ghənə̂vè, ə kɔʼsə̂ Njisə̀s etu ətəyn. 36Njisə̀s e sè ndùə etûə nyàm nə zɛ, ghɨghe chɔʼtə̂ àlaf ə ghənə̂kè maʼà ndùə endom, è və tyàŋà ətu.
37È və paʼsə̂ ndùə ə Njèlusalɛ̀m sè tso ndùə ə pfɨ̀ynə̀ sè Olìfs, nâʼà anɔ̂yn ə chùmtè epàm ə vəynke àkɨ̂m e sè saŋnə̂ kə ndo, tsìtə̀ Fèzhə̀ nâʼà è kyə̀ se tɛse kûmə̀ əghɛ e kanə ghɛ ə ghənə tè se nyi mə ə fe. 38Ghənə tè piə nə, “Pɔsê e nyi sê fɔ̀yn vɛ ə è pə̀yn sə ezə ə Pɛ̂pɛze. Pɔ̂ynè e nyi ekwùtwəyn. Zhə̀fè kyi epomsê elùʼ vɛ ə ve ngaŋte kwəyn!”
39Ghɨ Falàsî əmɔ̀ʼɔ̂ kə ghe tè kwiə kəpi anɔ̀yn nə kɛ ə piə sê Njisə̀s nə, “Kɨmse chùmtè epàm sɛ sɨ̂nə̀ ə Tyə̀ynsè.”
40È və piə sê ghənə nə, “Ə ghənə kɨme pi ndò, ə nâʼà əchi ə kɔʼsə̂ kə Fèzhə̀ nyi.”
41È və nə̀ ndùə sè paʼsə̂ mɨ̂sə̀ ndùə ə tə̀ʼ ə̀ Njèlusalɛ̀m ə naynə̂ ndùə tə̀ʼ ətəyn, səynze ə ko vəyn, è və chîə pə̀ kə ndò, 42ə piə nə, “Ə fo ndè ghàyn, ghɨə Njèlusalɛ̀mə̀ ə ke eghɛ zɛ ə ze pə̀ è pɔ̂ynè ndàyn ə, zôyn nyi mə ghàyn vâyn kàʼa ə ghàyn fe! 43Tuʼ mê pîəm paʼsə̂ pə̀ ndò sê ghàyn. Pàyn saynse nə̀ tɨmə mbàyn, ə è kyɨ̀ŋ ngɨa ghàyn ə fɨyn ghàyn kə epɨ̀as èkɨ̂m, kɨyte ke ndo ghàyn. 44Ghənə tə kəʼsə̂ ghàyn kè əkɨ̂m paʼsə̂ kəpî è ghɔyn ghɛ ə ghe nyi ə ghàyn ə sendɛ. Chie tə faŋa va etuə zhize fâyn kûmə̀ nə ghàyn pâʼà fe ke shîŋə̀ kɛ ə Zhə̀fè nə̂ pə̀ se pɔsê ə ghàyn ətəyn.”
Njisə̀s ə nji ə Ndɛ Ètsə̀mə
(Matyò 21.12-17; Mâk 11.15-19; Njɔyn 2.13-22)
45È və nə̀ ə ndùə njiə apɨəyn ə Ndɛ Ètsə̀məke sè chûmə̀ fɨsə əghɨ ghɛ ə ghe tè pəʼlə fɨau əfètə̂ ətəyn, 46piə sê ghənə nə, “Ə nyaʼ ə Ŋwàʼlè ə̀ Fèzhə̀ nə, ‘Ndɛ zɨmè tə nə̂ ə nyi Ndɛ̂ Ètsə̀mə’; pîza ghàyn ghe ə kɛse zôyn sə elùʼ ə ghɨ chɔŋɔghe.”
47Njisə̀s ə zhə̀tə̀ sè zɨsə̂ zaʼlə̂ ə Ndɛ Ètsə̀mə kè tuʼmè m̀kɨ̂m. Ngàŋ sə ndɛ Fèzhə̀ seghaʼâsè yî tyə̀ynsè sə esaʼse è chəʼ sə endaʼse e sè kyiŋə endom se zhwiə vəyn, 48pîza ə tàʼa fe eghɛ zɛ ə kə ghənə tsɛ̀ epam ətəyn se ko vəyn kûmə̀ nə ghɨ tè zɨə kə eghɛ zɛ ə è pi.
Currently Selected:
Lûk 19: bfm
Highlight
Share
Copy
Want to have your highlights saved across all your devices? Sign up or sign in
©2022 CABTAL