Njɔyn 1
1
Kyə̀ tè kə̀mne wùə èwàmnə
1Ə̀ tè nyi ə zhə̀te, tsɔ̀fə kə Zhə̀fè fɛte mbi, Kyə̀ ə̀ Fezhə̀ tè kâyne nyi ndò. Kyə̀ ə̀təyn tè nyì yî Zhə̀fè. Kyə̀ nə zɛ tè nyi Fezhə̀. 2Ə̀ tè nyi ə zhə̀te, Kyə̀ ə̀təyn tè nyi luʼ emɔ̀ʼ yî Zhə̀fè. 3Tɔynə̂ ə Vəyn, Zhə̀fè ə fɛtə̂ èfɨa èkɨ̂m. Ə tè va sê Kyə̀ nə zɨ̂yn mə Zhə̀fè tè pâʼà fɛtê nâʼàpî ghè vɛ ə nyi mə ə fɛtê ə mbi èkɨ̂m 4Ndam ze ekɨ̂m ndô pə̂ sê Kyə̀ ə̀təyn, ə̀ nyi èndam ətəynze ə ze pə̂yn èpayn sê ghɨ ghəkɨ̂m. 5Payn ətəyn panə əfètə̂ àlɨm, mə lɨm ətəynke vayn kàʼa ke ndɨmse zəynze.
6Zhə̀fè ə̂ tè tom ndùətom ə̀ vəyn, e tɔŋtə̂ nə Njɔyn, 7è və pə̀ tsâ sê ghɨə kûmə̀ èpayn nə zɨ̂yn kə ghɨghə kɨ̂m zɨ tom ə̀təyn ə pomə. 8Njɔyn è ngɨŋə̂ ə̂ vəyn tè vachi èpayn nə zɨ̂nə̀. È tè pə̀yn tsâyn kûmə̀ èpayn ətəynze. 9Kyə̀ nə zɨnə tè nyì kàyntè èpayn zɛ ə ze tyə̂ payn sê ghɨ ghəkɨ̂m. Ə̀ tè nyi Vəyn vɛ ə è tè pəyn ə mbi.
10È tè nyi ə mbi, pî kə Zhə̀fè tè fɛtè mbi yî Vəyn, mbi ə tàʼa fe kê ə Vəyn. 11È və pə̀ ə tə̂ zə Vəyn nə endaʼ pîza, ghɨə Vəynghe ə tàʼa fe kê ə vəyn. 12Pîza, sê ghɨ mɔʼɔ ghɛ ə ghe tè fi ndzɨsê Vəyn ə pomə sê vəyn, è və fo àtyaʼ nə ghənə ə nyi ə̀ ghɔyn ə Fezhə̀ghè. 13Ghənə tè pâʼà pə̀yn chi ghɔ Fezhə̀ endom vɛ ə wùə èwàmnə piə vayn ətəyn, kə ə̀ nyi ə̀ghɔ pɨ̀a wùə m̀sɔ̀ŋə; Zhə̀fè è ngɨŋə̂ Vəyn tè nyi pɨ̀a ə̀ ghənə̂.
14Kyə̀ ə̀təyn ə kɛsə̂ sə wûə èwàmnə, ə ndamə ə ghâsènì ə fètəyn. È tè nyi mə È və lwiyn è fùʼkè, ə tyə̀nə̀ kə səmɔʼ nyi kûmə̀ Fezhə̀. Ghâsènì ə fe èpomsê ə vəynze, epomsê zɛ ə è fi kə vayn vɛ ə̂ tè nyì ke vəyn sê pɨ̀a.
15Njɔyn ə tə wàmnè kûmə̀ vəyn. È tè chì fɨ̂ pə̂yn nə, “Ə̀ vɨ̂nə nyi vɛ ə m tè wàmnə kûmə̀ vəyn kə m tè pìə nə, ‹Wùə pə̀ ndò ə mi epàm, pîza tsɨ̂ə tsɛ̂ mi kûmə̀ nə È tè nyì chi ndò tsɔ̀fə kə ə piə mi.›”
16Ə Vəyn afùʼ kɛ ə ke nyi mə kə lwiyn kwəyn, È və pɔsê ghâsènì əkɨ̂m, ə fo ghâsènì è pɔsê əte kyì əte kyì. 17Zhə̀fè tè fo alâŋ tɔynə̂ ə Mosîs, pîza fùʼkè è səmɔʼ ə pə̀ tɔynə̂ ə Njisə̀s Klâys. 18Wùə pâʼà tyəm fe Zhə̀fè. Ə̀ nyì ke Vayn emɔ̀ʼ vɛ ə è tè nyi kepî kə Fezhə̀, mə È nyi ə Pɨ̀a etipì. Ə̀ nyì ke Vəyn vɛ ə è nyi mə è və fe Zhə̀fè. È və nə̀yn nə ə ke Fèzhə̀.
Njɔyn Foə M̀mò ə kwiynse nə vachi vəyn vɛ ə kɨmne ndə̂m
(Matyò 3.1-12; Mâk 1.1-8; Lûk 3.1-18)
19Ghɨ èghaʼâ ə Njûs ghɛ ə tè nyi ə Njèlusalɛ̀m tè tom əghɨ ə kɔʼsə nə eshyə̀ ndɛ̂ ètsə̀mə, è ghɨ esas ə ndɛ Levìghè nə ndu pfɨf sê Njɔyn Fo M̀mò nə, è nyi nde ə.
20Njɔyn tè pâʼà tə se pə̀ynsè, pîza ə wàmnə̀ fɨsə̂ ə ndayn è chichi pîə nə, “Ə̀ vachi mi vɛ ə chɔʼ ndə̂m.”
21Ghənə ə fɨnə pfɨfə kwəynsə̂ sê vəyn nə, “Ò se nyi nâʼà ndè? Ə̀ nyì gho Èlanjà mə?”
Njɔyn ə pə̀ynsə̀ sê ghənə nə, “Ngaŋ.”
Ghənə ə fɨnə pfɨfə sê vəyn nə, “Ò nyi Fɨ̀aʼtè zɛ ə ghàs lɨmtə mə?”
Njɔyn ə pìə nə, “Ngaŋ.”
22Ghənə ə pìə nə, “Tsàyn wùə vɛ ə ò nyi vəyn sê ghàs. Ghàs nyì se kɛsə ndù è pə̂ynseke sê ghɨ ghɛ ə tom ghàs. Ò pìə nə ə̀ nyì ghô ndè ə?.”
23Njɔyn ə pə̀ynsə̀ ghənə ə tsà kə fɨ̀aʼtè Èsayà tè pi nə,
“M nyi kyə̀ wùə vɛ ə è tɔŋə pîə elùʼ ashishive za nə,
‹Ghàyn nəyn ə ndom ə Pɛ̂pɛve ə nâynə̀ kə È kwi ətəyn.›”
24Ghɨə nə ghɛ ə tè pə̀yn sê Njɔyn nyi mə ə̀ tè tom əghɨ ə Falàsîə. 25Ghənə ə pfɨfə kwəynsə̂ sê Njɔyn nə, “Ə ò se va vɛ ə chɔʼ ndə̂m, va Èlanjà, va fɨ̀aʼtè, ò sè fo m̀mo mə ghè mə?”
26-27Njɔyn ə pìə nə, “M fo m̀mo sê ghàyn è môm, pîza ə ghàyn ə fètəyn, ə̀ tyəm wùə mə ghàyn keva. È pə̀ ə mì epàm, pîza m tsɔ̂fə̀ kwəynə̂ va se zhə̀nə sekwɨ̀l sə sepfɨ sə vəyn sə ghòlse.”
28Nâʼà ə̀ghɛ nə ghɨyn əkɨ̂m tè kyàynə endaʼ ə Petanìzè, engyinə̂ tsô èghaʼâ Njondàynzè elùʼ vɛ Njɔyn tè fo môm ətəyn.
Ə Njisə̀s, Ndzè Fèzhə̀
29Tuʼve ə zo Njɔyn ə fe Njisə̀s è pə̂ se vəyn, ə pìə nə, “Ə̀ vɨ̀nə nyi Vâ Ndzè ə̀ Fezhə̀. Ə̀ nyi Vəyn vɛ ə è njì tsɨsè pisə ghɨ̀ ə mbise! 30Ə̀ nyi vəyn vɛ m tè wàmnə̀ sê ghàyn kûmə̀ vəyn kə m tè pi nə, ‘Wùə nyiə pə̂ ə mì epàm, pîza È nyiə tsɨə tsɛ̂ mi, kûmə̀ nə è tè kàyne nyi ndò tsɔ̀fə kə piə mi.’ 31M tè ke va Vəyn, pîza mə pə̀ fo m̀mo è môm endom se nə̀yn nə ghɨə Isìlâyghè ke Vəyn.”
32Njɔyn ə tsà èghɛ zɛ ə ze tè kyayn: “M fe Sèzuʼ sə Fezhə̀sè se tso pə̂ ekwùtwəyn kə akwɨ̀l, ə pə̀ masə̂ ə və atu nyi yî vəyn. 33Pî kə m tè nyìəm ke va nə ə̀ nyi Vəyn. Pîza, Zhə̀fè kə Fe tè tom mi nə m fo môm è môm, tè nyi mə È və pì sê mi nə, ‹O tə fe ə Zuʼsə Fezhə̀sè tso pəyn ə se masə̂ ə wùə ətu, ə̀ nyi Vəyn vɛ ə È fo môm è Zuʼse ŋwaʼase.›” 34Mə fe kə ghɛ nə zɨ̂nə̀ kyàyn, sè tsâ sê ghàyn nə, “Ə̀ vɨ̀nə nyi Va Fèzhə̀.”
Chùmtè èpàm sə Njisə̀s sə shise
35Tuʼve ə zo kwəynsə pə̂, Njɔyn e tyəm fu yî chùmtè èpàm sə vəynse sepɛ̀. 36È və fe Njisə̀s kə è tsɛ̀, ə pìə sê ghənə nə, “Ghàyn nayne kə, ə̀ tsɛ̀ Vâ Ndzè ə̀ Fèzhə̀ za.”
37Chùmtè èpàm sə vəyn sɛ sèpɛ̀ ə zɨə èghɛ zɛ ə è pì ə zhə̀tə̀ chûmtə̀ Njisə̀s. 38Njisə̀s ə kə̀mnə̀ èwiyn, ə fe kə ghənə chûmtə̀ Vəyn, ə pfɨfə nə, “Ghàyn kyiŋə ghè?”
Ghənə ə pə̀ynsə̀ nə, “Ò ndamə ghayn ə Lapày?” (Lapày zɨ̀nə tyə̀nə̀ nə, Tyə̀ynsè.)
39È və pìə sê ghənə nə, “Ghàyn pəyn fe èluʼ vɛ ə m ndamə ətəyn.” Ə̀ tè se nyi mə ə̀ kɔʼɔ ndûə tèzhwi tekyàʼ èchwì. Ghənə ə ndùə yîghə̀ ghənə ə fe èlùʼ vɛ È ndamə ətəyn, ghənə ə faŋə fu se zaʼâ kə lɨma fɨm.
40Wùə èmɔ̀ʼ əfètə̂ ə̀ghɨ nə ghɛ tè nyi Andɨ̀lò, ə ànyìə Shimuyn Pità. 41Kè sə ashìŋə̀, è və kyiŋə ànyì ə̀ vəyn ə pìə sê vəyn nə, “Ghàs ə fe sɔ̀zà mə za nyi vɛ ə nyi mə ə chɔʼ.’” (Mə za nyi Klâys) 42Andɨ̀lò ə ke njìə ndùə è Shimùyn sê Njisə̀s.
Njisə̀s ə naynə̂ vəyn ə pìə nə, “Zə zɛze nyi Shimùyn, ə va Njɔyn, pîza ə nə̀ nə̂ ə tɔŋtə̂ ghò zôyn nə Sefàs.” (Sefàs è Pità nyì ke è zə èmɔ̀ʼ, ze tyə̂nə̀ nə, anayn.)
Njisə̀s ə njì Filìp yî Nàtanyèl sə sechùmtè èpàm sə vəynse
43Ə fetuʼ fə mɔ̀ʼɔfe, Njisə̀s ə chɔʼnə̂ se ndù apàs endaʼ ə Ngalìlîkè. È və fe Filìp ə pìə sê vəyn nə, “chùmte Mi!” 44Filìp tè nyi mə è ndò ə tə̀ʼ ə̀ Pètsayndà kèpî ə tɔ̂ŋ zɛ ə Andɨ̀lò yî Pità tè ndamə ətəyn. 45Filìp ə fe Nàtanyèl ə pìə sê vəyn nə, “Ghàs ə fe wùə vɛ Mosîs tè nyaʼ kûmə̀ vəyn ə ŋwàʼlè àlâŋ nə, ə̀ nyi kepî vɛ ə fɨ̀aʼtèsè tè nyaʼ kûmə̀ vəyn. È nyi Njisə̀s vɛ ə è ndò pə̂yn endaʼ ə Nazalɛ̀tzè, mə nyi vâ Njosɛ̀f.”
46Nàtanyèl ə pfɨfə nə, “Ghɛ echûŋ zhîze kaʼa ə ze fɨ ə Nazalɛ̀t ə?”
Filìp ə pə̀ynsə̀ nə, “Pə fe.”
47Kə Njisə̀s fe Nàtanyèl e pə̂ se Vəyn, È və wàmnə̀ kûmə̀ vəyn ə pìə nə, “Ə̀ vɨ̀nə nyì ke nâʼà kàyntè ə̀ wùə Isìlây səmɔʼ pìə nə kaŋke va ətəyn.”
48Nàtanyèl ə pfɨfə sê vəyn nə, “Ò kwì zayn sə̂ ke mi ə?”
Njisə̀s ə pìə nə, “M fə̂ fe ghô ashìŋə̀ kɛ ò fə tsɨs esas ə fekàʼ fə sefîkfè za tsɔ̀fə kə Filìp pəyn tɔŋɔ ghô.”
49Nàtanyèl ə pə̀ynsə̀ nə, “Tyə̀ynsè Ò nyì ke nâʼà Vâ ə̀ Fèzhə̀! Ò nyi fɔ̀yn ə̀ Isìlây!”
50Njisə̀s ə pìə nə, “Ò pomə ke kûmə̀ kə m pi nə mə fê fe ghô ashìŋə̀ kɛ ə ò fe tsɨs esas ə̀ fekàʼ fə sèfîksfè za mə? Ò nə̀ fe ə̀ghɛ ə mɔ̀ʼɔ, ə ghə tsɛ̂ ghɨ̂yn.” 51È və pìə sê ghənə nə, “M pîə sê ghàyn ke nâʼà səmɔʼ nə, ghàyn tə fe kə kwùtwəyn chwî, ə tsì sə Fezhə̀sè ə tsɛ̂nə̀ kə nyî kɔʼɔ, tso, tso pə̂ ə Vâ wùə ətu.”
Currently Selected:
Njɔyn 1: bfm
Highlight
Share
Copy
Want to have your highlights saved across all your devices? Sign up or sign in
©2022 CABTAL