Maatiusiup Aglangit 14
14
Juanasi Paaptitsirijiup Tuquninga
Maakusi 6:14-29; Luukasi 9:7-9
1Taissumani Iruutasi Galiliami aulatsijiujuq Jiisusimik tusaqtitaugami quviagijauninganik. 2Angajuqqaaqutini uqautivait, “Juanasi Paaptitsirijillariunasugivara, tuqungajunit makittuviniq; taimaimmat pijunnarniqaliqpuq kamanaqtulinirnik pinasuarunnarluni.”
3Tamatuma sivuningagut Iruutasiup Juanasi tigujauqulauramiuk, attungirlugu tigujausimavingmuaqtautilluniuk, taimailiulauqpuq Iruutiasi pijjutigillugu, qatanngutingata Pilippuusiup nulianga. 4Tamatuma sivuningagut Juanasiup Iruutasi uqautilaurmagu, “Tammallarikputit Iruutiasimik nuliaqtaarlutit!” 5Iruutasiup Juanasi tuqutautittumalauraluaqpaa, Juutilli sivuuragivait, Juanasimik nalauttaijiunasugiksingmata.
6Iruutasiup inuulirviksiurvingani Iruutiasiup paninga taanisiqpuq nalliunniqsiuriaqsimajulimaanut takunnaaqtaulluni, Iruutasiullu quviagimmarikpaa. 7Uqalauqpuq sulilariktinniaqtaminik sangutinianngitaminiglu, tunisivigijunnaqpagit sunatuinnarmik pijumajarnik.
8Niviaqsaaq anaanaminut apirilaurluni, anaanangata pijauqujanganik maligluni Iruutasi pijumavigivaa, uqarluni, “Maanna tunisivigilaunnga uvani Juanasi Paaptitsirijiup niaqunganik allirarmiitillugu!”
9Angajuqqaarjuaq quviasugunniiqpuq; angimmarigluni uqaviqqaugami takunnaariaqsimajut tusaatillugit, taassuma pijumajanga kajusititauquvaa. 10Taimaimmat Juanasi niaquiqtauquvaa tigujausimavingmi. 11Juanasiup niaqua allirarmiitillugu niviaqsaamut aittuutauvuq, niviaqsaap anaanaminuarutivaa. 12Juanasiup ilinniaqtingit tavvunngaramik, timinga aillugu annisivaat, iluvirlugu; tavvanngat Jiisusimuaqput tamatuminga uqautillugu.
Jiisusiup 5,000-nik Nirititsininga
Maakusi 6:30-44; Luukasi 9:10-17; Juanasi 6:1-14
13Jiisusiup tamanna tusaramiuk, tavvanngat umiakkut aullaqpuq inuqanngittumut inutuujaturluni. Inugasagjuat tusaramik, nunamingnit aullaqput malilirlugu pisuglutik. 14Jiisusi umiamit niugami inugasagjuanik takuvuq, ilatsugilirlugit, qanimajiangit aaqqikpait.
15Unnuktillugu ilinniaqtingita upakpaat uqautillugu, “Maanna unnulualirmat, tamannalu najuqtavut iglutaqarani; inuit aullaqtilaukkit nunalingnuarlutik immingnik niriniaqtamingnik niuvirniarmata.”
16Jiisusiup kiuvait, “Ukua aullariaqanngittut, ilissi niqiksanginnik tunisivigilauqsiuk.”
17Ilinniaqtingita kiuvaat, “Niaquujanik tallimainnarnik pitaqaqpugut, iqaluungniglu marruungnik.”
18Jiisusiup uqautivait, “Atii, taakkua qailauqsiuk.” 19Tavva inugasagjuat nunamut ivilingmut iksivaquvait; niaquujait tallimat iqaluuglu marruuk tigullugit qilangmut takusarluni, Guuti qujagivaa, niaquujait agguqpait ilinniaqtiminut tunillugit, ilinniatingillu inungnut tuniuqqaivut. 20Tamarmik nirivut naammaksillutik. Tavva ilinniaqtit iviujanik 12-nik tigusivut, amiakkunik agguqsimajunik taakkua tatatauvut. 21Angutit nirilauqtut 5,000 qanigijanganiipput, arnait surusillu naasaqtauqatautinnagit.
Jiisusiup Pisungninga Imaup Qaangagut
Maakusi 6:45-52; Juanasi 6:15-21
22Tavva Jiisusiup ilinniaqtini umiamut ikiquliqpait tasiup akianut ikaaqullugit sivunirmini, nangminirli Jiisusi inungnik aullaqtitsivuq 23inuit aullaqtittariiramigit, qaqqamut majuraqpuq inutuuluni tuksiarumalluni. Unnuktillugu tavvaniippuq inutuulluni; 24umialli nunamit ungasiktumiiliqput tasirmi, umiangat puukaqtammariliqpuq ingiulingnut; anurimut agguraramik. 25Ullaakkut siqirngujaq 3-lu 6-siullu akunninganiitillugu, Jiisusiup upaliqpait, imaup qaangagut pisugluni. 26Ilinniaqtit takugamik imaup qaangagut pisuktumik kappiasummariliqput, uqarlutiglu, “Tuurngaalunguna!” Nipituinnarmik ilangit nilliqput kappiasumut.
27Tavvainnarli Jiisusiup uqarvigivait, uqarluni, “Quaqsaanganasi! Uvangauvunga. Kappiasugasi!”
28Piitturuusi nilliqpuq uqarluni, “Ataniq, ivillariuguvit, imaup qaangagut ilingnut qaiqulaunnga.”
29Jiisusiup kiuvaa, “Qailirit!” Tavva Piitturuusi umiamit niulluni, imaup qaangagut pisuliqpuq Jiisusimut. 30Ikpigiummiliramiup anuriup sanngininga, kappiasuliqpuq, kivisillunilu imaanut nillirluni, “Ataniq! Piulinnga.”
31Tavvainnaq Jiisusiup isaglugu tiguvaa uqautillugu, “Ukpirnikiluaravit! Sungmaat qulaliqpi?”
32Tamarmik umiamut ikingmatik, anuri ikullaqpuq. 33Ilinniaqtingit umiamiittut saanganut paammaktiqput, uqarlutik, “Sulillariktumik Guutiup Irnirivaatit.”
Jiisusiup Qanimajunik Aaqqiksininga Ginisariitimi
Maakusi 6:53-56
34Tasirmik ikaaramik, nunaaqput Ginisaritimik atilingmut, 35inuit ilitaqsigamik Jiisusimik, tavvani qanigijanganiittut tamarmik uqaujjauvut qanimajullu tamarmik Jiisusimuarutivait. 36Inuit ilangit qinuvut Jiisusiup annuraangita sinaagutuinnarngunnit qanimajut aktuqsijunnaqullugit; Jiisusiup annuraangita sinaanik aktuqsijulimaat aaqqiktauvut.
Currently Selected:
Maatiusiup Aglangit 14: EAIBR
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible (Romanized) © Canadian Bible Society, 2022-2023.