Maatiusiup Aglangit 12
12
Sapatiup Miksaanut Apiqsuuti
Maakusi 2:23-28; Luukasi 6:1-5
1Tamatuma kinguningagut akuniuluaqtinnagu Jiisusi pisuliqpuq niaquujaksanik piruqsiivikkut Sapatiutillugu, ilinniaqtingit kaaktillugit, taimaimmat niaquujaksait piruqtungita nuvunginnik tigusiqattaliqput, piruqtunginniglu nirillutik. 2Paarisillu tamatuminga takugamik, Jiisusimut uqaqput, “Takugit, ilinniaqtitit taimailiuqtillugit Sapatimi atuqujaunngittumik atuqput!”
3Jiisusiup kiuvait, “Atuaqsilauqsimanngilasi Taivitiup piniarnirilauqtanganik, taissumani nangminiq unataqtuksaqutingillu kaaliqtillugit? 4Guutiup iglunganut itilauqpuq, nirillunilu Guutimut tunijausimajunik niaquujanik, piqujatigut nirijariaqanngikkaluarluni unataqtuksaqutingillu, tunirrusiqtitsijit nirijariaqaqtutuulaurmata taakkuninga niaquujanik. 5Uvvalu atuaqsilauqsimanngilasi Sapatiuliraangat tunirrusiqtitsijit tuksiarvigjuarmi Sapatiup piqujanganik suraivangmata? Taimaigaluaqtillugilli tamatuminga pasijaksaujjutiqanngilat? 6Uqautivassili tamaaniittuqaqpuq tuksiarvigjuamit anginiqsaujumik. 7Guutiup uqausinginni uqaqsimajut qaujimagussigik qanuq tukiqarmangaata, imailijut, ‘Nikagusungniq pijumajarivara, uumajunik tunirrusirniunngittuq.’ Taassuma tukinga tukisigussiuk, pasijaksaunngittunik pasijaksannguqtitsinasuarajanngilasi; 8Inuup Irninga Sapatimut Ataniungmat.”
Angut Nukiqanngittunik Aggalik
Maakusi 3:1-6; Luukasi 6:6-11
9Tavvanngat Jiisusi qimaruutigami, Juutit ukpirnirmut katimavingannuaqpuq. 10Takugit, tavvani angutitaqaqpuq nukiqanngittunik aggalingmik. Inuit ilangit tavvaniipput Jiisusimik akiraqturutiksamingnik pijjutiksasiurumallutik, taimaimmat Jiisusi apirivaat, “Piqujattinnik akiraqtuqpaa Sapatiutillugu inungmik aaqqiksijuqaqpat?”
11Jiisusiup uqautivait, “Nallisili qanuq pigajaqpaa siipiqutiqaqtuup, Sapatiutillugu siipiqutinga itiqsamut ilutujumut katakpat, tigulugu qavviqtinnasuarajanngilauk? 12Inuk qanuq siipimit pillariuniqsautigiva! Taimaimmat, piqujavut pitsiaqujivut Sapatiutillugu.” 13Tavva angummut nukiqanngittunik aggalingmut uqaqpuq, “Aggatit isaakkit.”
Tavva angutiup aggani isaakpait, aaqqitsiarlutiglu, iglungititut. 14Tavva Paarisit tavvanngat qimaruutilutik isumaksaqsiuqatigiiliqput qanuq Jiisusimik tuqutsijunnarmangaarmik.
Guutiup Pijini Niruaqsimajanga
15Jiisusi tusarami tuqutaunasuarnirminik, tavvanngat najuqtaminit qimaruutivuq; inugasagjuanillu maliktauvuq, qanimajulimaallu qanimmasinginnit aaqqikpait. 16Iniqtiqpait inungnut uqausirijaujumanani. 17Tamanna Jiisusiup piniarnirivaa nalauttaijuq Aisaiasikkut uqausiusimajut nalautsiliqullugit imailijut:
18“Takugit, tavva pijiga, niruaqsimajara, nagligijara, quviagitsiaqtaralu.
Anirnira tunilaaqpara taassumunga,
Uqausiqarumaaqpuq ajjigiiktitsiluni Juutiunngittunut.
19Aivaqatiqarumaanngilaq qaigalaarumaaranilu,
Aqqutini nipinga tusaajaujumaanngilaq.
20Nakatsijumaanngilaq ivigjuamik niungajumik,
Qamitsijumaanngilarlu qulliup maninganik paliliqtumik.
Sapilirumaanngilarlu ajjigiiktitsinirmik saalaqaqtitsilauqqaarani;
21Juutiunngittulimaallu atirmigut niriugijaksaqaliqtittumaaqpait.”
Jiisusilu Piulsipaapilu
Maakusi 3:20-30; Luukasi 11:14-23
22Inuit ilangit Jiisusimuarujjivut tautunngittumik angummik, uqarunnanngittumiglu anirnirlungmut ilummiqtausimagami, taanna Jiisusiup aaqqikpaa, angut uqarunnaqsivuq tautulirlunilu. 23Inugiakturjualimaat kamaniaqput Jiisusiup piniarnirijanganik, uqarlutik, “Unaa Taivitiup Irnirinngitaraluanga?” 24Paarisit tamatuminga tusaramik, uqaqput, “Una Jiisusi anirnirlungnik inungmit anititsiqattaqtuq anirnirluit angajuqqaangannut Piulsipaapimut pijunnarniqaqtitaulluni taimailiuqattaqtuq.”
25Jiisusiup qaujimagamigit qanuq isumaqarmangaata, uqautivait, “Nunalit angajuqqaarjuaqaqtut atausirmik aggurlutik#12:25 Aviuqarlutik immingnut unatalirutik angajuqqauvik akuniunngittuq nungukkajaqpuq, nunalillu, uvvalu ilagiit iglumiuqatigiit aggurlutik,#12:25 Aviuqarlutik immingnut unatalirutik atausiujunniirajaqput. 26Saataanasiullu Saataanasiuqatini anitikkuniuk, imminik siquttirluni aggurajaqpuq; qanurli taima ataniuvinga kajusijunnarajaqpa? 27Anirnirluit anitigukkit Piulsipaapikkut, maliktisili taima naukkut anititsiqattaqpat anirnirlungnik? Taimaimmat maliktisi iqqaqtuijigijumaaqpasi. 28Guutiulli Anirningagut, anirnirluit anitigukkit, tavva Guutiup Ataniuvinganut tikitausimaliqpusi.
29“Uvvalu qanuq sanngijualuup iglunganut itiqtuqarunnaqpaa? Piqutinginniglu aqsaarlugu, kisiani sanngijualuk qilaksuqqaarlugu; tavva iglungata piqutinginnik aqsaaqsijunnaqsigajaqpuq.
30“Pinasuaqatiginngitara uvannik akiraqtuqpuq; uvanniglu katiqsuiqatiqanngittuq avitirivuq. 31Taimaimmat uqautivassi, inuit ajuqtulinirmingnit qanuittutuinnanit, Guutimigluunniit uqarnirluksimagaluaqpata isumagijunnairviujunnaqput, Anirnirmigli Ijjurnaittumik uqarnirluujjijuq isumagijunnaiqtaunianngilaq. 32Nalliallu akiraqtuqtuq Inuup Irninganik isumagijunnaiqtauniaqpuq; nallialli akiraqtuqpat Anirnirmik Ijjurnaittumik isumagijunnaiqtaunianngilaq, maanna nalliuttumi pijumaaqtumilu.”
Napaaqtuq Piruqtungillu
Luukasi 6:43-45
33“Napaaqtuq piukpat paurngangit piuniarivut; napaaqtuq piunngippat paurngangit piunnginniarivut; napaaqtuq piruqtungitigut qaujimajauvakpuq. 34Ilissi quglugiangujusi qanuq piujunik uqarunnaqpisi? Piunngittuutillusi, uummatiup tatajjutinganik inuk uqausiqasuunguvuuq. 35Inuk piujuq piujunik saqqititsivakpuq piujunik katiqsivingminit; inugli piunngittuq piunngittunik saqqititsivakpuq piunngittunik katiqsivingminit.
36“Uqautivassi, iqqaqtuqtauviup ullungani inulimaat saqqititsijariaqarumaaqput atuutiqanngittunik uqausirilauqsimajamingnik. 37Uqausissinnut pasijaksaunginniraqtaujumaaqpusi, uqausissinullu pasijaksannguqtitaujumaaqpusi.”
Kamanaqtumik Aksururlutik Saqqititsiviujumajut
Maakusi 8:11-12; Luukasi 11:29-32
38Tavva piqujanik ilisaijit, Paarisillu ilangit uqaqput, “Ilisaiji, kamanaqtulitilluti takunnarumajugut.”
39Jiisusiup uqautivait, “Ullumiujuq inuit piunngittulijut Guutiqanngittullu kamanaqtulinirnik takujumavut; kamanaqtulinirmik tunisiviunianngilat nalauttaijup Juunaup kamanaqtuliningata asianik. 40Juuna imarmiutaaluup iluaniilaurmat ullunik pingasunik unnuaniglu pingasunik, taimaaktauq Inuup Irninga ullunik pingasunik unnuaniglu pingasunik nunarjuap itiningata iluaniittumaarivuq. 41Iqqaqtuqtauvik nalliutikpat Ninivimiut inungit makittumaaqput maanna inuujunik iqqaqtuilutik igitaksaruqtitsilutiglu; ajurnirmingnit qaqialilaurmata Juuna nalauttaijuq uqallaktillugu tusaramik; takugit, uqautivassi, tavvaniittuqaqpuq Juunamit ajunnginniqsaujumik! 42Iqqaqtuqtauvik nalliutikpat siipamiut angajuqqaarjuanga arnaq makittumaaqpuq maanna inuujunik igitaksannguqtitsiluni; taanna ungasiktualungmut ingirralaurmat nunaminit, tusaajaqturluni angajuqqaarjuap Suulumuuniup silatuninganik, takugit, uqautivassi tavvaniittuqaqpuq Suulumuunimit ajunnginniqsaujumik!”
Anirnirluup Saataanasiminngaaqsimajuup Utirninga
Luukasi 11:24-26
43“Anirnirluk inungmit anigami, nunakkut paniqtukkut ingirravuq iniksaminik qinirluni, nanisijunnanngikkunili, 44imminut uqaqpuq, ‘Iglumut qimalauqtannut utirnialiqpunga.’ Utirami, iglu takuvaa iluliqanngittuq, salumatsiarluni, aaqqitsiaqsimaliqtuq. 45Tavva anivuq tavvanngat anirnirnik 7-nik imminit piunngittuuniqsaujunik ilaqalirluni, tavvungalu tikinnamik tavvani iniqaliqput; tamatumalu kinguningagut inuk taanna sivurnganit piunnginniqsauliqpuq. Taimaittumaarivuttauq ullumi inuujunut piunngittunut.”
Jiisusiup Anaananga Qatanngutingillu
Maakusi 3:31-35; Luukasi 8:19-21
46Jiisusi suli uqallaktillugu inungnut, takugit, Jiisusiup anaananga qatanngutingillu tavvunga tikipput, igluup silataaniiliramik, Jiisusi uqaujjauquvaat uqaqatiqarumallutik. 47Tavva inuit ilangannut Jiisusi uqaujjauvuq, “Takugit, anaanaillu qatanngutitillu silami nangiqput, ilingnik uqaqatiqarumallutik.”
48Jiisusiup kiuvait, “Kina anaanaga, kinakkullu qatanngutikka?” 49Jiisusi ilinniaqtiminut tikkuarluni uqaqpuq, “Takugit! Ukua tavva anaanakka qatanngutikkalu! 50Nalliat Ataatama qilangmiittuup piniaqtauqujanganik pinasuaqtuq, taanna qatanngutigivara, najagillugulu, anaanagivara.”
Currently Selected:
Maatiusiup Aglangit 12: EAIBR
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible (Romanized) © Canadian Bible Society, 2022-2023.