Maki 11
11
Ɛnza ŋé lónan Yeluzalɛmu
Matiyu 21.1-11; Luka 19.28-40; Yaya 12.12-19
1Ii gbaa mínngɛ Yeluzalɛmu la, Bɛtifaze ní Betani ndɔ́ɔfɛ, Olivyetii ó tɔ́ɔfɛ, aa a yɛ kaamɔɔndhye ŋo fyáa bhyáashaa, 2tó kɛ fɔ i yɛ kó: «Só mín ŋé ɲɛ́nnzhaa fɛ́ nín áa táa o la. A kɛ́ lo ndɛ́nmɛn, a yáa sofɛɛnin dhyé nɔ́ gúunnin ɲé. Mɔɔn sí mán í síi a ka má. Áa a fwée kɛ́nan ale. 3Ní mɔɔn lɔ́ kɛ́ fɔ́ kó áa o kɛ́la mínnɛɛn lé kósɔn, áa fɔ a yɛ kó: ‹Mantii óle manko é a lá.› Waa a káa nan a manlɔ lé kwáalenin.»
4Ii táa ó lé lɔ kɛ táa sofɛɛnin ngbee nɔ́ gúunnin nzɔ́ɔ bhónaa lɔ lá sháa o tɔ́ɔfɛ. Ii a fwée. 5Mɔɔn mínnu tɛ́ɛ yénɔn, o lɔ́luu i mánɲaankɛ kó: «Ále! Áa mínnɛɛn lé kɛ́la? Mínnɛɛn lé kósɔn áa sofɛɛnin gbee ŋó fwéenan?» 6Ɛnza ŋé fɔ i yɛ tɛ́nmɛn né, ii mɔɔn ólu yawi o la. Mɔɔn ólu i tó yénɔn. 7Ii nan o sofɛɛnin ngbee ŋó lé Ɛnza nzaala. Ii i yɛ faani olu lá lá a kwɔ lɔ, tó aa í síi a kwɔ lɔ. 8Mɔɔn shɛ́ɛman ŋé i yɛ faani olu lɔ́woo sháa o ka, tó lɔ́ lúu yíibhoo lú tɛ́ɛ sɛ́ɛn olu mán kɛ́nan olu lala sháa o ka. 9Mínnu tɛ́ɛ a ɲɛn óni mínnu tɛ́ɛ a kwɔ, olu tɛ́ɛ gbáanan kó: «Ozana, tando é Ala yɛ́. Mɔɔn mín ŋé nánla Mantii o tɔ́ɔla, tando é o yɛ. 10Laula yɛ mansaya mín é nánla, tando é ó yɛ́. Ozana Ala yɛ́ sá ŋó lɔ.» 11Ɛnza ŋé lo Yeluzalɛmu, aa táa lo Ala bhatobhomba ó kɔ́ɔnnɔn, tó kɛ fé ŋó bɛ́ mánfɛɛ. O kwɔ, ale ní a yɛ kaamɔɔndhye ndá ni fyáa ólu táa Betani, kɛ mansɔɔ sú tɛ wɛɛ bhyáa kwó le.
Ɛnza ŋé dáan bhyáala fígisun nɔ fɛ́
Matiyu 21.18-19
12O lúusɔgbɛ o, i tɛ́ɛ bhɔ́la mínngɛ Betani, kɔ́ɔn é Ɛnza myaan. 13Aa fígisun nɔ búu yé a lá ywáa já nɔn. Aa í mángbaa a lá kɛ a mánfɛɛ sáan a yáa a dhyé nzɔ́ɔ a lá. Waa aa sé mínngɛ yíi o tɔ́ɔfɛ, aa a búu gbɛɛgbɛɛ lé sɔ́ɔ a lá, kɛ mansɔɔ a dhyé ngɛ́ wáati o tɛ́ mán sé bhá. 14Ɛnza ŋé fɔ o le lɔ kó: «Mɔɔn sí táa í dhyé ŋó lɔ́ɔ mée fɛ́sɛ fɛ́sɛ.» A yɛ kaamɔɔndhye ŋolu o kóman ó lé myɛ́n.
Ɛnza ŋé feekɛbhaa olu gbɛnan Ala bhatobhomba ó la
Matiyu 21.12-17; Luka 19.45-48; Yaya 2.13-22
15Ii lo Yeluzalɛmu. Ɛnza ŋé lo Ala bhatobhomba ó kɔ́ɔnnɔn, aa lámyaan kɛ feekɛbhaa olu ní sanikɛbhaa olu gbɛ́. Aa wɛ́ɛfɛɛmaa olu tá tabɛli ólu bé, kɛ biinin nvelebhaa olu tá gbaanin ŋo bɛ́ bé bé. 16A mán sɔ́n mée ké lɔ́ a tínmin ni feefe né Ala bhatobhomba ó kɔ́ɔnnɔn. 17Aa wɛɛ mínngɛ, aa mɔɔn ólu kála kó: «Aa sɛ́wɛ le kó:
Ɲɛ́n bhó ŋó káa kíi lé kó síya o bɛ́ yɛ Ala bhatobho.
Wáa Ále wɛ́ɛ o lé kɛ́ so nú lóonaankɛlaa lé nín!»
18 Faanlɛɛɲansebhaa olu kúnndii ólu ní sɛliya kaamɔɔn ólu o myɛ́n mínngɛ, ii ɲánɲiin Ɛnza nvaako ó mán. I tɛ́ɛ sháannan a ɲɛn, kɛ mansɔɔ a yɛ lakawanikan ŋo tɛ́ɛ bɛ́ ɲán myaanla lé. 19Ywáa oo sé mínngɛ, ale ni a yɛ kaamɔɔndhye ŋolu bhɔ́ só ó kɔ́ɔnnɔn.
Fígisun njanin ŋóo lɔ́ni mín dila án man
Matiyu 21.20-22
20Fáyi o mán, i tínminndɔ o le, ii fígisun ŋo yé ké a wɛɛ já kɛ sé fɔ́ɔ a díin ŋo mán. 21Kó mín ŋé kɛ́ oo bhyáa Piyɛli kɔ́ɔnnɔn. Aa fɔ Ɛnza ɲɛn kó: «Kaamɔɔn, í ɲán gbáan, íi fígisun mín dáan a wɛɛ já.»
22 Ɛnza ŋé fɔ a yɛ kaamɔɔndhye ŋolu yɛ kó: «Áa lá Ala la. 23Tó ní fɔ a yɛ́ tínɲan in né ngó, ní mɔɔn mín ngɛ fɔ tii míin ɲɛn kó: Bhɔ́ ywáa míin nɔn yánun, íi táa í láfii kɔɔji o lɔ, ní a mán síka a yóso o lɔ́, ní kɛ lá a lá, kó a wɛ́ɛ mín nvɔ́ o yáa kɛ, o yáa kɛ a yɛ. 24O lé kósɔn ní fɔ́la a yɛ́ ngó: A kɛ́ kɛ́ fé ŋóo fé ngofɔla sɛ́ɛ o lɔ, a lánin ŋan kɛ́ a lá óyoo á wɛ́ɛ o fé ŋó sɔ́ɔ, Ala yáa ó fé ŋó dí a man. 25A lɔ́nin ngɛ́ kɛ́ sɛ́ɛ o la, ni o kɛ́ kɛ́ ké mɔɔn lɔ́ wɛ́ɛ yáacɛ táa lá, áa yafa, o kɛ́ kɛ́, án Nvá mín ŋé sá ŋó lɔ, o yáa yafa Álee mán. 26[Wáa ní Ále mán yafa mɔɔn tɔ́ ólu mán, a fá míin sá ŋo lɔ o táa yafa Álee mán.»]
Yɛ́ɛtii Ɛnza móosii o kó ólu la?
Matiyu 21.23-27; Luka 20.1-8
27O wɛ́ɛnin ŋó kwɔ, Ɛnza ni a yɛ kaamɔɔndhye ŋolu í kwɔ́sɛɛ Yeluzalɛmu. A tɛ́ɛ táaman kɛ́la Ala bhatobhomba ó lúkɔɔn ó kɔ́ɔnnɔn mínngɛ, faanlɛɛɲansebhaa olu kúnndii ólu ní sɛliya kaamɔɔn olu ní cɛba ólu í mángbaa a lá. 28Ii a mánɲaankɛ kó: «Íi kó míinnu kɛ́la sébhaaya mínnɛɛn lé la? Yɛ́ɛtii o sébhaaya ó dí í mán?»
29 Ɛnza ŋé í yawi kó: «Ngáa a mánɲaankɛ láfaɲan kée ne man, aa ɲáwi, o kɛ́ kɛ́, ní bhɔ́la kó míin nú kɛ́ ó sébhaaya ó lé ywáa mínnɔn, ní o fɔ́ a yɛ́. 30Yɛ́ɛtii Yaya Bátizelikɛbhaa bhyáashaa kɛ́nan mɔɔn ólu bátize, Ala bháa bháa mɔɔn ólu? Áa ɲáwi.» 31Oo fɔ́ mínngɛ, i tɛ́ɛ fɔ́la ɲɔ́ɔnɲɛn kó: «Ní án ngɛ a yawi kó Ala lée a bhyáashaa, a yáa án mánɲaankɛ kó mínnɛɛn lé kósɔn tó án mán lá Yaya la? 32Tó ní án ngɛ fɔ kó mɔɔn lée lúu a bhyáashaa!» I tɛ́ɛ sháannan yaman o ɲɛn, kɛ mansɔɔ mɔɔn bɛ́ tɛ́ɛ Yaya yacela Céla bhɛ́ɛbhɛɛ lé lé. 33Íi Ɛnza ɲawi kó: «Án mán lɔ.» Ɛnza ŋé i yawi kó: «Hun, née kó mínnu kɛ́la nín, ní ólu kɛ́la sébhaaya minnan ndáa o fɔ́ a yɛ́.»
Currently Selected:
Maki 11: MXX
Highlight
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.