Matiyu 5
5
Ɛnza ŋé lakawanin mín ngɛ tii ó ka
Luka 6.20-23
1Ɛnza ŋé yaman o yé mínngɛ, aa í yɛ́ɛ tii lɔ́ ka kɛ í síi yénɔn. A yɛ kaamɔɔndhye ŋolu táa a saala 2tó aa i kála námyaan tá ko:
3«Mɔɔn mínnu a lɔ ŋóo íi faannda né i yóso o lɔ,
olu yeemanfanin ɲé,
kɛ mansɔɔ í yáa sángboo ó Mansaya o sɔ́ɔ!
4Mɔɔn mín núu kásila, yeemanfaa é olu yɛ,
kɛ mansɔɔ Ala yáa i yóso láyii!
5Mɔɔn mínnu sáwɛɛnin ŋe, yeemanfaa é olu yɛ,
kɛ mansɔɔ lúukolo ó yáa kɛ́ i ta le!
6Téleɲan ó nɛ́li é mɔɔn mínnu la, yeemanfaa é olu yɛ,
kɛ mansɔɔ Ala yáa i dhyáaɲɛnngo kɛ!
7Hínnɛn é mɔɔn mínnu yóso lɔ, yeemanfaa é olu yɛ,
kɛ mansɔɔ Ala yáa hínnɛn olu la!
8Mɔɔn mínnu yóso ó gbɛ́nin ɲe, yeemanfaa é olu yɛ,
kɛ mansɔɔ olu yáa Ala yé!
9Mɔɔn mín núu mɔɔn ólu cɛ́lɔbhyɛnan,
yeemanfaa é olu yɛ, kɛ mansɔɔ fɔ́ yáa kɛ́ olu man kó Ala dhyé nú!
10Ii mɔɔn mínnu tɔ́lɔla i yɛ téleɲan o kósɔn,
yeemanfaa é olu yɛ, kɛ mansɔɔ i yáa Ala yɛ́ Mansaya ó hɛ́lɛ o sɔ́ɔ.
11Ni mɔɔn ólu kɛ́ kɛ́ a nɛ́ɛnnan, wáman kɛ́ kɛ́ a tɔ́lɔla, wáman kɛ táa fwɔnɲan yóo mbɛ́ súu la lé a lá kɛ kun ngɛ́ a yɛ́ lánanya ó lé né la, álee yeemanfanin ɲé.
12Áa í ɲáanli, kɛ a nisɔdhyaa gbúnigbukɛ, kɛ mansɔɔ bhaayeba é a yɛ́ sá ŋó lɔ. Sɔ, ii céla ólu tɔ́lɔ céne íkwɔ.»
Saanan mín ŋé kɔɔ óni kɛ́ɛnɲan ó ka
13Ɛnza ŋé fɔ íkwɔ kó: «Ále lée lúu kɔɔ o lé dínɲan la. Wáa ni kɔɔ ó tá dhyáalaa ó kɛ́ bhɔ́ a lá, a káa mínnɛɛn lé ɲán bhée? Ké tɔɔn gbɛ́ɛ le tɛ́ a lá bhée ŋwé, o ɲán o mán, fɔ́ kɛ a lafii kɛ́ɛnman lé tó mɔɔn ólu í sé gbáan gbáan a ka.
14Ále léelu é kɛ́ɛnɲan lé dínɲan mɔ́ɔndhye ŋólu yɛ. Só mín nziinin ngɛ́ kɛ́ tii o ka, o só ó tɛ́ sé lóonan; 15Oo lɔ mínngɛ, mɔɔn tɛ́ tá bhyáala laman ŋo la tó kɛ pála ŋó mbíin a kunnan. Wáa mɔɔn é a siila lamannziife ne ka ké aa kɛ́ɛnɲan lábhɔ bhóngɔɔnnɔnbhaa olu bɛ́ yɛ. 16A yɛ́ kɛ́ɛnɲan ó kákan kɛ máan njé ne mɔɔndhye ŋólu ɲánla ké ii a kɛ́ko bhɛ́ɛ ólu yé, tó a Fá mín ŋé sá ŋó lɔ, ii o bwóɲan.»
Lakawanin mín ŋé tɔ́ ŋolu ka
17«A kɛ́nan kɛ́ a kɔ́ɔnnɔn kó ní nan Musa yɛ́ sɛliya óni céla ólu yɛ́ kóman o lafadi tɔ́ɔ le lɔ. Mán nan o lafadi tɔ́ɔ lɔ, waa ní nán o kó ŋólu lafa tɔ́ɔ le lɔ. 18Tó ní fɔ a yɛ́ tínɲan in ne ngó: Sannin sángboo óni lúukolo ó a tínmin, sɛ́wɛdhye nvítiinin wáman dhyaa nvítiinin nzí táa bhɔ́ tɔ́ ŋólu lɔ́kan ŋólu la. Fɔ tɔ́ ŋólu lɔ́kan ŋó a kɛ́ lé.#5.18 Fɔ́ tɔ́ ŋolu lɔ́kan ŋó a kɛ́ lé: O ywáa ó fɔ́nin ŋé Ala saaninkan nɔyɛɛmanbhaa lɔ́lu kwɔ́ lé kó sánnin dínɲan a fáa. 19O le kósɔn ni mɔɔn mínngɛ sɛliya o bɛ́ lɔ fítiinin ŋó kée njáan, óni kɛ́ mɔɔn olu kála o kée ngɛla, o tíi ó yáa kíi ko bɛ́ lɔ fítiinin ŋo sángboo ó Mansaya o lɔ. Wáa mɔɔn mín ngɛ sɛ́liya o látaaman óni kɛ mɔɔn olu kála o kɛ́la, o tíi o yáa kíi ko mɔɔn bá sángboo ó Mansaya o lɔ. 20Tó ní fɔ a yɛ́ ngo: Ni a yɛ́ téleɲan ó mán tínmin sɛliya kaamɔɔn ólu ní Falizɛn ŋolu tá o ka, a táa Ala yɛ́ Mansaya ó hɛ́lɛ o sɔ́ɔ.»
Lakawanin mín ŋé mwɛ́nnɛnli o ka
21«A wɛ́ɛ myɛ́n kó fɔ́ wɛ́ɛ kɛ́ án myɛ́man ólu yɛ́ Musa yɛ́ tɔ́ ŋo tá fa nvɛ́ kó: Í kɛ́nan mɔɔn ní ó bhɔ́, mɔɔn óo mɔɔn kɛ́ a mɔɔnɲɔɔn ó ní ó bhɔ́, kíti kákan kɛ tɛɛ o tíi o ka. 22Wáa née fɔ́la a yɛ ngó: Mɔɔn óo mɔɔn kɛ mwɛ́nnɛn a mɔɔnɲɔɔn ó mán, kíti kákan kɛ tɛɛ o tíi ó ka, mɔɔn mín ngɛ fɔ a mɔɔnɲɔɔn ó mán kó ‹kúnda!› Kíti kákan kɛ tɛɛ o tíi ó ka kítitɛɛbhaa ólu bhóo, mɔɔn mínngɛ fɔ a mɔɔnɲɔɔn o mán kó ‹san!› O tíi ó kákan né kɛ táa yaananman tá ó lɔ. 23O ɲán o mán, ni í kɛ́ fáa kóɲwaan kɛ́ Ala yɛ́ faanlɛɛbhɔlaa ó ka, ni a kɛ bhyáa í hákiila óo í wɛ́ɛ í sɔ ngɛ́ í mɔɔnɲɔɔn lɔ́la, 24í kwɔ́kɛ í yɛ́ kóɲwaanfe ŋo lá faanlɛɛbhɔlaa ó lɔ́ yénɔn kɛ táa íle ní í mɔɔnɲɔɔn o cɛ o lɔ́bhyɛ ŋótun, tó kɛ tó í kwɔ́sɛɛla kɛ́nan í yɛ́ kóɲwaan ó kɛ́ Ala yɛ.
25Ni íle ní mɔɔn lɔ́ kɛ́ kɛ́ táala ɲɔɔn ne kititɛɛlaalɔ, i ɲángban kɛ íle ní o tíi ó cɛ o lɔ́bhyɛ ké áa sháa o lá bhée. O ɲán o mán, í kɛ́ɛkɛɲɔɔn ó táa táa í ló kítitɛɛbhaa o bhóo, kítitɛɛbhaa o táa í lábhyaa kasobho ŋo kunnansiibhaa ó bhóo, tó óo táa í bhyáa kasola. 26Tó ní fɔ í yɛ́ tínɲan in ne, ni í mán o yúu ó saa féfe, í táa bhɔ́ o kaso o la.»
Lakawanin mín ŋé káanngɛ ó ka
27«A wɛ́ɛ myɛ́n kó fɔ́ wɛ́ɛ kɛ́ án myɛ́man ólu yɛ́ Musa yɛ́ tɔ́ ŋo lɔ́ kó: Í kɛ́nan ɲɔnmɔɔnya kɛ. 28Wáa né kó a yɛ́ ngó mɔɔn óo mɔɔn kɛ́ í ɲán bhɔ́ a mɔɔnɲɔɔn o muso fɛ́, o tíi ó wɛ́ɛ wɛɛ ɲɔnmɔɔnya lé kɛ́la a yóso ó lɔ́ wé. 29Í bhóobhɛɛkɔɔ ɲán ó, ni o kɛ kɛ sɔ́ɔbu lé kɛ́ í ló yúumukɛ ó lɔ, a bhɔ́ í la kɛ a lafii. Í bɔɔn ó í fásimanlaa ó ywáa kéembe lɔ, o a físaa í mán í ywáa bɛ́ lafii ó lé yaananman o lɔ. 30Ni í bhóobhɛɛ ó lée í lónan yúumukɛ ó lɔ, a tɛɛ í lá kɛ a lafii: Í bɔɔn ó í fásimanlaa ó ywáa kéembe lɔ, o a físaa í mán í ywáa bɛ́ lafii ó lé yaananman o lɔ.»
Lakawanin mín ŋé fúusa ó ka
31«A wɛ́ɛ myɛ́n kó fɔ́ wɛ́ɛ kɛ́ án myɛ́man ólu yɛ́ Musa yɛ́ tɔ́ ŋó lɔ kó: Mɔɔn óo mɔɔn kɛ́ í bá a muso lɔ, o tíi o kákan né kɛ fúusasɛwɛ le ló a muso bhóo. 32Tó ni a fɔ a yɛ́ ngó: Cɛ óo cɛ kɛ́ í bá a muso lɔ kéni o muso ó mán ɲɔnmɔɔnya kɛ, ni o kɛ́ sii cɛ kwáa la, ké a wɛɛ ɲɔnmɔɔnya lé kɛ́ wé, o ɲán kée ŋó mán a cɛ kɔɔ ó lée a yɛ ɲɔnmɔɔnya kɛ ó sɔ́ɔbu lé wé. Muso mín no ɲɛ́n fúu sáni ŋé a cɛ kwɔ, cɛ mín ngɛ o muso ó tá, ké o tíi ó wɛ́ɛ ɲɔnmɔɔnya lé kɛ́ íkwɔ wé.»
Lakawanin mín ŋé shɛ́nnin o ka
33«A wɛ́ɛ myɛ́n kó fɔ́ wɛ́ɛ kɛ́ án myɛ́man ólu yɛ́ Musa yɛ́ tɔ́ ŋo tá fa nvɛ́ kó: Í kɛ́nan bhɔ́ í yɛ́ shɛ́nninkan ŋo ka, wáa í kɛ́ í shɛ́n kan mínnan Mantii o koowaan la, o kan ŋó bhɔ́ a sháa man. 34Wáa née fɔ́la a yɛ́ ngó a kɛ́nan shɛ́n mantɛɛ fɛ́sɛ fɛ́sɛ, a kɛ́nan shɛ́n mantɛɛ sángboo o la, kɛ mansɔɔ Ala nɔ́nmɔnnaa ó lée wé, 35a ló ngɛ́nan shɛ́n mantɛɛ lúukolo ó la, kɛ mansɔɔ Ala tónan ólu kɔ́ɔtalaa ó lée wé, a kɛ́nan shɛ́n mantɛɛ Yeluzalɛmu la, kɛ mansɔɔ mansaba Ala tá lée wé. 36A yɛ́ɛ ló ngɛ́nan shɛ́n mantɛɛ a kúnngɔɔ ŋo la, kɛ mansɔɔ a tɛ́ sé kɛ a kúnzhe o kɛ́ɛ kée nangbɛ wáman kɛ a lafin. 37Mɔɔn mín ngɛ fɔ kó ɔɔn, o a kɛ ɔɔn ne, ni a lo ngɛ́ fɔ kó ɔn-ɔn, o a kɛ́ ɔn-ɔn ne. Kóman tɔ́ mín núu fálala olu ka, o bɛ́ é sɔtaannan bhyáafo ne le.»
Lakawanin mín ŋé kóɲɔɔnbhɔ ó ka
38«A ló ŋwɛ́ɛn myɛ́n íkwɔ kó fɔ́ wɛ́ɛ kɛ́ án myɛ́man ólu yɛ́ Musa yɛ́ tɔ́ ŋo lɔ kó: Nvɔn ɲɔ́ɔn lée nvɔn le! Ɲán lée ɲán o yúu saala, ɲín ŋo lée ɲin ŋó yúu saala. 39Wáa née fɔ́la a yɛ́ ngó mɔɔn mín ngɛ kóyoongɛ a lá, a kɛ́nan a tá ɲɔɔn bhɔ́. Ni mɔɔn lɔ́ kɛ́ í tóoce í bhóobhɛɛ tóo o kɔɔ, í bhóonwaan ndoo o síi a yɛ íkwɔ. 40Ni mɔɔn lɔ́ kɛ́ i kíi kítitɛɛlaa lɔ ké aa í yɛ deeke o myáan í lá, í yɛ́ deekeba ó yɛ́ɛ lo a bhóo. 41Ni mɔɔn lɔ kɛ́ fáan lá í ka kó íi í séngwɔko wáa kée ngɛ́ ni a yɛ lwée ŋó le, í séngwɔko wáa fyáa kɛ́ a yɛ. 42Ní mɔɔn lɔ kɛ́ fé nɔ́n kófɔ i yɛ́, ii a di mán, ni í bhóofe o sháannɔɔ kɛ́ kɛ́ mɔɔn lɔ́la, í kɛ́nan í bá a tíi yɛ.»
Á yúumɔɔn olu a dhyáa a yɛ
43«A ló ŋwɛ́ɛn myɛ́n íkwɔ kó fɔ́ wɛ́ɛ kɛ́ án myɛ́man ólu yɛ́ Musa yɛ́ tɔ́ ŋo lɔ kó: Í ɲíin o a dhyáa í yɛ́, í yúu o a gbéya í yɛ́. 44Wáa née fɔ́la a yɛ́ ngó a yúu ólu kó á dhyáa á yɛ́, áa Ala dɛ́li a tɔ́lɔbhaa olu yɛ. 45A Fá mín ŋé sá ŋó lɔ, a káa kɛ́ o dhyénjɛ lú lé o ɲán o lé mán, kɛ mansɔɔ aa a yɛ tee ó lábhɔla mɔɔn yóo ŋóni mɔɔnbhɛɛ olu bɛ́ le yɛ, aa sá ŋo lánanla téemaa óni téemɛɛ ólu bɛ́ le ka. 46Á kó a dí mínnu yɛ́, ní ó kée ŋolu kɛ dhyáa á yɛ́, áa tɔɔn mínnɛɛn lé sɔ́ɔla o la? Nísɔɔnmyaanbhaa olu tɛ́ o kɛ́la a? 47Ni a kɛ́ kɛ́ a yɛ́ɛlamɔɔn kée ŋó léelu fola, áa kó kɛ́ gbɛ́yanin né kɛ́la o lé wé ŋan? Háanin káafii olu o súu o kɛla! 48Oo lɔ mínngɛ a yɛ́ kó o bɛ́ télenin ŋan kɛ́ o yóo a Fá mín ŋé sángboo ó lɔ, o yɛ́ kó ólu télenin ŋé tɛ́nmɛn.»
Currently Selected:
Matiyu 5: MXX
Highlight
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.