Matiyu 26
26
Kúnndii ólu fɛ́ kɛ Ɛnza nváa
Maki 14.1-2; Luka 22.1-2; Yaya 11.53-54
1 Ɛnza ŋé wɛɛ o kóman ó bɛ́ fɔ́la mínngɛ, aa fɔ a yɛ kaamɔɔndhye ŋolu yɛ kó: 2«Mɔɔn mín ŋé mɔɔn Dhyénjɛ óle, o yáa ló a yúu olu bhóo tó olu a gbáan yíi o mán. Tee fyáa lé wɛ́ɛ tó o kó ó ɲánman, a ló ŋan lɔ ŋóo a káa kɛ́ Hɔ́lɔɲanli o ɲánlagbɛ ló ŋo lé la.»
3O fɔ́nin ŋó kwɔ, faanlɛɛɲansebhaa olu kúnndii ólu ní Yawudhyaa cɛba ólu ɲɔ́ɔnɲe faanlɛɛɲansebhaa olu kúnndiiba Kayife yɛ́ lúkɔɔn ó mán. 4Ii bhyɛ kée mán kó kɛ Ɛnza myáan loo nɔn kɛ a fáa. 5I tɛ́ɛ fɔ́la o bhóo ó mán kó: «Án ndɛ́ sé a myáanla ɲánlagbɛ lo míin mán ní o tɛ, yaman ó yáa ɲáanmin.»
Muso lɔ́ é latikɔlɔ kɛ́la Ɛnza ngúnnɔn
Maki 14.3-9; Yaya 12.1-8
6Só mín ndɔ́ɔ kó Betani, Ɛnza ndɛ́ɛ yénɔn, Simɔn kwáantɔ yɛ́ bhó ŋó la. 7Muso lɔ́ é í mángbaa a lá ni bháanin ngúugbɛɛ nɔ le mín nálaanin ndɛ́ɛ káwa kúugbɛɛ nan, mín ŋe kíila ko Alibatili. Tó a fanin ndɛ́ɛ latikɔlɔ sɔɔn gbɛ́ɛ nan. Aa o latikɔlɔ ŋo kɛ́ Ɛnza ngúnnɔn ké oo lɔ́min kɛ́. 8Ɛnza ɲɛn kaamɔɔndhye ŋolu o kókɛse ŋó yé mínngɛ, oo i lamwɛnnɛn, tó ii fɔ kó: «Aa latikɔlɔ ngúugbɛɛ nzúu míin nɔ́nɔɔnla mínnɛɛn lé gbú lá nín? 9Mɔɔn tɛ́ɛ sé ale latikɔlɔ ó felela wɛ́ɛ lágbɛɛn nan kɛ o wɛ́ɛ o dí bhóokoo ŋólu mán!»
10O kóman ólu bhyáa Ɛnza ndóo lɔ́ mínngɛ, aa fɔ a yɛ kaamɔɔndhye ŋolu yɛ kó: «Mínnɛɛn le kósɔn áa muso míin ngannankwaanyala? A wɛɛ kóbhɛɛ lé kɛ́ ɲɛ́n nín! 11Kɛ mansɔɔ ále ní bhóokoo ŋólu yáa kɛ́ kéene yánun wáati bɛ́ lɔ, wáa né ní ále táa kɛ́ kéene yánun wáati bɛ́ lɔ. 12Muso míin ŋé latikɔlɔ ó kɛ́ nga nzúlongo o lé kósɔn. 13Tó ní fɔ a yɛ́ tínɲan in ne ngó, sanmankanmɛɛ míin ngáa í láse dínɲan ywáa óo ywáa lɔ, muso ó kɛ́ko míin ɲáan fɔ́ o ywáa ó bɛ́ lɔ tó a ko é bhyáa mɔɔn olu hákiila.»
Ɛnza ɲanvalɔɔ é Zudasi la
Maki 14.10-11; Luka 22.3-6
14Kaamɔɔndhye ndá ni fyáa ó mín ngée ndɔ́ɔ tɛɛ kó Zudasi Sikaliyɔti, oo táa faanlɛɛɲansebhaa olu kúnndii ólu fɛ́ yé 15Tó aa fɔ i yɛ kó ni ngɛ́ Ɛnza lo á bhóo, á káa mínnɛɛn lé dí mán. Olu wɛ́ɛgbannan bísawa dí a man. 16Kɛ ta o wáati o mán, Zudasi tɛɛ ɲánɲiinnan kɛ Ɛnza no í móo.
Hɔ́lɔɲanli sunman ngo o
Maki 14.12-21; Luka 22.7-14,21-23; Yaya 13.21-30
17 Búlufuunmɛɛ ó ɲánlagbɛ # 26.17 Búlufuunmɛɛ ó ɲánlagbɛ: O ɲánlagbɛ o lée Izalayɛlika olu bhɔ ó yɔɲan ó lɔ o ko bhyaa lá i kɔɔnnɔn. Í ɲángban kóyoo ŋó man íi búlufuunmɛɛ ó lɔɔ ŋó lé lɔ. Íi ó ɲanlagbɛ o kíila i kwɔ́ ko Hɔ́lɔɲanli ó ɲánlagbɛ ó. o tée jónan ó mán, kaamɔɔndhye ŋolu Ɛnza manɲaankɛ kó: «Íi fɛ́ ké án ni í yɛ́ Hɔ́lɔɲanli o ɲánlagbɛ ó gbá ó kɛ́ ywáa mínnɛɛn lé lɔ?» 18Ɛnza ngó i yɛ kó: «Áa táa lɔ fɛ́ yénɔn lúukɔɔnnɔn kɛ fɔ a yɛ kó: ‹Án ngáamɔɔn kó kɛ́nan fɔ kó tɔ bhɛ́ɛ tɛ́ a ta wáati o sé o lá bhée, oo lɔ mínngɛ, ale ní a yɛ kaamɔɔndhye ŋolu káa nan Hɔ́lɔɲanli o ɲánlagbɛ ó kɛ́ í fɛ́yanun.› » 19Ɛnza ŋé kó mín nvɔ kaamɔɔndhye ŋolu yɛ, ii o kɛ tó kɛ Hɔ́lɔɲanli o ɲánlagbɛ ó gbá ó kɛ.
20Ywáa óo sé mínngɛ, Ɛnza ni a yɛ kaamɔɔndhye ndá ni fyáa ólu dhyɛ kɛ. 21Í tɛ́ɛ lɔ́min kɛ́ ó lá wáati mínnɔn Ɛnza ŋé fɔ kó: «Tó ní fɔ a yɛ́ tínɲan in ne ngó, a kée ngéenan yáa ne yánva.» 22O kóman óo kaamɔɔndhye ŋolu ɲánlasii tó ii Ɛnza manɲaankɛ kée ngée ndá kó: «Né kó tɛ lɛ, bháa díi Mantii o?» 23Ɛnza ŋé i yawi kó: «Né ní mɔɔn mín ngáa í bhóo ló sunmannve ŋó lɔ́ kéene, o tíi ó lé káa ɲánva. 24Mɔɔn Dhyénjɛ ó yáa sayakɛ óyoo a sɛwɛnin ɲé a ta fa nvɛ́ tɛ́nmɛn né. Wáa mɔɔn mín ngwɛnnin ngáa mɔɔn Dhyénjɛ ó yánva, kunnangboya é o tíi ó yɛ! Yáanin o tíi ó wóobhaa yɛ́ɛ tɛ́ mán a bhyáa fwɛ́ɛn ka, o tɛ́ɛnan físaya!» 25Zudasi, o mín ndɛ́ɛ Ɛnza ɲanvasii lɔ, oo ale Ɛnza manɲaankɛ kó: «Né kó tɛ lɛ, bháa díi kaamɔɔn ó?» Ɛnza ŋé a yawi kó: «Íle lé kó cé ŋwaa.»
Ɛnza ŋé lɔ́min lábha mín ngɛ ni a yɛ kaamɔɔndhye ŋolu le
Maki 14.22-26; Luka 22.14-20
26I tɛɛ lɔ́min o kɛ́la mínngɛ, Ɛnza ŋé búlu ó tá, kɛ Ala bálika bhɔ́, kɛ a lɔ́tɛɛtɛɛ kɛ́ a di a yɛ kaamɔɔndhye ŋolu mán, tó kɛ fɔ i yɛ kó: «Nvásisoo ó lée wé, áa a tá kɛ a lɔɔ.» 27Aa wɛɛ kɛ lɛ́zɛnnjifyɛ lɔ tá tó kɛ Ala bálika bhɔ́ kɛ o lɛ́zɛnnji o ló i bhóo kɛ fɔ kó: «A bɛ́ a a lɔ mín, 28ɲee ó lée wé, yée mín ŋé bwɔ́ yúumu yafa o bhóoman mɔɔn shɛ́ɛman ngósɔn. Yée mín ŋé wé, o lé káa kɛ́ Ala yɛ dhyáaɲɔɔnya ó láheli o tɔ́ɔmanse ne. 29Tó ní fɔ a yɛ́ tínɲan in ne ngó, ndáa lɛ́zɛnnji mín bhée fɔ́ ngɛ́ kɛ́ lɛ́zɛnnji kwáa mínnan ní ále Nvá yɛ́ Mansaya ó lɔ.» 30Ii wɛɛ Ala tándo lɔ́ ŋolu lá lá mínngɛ, ii bhɔ́ kɛ táa Olivyetii ó mánshaa fɛ́.
Ɛnza ngó Piyɛli yáa fɔ kó a man ale lɔ
Maki 14.27-31; Luka 22.31-34; Yaya 13.36-38
31 Ɛnza ŋé fɔ a yɛ kaamɔɔndhye ŋolu yɛ kó: «Bí sú míin nɔ́n, a bɛ́ yáa í kwɔ́kɛ nán, kɛ mansɔɔ a sɛwɛnin ɲé kitabu o lɔ́ kó: Ɲáan saamangbɛngbɛmaa o fáa tó saa sɛ́ɛ ólu ɲɛ́nɲɛn. 32Wáa ngɛ́ kúun kɛ bhɔ́ su ólu cɛ́man, ɲáan bhyáa a ɲɛ́n nzɔ́ kɛ táa Galile lánga ŋo lɔ.» 33Piyɛli é fɔ a yɛ́ kó: «Yáanin mɔɔn tɔ́ ólu kɛ́ í kwɔ́kɛ í la, né táa ngwɔ́kɛ í lá tún.» 34Ɛnza ŋé a yawi kó: «Tó ní fɔ í yɛ́ tínɲan in ne ngó, bí sú míin ɲɛ́ɛ lɔ, sánnin lónan ŋo a kóman, í yáa fɔ síɲan sawa kɛ kó í mán né lɔ.» 35Piyɛli kó a yɛ kó: «Dínɲan lɔ, ndáa fɔ ngó mán í lɔ́, yáanin ngɛ́ saya kɛ́ í fɛ́.» Kaamɔɔndhye ŋo tɔ́ ólu bɛ́ɛ o fɔ o ɲán kée ŋó mán.
Ɛnza ŋé í sɛ́ɛla Zesemane
Maki 14.32-42; Luka 22.39-46
36Fɔ́ é kɛ́la ywáa mín man kó Zesemane, Ɛnza ni a yɛ kaamɔɔndhye ŋolu sé ó ywáa ó lɔ mínngɛ aa fɔ i yɛ ko: «Áa í síi ya ké ndáa nzɛ́ɛ yéenɔn.» 37Aa Piyɛli ní Zebede dhyénjɛ fyáa ó bhyáa í fonga kɛ táa. Ɛnza ndɛ́wɛɛ bhyáa í ɲánlasii le, óni kɛ a ní ó tɔ́lɔ. 38Tó aa fɔ i yɛ kó: «Né ní o wɛ́ɛ tɔ́lɔ koyoongɛ fɔ́ kɛ kɛ́ óo ngáa sayakɛ a bhóo. Áa tó yánun, áa tó í ɲánla ní ne.» 39Ɛnza ŋé í cɛ́bhɔ i la dɔ́ɔnin tó kɛ í cé ngbáan lúu lɔ kɛ Ala dɛ́li ni fɔ le kó: «Nvá Ala, tɔ́lɔyaba míin nín, ni íi sé kɛ ó cɛ́bhɔ ne lá. Waa ó bɛ́ kwɔ, í kɛ́nan a kɛ ne sao óle, fɔ́ í légbu sao ó!» 40Aa í kwɔ́sɛɛ a yɛ kaamɔɔndhye nzawa ólu saala. Aa táa ké olu sunnɔɔn lɔ. Aa i lakuun kɛ fɔ Piyɛli yɛ kó: «Ɲɔ́ɔn ngó ále mán sé lɛ́ɛlɛ kéembe kɛla a ɲán lá ni né le kɛ́ɛ! 41Áa tó í ɲánla, kɛ Ala dɛ́li ké á kɛ́nan lo lɔ́swaannin ó lɔ. Kóbhɛɛ kɛ́ yóso é Adamandhye ŋó kɔ́ɔnnɔn, wáa a sé tɛ́ a yɛ.» 42Aa í cɛ́bhɔ i la ko síɲan fyáaɲɔn o kɛ kɛ́ táa Ala dɛ́li íkwɔ kó: «Nvá Ala, tɔ́lɔya mín ŋé nánla nín, ni ngákan kɛ ngúnnzii o kɔ́ɔ lé, ni a táa sé í cɛ́bhɔla nan, í sáo ó a kɛ́!» 43Aa í kwɔ́sɛɛ kaamɔɔndhye ŋolu mán íkwɔ, kɛ́nan i sɔɔ sunnɔɔn lɔ ikwɔ, kɛ mansɔɔ i bɛ́ ɲánfaa tɛ́wɛɛ gbíiya i la. 44Aa i tó yénɔn kɛ í lɔ́nin manbhɔ íkwɔ tó kɛ í sɛ́ɛ síɲan sawaɲɔn kɛ óyoo aa í sɛ́ɛ dɔ́ olu lɔ tɛnmɛn. 45Aa wɛɛ kɛ í kwɔ́sɛɛ a yɛ kaamɔɔndhye ŋolu saala. Aa fɔ i yɛ kó: «Áa sunnɔɔn le lɔ́ bhée kɛ a lɔ́nwɛɛn a? Mɔɔn Dhyénjɛ ó, o káa ló yúumukɛbhaa olu bhóo wáati mínnɔn, o wɛ́ɛ bhyáa sé lé. 46Áa í wíi ké án ndáa! Ɲanvabhaa o lée nánla nín!»
Ɛnza myaanko o
Maki 14.43-50; Luka 22.47-53; Yaya 18.3-12
47Kɛ́ Ɛnza ndó kóman o la, a yɛ kaamɔɔndhye ndá ni fyáa ó kée ŋó mín ndɔ́ɔ kó Zudasi, oo í kunnanbhɔ ni yamandhye ngbɔ́gbɔ lé a kwɔ́ka. Fá ŋóni gbéle lú tɛ́ɛ yaman o bhóo. Faanlɛɛɲansebhaa olu kúnndii ólu ní Yawudhyaa cɛba ó léelu tɛ́wɛɛ o mɔɔn ólu bhyáashaa. 48Ɛnza ɲanvabhaa o tɛ́ káa a tɔɔmansii ɲán o mín man, a tɛ wɛɛ o ɲányaa yamandhye ŋó lá tá kó: «Ngáa nvínin cɛ mín man wé, ale lée wé. Áa ale lé myáan!» 49Aa í mánlo Ɛnza nán íkɔlɔ téeman kɛ fɔ a yɛ kó: «Ní í fola, kaamɔɔn ó!» Aa o fɔ tó kɛ́ í fínin a man. 50Ɛnza ŋé a yawi kó: «Ndwáanva, í nánnin ŋé kó mín ngɛ tɔ́ɔ lɔ, o kɛ.» Mɔɔn ólu í mánlo Ɛnza nan kɛ a myaan. 51Ɛnza nvongamaa o kée ŋé a ta fá ŋó bhɔ́ a foo ŋo lɔ kɛ a láyii faanlɛɛɲansebhaa olu kúnndiiba ó yɛ́ bháalakɛdhye ŋo ka kɛ a tóofaa ó tɛɛ man téeman. 52Oo kɛ́ mínngɛ, Ɛnza ŋé fɔ a yɛ kó: «Í yɛ́ fa ŋo ló a foo ŋo lɔ, kɛ mansɔɔ mɔɔn óo mɔɔn é fa ndála mɔɔn lu fɛ́, fa ne káa o tíi ó fáa. 53Í mán lɔ ŋóo né tɛ́ɛ sé kɛ Nvá dɛ́li ngó aa malɛɛka wáa gbɔ́gbɔ lánan ɲɛ́n nín íkɔlɔ a? 54Wáa ni o ló ngɛ́ kɛ́, Kitabu o lɔ́kan ŋó káa í lafa o lɔ́ díi bhée? Kó mín núu nzɔ́ɔla nín, a fɔnin ngɔɔ lée Kitabu o lɔ kó olu tɛ́ káa nzɔ́ɔ le kɔ́ɔ!»
55Ɛnza ŋé wɛɛ kɛ fɔ yaman o yɛ kó: «Áa nánla ni fá nu ní gbéle lú lé né lé myáan tɔ́ɔ lɔ óyoo kóyoongɛbhaa lɔ a? Ló ŋóo ló, ndɛ́ɛ nzíila Ala bhatobhomba ó kɔ́ɔnnɔn kɛ mɔɔn olu kála, a mán myáan. 56Kó míin ngwɛ́ɛn mbɛ́ é nzɔ́ɔ ke céla ólu saaninkan mín núu Kitabu o lɔ, olu a í lafa.» Oo kɛ́ mínngɛ, a yɛ kaamɔɔndhye ŋolu bɛ́ é bwée kɛ í kwɔ́kɛ a lá.
I wɛɛ táa ni Ɛnza né kítitɛɛlaa o lɔ
Maki 14.53-65; Luka 22.54-55,63-71; Yaya 18.13-14,19-24
57 Ɛnza myaanbhaa olu táa ni ale faanlɛɛɲansebhaa olu kúnndiiba Kayife lé fɛ́ yénɔn, ké sɛliya kaamɔɔn ólu ní cɛba ólu ɲɔ́ɔn nadhyɛ yénɔn. 58Piyɛli é Ɛnza nzúukutaaman kɛ, kɛ táa lo fɔ́ faanlɛɛɲansebhaa olu kúnndiiba ó fɛ́ yé. Aa lo lú o kɔ́ɔnnɔn tó kɛ í síi kunndiiba ó yɛ́ bháalakɛdhye ŋolu tɔ́ɔfɛ. Ɛnza myaanko o tɛ́ káa í lábha ndɛ́nmɛn, a tɛɛ fɛ́ ké o a kɛ́ a ɲanla.
59 Faanlɛɛɲansebhaa olu kúnndii ólu ní Yawudhyaa olu yɛ́ kítitɛɛmɔɔnba ó bɛ́ tɛ́ɛ fwɔnɲankan nɔ ɲíinnan sɛ́ɛya bhóoman ké i tɛɛ o bɛ́ɛ Ɛnza nan, kó óo kó é kɛ ke o tɛ́ɛ kɛ́ a faakun né i bhóo. 60Wáa i man kan nzɔ́ɔ, mín ndɛ́ɛ sé kɛ́la Ɛnza nvaakun ne, kɛ́ɛke sɛ́ɛya fwɔ́ɲanfɔ gbɔ́gbɔ tɛ́ɛ i bhóoka. Kwɔ́ o lá ósɔ, cɛ fyáa é táa i saala 61kɛ fɔ kó Ɛnza ndɔ́ɔ míin ŋé fɔ kó álee sé Ala bhatobhomba ó céla kɛ́wɛɛ kɛ a lɔ́ ko kwáa kɛ́ tee sáwa kɔ́ɔnnɔn. 62O sɛ́ɛya ó ládinin ŋó kwɔ, faanlɛɛɲansebhaa olu kúnndiiba óo í wíi kɛ fɔ Ɛnza ɲɛn kó: «Kóman súu súu tɛ́ í fɛ́ kɛ mɔɔn míin nú yawi a?» 63Ɛnza ŋé lumandhye myáan a yɛ́ɛ ka. Oo kɛ́ mínngɛ, faanlɛɛɲansebhaa olu kúnndiiba óo fɔ a yɛ kó: «Í shɛ́n Ala ɲáanman ŋó la kɛ fɔ án ɲɛn ni íle lée Kílisi o le, Ala Dhyénjɛ ó.» 64Ɛnza ngó a yɛ kó: «Í légbu lé wɛ́ɛ o fɔ́ wé. Waa, tó ní fɔ a yɛ́ ngó a yáa mɔɔn Dhyénjɛ ó, síinin ɲé Sétii ó bhóobhɛɛkɔɔ, a ló yáa a yé nánla sángawa ólu ka.» 65Ɛnza ŋé o kóman ólu fɔ́ mínngɛ, faanlɛɛɲansebhaa olu kúnndiiba óo a yɛ́ɛla kannanfaani o fála mwɛ́nnɛn o mán tó kɛ fɔ kó: «A wɛɛ Ala lɔ́ɔya! Án manko tɛ́ sɛ́ɛya gbɛ́ɛ ɲiin nán bhée! A bɛ́ wɛ́ɛ a kómankan ŋo myɛ́n ké aa Ala lɔɔyala lɛ? 66Álee kó án ni mínnɛɛn lé kɛ́ a lá o lɔ?» Mɔɔn ólu fɔ kó: «Áa á fáa lé!» 67Oo kɛ́ mínngɛ, íi i láji bwɔ́ a ɲán lɔ óni kɛ a gbú gbú, lɔ́luu a tóo cé 68tó kɛ táa fɔ lé a yɛ kó: «Célayakɛ Kílisi! Yɛ́ɛtii i gbasi ó fɔ́ án ɲɛn?»
Piyɛli é í lámangbɛyala kó ale mán Ɛnza nɔn
Maki 14.66-72; Luka 22.56-62; Yaya 18.15-18,25-27
69Oo í lɔ́ ké Piyɛli síinin ɲé kɛ́ɛnman lú o kɔ́ɔnnɔn. Bháalakɛdhye musoman nɔ́ é í mángbaa a lá kɛ fɔ kó: «Íle ní Ɛnza Galileka cɛ o tɛ́ɛ kéene.» 70Wáa Piyɛli é í lámangbɛya ni a fɔ lé bɛ́ ɲánla kó: «Í yɛ́ɛ é dhyaa mínnan wé, né tɛ́ bhɔ́la o ɲánle.» 71Aa o fɔ tó kɛ táa lú o lákɔɔlaa ó lɔ. Bháalakɛdhye musoman ngbɛ́ɛ é a yé yénɔn, oo fɔ yé ŋó mɔɔn ólu yɛ kó: «Cɛ míin ní Ɛnza Nazalɛtika cɛ o tɛ́ɛ kéene.» 72Piyɛli é í lámangbɛya ko kwáa kɛ́ ni í shɛ́n ne kó: «Mán ale cɛ ó lɔ.»
73Wáati dɔ́ɔnin ŋé tínmin mínngɛ, mɔɔn mínnu tɛ́ɛ yénɔn, olu í mángbaa Piyɛli la kɛ fɔ a yɛ kó: «Síka tɛ́ lɔ, íi Ɛnza nvongamaa o lé lɔ́ le, í kómankan ŋo bɛ́ é yáala mɔɔn la kó íi bhɔ́la Galile le.» 74Piyɛli é í shɛ́n kɛ fɔ kó: «Ala a ndáan, ni ngɛ́ kɛ́ fwɔnɲan la! Ngó mán ale cɛ ó lɔ!» O wáati kée ŋó lɔ, lónan ŋóo kóman téeman. 75Oo kɛ́ mínngɛ, Ɛnza ŋé kóman mín nvɔ Piyɛli yɛ oo bhyáa a kɔɔnnɔn téeman kó: Sánnin lónan ŋo á kóman, íle yáa fɔ né mán síɲan sawa kó í mán né lɔ́. Aa bhɔ́ kɛ́ɛnman kɛ kasi kɛ́ bhɛ́ɛbhɛɛ le.
Currently Selected:
Matiyu 26: MXX
Highlight
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.