Matiyu 14
14
Yaya Bátizelikɛbhaa yɛ saya ó
Maki 6.14-29; Luka 9.7-9
1O wáati o lɔ, cɛ mín ndɛ́ɛ fáan lá Galile mála ó lɔ tó ale cɛ ó tɔ́ɔ tɛɛ kó Elɔdi, aa Ɛnza ngodhyaa ŋó myɛ́n. 2Aa fɔ a yɛ bháalakɛdhye ŋolu yɛ kó: «Yaya Bátizelikɛbhaa lée wé, a wɛɛ kúun kɛ bhɔ́ su ólu cɛ́man! O lé kósɔn káwananngo lú kɛ́ ó sé é a yɛ.»
3Wáa Elɔdi tɛ́wɛɛ fɔ kó kɛ Yaya lálɔ kɛ a sili tó kɛ a bhyáa kaso la. A tɛ wɛɛ o fɔ kɛ a kun ngɛ́ a bhádhyemannjɛ Filipu muso Elodiyadi ta ko o lé lɔ. 4Kɛ mansɔɔ, Yaya tɛ́wɛɛ fɔ Elɔdi yɛ kó a mánngan kɛ Elodiyadi tá a muso le. 5Elɔdi tɛ́ɛ fɛ́ kɛ Yaya fáa, wáa a tɛɛ sháannan yaman o ɲɛn, kɛ mansɔɔ yaman o tɛ́ɛ Yaya yacela céla lé le. 6Wáa Elɔdi wóolo ŋo sámyɛ ŋo la, mɔɔn mínnu kíinin ndɛ́ɛ súnmannɔɔ ndɔ́ɔ o lɔ, Elodiyadi dhyémuso é lɔ ngɛ́ olu kɛ́ɛnnan. A ko é dhyáa Elɔdi yɛ. 7Kó ólu kɛ́ɲan man cé, aa láheli ta o síngbiinin ŋo yɛ kó o kɛ́ fé ŋóo fé ngófɔ a yɛ, kó a yáa o kɛ́ a yɛ. 8A lɔsunin ngwɔ a mán bhóo, Elɔdi dhyémuso é fɔ kó: Yaya Bátizelikɛbhaa kún ŋó bhyáa tása lɔ kɛ́nan a di mán yánun. 9O kóman óo mansacɛ o ɲánlasii. Wáa a yɛ láheli ta ni ŋólu ni a latuunnan ólu kósɔn, aa fɔ kó kɛ Yaya kún ŋo dí dhyé ŋó mán. 10Aa mɔɔn bhyáa kɛ táa Yaya kún ndɛ́ɛ kasobho ŋo la. 11Ii a kún ŋo bhyáa tása lɔ kɛ́nan a lo síngbiinin ŋo bhóo, tó síngbiinin óo Yaya kún ŋó ló a wóobhaa bhóo. 12Yaya yɛ́ kaamɔɔndhye ŋolu nan Yaya fée ó tá kɛ a sutaa, tó kɛ táa saan o láce Ɛnza nan.
Ɛnza ŋé lɔ́min dila cɛ wáa lóo mán
Maki 6.30-44; Luka 9.10-17; Yaya 6.1-14
13 Ɛnza ŋé Yaya sáyako o myɛ́n mínngɛ, aa í bhyáa kúun nɔn kɛ bhɔ́ yénɔn kɛ táa í kéenan ywáa cɛ́bhɔnin nɔ lɔ. Mɔɔn ólu a táako o myɛ́n, tó yamandhye ŋé bhɔ́ só ólu lá kɛ bhyáa Ɛnza nɔn fɛ́ i sénan. 14Ɛnza ŋé bhɔ́ Kúun ŋó lɔ́ mínngɛ, aa yamanba ó yé, i mánɲwaan é lo a lɔ tó aa i yɛ yaangalotɔ ólu lákɛɛnya. 15Ywáala é sé mínngɛ, a yɛ kaamɔɔndhye ŋolu í mángbaa a lá kɛ fɔ a yɛ kó: «Ya ŋó cɛ́bhɔnin ɲé, wáati o ló ŋwɛ́ɛn yánva. Yaman ó lábhyaa ké ii táa sunman nzá an ndɔ́ɔfɛ só ólu la» 16Waa Ɛnza ŋé fɔ i yɛ kó: «I mánngan kɛ táa, ále gbúlu a sunman ndí i man!» 17Ii fɔ Ɛnza ɲɛn kó: «Búlu lóo ní yɔ́ɔ dhyé nvyáa gbóto lée án móo yánun.» 18Ɛnza ngó i yɛ kó: «Áa nan olu lé ɲɛ́n.» 19Ɛnza ŋé fɔ kó yaman o a í síi lúu man bín ŋó ka. Oo kɛ́ mínngɛ Ɛnza búlu lóo ólu ní yɔ́ɔ dhyé nvyáa ó tá, kɛ í ɲán layɛɛ sángboo o mánshaa fɛ́ kɛ Ala bálika bhɔ́, tó kɛ búlu ólu kúunndɛɛtɛɛ kɛ i lo ló a yɛ kaamɔɔndhye ŋolu bhóo. Ólu búluguun ŋólu lɔ́taandaa yaman o la. 20Mɔɔn ólu bɛ́ é lɔ́minkɛ kɛ fá. Tó ii nán seenin ndá ni fyáa láfanin né sunman ndɔto ó la. 21Mɔɔn mínnu tɛ́ɛ lɔ́minkɛsɛɛ o lɔ ólu tɛ́ɛ cɛ wáa lóo lú siya bhɔ́la ó tɛ́ muso ólu ní dhyémuu ólu la.
Ɛnza ŋé táaman kɛ́la bhá ó ka
Maki 6.45-52; Yaya 6.15-21
22O kó óo bhɔ́ í lá tɛ́nmɛn, Ɛnza ŋé fɔ a yɛ kaamɔɔndhye ŋólu yɛ kó ii í bhyáa Kúun ŋó lɔ kɛ bhá ó tɛ́ɛ a ɲɛn kɛ táa a ɲan dɔ́ o mán sánnin ale a yaman ólu lábhyaa. 23Aa yaman ólu lábhyaa mínngɛ, aa í yɛ́ɛ í kéenan tii ó ka kɛ í sɛ́ɛ. Ywáa ó sé ké aa yénɔn bhée. 24Kúun ŋó wɛ́ɛ í ywáa yáɲan bhákaan ŋo la. Wáa fwɛ́ɛn ó bhyáa kóɲan o mán, jífwɛɛn o tɛ́ɛ Kúun ŋó láfinzanvinzanan kɛ mansɔɔ fwɛ́ɛn ó tɛ wɛɛ gbíiya i ka. 25Fáyi o mán, Ɛnza ŋé táaman kɛ́ bhá ó ka kɛ táa a yɛ kaamɔɔndhye ŋólu saala. 26Kaamɔɔndhye ŋólu a yé táaman kɛ́la bhá ó ka mínngɛ, ii sháan koyoongɛ fɔ́ ii fɔ́la kó: «Mɔɔn lɔ́ lé sáula káa kɛ́ wé!» Ii gbáa ngbáa sháanɲan bhóo. 27Ɛnza ŋé fɔ i yɛ o ywáaninngee ŋo lɔ kó: «Áa í lɔ́ja! Né lée wé, a kɛ́nan sháan!» 28Oo kɛ́ mínngɛ, Piyɛli é kóman ó tá kɛ fɔ kó: «Mantii o, ni íle lée wé, a fɔ kó ní táaman kɛ́ jí ó ka kɛ táa í saala.» 29Ɛnza ngó a yɛ kó: «Nan!» Piyɛli é bhɔ́ Kúun ŋó lɔ tó kɛ táaman kɛ́ lámyaan jí ó ka kɛ táa Ɛnza manshaafɛ.
30Wáa Piyɛli é yé mínngɛ óo fwɛ́ɛn ó wɛ́ɛ bwóɲan, aa sháan. O kɛ́ɲan o mán, aa táa yíi lé jí ó kɔɔ. Aa gbáa ndéeman kó: «Mantii o, ngála!» 31Íkɔlɔ téeman, Ɛnza ŋé í bhóo lábhɔ kɛ a myaan tó kɛ fɔ a yɛ kó: «Í ló yɛ lánanya ó lo ŋa lɔ́ɔ! Íi síkala mínnɛɛn le la?»
32I bɛ́ é í yɛ́ɛ Kúun ŋó lɔ, fwɛ́ɛn óo í mánla. 33Kó ólu kɛ́ɲan man cé, kaamɔɔndhye mínnu tɛ́ɛ Kúun ŋó lɔ, ólu í kúnmɛɛn nɔ́kɛɛ Ɛnza ɲɛn ni fɔ lé a yɛ kó: «Kɛ fɔ tínɲan in ne, íle lée Ala dhyénjɛ óle!»
Ɛnza ŋé Zenezalɛti lánga ŋo yaangalotɔ ólu lákɛɛnyala
Maki 6.53-56
34Ii wɛɛ bhá ó tɛ́ɛla kɛ sé Zenezalɛti mála o lɔ. 35O ywáa ó mɔɔn ólu Ɛnza manlɔ, ii táa o kóman ó láse o mála ywáa bɛ́ lɔ, tó mɔɔn olu nan yaangalotɔ ó bɛ́ lé Ɛnza ɲɛn, 36Tó kɛ a dɛ́li kó aa dyɛn ké yaangalotɔ ólu a í bhóo túu a yɛ deekeba ó lágboo o lá. I súu súu é í bhóo túu a lá, o mɔɔn ó bɛ́ é kɛ́ɛnya.
Currently Selected:
Matiyu 14: MXX
Highlight
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.