Luka 8
8
Muso mínnu tɛ́ɛ Ɛnza dhyɛmanla
1O kwɔ, Ɛnza ndɛ́ɛ yáala lá sóba óni só dhyénin ŋólu la kɛ́ lakawanin kɛ́, kɛ́ Ala yɛ́ mansaya ó sanmankanmɛɛ o láse. A yɛ́ kaamɔɔndhye ndá ni fyaa ó tɛ́ɛ ni a le, 2óni muso láman láman, Ɛnza ndɛ́ wɛ́ɛ Lámansa gbɛ kɛ́ bhɔ́ mínnu fɛ, kɛ́ lɔ́lu kɛ́ɛnya. Olu tɔ́ɔ ó lée nin: Mwɛnyamu Magidalaka, Ɛnza ndɛ́ wɛ́ɛ Lámansayoo wóonvyaa gbɛ́ kɛ́ bhɔ́ min nvɛ́, 3óni Zaani min ŋé Elɔdi yɛ́ nanfoo ó kúnnansiibhaa Shuza muso le, óni Suzani, óni muso gbɛ́ɛlu, mínnu tɛ́ɛ Ɛnza ni a yɛ́ kaamɔɔndhye ŋólu dhyɛmanla ní í bhóofe ŋólu lé.
Sɛɛnkɛbhaa o yɛ saanan ó
Matiyu 13.1-9; Maki 4.1-9
4Yaman é bhɔ́ só ólu bɛ́ lá kɛ́ nán í mínnin Ɛnza nán. Aa saanan míin ná kó:
5«Sɛɛnkɛbhaa o bhɔ́ kɛ́ táa a yɛ́ sí ó fíi a bhóo sɛɛn man. Kɛ́ tó sí fíi ó la, a koo ó lɔ́lu táa bé sháa ó lafɛ. Tínminmaa ólu o dɔ́, tó sámankɔɔn ólu í lakuun. 6Á fán nɔ́lu bé fáa ó ka. Olu i fɛ́ɛ mínngɛ, íi fáa kɛ mansɔɔ swáan tɛ tɛ́ i kɔɔ. 7A lɔ́lu é táa bé ŋwɛ́ɛn ŋólu cɛ́man, ólu i fɛ́ɛ, óni ŋwɛ́ɛn ŋó wili ɲɔɔn nvɛ́, ŋwɛ́ɛn ŋólu í sɔ́ɔsii olu ka. 8A lɔ gbɛ́ɛlu táa bé lúu dhyáanin ŋó ka. Olu i fɛ́ɛ kɛ́ wili kɛ́ dhyé nzhɛ́ɛman ngɛ́. Ólu í ɲɔɔn ngɛnmɛn kɛnmɛn sɔɔ.»
O kóman ó fɔnin ngwɔ, Ɛnza ŋé gbáa kó: «Tóo é min ngúnman kɛ́ myɛnnin kɛ́, o á myɛnnin kɛ.»
Mínnɛɛn le kósɔn Ɛnza ŋé saanan lá lá?
Matiyu 13.10-13; Maki 4.10-12
9Ɛnza ŋé saanan min ná, a yɛ́ kaamɔɔndhye ŋólu a manɲaankɛ o kɔɔ ó mán. 10Aa i yawi kó: «Ala yɛ́ mansaya ó gbondo ó lɔninya ó wɛ́ɛ dí ále léelu man. Wáa mɔɔn tɔ́ ólu tá o fɔ í yɛ́ saanan bhóo le man, kó óo kó e kɛ́ ke íi mánfɛɛli kɛ́ wáa ke i kɛ́nan fósi yé, ké íi myɛnnin kɛ́ wáa ke i kɛ́nan bhɔ fósi ɲánle.»
Ɛnza ŋé sɛɛnkɛbhaa o yɛ saanan ó kɔɔ o fɔ́la
Matiyu 13.18-23; Maki 4.13-20
11«Ni saanan min na, o kɔɔ ó lée nín: Ala saaninkan ŋó lée sí o lé. 12Sháa ó lafɛ láa óo mɔɔn lɔ́ léelu lé mín núu Ala sáaninkan ŋo myɛ́nnan, wáa Sɔtaannan é nan o bhɔ́ i yóso lɔ, kó óo kó é kɛ́ ke i kɛ́nan lá a lá kɛ́ kísi. 13Sí mín núu bé gbófaa ywáa o lɔ, óo mɔɔn lɔ́ léelu lé, ní ólu kɛ́ ó kóman ó myɛ́n, íi sɔ́n a mán ni nisɔdhyaa le. Wáa Ala saaninkan ŋó díin gbáannin ndɛ́ kɛ́la o tíi ólu yóso o lɔ, íi lá lá o kóman ó la wáati dɔ́ɔnin ngɔ́ɔnnɔn, ní lɔ́swaannin ó kɛ́nan wáati min nɔn, íi i íkwɔ lo. 14Sí míin bé ŋwɛ́ɛn ŋólu cɛ́man, óo mɔɔn lɔ́ léelu lé, mínnu wɛɛ Ala saaninkan ŋó myɛ́n, hánminnanngo ólu, ní nanfoo kó ólu, ní dínɲankɛdhyaa óo o kóman ó gbɛ́nnɛn fɔ́ i tɛ dhyé ngɛ́. 15Sí mín núu bé Lúudhyaanin ŋó ka óo mɔɔn lɔ́ léelu lé, mín núu Ala saaninkan ŋó myɛ́nnan, íi a myaanla ni yósobhɛɛ lé kɛ́ í lɔ́ja tó kɛ́ dhyé ngɛ.»
Laman ŋó tá sáanan ó
Maki 4.21-25
16Ɛnza ŋé fɔ íkwɔ kó: «Mɔɔn sí tɛ́ laman ŋó lamaannan kɛ́ a bhyáa pála ŋó kɔ́ɔ, wáman láfe ŋó kɔ́ɔ. Wáa aa síilaa lamannziife ne ka ké mɔɔn mínnu kɛ kɛ́ lónan bhó ŋó kɔɔnnɔn, olu a yéli kɛ́.»
17«Kɛ mansɔɔ fénoonaankɛnin nzí tɛ́ yé mín ndáa yé. Gbondo sí tɛ́ yé mín ndáa bhɔ́ kɛ́ɛnman.»
18«Áa a yɛ́ myɛnnin kɛ́ɲan ó lákɔɔsi, kɛ mansɔɔ aa céne, lɔ́ kɛ́ kɛ́ mɔɔn mín móo, lɔ yáa bhyáa o tíi ó tá ó ka; Waa fé ndɛ́ mín móo, yáanin a í milila kó míin a bhóo, o yáa bwási a lá.»
Ɛnza ŋwóobhaa ní a bhádhye ŋólu
Matiyu 12.46-50; Maki 3.31-35
19Ɛnza ndɛ́ɛ ywáa min nɔn, a wóobhaa ní a lɔ́ɔcɛ ólu nan. Wáa i tɛ tɛ́ sé kɛ́ í mángbaa a lá yaman ó kósɔn, 20lɔ é fɔ a yɛ kó: «Í wóobhaa ní í lɔ́ɔcɛ ólu lɔ́nin ɲé kɛ́ɛnman íi fɛ́ kɛ́ í yé.»
21Wáa aa i yawi kó: «Mɔɔn mínnu é i tóo manlɔla Ala saaninkan ŋó lɔ kɛ́ a sháa ó táaman, o lée lúu né wóobhaa óni nɔ́ɔcɛ lú lé.»
Ɛnza ŋé fwɛ́ɛnba ó lalɔla
Matiyu 8.23-27; Maki 4.35-41
22Ló nɔ́ la, Ɛnza ŋé ló kúun ŋó kɔɔnnɔn ní a yɛ́ kaamɔɔndhye ŋólu le. Aa fɔ i yɛ kó: «Án ndáa bhá ó kwɔ́man.» 23Kɛ́ i tó bhá ó cɛ́man kúunnanbwee ó la, Ɛnza ŋé sunnɔɔnkɛ. Fwɛ́ɛnba lɔ é bhyáa, fɔ kúun ŋó tɛ́ɛ fɛ́ kɛ́ fá jí ó la. Tɔnin njɛ́lɛlɛ tɔnin njóun ké íi tó ji ó lɔ. 24O lɔ, íi i mangbaa Ɛnza nan kɛ́ a lá kúun kɛ́ fɔ a yɛ́ kó: «Kaamɔɔn, kaamɔɔn, án ngáa fáa.»
Ɛnza ŋé kúun kɛ́ jámanngɛ fwɛ́ɛn óni jí ó kunnan. Fwɛ́ɛn ó i lɔ́, jí óo í mánla, ywáa ó í mánla. 25O kwɔ, Ɛnza ŋé fɔ a yɛ́ kaamɔɔndhye ŋólu yɛ kó: «A yɛ́ lánanya óo mín?»
Kaamɔɔndhye ŋólu káwakoya, fɔ sháanɲan é lo i yóso lɔ tó í tɛ́ɛ ɲɔ́ɔn mánɲaankɛla Ɛnza ndá fa ŋo fɛ kó: «Cɛ míin ŋé yɛ́ɛtii le? Yáanin fwɛ́ɛn óni bháji óo a bwóɲanla?»
Ɛnza ŋé Lámansatɔ lɔ́ lákɛɛnyala
Matiyu 8.28-34; Maki 5.1-20
26Ɛnza ní a yɛ́ kaamɔɔndhye ŋólu sé Zelaza mala ó lɔ, bhá ó ɲán dɔ́ o mán o min ŋé Galile mala ó ɲán ó lɔ. 27Ɛnza ŋé í yíi kɛ́ bhɔ́ kúun ó kɔɔnnɔn kɛ í bhyáa lúu mán tɛ́nmɛn! Cɛ lɔ́ tɛ́ɛ o só ó lá, oo nán a kunmyɛ. Lámansayoo néelu tɛ́ɛ o cɛ ó fɛ́. Kabiini wáatija, a tɛ tɛ́ faani lónan bhée. A tɛ tɛ́ síla bhó ngɔɔnnɔn bhée fɔ kábulu só ó la. 28Cɛ o Ɛnza ɲé mínngɛ, a gbáa fáanla kɛ́ táa i kúnmɛɛn nɔkɛɛ Ɛnza ngɔɔ kɛ́ fɔ kó: «Mínnɛɛn lée án njɛ, Ala kɔɔtaninmba o dhyénjɛ Ɛnza? Née i dɛ́lila, í kɛ́nan né tɔ́lɔ.» 29Cɛ óo ó fɔ lé, kɛ mansɔɔ Ɛnza ndɛ́ɛ a fɔ́la kó Lámansa o á bhɔ́ a fɛ. Lámansa ó tɛ́ɛ a tɔ́lɔla wáati shɛ́ɛman, mɔɔn ólu tɛ́ɛ a bhóo óni a se ŋólu silila ní nɛɛnyɔlɔkɔ óle lé kɛ́ a bhyáa. Wáa a tɛ́ɛ tóla kɛ́ ólu tɛ́ɛtɛɛ, Lámansa ó tɛ́ɛ táala ní ale wúla ó kɔɔnnɔn.
30O kwɔ, Ɛnza ŋé a mánɲaankɛ kó: «Í tɔ́ɔ díi?»
Lámansa ó Ɛnza ɲawi kó: «Ndɔ́ɔ kó yaman.» Aa ó fɔ lé kɛ mansɔɔ Lámansa shɛ́ɛman né tɛ́ɛ a fɛ. 31Lámansa ólu é Ɛnza dɛ́li kó a kɛ́nan i gbɛ́ kɛ́ táa ile ɲangbanywaa lɔ.
32O wáati ó lɔ gbóyoonin nzɛ́ɛ lɔ́lu tɛ́ɛ lɔ́minkɛla tii ó mán. Lámansa ólu Ɛnza dɛ́li kó aa sɔ́n ké íi táa lo ó gbóyoonin ŋólu lɔ. Ɛnza ŋé sɔ́n. 33Lámansayoo ŋólu bhɔ́ o lé lɔ cɛ ó fɛ́, kɛ táa lo gbóyoonin ŋólu lɔ. Gbóyoonin nzɛ́ɛ ó í cɛ kɛ́ yɛ́ɛ tíi ó ka kɛ́ táa í bé bháji ó lɔ kɛ́ fáa.
34Gbóyoonin ngunnansiibhaa olu bɛ́ɛ bwée kɛ táa o kó ó búubhɛɛ só o kɔɔnnɔn, óni kanman ŋolu la. 35Kó míin kɛ́, mɔɔn ólu bhɔ́ kɛ́ táa ó mánfɛɛ. Ii sé Ɛnza mán. Ii a yé kó Lámansa ó wɛ́ɛ bhɔ́ cɛ ó fɛ, a síinin ŋé Ɛnza nzé ngɔ́ɔ, fáani é a kannan, a wɛ́ɛ í ɲánmanlɔ. Ii sháan gbútuukɛ. 36O kó ólu kɛ́ mɔɔn mínnu ɲánla, lámansayoo ŋólu bhɔ́ ɲanmin mán tó aa bwási í tɛ́ɛ o ɲánfɔla mɔɔn tɔ́ ólu yɛ. 37O lɔ, Zelazaka ólu Ɛnza dɛ́li kó aa bhɔ́ í yɛ́ mala ó lɔ, kɛ mansɔɔ a sháanɲan ó wɛ́ɛ bwóɲan i mán. Ɛnza ŋé lo kúun ŋó kɔɔnnɔn tó kɛ táa, 38Lámansayoo ŋolu bhɔ́ cɛ min nvɛ́, óo Ɛnza ndɛ́li kó ní aa sé kɛ́ táa ni ale.
Wáa Ɛnza ŋé a yawi kó: 39«Í kwɔ́sɛɛ kɛ́ táa i bhóo lúman, Ala wɛ́ɛ kóba mínngɛ i yɛ, ii ó bɛ́ lɔ́sɔɔ.»
Ɛnza ŋé kó óo kó kɛ́ a yɛ, aa táa o lɔsɔɔ só ó kɔɔnnɔn.
Ɛnza ŋé muso lɔ́ lákɛɛnya kɛ́ sínngbiinin nɔ sú lákuun
Matiyu 9.18-26; Maki 5.21-43
40 Ɛnza ŋé í kwɔ́sɛɛ kɛ́ bhɔ́ bhá ó kwɔ́man wáati min nɔn, yamanba é a kunmyɛ ni nisɔdhyaa le, kɛ mansɔɔ i bɛ́ tɛ́ɛ a mankɔɔnnan. 41O wáati ó lɔ, cɛ lɔ́ é nan min ndɔ́ɔ kó Zayilusi. Sɛ́ɛbho ó kunndii lé tɛ́ɛ ále. Aa táa i kúnmɛɛn nɔkɛɛ Ɛnza ngɔɔ, kɛ́ a dɛ́li kó aa a mankoto ké áa táa a bhóo lúman, 42kɛ mansɔɔ a dhyémuso mánngɛnnɛn, kó aa fɛ́ kɛ́ sayakɛ, kó ó dhyémuso kée ŋó lée a dhyé ne. Dhyé ŋó sísa ó tɛ́ɛ sanɲin tá ni fyáa si bhɔ́la.
Ɛnza ndáatɔ ó o ywáa ó lɔ, mɔɔn ólu tɛ́ɛ a díinndiinnan fɔ kɛ́ a gbɛ́nnɛn. 43O wáati ó lɔ, muso lɔ tɛ́ɛ i cɛ́man, mín ɲɛ́n káakwo tɛ́wɛɛ kɛ́ a la yangalo lé sanɲin tá ni fyáa kɔ́ɔnnɔn. A bhóota ŋó bɛ́ wɛ́ɛ wɛɛ, kɛ mansɔɔ a tɛ́wɛɛ táa bhwɛ́ɛkɛbhaa shɛ́ɛman nvɛ́ yé. Wáa a yɛ́ yangalo ó mán kɛ́ɛnya. 44Aa í mángbaa Ɛnza nán a kwɔ́man kɛ í bhóo túu o yɛ́ deeke ó lágboo o lá. O ywáanin ŋó lɔ, a yɛ́ káakwo yangalo óo í lɔ́. 45Ɛnza ŋé ɲaankɛli kɛ́ kó: «Yɛ́ne wɛɛ i bhóo túunan?»
Mɔɔn sí man sɔ́ɔ kɛ́ fɔ kó ale. Piyɛli é kóman ó tá kɛ́ fɔ kó: «Kaamɔɔn, i ɲán é a lá kó mɔɔn ólu í díinndiinnan fɔ́ kɛ í gbɛ́nnɛn.»
46Wáa Ɛnza ngó: «Mɔɔn lɔ wɛ́ɛ í bhóo túunan, kɛ mansɔɔ né wɛ́ɛ a lɔgbɛ kó faan lɔ́ wɛ́ɛ bhɔ́ ne lɔ.» 47Muso o a lɔ kó ó kó ó tɛ́ sé kɛ́ í lóonaankɛ mínngɛ, a yaayaatɔ ó táa i kúnmɛɛn nɔkɛɛ Ɛnza nzé ngɔɔ. Aa í túu a lá kún mínnan, óni a kɛ́ɛnya ywáaninngee nɔn ɲán mín mán, aa ó bɛ́ lɔsɔɔ Ɛnza ɲɛ́n mɔɔn ólu ɲánla. 48Ɛnza ŋé fɔ a yɛ́ kó: «Nyémuso, i yɛ́ lánanya ó wɛ́ɛ í lákɛɛnya. Táa hɛ́lɛ lɔ́.»
49Kɛ Ɛnza ndo ó kóman ó la, mɔɔn lɔ é bhɔ́ sɛ́ɛbho kunndii Zayilusi yɛ́ lú ó mán kɛ́nan fɔ a yɛ́ kó: «I dhyémuso wɛ́ɛ sayakɛ, í kɛ́nan kaamɔɔn ó tɔ́lɔ bhée.»
50Ɛnza ŋé ó kóman ó myɛ́n mínngɛ, aa fɔ Zayilusi yɛ́ kó: «Í kɛ́nan sháan, lá Ala la dɔlɔun, i dhyémuso yáa kísi.»
51Ii sé Zayilusi yɛ́ lú ó man wáati min nɔn, Ɛnza mán sɔ́n ké mɔɔn lɔ a lo ni ále bhó ŋó kɔɔnnɔn fɔ Piyɛli, óni Yaya, óni Zaki, óni dhyémuso ó fá óni a wóobhaa dɔlɔun. 52Mɔɔn bɛ́ tɛ́ɛ kásila kɛ́ gbáa sínngbiinin ŋó sayako ó lɔ. Ɛnza ŋé a fɔ i yɛ kó: «A kɛ́nan kásikɛ, dhyémuso ó sayakɛnin ndɛ́, aa sunnɔɔn le lɔ.»
53Mɔɔn ólu a lɔ kó sínngbiinin ŋó wɛ́ɛ sayakɛ tínɲan in ne mínngɛ, ii yɛ́ɛbhɔ Ɛnza nɔn. 54Wáa aa lo kɛ́ dhyémuso ó myáan a bhóo mán kɛ́ fɔ a yɛ kó: «Nyé, í wíi.» 55O ywáaninngee ŋo lɔ, dhyé ŋó ní óo i kwɔ́sɛɛ a man, aa i wíi. Ɛnza ŋé fɔ́ko ii lɔ́min di a man. 56Dhyé ŋó wóobhaa ólu káwakoya koyoongɛ. Wáa Ɛnza ŋé fɔ i yɛ kɛ́ a mangbɛya ko i kɛ́nan o kó ó ɲánfɔ mɔɔn sí yɛ.
Currently Selected:
Luka 8: MXX
Highlight
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.