Yaya 9
9
Ɛnza ŋé cɛfyoondɔ lɔ́ ɲán lákala
1Ɛnza ndíminndɔ óo cɛ lɔ́ yé min ŋe wóo fyóo ne. 2Kaamɔɔndhye ŋólu Ɛnza mánɲaankɛ kó: «Kaamɔɔn, mínnɛɛn le kósɔn cɛ míin ŋe wóo fyóoɲan lɔ́? Ale gbú ta yúumu ó kósɔn ŋan, wáman a mwɛ́ɛnbhaa ólu ta o?»
3 Ɛnza ŋé í yawi kó: «Ale ta yáacɛ o tɛ́, a mwɛ́ɛnbhaa ólu ta yáacɛ o tɛ́. Wáa óo kɛ́ lé, ké Ala tá sébhaaya o waa yáa ale sɔ́ɔbu lá. 4Tée óo máannan wáati min nɔn, án ngákan kɛ án njébhaa o yɛ bháala ó kɛ́ o wáati o le lɔ́. Ni sú o kɛ́ kwó, mɔɔn si tɛ́ sé kɛ bháala kɛ́ bhée. 5Kɛ́ né tó dínɲan lɔ́, né lée dínɲan tá kɛ́ɛnɲan ó lé.»
6Ɛnza ŋé ó kóman ólu fɔ kɛ́ wɛ́ɛ mínngɛ, aa í láji bwɔ́ lúuman kɛ́ ó bhɔɔ dɔ́ɔnin ŋó lwée kɛ́ o gbóo cɛfyoondɔ ó ɲán o man 7kɛ́ fɔ a yɛ́ kó: «Táa i ɲán o kwó Silowe jí jáan ó lɔ́.» Silowe kɔ́ɔ ó tɔ́ɔ kó céladhye. Fyóondɔ ó táa i ɲán o kwó yé, a kwɔ́sɛɛtɔ ó, a tɛ́ɛ yéli kɛ́la.
8A siiɲɔɔn olu óni a lɔmaa mínnu tɛ́ɛ a lɔ kɔ́ɔ fáanlɛɛ kófɔ ó man, ólu nan a yé, íi fɔ kó: «Cɛ min ndɛ́ɛ í síila yánun kɛ́ dɛ́lili kɛ́, ó tɛ́ míin ne a?» 9Lɔ́lu kó ale lée wé. Lɔ́lu kó ale tɛ́ o le, ko i bhɔ́nin ŋé ɲɔ́ɔnnan lé. Wáa cɛ ó kó: «Né lée wé.» 10Íi a mánɲaankɛ kó: «Tó, i ɲán óo í láka dí lé?» 11Aa i yawi kó: «Íi cɛ min ngíila kó Ɛnza, ó lée bhɔɔ o lwée kɛ́ ó gbóo ɲán ó man kó ndáa ɲán o kwó Silowe jí ó lɔ́. Ní táa ɲán o kwó, né ɲán óo í láka.» 12Íi a mánɲaankɛ kó: «Aa mín?» Aa í yawi kó mán lɔ.
Falizɛn ŋólu fyóonjɛ o kɛ́ɛnyanin ŋo manɲaankɛ lá
13Cɛ min ndɛ́ɛ fyóo né, íi ó myáan kɛ́ táa ó lé Falizɛn ŋólu saala. 14Waa Yawudhyaa olu yɛ́ lɔnwɛɛnlilo ŋo lé tɛ́ɛ wé Ɛnza ŋé bhɔɔ ó lwée kɛ́ cɛ ó ɲán o láka ó lo ŋo lé lá. 15Falizɛn ŋólu cɛ ó mánɲaankɛ kó i ɲán oo i láka dí lé. Aa í yawi kó: «Aa bhɔɔ o lé gbóo ɲán ó man, ní ɲán o kwó, ní yéli kɛ́la sísan.»
16Falizɛn ŋó lɔ́lu a fɔ kó: «O cɛ ó tɛ́ lɔnwɛɛnlilo ŋó bhátola. O sán ó lɔ́, a mán bhɔ́ Ala fɛ́ yé.» Waa lɔ́lu kó: «Yuumutɔ é sé kɛ́ káwako míin ɲɔ́ɔn ngɛ́ a?» O ywáa ó lɔ́, í yɛ́ kóman óo fwɔ́ ɲɔ́ɔn ngwɔ́ tó íi i lɔtaa.
17Íi cɛ ó mánɲaankɛ i kwɔ́ kó: «Cɛ míin i ɲán ó lákanin, í lée mínnɛɛn lé fɔ́la a yɛ́ kó o lɔ́?» Aa í yawi kó: «Cɛ ó Céla lé lé.» 18O bɛ́ kwɔ́, Yawudhyaa ólu mán sɔ́n kɛ́ la a lá kó cɛ ó tɛ́ɛ fyóo né le kɔ́ɔ, fɔ íi a mwɛ́ɛnbhaa ólu kíi 19kɛ í mánɲaankɛ kó: «A wóodhye née cɛ míin né a? Áa wóo fyóo né le a? Aa kɛ́ díi tó aa yéli kɛ́la sísan?» 20A mwɛ́ɛnbhaa ólu í yawi kó: «Án ngwɛ́nnin a lɔ́ ŋóo án dhyé née wé, a fyóondɔ lée wóo. 21Waa a ɲán ó lákako ó, án ndɛ́ fósi lɔ́ o lɔ́. Mɔɔn míin a ɲán o láka án ndɛ́ o lɔ, áa a gbú mánɲaankɛ o lá, dhyémuu tɛ́ a lé bhée, aa sé kɛ́ ó ɲánfɔ a yɛ́.» 22A mwɛ́ɛnbhaa ólu ó fɔ kɛ mansɔɔ i tɛ́ɛ sháannan Yawudhyaa ólu ɲɛ́n. I tɛ́ wɛ́ɛ bhyɛ lɔ́ kó ni mɔɔn óo mɔɔn kɛ́ fɔ kó Ɛnza née Kílisi o lé, kó ó tíi o táa lo kaangɛbho ŋó kɔ́ɔnnɔn bhée. 23O kósɔn, a mwɛ́ɛnbhaa ólu fɔ́ ko íi a gbú mánɲaankɛ, kó dhyémuu tɛ́ a lé bhée.
24Cɛ min ndɛ́ɛ fyóo ne Falizɛn ŋólu cɛ ó kíi i kwɔ́ kɛ́ fɔ a yɛ́ kó áa Ala kunnanwee: «Án ni a lɔ ŋóo i ɲán ó lákabhaa óo yúumutɔ lé lé. Tínɲan o fɔ án ɲɛ́n Ala ɲánkɔɔ.» 25Aa í yawi kó: «Né kwɛ́nnin mán lɔ ni yúumutɔ lée a lé lɛ́! Ní kó kéene lɔ, né tɛ́ɛ fyóo né lé, waa sísan ní yéli kɛla.»
26Íi a mánɲaankɛ kó: «Aa mínnɛɛn lé kɛ́ í lá? Aa i ɲán ó láka dí lé?» 27Cɛ óo i yawi kó: «Ŋwɛ́ɛn ó ɲánfɔ a yɛ́ kɔ́ɔ, a mán í tóomanlɔ nɔ́n. Mínnɛɛn le kósɔn áa fɛ́ kɛ́ ó kóman kée ŋó lɔ́myɛn í kwɔ́? Bháanin á lée fɛ́ kɛ́ kɛ́ a yɛ́ kaamɔɔndhye ne a?»
28Falizɛn ŋólu a lámyaan kɛ́ cɛ ó nɛɛn, íi fɔ a yɛ́ kó: «Ile lée a yɛ́ kaamɔɔndhye ne. Án née kwɛnnin ŋé Musa ta kaamɔɔndhye ne lé. 29Án ni a lɔ ŋóo Ala é kóman Musa yɛ́. Waa míin ni, án mán ó bhɔ́laa lɔ́.»
30Cɛ óo fɔ i yɛ́ kó: «Aa, ó lée káwako ó lé. A mán a bhɔ́laa o lɔ waa a wɛ́ɛ né ɲán ó láka. 31Án ngwɛ́nnin ŋan lɔ ŋóo Ala tɛ́ yúumutɔ ó yɛ́ bhátoli ó yawila. Wáa mɔɔn míin sháannan Ala ɲɛ́n tó aa a sao ó kɛ́la, aa ó lé yawila. 32Án mán myɛ́n bhá kó mɔɔn míin wóo fyóoɲan lɔ́, kó lɔ́ wɛ́ɛ ó ɲán o láka. 33Ni cɛ míin ndɛ́man bhɔ́ Ala fɛ́ yé, a tɛ mánfaa sé fósi kɛla.» 34Íi fɔ a yɛ́ kó: «Ile kɛ́ tá i wóowaati ó mán ile gbútuu o bɛ́ɛ wóo yúumu o lé lɔ, tó ii nán i lɔ́ yánun kó ii án ngálanan!» Ii a gbɛ́ kɛ́ a lábhɔ kɛ́ɛnman.
Yɛ́ɛtii lú é fyóondɔ gbú o lé?
35 Ɛnza ŋé a myɛ́n ko í wɛ́ɛ a gbɛ́ mínngɛ, aa nan a labhyɛ. Aa a mánɲaankɛ kó: «I wɛ́ɛ lá mɔɔn Dhyénjɛ ó lá a?» 36Cɛ ó a yawi kó: «Mantii ó, yɛ́ɛtii é wé, ké ní lá a lá?» 37Ɛnza ngó: «I wɛ́ɛ a yé kɛ́ bhá. Ale lée kómanla i yɛ́ nín.» 38Cɛ ó kó: «Né o. Wɛ́ɛ lá i lá Mantii ó.» Aa i kúnmɛɛn nɔ́kɛɛ Ɛnza ngɔ́ɔ.
39O kwɔ́, Ɛnza ngó: «Née nan dínɲan míin nɔn kíti o le kósɔn. O lɔ, mínnu ɲán tɛ́ yéli kɛ́la, ké olu ɲán o a í láka. Min núu yéli kɛ́la, ké olu a kɛ fyóo ne.» 40Falizɛn mínnu tɛ́ɛ ni a lé o ywáa ó lɔ́ ólu a yɛ́ kóman ó myɛ́n, íi a mánɲaankɛ kó: «Án née fyóo né lé a?» 41Ɛnza ŋé í yawi kó: «Ní a tɛ́ɛ kɛ́ fyóo né, yúumu tɛ́ táa kɛ́ a man. Waa áa fɔ́la mínngɛ kó aa yéli kɛ́la, o kósɔn, a hálakinin ɲé wáati o bɛ́.»
Currently Selected:
Yaya 9: MXX
Highlight
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.