Yaya 11
11
Laza ta sáyako ó
1Cɛ lɔ́ yangalotɔ tɛ́ɛ Betani a tɔ́ɔ kó Laza, Mwɛnyamu ni a bhádhyemuso Mati yɛ só ó lá. 2Ale Mwɛnyamu lée látikɔlɔ o bwó Mantii Ɛnza nzé ŋo ka tó kɛ́ a kúnzhe ó ta kɛ́ a jɔsi, óle bhádhyemannjɛ Laza lé tɛ́manngɛnnɛn. 3A bhádhyemuso fyáa olu mɔɔn bhyáa kɛ́ táa fɔ Ɛnza ɲɛ́n kó: «Mantii ó, i twáanva mánngɛnnɛn.»
4 Ɛnza ŋé í yɛ́ kóman ó myɛ́n mínngɛ, aa fɔ kó: «Yangalo míin ndɛ́ a sáta lé, waa óo kɛ́ le ké Ala a i kunnanwee óni Ala Dhyénjɛ o á tando.»
5Mati, ni a bhádhyemuso o, óni Laza ko tɛ́ɛ dí Ɛnza ɲɛ́n. 6Waa aa Laza yɛ yangalo kó ó myɛ́n mínngɛ, a tɛ́ɛ ywáa min nɔn, aa tée fyáa kɛ́ yénɔn íkwɔ. 7O kwɔ́, aa fɔ a yɛ́ kaamɔɔndhye ŋólu yɛ́ ko: «Án ni án ngwɔ́sɛɛ Zude mala ó lɔ́.» 8A yɛ́ kaamɔɔndhye ŋólu fɔ a yɛ́ kó: «Kaamɔɔn, Yawudhyaa ólu tɛ́ɛ fɛ́ kɛ́ í bwó káwaguun nan yénɔn o mán myɛ́n bhá, ii fɛ́ ké án ní án ngwɔ́sɛɛ yénɔn a?» 9Ɛnza ŋé í yawi kó: «Lɛ́ɛlɛ tá ni fyáa le tɛ́ tée kée ŋó kɔ́ɔnnɔn a? Mɔɔn min ngɛ́ kɛ́ táaman kɛ́la tée lɔ́, o tɛ́ i sénanta la, kɛ mansɔɔ aa yéli kɛ́la tée ó bháaka lɔ́, 10wáa, ni mɔɔn lɔ́ kɛ́ kɛ́ táaman kɛ́la sú o lɔ́, óo í sénanta la le, kɛ mansɔɔ a tɛ́ yéli kɛ́la.»
11O kóman ó bɛ́ fɔnin ŋo kwɔ́, aa fɔ í yɛ́ kó: «Án ndwáanva Laza wɛ́ɛ sunnɔɔnkɛ, waa né kɛ́ɛ tɛ́ɛ a lákuun.» 12Kaamɔɔndhye ŋolu fɔ a yɛ́ kó: «Mantii ó, ni a wɛ́ɛ sunnɔɔnkɛ, ó kɔɔ ó tɔ́ɔ kó a yáa kɛ́ɛnya.» 13Ɛnza ndɛ́ɛ Laza yɛ sáyako ó lé fɔ́la, waa kaamɔɔndhye ŋólu tɛ́ɛ i milila kó a tɛ́ɛ kómanla sunnɔɔn gbú lé ka. 14O kwɔ, Ɛnza ŋé fɔ kɛ́ gbɛ́ i yɛ́ kó: «Laza wɛ́ɛ sayakɛ, 15né kɛ kɛ́bhɛɛya o yénɔn, ó lée dhyáa né yɛ́, óle kósɔn, ké aa sé kɛ́ í yéesii ne lá. Án ndáa a fɛ́ yé.» 16O lɔ́, Tomasi min ndɔ́ɔ kó Fyaanin, óo fɔ kaamɔɔndhye ŋó tɔ́ ólu yɛ́ ko: «Án ndáa yénɔn ké án bɛ́ a sayakɛ ɲɔ́ɔn nvɛ́.»
Ɛnza née ɲáanmanɲan o lé
17 Ɛnza ŋé nan mínngɛ Betani, oo kɛ́ ké Laza sú ó tɛ wɛ́ɛ tée náannin kɛ́ kábulu ó kɔɔnnɔn. 18Betani ni Yeluzalɛmu cɛ ó tɛ́ tɛ tínminnan kilo sawa ka. 19Yawudhyaa shɛ́ɛman ndɛ́ wɛ́ɛ táa Betani ké íi Mati ni Mwɛnyamu yéesii i bhádhyemannjɛ o yɛ sáyako ó lɔ́.
20Mati o a myɛ́n mínngɛ kó Ɛnza ŋé nánla, aa táa a labhyɛ. Oo kɛ́ ké Mwɛnyamu síinin ŋé bhó ŋó kɔ́ɔnnɔn. 21Mati é fɔ Ɛnza ɲɛ́n kó: «Mantii ó, ní i tɛ́ɛ kɛ́ yánun, né bhádhyemannjɛ o tɛ́ mánfaa sayakɛ. 22Wáa yáanin ní né lánin ŋé a lá kó ile kɛ fé ŋóo fé ngófɔ Ala yɛ́, a yáa o dí i man.» 23Ɛnza ŋé a yawi kó: «I bhádhyemannjɛ ó yáa kúun.» 24Mati é fɔ a yɛ́ íkwɔ kó: «Ní a lɔ ŋóo a yáa kúun dínɲan labhalo ŋó la.»
25Ɛnza ŋé fɔ a yɛ́ kó: «Né lée su ólu lákuunnan, ni ní ó dila, ni mɔɔn min ngɛ́ lá né lá yáanin o tíi o kɛ́ sayakɛ, o yáa ɲáanmanɲan. 26Óni mɔɔn óo mɔɔn kɛ́ kɛ́ í ɲánla, ni a lánin ŋé né lá, a táa sayakɛ fɛ́sɛ fɛ́sɛ. I lánin yé o lá a?» 27Mati é a yawi kó: «Ɔɔn Mantii ó, né lánin yé o lá kó ile lée Kílisi o lé, Ala Dhyénjɛ, min ngákan kɛ́nan dínɲan lɔ́.»
Ɛnza ŋé kasi lá Laza yɛ saya o kósɔn
28Aa ó kóman ólu fɔ kɛ́ wɛ́ɛ mínngɛ, aa táa a lɔ́ɔmuso Mwɛnyamu kíi lóonɔn kɛ́ fɔ a yɛ́ kó: «Kaamɔɔn ó wɛ́ɛ nan, áa i kíila.» 29Mwɛnyamu é ó myɛ́n mínngɛ, aa í lateeya kɛ́ í wíi kɛ́ táa Ɛnza nzáala. 30O wáati ó lɔ Ɛnza ndɛ́man lo só ó kɔ́ɔnnɔn bhá. Mati é a labhyɛ ywáa min nɔn, a tɛ́ɛ ó ywáa o le lɔ́. 31Yawudhyaa mínnu tɛ́ɛ ni Mwɛnyamu lé bhó ŋó kɔ́ɔnnɔn kɛ́ a yéesii, ólu a yé mínngɛ ké a wɛ́ɛ í lateeya kɛ i wíi kɛ́ bhɔ́, ólu i bhyáa a kwɔ́. I tɛ́ɛ í milila kó a kɛɛ tɛ́ɛ kábulu ywáa o le lɔ́ kɛ́ kásikɛ.
32Ɛnza ndɛ́ɛ ywáa min nɔn Mwɛnyamu é nan sé o ywáa o lɔ mínngɛ kɛ a yé, aa í kúnmɛɛn nɔ́kɛɛ a kɔɔ kɛ́ fɔ a yɛ́ kó: «Mantii ó, ni ile tɛ́ɛkɛ yánun, né bhádhyemannjɛ o tɛ́ mánfaa sayakɛ.» 33Ɛnza ŋé ale ni Yawudhyaa ólu kasitɔ o yé mínngɛ, oo a nílafin, kɛ́ a hákii o ɲáanmin. 34Aa í mánɲaankɛ kó: «Áa a su lo ywáa mínnɛɛn lé lɔ́?» I kó: «Mantii ó, nan ii táa a ywáa ó mánfɛɛ.»
35Ɛnza ŋé kásikɛ. 36O lɔ, Yawudhyaa mínnu tɛ́ɛ yé, ólu fɔ kó a twáanva gbú lé tɛ́ɛ a lé lɛ́. 37Waa lɔ́lu fɔ kó: «Ale min wɛ́ɛ fyóo ŋó ɲán olu láka, a tɛ tɛ́ sé kɛ́ a kɛ́ ké Laza kɛ́nan sayakɛ a?»
Ɛnza ŋé Laza lakuunnan
38 Ɛnza níla é fín íkwɔ, aa táa kábulu ywáa ó lɔ. Kábulu ó tɛ́ɛ káwa jáan lɔ lé lɔ́, íi káwagbuba lɔ́ lé ta kɛ́ a latuun. 39Ɛnza ŋé fɔ kó íi káwagbuba ó bhɔ́ kábulu ó lá lá. Cɛ min wɛ́ɛ sayakɛ, ó bhádhyemuso Mati é fɔ a yɛ́ kó: «Mantii ó, a swáan wɛɛ bhɔ́ sísan, kɛ mansɔɔ a sú ó lonin ŋwɛ́ɛn tée náannin bhɔ.»
40Ɛnza ŋé fɔ a yɛ́ kó: «Né mán a fɔ i yɛ́ ngó ni lánanya é í lɔ́, ngó í yáa Ala ta sébhaaya ó yé a?»
41Íi káwagbuba ó bhɔ́ yé, o kwɔ́ Ɛnza ŋé í ɲán láyɛɛ sáman kɛ́ fɔ kó: «Nvá, ní bálika bhɔ́la i yɛ́ kɛ mansɔɔ i wɛ́ɛ né yawi. 42Ní lɔ ŋóo ii né yawila wáati ó bɛ́, wáa ní ó fɔ́la le ké mɔɔn mínnu né lámiin nan, olu a lá a lá kó íle lée né cé.»
43Aa ó kóman o fɔ kɛ́ wɛ́ɛ mínngɛ, áa í kánnanwii kɛ fɔ kó: «Laza, í wíi kɛ́ bhɔ́!»
44Laza min ndɛ́ wɛ́ɛ sayakɛ, óo kúun kɛ́ bhɔ́ kábulu ó lɔ́. Féngbɛ tɛ́ɛn ŋo míninminin ndɛ́ɛ a bhóo óni a se ŋo man, óni kɛ féngbɛ lɔ́ tá kɛ a kún ŋo mánsili o lá. Ɛnza ŋé fɔ mɔɔn olu yɛ́ kó: «Áa a fwée ké aa táa.»
Mɔɔn olu fɛ́ kɛ́ Ɛnza nváa
Matiyu 26.1-5; Maki 14.1-2; Luka 22.1-2
45Yawudhyaa mínnu tɛ́ wɛ́ɛ nan Mwɛnyamu fɛ́ yé, olu Ɛnza ɲɛn kókɛnin ŋó yé mínngɛ, olu shɛ́ɛman ŋé lá a lá. 46Wáa lɔ́lu táa Falizɛn ŋólu fɛ́ yé, Ɛnza ŋé kó min ngɛ́, kɛ ó lɔ́sɔɔ í yɛ́. 47Faanlɛɛɲansebhaa olu kúnndii ólu ni Falizɛn ŋólu ɲɔ́ɔnɲe kɛ, kɛ́ fɔ kó: «Án ngáa mínnɛɛn lé kɛ́? Kɛ mansɔɔ cɛ míin ŋé káwako shɛ́ɛman ngɛ́la. 48Ni án ngɛ́ a tó yé ni a kɛ́ táa ɲɛ́n, mɔɔn bɛ́ yáa la a lá, o bhóo ó mán, Lomɛnka ólu yáa nan kɛ́ án ɲɛ́n ywáa sɛ́nnɛnyanin ŋó cé óni kɛ́ án síya o lábe.»
49Mɔɔn kée ndɛ́ɛ í cɛ́man min ndɔ́ɔ ko Kayife ó lé tɛ́ɛ faanlɛɛɲansebhaa olu kúnndiiba o lé o sá ŋó la, óo fɔ í yɛ́ kó: «Ále man fósi lɔ. 50Ale mán lɔ kó mɔɔn kée ngákan kɛ sayakɛ yamaan ó kósɔn ké án ndá síya o bɛ́ kɛ́nan hálaki, kó o waa físaa a?» 51O kóman ó mán bhɔ́ a gbú lɔ, o sá ŋó la, ale lé tɛ́ɛ faanlɛɛɲansebhaa olu kúnndiiba ó lé, a tɛ́ɛ célayakoman lé fɔ́la kó Ɛnza ngákan kɛ́ sayakɛ Yawudhyaa ólu síya o kósɔn. 52O tɛ́ tɛ kɛ́la i yɛ́ síya gbɛ́ɛgbɛɛ ó kósɔn, waa Ala dhyé ŋólu mínnu ɲɛ́nnzɛnnin yé, ké aa sé kɛ́ ólu ládhyɛ.
53Kɛ a ta o lo ŋo man, Yawudhyaa kúnndii olu bhyɛ a mán ko í káa a Fáa. 54A tɛ tɛ́ sɔ́nnan kɛ́ táa Yawudhyaa ólu cɛ́man bhée. O lé kósɔn Ɛnza ŋé táa dhyɛ́ ó Fán nɔ́ fɛ́ só lɔ́ lá min ndɔ́ɔ kó Efalayimu. Ale ni a yɛ́ kaamɔɔndhye ŋólu tó o ywáa ó lɔ́.
55O wáati ó lɔ́, Yawudhyaa ólu ta Hɔ́lɔɲanli o ɲánlagbɛ ló ŋó tɛ́ wɛ́ɛ sé. Mɔɔn shɛ́ɛman ndɛ́ɛ bhɔ́la sódhyenin ŋólu la kɛ́nan Yeluzalɛmu kɛ́ i yɛ́ɛ sɛ́nnɛnya kɛ́ kéeɲan ní í yɛ́ laanan óle. 56Mɔɔn olu tɛ́ɛ Ɛnza ywáa ɲíinnan. Kɛ í tó Ala bhatobhomba ó kɔ́ɔnnɔn, íi fɔ ɲɔ́ɔn ɲɛ́n kó mínnɛɛn wɛ́ɛ kɛ, bháa a mánfaa nan fɛ́ti míin man an? 57Faanlɛɛɲansebhaa olu kúnndii ólu ni Falizɛn ŋólu tɛ́ wɛ́ɛ tɔ́ nɔ síi kó ni mɔɔn mínngɛ Ɛnza ywáa lɔ, ko íi a ywáa yáa í lá, ké íi táa a myáan.
Currently Selected:
Yaya 11: MXX
Highlight
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.