Kɛ́wɛɛ 2

Ní Sɛnnɛnyanin ŋó yíilo ŋó

1Pantekɔti #2.1 Pantekɔti Pantekɔti o tɛɛ Yawudhyaa olu yɛ sunman ŋo kún jónan o ɲánlagbɛ o le le, o ɲánlagbɛ o tɛ tɛ kɛla ywáa gbɛ́ɛ lɔ, fɔ Yeluzalɛmu. ɲánlagbɛ ló ŋó se mínngɛ, lánanbhaa olu bɛ́ ládhyɛnin ndɛ́ɛ ywáa kée ŋó lɔ. 2O ywáaninngee ŋo lɔ, mannganba lɔ é bhɔ́ sángboo o lɔ, a tɛ́ɛ le óo fwɛ́ɛnba mánngan. I ládhyɛnin ndɛ́ɛ bhó mín ngɔ́ɔnnɔn, o bhó ŋóo fá o mánngan ŋó la. 3Ii támaan nɔ́lu yé, í lɔ́taa ndáa nan kɛ í síi sii i bɛ́ kée ngéenan kúnnɔn. 4I bɛ́ɛ fá Ní Sɛnnɛnyanin ŋó la, Ii lámyaan kɛ kóman kán gbɛ́ɛlu lɔ, Ní Sɛnnɛnyanin ŋó kán mín nó i lálɔ, íi o kán ŋó fɔ́.

5O wáati ó lɔ, Yawudhyaa Ala ɲɛ́nnzhaanmaa olu bhɔ́ síya olu bɛ́ cɛ́man, kɛ́ nan wáati kɛ́ Yeluzalɛmu. 6Íi o mánngan ŋó myɛ́n mínngɛ, yaman óo bwée kɛ táa i ládhyɛ. Kɛ mansɔɔ i bɛ́ kée ngéenan tɛ́ɛ i fá kán ŋó myɛ́nnan i bhádhye ŋólu lálɔ, oo bháa i lɔ gbútuukɛ. 7I bɛ́ é kawakoya fɔ́ kɛ́ i kɔɔnnɔnfii, i tɛ́ɛ fɔla ɲɔ́ɔn ɲɛ́n kó: «Mɔɔn mínnu é kómanla nín, i bɛ́ tɛ́ Galileka le á? 8A wɛɛ kɛ́ díi, tó án mbɛ́ kée ngéenan é án nva kán ŋó myɛ́nnan i lálɔ? 9Án nɔ́lu é Palitika le, óni Medɛsika, óni Elamitika, óni Mezopotami óni Zude, óni Kapadɔsi, óni Pɔn, óni Azi, 10óni Filizi, óni Panfili, óni Ezipu, óni Libi míin Silɛnin ndɔ́ɔfɛ, óni mínnu síinin ŋé Lomɛn, 11óni Yawudhyaa ólu, óni mínnu ló Yawudhyaaya o lɔ, óni Kɛlɛtika ólu, óni Alabu ólu. An bɛ́ɛ Ala yɛ kóba ólu lákɛɛ kán ŋó myɛ́nnan an ɲɛ́n kán ŋólu lɔ!» 12I bɛ́ɛ káwakoya; i tɛ́man lɔ́ ŋó i káa mín nvɔ́ bhée. I tɛ́ɛ fɔla ɲɔ́ɔn ɲɛ́n kó: «Míin ngɔ́ɔ o mínnɛɛn le le ikwɔ?» 13Wáa lɔ́lu tɛ́ɛ yɛ́ɛbhɔla i lɔ kɛ fɔ́ kó: «Mɔɔn míinnu fánin ɲé gbɛ́ le la.»

Piyɛli yɛ́ lákawanin o

14Mɔɔn olu yɛ́ɛbhɔ lánanbhaa olu lɔ mínngɛ, Piyɛli é i wíi kɛ i lɔ kaamɔɔndhye ndá ni kée ŋólu cɛ́man, kɛ i kannan bhɔ́ kɛ fɔ kó: «Álee Yawudhyaa ólu, óni álee mínnu síinin ɲé Yeluzalɛmu, áa i tóomanlɔ ɲɛn kóman o lɔ! Kó míin kɛla nin, kéni o ɲánfɔ a yɛ. 15Áa fɔ́la mɔɔn míinnu ko i fánin ŋé gbɛ́ ó la, mɔɔn mínnu fánin ndɛ́ gbɛ́ la, óyoo áa i mili a la ɲáanmin mán, kɛ mansɔɔ tée o man gbán bhá. 16Wáa céla Zowɛli tɛ́ wɛ́ɛ kóman mín nvɔ́, o lée kɛ́la kwáalenin; a kó:

17‹Ala kó: “Wáati labha ŋolu la,

Né yáa Ní ó dí Adamandhye ŋólu bɛ́ mán shɛ́ɛman né.

A dhyénjɛ olu ní a dhyémuso olu yáa célayakɛ.

Né Ala yáa fé nú yáa a yɛ káwee ŋólu la.

A yɛ́ cɛbakɔɔ ólu yáa shóo lu kɛ.

18Tínɲan in ne, o ló ŋolu la, né yáa Ní o dí ɲɛ́n yɔ́njɛ olu ní ɲɛ́n yɔmuso ólu man, i yáa célaya lu kɛ́.

19Né yáa káwananngo lu kɛ sáman, sángboo ó lɔ,

kɛ́ tɔɔmansiilu kɛ luu mán, lúukolo o ká,

yée ó, tá ó, óni fundɛli sísiman ŋó.

20Tée ó yáa yɛ́ɛman, kɛ kɛ́ diwi le.

Óni káa o yáa yɛ́ɛman, kɛ kɛ́ yée lé.

Sannin Mantii o yɛ́ ló ŋó a sé.

O lómba o, óni o ló nɔ́lɔman ŋo.

21O lɔ, mɔɔn óo mɔɔn kɛ́ Mantii o tɔ́ɔ ó kíi,

o yáa kísi.”›#2.21 O kóman ó sɛ́wɛnin ŋé Zowɛli 3.1-5.

22 Izalayɛlika olu, áa i tóomanlɔ, ni fɛ́ kɛ mín nvɔ́ á yɛ. Á bɛ́ bɛ́ a o lɔ́, áa kóman míinnu lɔ́myɛn! Ɛnza Nazalɛtika o, é kɛ mɔɔn lɔ lé le, Ala é a yɛ́ sébhaaya ó yáa á lá Ɛnza Nazalɛtika le fɛ, kɛ yáa á lá ko ale Ala lée a cé a man; aa kóbabalu, óni káwakolu, óni tɔɔmansii ólu kɛ́ a cɛ́man, óo a gbúlu a o lɔ́ ɲán mín man. 23Cɛ míin ŋé di a man kɛ́ kéeɲan ni Ala yɛ kolatɛɛnin ŋóni a yɛ lɔ́ninya ko nantɔ olu, áa tinmin Alalɔmɛɛ olu man kɛ a gbaan yíi ó man kɛ́ a fáa. 24Wáa Ala wɛ́ɛ a lakuun kɛ a bwási kɛ a bhɔ saya o tá fáan o kɔɔ, kɛ mansɔɔ a laanin ndɛ́ tɛ ké saya o a lɔmyaan kɛ a tó a tá fáan o kɔɔ. 25Kɛ mansɔɔ Laula é fɔ a mán kó:

‹Né tɛ́ɛ Mantii ó yéla ɲankɔɔ wáati bɛ́,

kɛ mansɔɔ aa né bhóobhɛɛkɔɔ ké né kɛ́nan yáayaa.

26O lé yɛ́ɛ kósɔn, nisɔdhyaa óo ne yóso o lɔ́, ne lá o nisɔdhyaa kóman ólu fɔla. Né fasi ó yáa i lɔ́nwɛɛn yéemansii o kósɔn,

27kɛ mansɔɔ í táa sɔ́n kɛ́ ne ní ó a tó su olu cɛ́man. Í lo ndáa sɔ́n ké i yɛ́ mɔɔn sɛ́nnɛnyanin ŋó fasi ó a twée kabulu ó lɔ.

28Í wɛ́ɛ ɲaanmanɲan o sháa olu yáa ne la.

I yáa ne yóso lafa ɲáanli ó la, kɛ mansɔɔ né yáa kɛ́ ní i lé.›

29Mádhye ŋólu, áa i yáakɛto kéni án myɛ́nman Laula yɛ ko ó fɔ a yɛ síka tɛ́ min nɔn. Aa saya kɛ́, íi sú ló, yáanin bí a kábulu ó án njɛ́man ya. 30Wáa Laula tɛ́ɛ céla lé le, a tɛ́ɛ lɔ́ ŋóo Ala wɛ́ɛ láheli tá a yɛ kó: ló nɔ a maannin o lɔ yáa i síi a yɛ mansayagbaanin ŋó ká. 31Aa Kílisi kúunnin ŋo yé jónan. Tó áa fɔ́ kó: ‹A su o man tó su olu cɛ́man, óni a fasi ó man twée kabulu ó lɔ.› 32O Ɛnza ŋó, Ala wɛ́ɛ a lakuun, kɛ a bhɔ́ saya ó lɔ, án née kwɛ́nnin bɛ́ɛ a sɛ́ɛya le. 33A wɛ́ɛ kɔɔta kɛ i síi Ala bhóobhɛɛkɔɔ#2.33 An ni bhɔ a ɲánle oo: Ala bhóobhɛɛ o lée a kɔɔta kɛ alayɛɛ sángboo o lɔ., Ní Sɛnnɛnyanin ŋo mín náheli tá, áa o sɔ́ɔ Fá o bhóo. Aa o mín náyii tó áa yéla, óni áa myɛ́nnan. 34O ɲan o man, Laula gbú mán yɛ́ɛ sángboo ó lɔ, wáa ale gbú fɔ́ kó:

‹Mantii óo fɔ́ ɲɛn Mantii o yɛ kó:

Í síi né bhóobhɛɛkɔɔ.

35Fɔ́ né á i yúu ólu tɔ́nɲɔɔn i sé ngɔɔ.›#2.35 O kóman ó sɛ́wɛnin ŋé Zabulu 110.1.

36Kwáalenin, álee Izalayɛlimɔɔn ólu bɛ́ kákan kɛ́ a lɔ́ cɛ́ɛne ko, áa Ɛnza mín gbáan yíi ó man, Ala wɛɛ a kɛ́ Mantii óni Kílisi ó le.»

Lánanbhaa wáa sawa

37Mɔɔn ólu Piyɛli yɛ kóman ólu lɔ́myɛn mínngɛ, i hákii ó ɲáanmin. Ii Piyɛli ní céladhye ŋó tɔ́ ólu mánɲaankɛ kó: «Mádhye ŋólu, an ngákan kɛ mínnɛɛn le kɛ?» 38Piyɛli é i yawi kó: «Aa díminsa a yɛ kóyoo ŋólu la, a bɛ́ kée ngée ŋá bátize Ɛnza Ngílisi tɔ́ɔla, ké aa yúumu yafa ó sɔ́ɔ. O lɔ, a yáa Ní Sɛnnɛnyanin ŋó dí a man. 39Kɛ mansɔɔ Ala yɛ láheli o ále ni á dhyé ŋólu tá le, óni mɔɔn óo mɔɔn é ywáaja nɔn. Tínɲan in ne, án ɲɛn Mantii Ala ó káa mɔɔn óo mɔɔn kíi, áa láheli o tá olu bɛ́ le yɛ́.» 40Piyɛli é kóman kɛ́ myɛ́n, a tɛ́ɛ sɛ́ɛya ladila óni ké ii í lɔ́ja, kɛ fɔ́ kó: «Áa i cɛ́bhɔ mɔɔnyoo ŋólu la ké áa kísi.» 41Mínnuu sɔ́n Piyɛli yɛ kóman o mán, ii ólu bɛ́ bátize. O ló ŋo la, mɔɔn wáa sawa é fála lánanbhaa ólu ká.

Lánanbhaa jónan ólu yɛ́ dínɲan lɔ́tɛɛ ó

42Lánanbhaa ólu lɔ́janin ndɛ́ɛ kɛ́ céladhye ŋólu yɛ kaa ŋó lɔ́myɛn, i tɛ́ɛ kó bɛ́ kɛ́la bhádhyeɲan la, kɛ lɔ́min kɛ ɲɔ́ɔn nvɛ#2.42 A sɛwɛnin ɲe gɛlɛkikan ŋo lɔ le, ko: «kɛ búlu lɔtaa». «Búlu lɔtaa» ŋóo lɔ́minkɛ ɲɔ́ɔn nvɛ lé le. A lo ŋé se kɛla Mantii o yɛ tabɛli o le., #2.42 O kóman ó sɛ́wɛnin ŋé Luka 22.19.óni sɛ́ɛ o. 43Ala ɲɛ́nnzhaanɲan o tɛ́ɛ mɔɔn olu lɔ, Ala tɛ́ɛ tínminnan céladhye olu man kɛ káwananngo olu ni sɛ́ɛya shɛ́ɛman ngɛ́. 44Lánanbhaa ólu bɛ́ tɛ́ɛ kéene le, í bhóofe ŋó bɛ́ tɛ́ɛ kéene le. 45I tɛ́ɛ í yɛ́ sɛ́ɛn olu ni i bhóofe ŋólu felela, kɛ o wɛ́ɛ o lɔ́taa ɲɔ́ɔn njɛ́, kɛ kéeɲan ni i bɛ́ tá mankoya o le. 46Ló ŋóo ló, i tɛ́ɛ ɲɔ́ɔn nádhyɛla Ala bhatobhomba o kɔ́ɔnnɔn, ní miliya kéene. Óni i tɛ́ɛ búlu o lɔ́taanan ɲɔ́ɔn njɛ́ bhó ŋólu la, óni i tɛ́ɛ lɔ́min o kɛ́la ni ɲɔ́ɔn ne nisɔdhyaa o lɔ, ni yóso kún ngbɛ́nin ne. 47I tɛ́ɛ Ala tandola, i dhyaa tɛ́ɛ mɔɔn bɛ́ lɔ. Mantii o tɛ́ɛ mɔɔn mínnu bwɔ́sila a tɛ́ɛ olu fálala lánanbhaa olu ká ló ŋóo ló.

Currently Selected:

Kɛ́wɛɛ 2: MXX

Highlight

Copy

Want to have your highlights saved across all your devices? Sign up or sign in

Learn More About Mahou

Kɛ́wɛɛ 2

Popular Bible Verses from
Kɛ́wɛɛ 2

Bible:

Mahou

Version: Mahou - MXX

Kɛ́wɛɛ 2

Kɛ́wɛɛ 2

Popular Bible Verses from Kɛ́wɛɛ 2

Bible:

Mahou

Version: Mahou - MXX

Kɛ́wɛɛ 2

Popular Bible Verses from
Kɛ́wɛɛ 2