LIKI 19
19
Yeesu ger Zake
1Bə minti Yeesu tuukuŋ Zeriko tuukaŋ, wə əsəŋ bə cakɗe vil taŋa wəra. 2A ko toŋa kəya, hulum yaŋ ada səmu minti Zake. Wə kumna də *kaa kə tope lambaŋ daana wə də bege ablaw. 3Wə a bəlaŋ minti tó asə Yeesu la də dər tó, minti wə mindi mo. Səma, duru ɗempa a əsu ba kas kaa kə ablaw gud bə minti wə godogroy. 4Kəya wə kooroŋ də tara ajew na tiinə kaŋ na. Wə ɗeŋ a li apəya a kəbaŋa minti tó asə Yeesu la, gud bə minti wə sə a bə kele yaŋ guudiŋ. 5Bə minti Yeesu tuukuŋ a ko toŋaŋ, wə haŋ duru apəya, wə wəətunu minti: «Zake, vaa da warda adawra da cəlamma, gud bə minti ten kir hi dayna ger dəma.» 6Kəya Zake luŋ warda cəlam faɗi, wə duunu irku du də waale. 7Kaa gə minti asaŋ kel teŋ keɗeŋ, yə əsəŋ bə ŋorme kuya bə waate minti: «Hulum toŋ ɗeŋ a hi haa ger hulum bə baymeleŋa!»
8Səma Zake faŋ apəya, wə waataŋ Barkaŋ minti: «Barkaŋ, golə la, ten ɓarse nusi də kar nin yaŋ wəra a kaa kə caacaŋ, daana jəəne minti ten a jəŋ tiniini də hulum ne a kəkəy bə de soloy nuutuŋ, ten wirku yaŋ máŋ kampa waaɗe.» 9Kəya Yeesu wəətunu minti: «Giidə kuli toŋ fəlaŋ seere ne dayna, gud bə minti hulum toŋ a kaasaw də *Abrahama gəm. 10Bədoona ana, *Kormə Hulúm bəŋ a golde daana a seere kaa gə minti a lenteŋ wəraŋ.»
Ku kumti cəərə soloy bə minti kumnaŋ əynu kasi kaa kə joŋre nuutuŋaŋ
(Mat. 25.14-30)
11Bə minti kaŋ bə iski kel teŋaŋ, Yeesu raawaŋ bə waate *ku kumti gaalaŋa a kaa gə minti bəŋ a iski kel nuutuŋ. Wə jəŋ bədoona gud bə minti wə wəra maŋ sar Zeruzalema, kaŋ ɗəkəŋ neeteŋ haa minti *Kumna kə Pepeŋ veɗe wəra hebkəna a ko toŋa faɗi. 12Wə wəətənəy ta minti: «Golə la, pur kəman yaŋ, wə a kaasaw də kumnaŋa. Wə kooroŋ warna giidə seŋka kəman na tooto minti yə doo tó da də ada kumna. Adoro tó hare da máŋ kumna. 13Ajew də kooreŋa, wə mantaŋ gud kaa kə joŋre nuutuŋa hor, wə ɓərsənəy soloy kəəsi məna-məna keɗe. Wə wəətənəy minti: ‹Aŋ jəə celeere la duuru hãã bə minti ten hare daŋ.› 14Səma kaa gə giidə seŋka nuutuŋ jəmaŋ acukur wəra duuru. Yə əsəŋ, yə vaŋ kaa a waate minti: ‹Are bele minti hulum toŋ jəə la kumna naare ba.›
15Bədoona, də teŋ keɗe wə haraŋ da máŋ giidə seŋka nuutuŋ da kumna. Wə mantaŋ kaa kə joŋre nuutu hori gə minti wə a əytənəy soloy kəəsiŋ, bə gole joŋre bə minti mindi mo a juunu duuruŋ. 16Hulum bə joŋre bə ajew bəŋ suru, wə wəətunu minti: ‹Bərdən, soloy nəmti məna'i bə minti tam a aynan diŋ, ten fəlaŋ guudu hor.› 17Kumnaŋ hərnu kel minti: ‹Tam jəŋ kel teŋ pəsaŋ, tam hulum bə joŋre ɗeketi. Gud bə minti tam jəŋ joŋreŋ a kuɗuŋa də kar koncoŋ, ten ayam abay cəərə vil kəmtəŋa hori.› 18Hulum bə joŋre bə ɓasiŋ bəŋ suru, wə wəətunu minti: ‹Bərdən, soloy nəmti məna bə minti tam aynan diŋ, ten fəlaŋ guudu wiiɗiw.› 19Kumnaŋ wəətunu minti: ‹Tam, ten ayam abay cəərə vil kəmtəŋa wiiɗiw.› 20Kəya baalaŋ tuukuŋ, toŋ wəətunu minti: ‹Barkaŋ, golə la haa kəya soloy məna bə minti tam a aynan diŋ, ten mitnu a dəməəmə. 21Ten jəŋ walka kaasam gud bə minti tam hulum bə minti kel dəm gəəli. Kar gə minti vəənəy paapa tam baŋ, tam humtuy a kusrum faɗ-faɗi; kaasaw gə minti tam a ju'uni baŋ, tam cəməy faɗ-faɗi gəm.› 22Kumnaŋ hərnu kel minti: ‹Tam hulum bə joŋre bə baymeleŋ toŋ! Ten jəmam kəəti dəm də dər kel nəmtiŋ toki. Tam wəra bə asə-ase minti ten hulum bə minti kel dən gəəli tə kəm, ten humti kar gə minti ten vəənəy paapa ten baŋ, ten ceme kaasaw gə minti ten a ju'uniy baŋ. 23Tam gaanan soloy nin a ko bə minti yə ayte soloy də kan du adaŋ bə səm mo, minti bəŋa ten haraŋ də neŋ, ten falə kan du la guudu ada?› 24A ko toŋa kəya, wə waataŋ kaa gə suruŋ minti: ‹Aŋ doo soloy bə kəəsu la wəra, aŋ əyu la a hulum bə minti nuutuŋ hor.› 25Yə hərnu kel minti: ‹Barkaŋ, wə də soloy kəəsu hor paŋ mo!› 26Wə wəətənəy minti: ‹Ten waataŋ: hulum bə minti jəəne də karman kəəsuŋ, yə əyu yaŋ ada pa. Səma, hulum bə minti karman nuutu paapaŋ, weseki bə minti kəəsuŋ, yə daw du yaŋ wəra#19.26 Gud kel teŋ haa minti: hulum jəəne bə aye ɗiki du a əski bə kel kə Pepeŋa, wə kəyu ada bə ze gud əski nuutuŋ ada pisi ze. Səma hulum bə minti paapa bə ayə-aye ɗiki du a əski bə kela baŋ, weseki bə minti wə a iskiniy, cuuru gay wəra ge ɗaw.. 27Kaa gə acukur dən gə minti a balnan kumna neete baŋ, bəəda diiri kanda, əwəy la wəra tiinina kəna.›»
Yeesu kele Zeruzalema
(Mat. 21.1-11, 15-17; Mar. 11.1-10; Zaŋ 12.12-16)
28Adordə kel kə waate teŋa, Yeesu kəlaŋ tiinə kaa na bə koore Zeruzalem. 29Bə minti wə tuukuŋ sar wəlasi bə Betfajeŋa daana Betaniŋ, maŋ sar *pərki bə minti yə məntu Oliviye, kəya wə vaŋ kaa warna ɓasi gud *kaa gə guuduŋ na. 30Wə wəətənəy minti: «Aŋ ɗee la giidə wəlasi də tiiniŋ na haa naŋ. Aŋ vaŋ ne ada naŋ, aŋ fele kormə agerhẽ bə minti hulum a luunu kəm hõy baŋ bə əntə-ənti gil. Aŋ fuku da, aŋ bəəda duuru kanda. 31Hulum laanaŋ kuŋ ne minti: ‹Aŋ fuku haa səm moŋ?›, aŋ həru kel la minti: ‹Barkaŋ də caadu.›»
32Kəya kaa kə vaa-veŋ kooroŋ, yə ɗeŋ a fele kel damdi Yeesu a wəətənəy diŋ ana. 33Bə minti yə bə foke kormə agerhẽŋaŋ, kəmnə duŋ wəətənəy minti: «Aŋ foke kormə agerhẽŋ haa səm mo?» 34Yə haraŋ kel minti: «Barkaŋ də caadu.» 35Kəya yə doŋ kormə agerhẽ da a Yeesu, yə pəŋ dəməəmə neete də cəərə kumsəŋ wəra, yə baartəna cuuru, kəya yə luŋ Yeesu kərdu. 36Bə minti wə bə ɗe caw, kaŋ fəkaŋ dəməəmə neeteŋ də cəərə kumsəŋ a kəkəya.
37Bə minti wə bə tuuki maŋ sar Zeruzalema a kəkəy bə minti sorke warda cəərə pərki bə Oliviye daŋ, kaa gə gud Yeesuŋ keɗe jəŋ wəra fənay də waale, daana yə əsəŋ bə tokɗe Pepeŋa koloŋ-koloŋ cəərə miɗi bə minti yə a əsnuŋ keɗe minti: 38«Pepeŋ gaa pisi la cəərə Kumna bə minti bəŋ a sam Barkaŋaŋ! Kəkaɓiŋ jəə la apəya, ko bə apəyaŋ keɗe tokɗə Pepeŋ la!»
39Sərdə kaanə *Farisiyeŋ gə minti aduubə də kaŋa adaŋ waataŋ Yeesu minti: «Hulum bə hateŋ, waatə kaa gə guudum la minti yə zenə la!» 40Wə hərnəy kel minti: «Ten waataŋ, jəəne minti yə zeneŋ neŋ, karmə pərkiŋ laka naakte kuy yaŋ.»
Yeesu hage cəərə Zeruzalema
41Bə minti Yeesu zeŋ maŋ sar kuli bə Zeruzalemaŋ daana wə asna anəkay, wə hagaŋ cəərə. Wə minti: 42«Te vil də Zeruzalem, te sə a asə la nuutu təwa dər hi bə daynaŋa minti karman bə əyəy kəkaɓiŋ a haa muntu moŋ! Səma, bə hebkənaŋ, karman toŋ wəra bə metə-mete diriya. 43Ko kəman bi yaŋ ciiriya minti kaa gə acukur diŋ ɓikiy ciiriy yaŋ wəra, yə he ku kaŋ yaŋ wəra bay ve warna daana bay ve da. Kəya yə ɗələy yaŋ duuri wəra ɓəki keɗe. 44Yə ɓəlkəy yaŋ wəra keɗe, yə awe kaa gə giidi yaŋ wəra gəm, yə yaake pərki cəərə kumsu apəya anə məna ba, gud bə minti te bəlaŋ ase hi bə minti Pepeŋ bəŋ a kəyəy duuruŋ ba.»
Yeesu giidə Kuli kə Pepeŋa
(Mat. 21.12-13; Mar. 11.15-19; Zaŋ 2.13-16)
45Kəya Yeesu kəlaŋ giidə tiilim də *Kuli kə Pepeŋa, wə əsəŋ bə sarme kaa kə ji celeereŋa wəra, 46bə wəətiya minti: «Pepeŋ waataŋ giidə kefter nuutuŋa minti: ‹Kuli nin ji yaŋ kuli bə toose.› Səma aŋ teŋ, aŋ kulnu ‹ko bə əsti kə kaa gə minti tope kar kasi kaŋa də waŋ#19.46 Jér. 7.11.›»
47Yeesu bə hate dər hitiŋa saksaki giidə Kuli kə Pepeŋa. Kəkamna kə *kaa kə keere Pepeŋ, də *kaa kə hate ku gili nuutuŋ, də kəkamnaŋ, bə golde kəkəya bə awe Yeesu wəra. 48Səma, yə ɗempa a fele kəkəy bə ji karman suru ba, gud bə minti kaŋ keɗe bə jiɓru ɗeket-keti. – 19 20
Currently Selected:
LIKI 19: KERNT05
Highlight
Share
Copy
Want to have your highlights saved across all your devices? Sign up or sign in
Texte de la Bible: Kera © Alliance Biblique du Tchad, 2004.