LIKI 15
15
Ku kumti cəərə taaməka də lentə-lente də falə-feleŋa
(Mat. 18.12-14)
1Hõy məna, *kaa kə tope lambaŋ də kaa kə bayməlaŋ gaalaŋ zeŋ sar Yeesu da keɗe bə bi a jeɓre kel nuutuŋ. 2Kəya, kaanə *Farisiyeŋ də *kaa kə hate ku gili kə Pepeŋ əsəŋ bə ŋorme kuya bə waate minti: «Hulum toŋ tope irku də kaa kə bayməlaŋ, daana wə hame soŋ diiri gəm!»
3Kəya Yeesu wəətənəy kel də *ku kumti minti: 4«Hulum jəəne aduubə dəŋa də kaamaŋ kəsiŋ, lenteŋ ne wəra məna guudiŋ, wə ji naanaanə mo? Wə yaake kaayaŋ té hor-hor tampəla ciiri tampəla'iŋ laki giidə maskaŋa, wə koore a golde nayta də lentə-lenteŋ hãã bə minti wə fəlaŋ bə mo? 5Bə minti wə falna də neŋ, wə haara kuuru da də waale ablaw. 6Wə bi dəərə akera, wə mante gədəəruŋ də kaa gə tiinə kuli nuutuŋ daana wə wəətəy minti: ‹Aŋ waalə la dəərən, gud bə minti ten fəlaŋ taaməka nin də lentə-lenteŋ də ne!› 7Ten bə waataŋa, waale ji yaŋ apəy na ablaw bədoona ana gəm, a ko bə minti hulum bə baymele məna koloŋ kirku ne a baymele nuutuŋ. Waaleŋ cəərə hulum toŋa dəŋaŋ kə kaayaŋ hor-hor tampəla ciiri tampəla'i ɗekeri gə minti paapa də taynə kole kirki a baymele neeteŋ baŋ.»
Ku kumti cəərə soloy bə lentə-lente məna'i bə falə-feleŋa
8«Bədoona ana pa, jəəne minti həlgə də soloy kaasa hor, lenteŋ ne wəra guudu mənaŋ, a ji naanaanə mo? A do'e lampa, a harwe kuliŋ wəra, a guldu wəra pis-pisi hãã bə minti a fəluŋ bə mo? 9Bə minti a fəlnu neŋ, a mante kə jaa naata kəram gə tiinə kuli naataŋ. A wəətəy minti: ‹Aŋ waalə la dəərən, gud bə minti soloy nin bə minti a lenteŋ wəraŋ, ten fəlnu ne!› 10Bədoona ana gəm ten waataŋ, waale ji yaŋ ablaw aduubə də *kaa kə digi kə Pepeŋa gud hulum məna'i bə minti koloŋ kirku ne a baymele nuutuŋ.»
Ku kumti cəərə kormə hulum bə minti a lenteŋ wəra daana haraŋ daŋ
11Yeesu waataŋ pa minti: «Hulum kəman yaŋ wə də kərmuyu ɓasi. 12Konceŋ waataŋ buru minti: ‹Barən, ayan dər bege nin bə minti ten sə a humu a gubli dəma la wəra.› Kəya wə ɓərsənəy di wəra.
13Adordə hiti lakiŋ, kurmuyu konceŋ gusuŋ bege nuutuŋ wəra keɗe, wə kooroŋ warna də soloy nuutuŋ giidə seŋka kəman na tooto. A ko toŋa kəya, wə əsəŋ bə ɓalke soloy nuutuŋa wəra neŋneŋ keɗe a kəkəy bə booboŋa. 14Bə minti soloy nuutuŋ ɓalkaŋ wəra keɗeŋ, tay mooto awaŋ giidə seŋka taŋa, kar kə hame nuutuŋ əsəŋ bə kirpu. 15Kəya wə kooroŋ ger hulum kəman giidə seŋka taŋa ada a jəw joŋre. Hulum toŋ gəənu giidə aka nuutuŋa bə ame gaduuru. 16Wə də taynə hame we də kəbaŋ gə minti yə əytəy a gaduuruŋ, səma hulum ɗempa a əyu du ba.
17A ko toŋa kəya, wə asaŋ kusru, wə əsəŋ bə ɗiki minti: ‹Kaa kə joŋre gə ger barən aniinə mo minti yə keɗe də kar kə hame ablaw hãã bə minti guudiŋ kole bə yaakte wəraŋ, anaaŋa ten wəra bə leɓe kusrəna kəna ta kənaŋ! 18Marya diŋ ten hare ger barən, ten ɗe yaŋ a wəətu minti: barən, ten jəŋ baymele sar Pepeŋa daana sarəma gəm. 19Ten paapa bə nakə-neke kir minti tam mantan la kormoyom pəda. Jən la bə kaa kə joŋre nəmtiŋ ha'aŋ ana.›
20A ko toŋa kəya wə haraŋ ger buru da. Bə minti wə warda kəm tooto bə ɗe daŋ, buru əsnu, wə əsnu caadu ablaw. Wə kooroŋ də tara a ŋəfu, kəya wə gərgunu. 21Kurmuyuŋ wəətunu minti: ‹Barən, ten jəŋ baymele sar Pepeŋa, daana sarəma gəm. Ten paapa bə nakə-neke kir minti tam mantan la kormoyom pəda…› 22Səma buru waataŋ kaa kə joŋre nuutuŋ minti: ‹Aŋ tarə la cəlamma a humi jamba pasa də deŋe kumsəŋ da a kormon, aŋ vaw du la suru. Aŋ kəlu kooso la karmə kəəsu, təru kalmasi la kəmpuru. 23Aŋ doo kormə kurki bə minti áŋ a ənnunu da, aŋ jəmu la, áŋ hamə la, áŋ jəə kəɗwəy la! 24Gud bə minti kormon gila a wəra akas hulum bə mee-me ana, bə hebkənaŋ wə haraŋ ne wəra dədərgə; wə a jəŋ akas hulum bə lentə-lente, bə hebkənaŋ ten haraŋ ne bə fəlu.› Kəya yə əsəŋ bə ji kəɗwəya də waale ablaw.
25Də ko toŋ ha'aŋ kurmuyu bobloŋ a warda giidə akaŋ da. Bə minti wə haraŋ daŋ, wə tuukuŋ maŋ sar kuliŋa, wə əskəŋ kar bə ufi daana kaŋ bə hərgi. 26Kəya wə mantaŋ gud kaa kə joŋreŋa məna, wə ləənu ku minti: ‹Toŋ haa maa bədoona mo?› 27Wə hərnu du minti: ‹Seenem konceŋ haraŋ də ne. Bəram awaŋ kormə kurki bə minti áŋ a ənnunuŋ ne wəra, gud bə minti wə haraŋ bə fele kurmuyuŋa girdu kəm caw dədərgə bay meŋ.› 28Kəya kurmuyu bobloŋ koloŋ waŋ, wə ŋoryoŋ bay kele akera. Buru kəlaŋ wəra a jəw kamkam minti wə kalə la akera. 29Səma wə haraŋ kel kə waateŋ a buru minti: ‹Golə la kəm mo! Ten bə jəm joŋreŋa laate ablaw, ten yaakənam kum wəra hõy anə məna ba. Də teŋ keɗe, tam aynan kormə harga hõy minti are hamə la, are waalə la də gədaarən ba. 30Səma, bə minti kormoyom tó bə minti ɓalkaŋ bege nəmtiŋ wəra gud kəmaswaŋaŋ haraŋ da anəkayŋa, tam jəmnu kormə kurki bə annə-anneŋ wəra faɗi!› 31Buru hərnu kel minti: ‹Kormonti, áŋ də kumsə áŋ kəna saksaki, daana kar nin keɗe nəmti gəm. 32Áŋ a kir ji kəɗwəy daana kir ji waale, gud bə minti seenem gila a wəra damdi hulum bə mee-me ana, bə hebkənaŋ wə haraŋ ne wəra dədərgə; wə a damdi hulum bə lentə-lente ana, bə hebkənaŋ ten fəlnu ne.›» – 15 16
Currently Selected:
LIKI 15: KERNT05
Highlight
Share
Copy
Want to have your highlights saved across all your devices? Sign up or sign in
Texte de la Bible: Kera © Alliance Biblique du Tchad, 2004.