JOŊRE 24
24
Pol ku kəətiŋa tiinə kumna Feliksə
1Hiti jəŋ wəra wiiɗiw, kəya Ananiyasi, *kumna boblo bə keere Pepeŋ, tuluŋ wəra Sezare də sərdə kaa kəmtəŋ gə tiinə kaanə Ziwifiŋ, daana də hulum kəman bə minti keye kaŋ ku kəətiŋaŋ, səmu minti Tertul. Yə kooroŋ sar kumna Feliksə bə ɗe a ge kel cəərə Pola. 2Kumna mantaŋ Pol da, kəya Tertul məlaŋ gud kel nuutu gə waateŋ cuuru faɗi minti: «Tam Feliksə, kumna, hulum bobloŋ, seŋka náŋ əsəŋ hebkəna kəkaɓi dər kel haa guuduma, gud ase nəmtiŋa, daana gud kel kəmarwaŋ gə minti tam kəlnəy wəra gə ɗampaŋ, gud bə minti kel də bə ɗəmam kusrumaŋ. 3Saksaki daana a ko muntu muntu mo keɗe, are doŋ haa də pisi nəmtiŋ də waale, are jəm suuse ablaw guudu. 4Səma, ten paapa kir kəlam cəwaŋ wəra boobo ba. Ten jəm kamkam, kel naare weseki gə minti are bele waatam diŋ, jiɓriy la kəm də giidim pəsaŋ. 5Are asaŋ hulum toŋ ha'aŋ, wə hulum bə ji kel gə bese kaŋ wəra keɗe. Wə bə ke ku kaanə Ziwifi gə cəərə seŋkaŋa wəra lama keɗe. Wə haa kumna də kaa gə minti yə məntəy Nazareyeŋ#24.5 Yə mante Nazareyeŋ haa kaa kə doo-de gə gud Yeesu, gud bə minti Yeesu bəŋ haa Nazareti da., gə minti hate kel paapa a gədəəgi diŋa baŋ. 6Wə a ɗəlaŋ zode *Kuli kə Pepeŋ wəra gadi pə ɗaw. Are duunu haa də ko toŋ faɗi. [Are a bəlaŋ jəmu kəəti du haa damdi ku gili naareŋ waataŋ bədoonaŋ ana'i, 7səma Lisiyasi tuluŋ də sootoŋ haa də waŋ anə həm-həm faɗi, yə ɓutnu warna kasi are na a səɓakiŋ. 8Kəya wə waataŋ kaa gə minti yaŋ kir gaw də kel minti yə ɗee la máŋ warna tiinim na faɗi.] Tam ləənu ku neŋ, a kəkəy də kel nuutu gə harteŋaŋ, tam bə əski gud kel gə minti are gəənu du cuuruŋ yaŋ də kosnom minti yə gəəzi.» 9Kaanə Ziwifi vaŋ kuy a kela ada gəm minti yə haa bədoona tew-tew faɗi.
Pol waate kel wəra cəərə kusru tiinə Feliksə
10Kumnaŋ veɗgeŋ Pol anəkay minti wə waatə la. Kəya Pol əsəŋ bə waate minti: «Wəra də dərən minti tam bə ceme kəətiŋa ɗeker giidə seŋka naareŋa hebkəna laate ablaw. Bədoona ta, walka paapa bə jəna anə weseka bə waate kel gə cəərə kusrən wəra tiinimaŋ ba. 11Tam neke yaŋ kir gole dər kel teŋ tam də kusrum. Ten kooroŋ Zeruzalem bə ɗe a ke awalna a Pepeŋ hebkəna ha'aŋ, dəŋaŋ hiti hor cuuru ɓasi ba. 12Yə falnan giidə *Kuli kə Pepeŋa ha'aŋ, ten paapa bə ce awəya də hulum ba, koo ten a paapa bə ke ku kaa bə gəm. Kel teŋ kəyaŋ, ten jiiniy giidə *kuli bə toose kə kaanə Ziwifiŋa bə gəm, a ko kəmana giidə vila bə gəm. 13Kaa teŋ lakaŋ, yə paapa gə nakə-neke bə kam gud kel gə minti yə bə gan dəna cəərənaŋ bə hasi. 14Haa kəna kel gə minti ten asaŋ teŋ: ten haŋ haa kəkəy kimirwi bə minti yə a waatənam cuuru minti wə paapa a gəəziŋa baŋ. Ana ten ke awalnaŋ haa a Pep kə kəmoomo də áŋ, daana ten bə doo-de gud kel gə minti wəra gə jeerə-jeere giidə *ku gili kə *Moyisiŋaŋ daana jeere kə *kaa kə jogte ku mini kə Pepeŋ. 15Ɗiki dən bə malə-mele cəərə Pepeŋa damdi ɗiki di bə malə-mele cuuru ana gəm minti: kaa ɗekeriŋ də kaa kə bayməlaŋ meŋ neŋ, yə hare yaŋ wəra dədərgə adordə meŋa keɗe'i. 16Gud teŋa ta, ten də kusrən gəm, ten bə ji wəra anə keɗe-keɗe minti ɗiki dən a hoyon tiinə Pepeŋa ba, tiinə huluma bə gəm.
17Ten laataŋ warda ablaw bay bi kəna Zeruzalema. Ten bəŋ haa a aye soloy bə keyeŋ a sərdə kaa katən gə Ziwifiŋ daana bə bi a aye kar a Pepeŋ gəm. 18Bədoona ta, yə falnan giidə Kuli kə Pepeŋa haa bə əyu kar teŋa. Ten a təwaŋ kar gə minti ten a jiiniy bə poore kusrən wəra haa tewe ɗaw. Kaa kə ablaw a paapa sarəna ba, koo hulum məna bə hoye koŋa ada mo, paapa gəm. 19Səma, falnan ha'aŋ sərdə gə Ziwifi gə giidə seŋka də Aziŋ. Kel kə bayməlaŋ gə minti ten a jiiniy a jəə la kuya adaŋ, sə a a bi laki tiinəma kəna bə bi a waate kel gə minti yə gaanan dən cəərəna, haa té. 20Yə paapa kəna bə tə kəm, kaaya té gə minti laki hebkənaŋ, yə waatə la kəm mo. Yə fəlaŋ kel kə bayməlaŋ məntəŋ sarəna a kəkəy bə minti ten haraŋ kel wəra cəərə kusrəna tiinə *kaa kəmtəŋ gə jeme kəəti kə kaanə Ziwifiŋa mo? 21Ten wəətənəy kel nuutu wəra tiini koloŋ ɗaaməna minti: ‹Aŋ mantənan ku kəətiŋa dayna haa gud bə minti ɗiki dən wəra bə malə-mele cəərə hare bə kaŋa wəra dədərgə adordə meŋaŋ.› Yə ɗəkəŋ minti ten jəŋ karman bə baymele haa gud kel teŋa ɗawmay mo?»
22Kumna Feliksə wəra bə asə-ase kel gə cəərə Kəkəy kə Barkaŋ anə kaŋkaŋ. Kəya wə zeŋ hi bə kəətiŋ bə waate gə Ziwifiŋa minti: «Bə minti Lisiyasi, hulum boblo bə cəərə sootoŋ bə bəŋ neŋ, ten jəmaŋ kəəti nəətiŋ yaŋ kəm.» 23Kəya wə waataŋ sooto bə saamaŋ minti wə harə la də Pol a daŋgay, wə gulu cuuru la, səma wə a jəw damdi hulum bə daŋgay hasiŋ ana ba. Wə a he ku gədəəruŋ wəra bay bi a jəw digi bə gəm.
24Jəŋ hiti wəra laki, anə Feliksə haraŋ da gud kumsi da də muru Dursil, a haa də Ziwifi. Kəya wə vaŋ kaa bə ɗe a mante Pol da, wə bəŋ a isi bə jiɓru ku cəərə kel gə minti waate sam de bə gud Yeesu Kristuŋ. 25Səma, bə minti Pol ɗeŋ a tuuki cəərə kel kə ɗe dəm ɗekeriŋa, cəərə amə bə kusruma, daana minti Pepeŋ bə ɗe a jeme kəəti də kaŋ yaŋ hõy, walka jəmaŋ Feliksə faɗi. Kəya wə wəətunu minti: «Kel kə daynaŋ nəkaŋ kəm bədoona anə me'i pa, ɗee la nəmti ta. Bə minti ten bə fəlaŋ dərən neŋ, ten hare yaŋ bə mantama.» 26Də teŋ keɗe, ɗiki du wəətu haa minti Pol aye soloy yaŋ a tó. Gud teŋa ta, wə məntutu suru da saksaki minti té naltə laŋ.
27Laate jəŋ ɓasi də kel teŋ, kəya Porsiyusi Festusi koloŋ a kumnaŋa a koɗ Feliksə faɗi. Feliksə a bəlaŋ minti kaanə Ziwifi ɗəkə la minti tó pisi tə bə moŋ, wə yaakaŋ Pol a daŋgaya.
Currently Selected:
JOŊRE 24: KERNT05
Highlight
Share
Copy
Want to have your highlights saved across all your devices? Sign up or sign in
Texte de la Bible: Kera © Alliance Biblique du Tchad, 2004.