யோவானு 5
5
யேசு ஒந்து மொண்டின சென்னங்க மாடுவுது
1இதுக்கு இந்தால யூதருகோளோட அப்பா ஒந்து பந்துத்து. ஆக யேசு எருசலேமியெ ஓதுரு. 2எபிரெயு மாத்துல பெதஸ்தா#5:2 கிரேக்கு மாத்துல இருவுது கையில எழுதித கொஞ்ச பிரதிகோளுல பெத்சாயிதா அந்து எழுதி இத்தாத. அந்து கூங்குவுது ஒந்து குட்டெ எருசலேமுல குரி பாக்குலு அம்புது பாக்குலொத்ர இத்தாத. ஆ குட்டென சுத்தி ஐது மண்டபகோளு இத்துத்து. 3ஆ மண்டபகோளுல குருடரு, மொண்டிகோளு, சூம்பி இருவுது உறுப்பு இருவோரு ஈ மாதர இருவுது தும்ப ஆளுகோளு பித்துகோண்டு, குட்டெல இருவுது நீரு ஏவாங்க கலங்குவுது அந்து காத்துகோண்டு இருவுரு. 4ஏக்கந்துர, கொஞ்ச ஒத்துகோளுல ஆண்டவரோட தூதாளு ஒந்தொப்பா ஆ குட்டெல எறங்கி அதுல இருவுது நீருன கலக்குவா; நீரு கலங்கிதுக்கு இந்தால யாரு மொதல்ல அதொழக எறங்குவுனோ அவ ஏ மாதர சீக்கு பந்தோனாங்க இத்துரிவு அவுனியெ சென்னங்க ஆயோவுது. 5முவ்வத்தெட்டு வருஷகோளு சீக்கு பந்தோனாங்க இருவுது ஒந்தொப்பா அல்லி இத்தா. 6பித்துகோண்டு இருவுது அவுன்ன யேசு நோடி, அவ தும்ப காலவாங்க சீக்கு பந்துயித்தோனு அந்து தெளுது அவுனொத்ர, “நிய்யி சென்னங்காவுக்கு விருப்புத்தாயா?” அந்து கேளிரு. 7அதுக்கு சீக்கு பந்தோனு, “ஐயா, நீரு கலங்குவாங்க நன்னுன குட்டெயொழக எறங்குசிபுடுவுக்கு ஒந்தொப்புருவு இல்லா. நானு ஓவுக்கு முந்தால பேற ஒந்தொப்பா நனியெ முந்தால எறங்கிபுடுத்தான” அந்தேளிதா. 8யேசு அவுனொத்ர, “எத்துரி, நின்னு படுக்கென எத்திகோண்டு நெட” அந்தேளிரு. 9ஆகவே அவ சென்னங்காயி, அவுனோட படுக்கென எத்திகோண்டு நெடது ஓதா. ஆ தினா ஓய்வு தினவாங்க இத்துத்து. 10அதுனால யூதமத தலெவருகோளு சென்னங்காதோன்ன நோடி, “இந்தியெ ஓய்வு தினவாங்க இத்தாதையே. படுக்கென எத்திகோண்டு ஓவுக்கு நினியெ சட்டபடி உரிமெ இல்லா” அந்தேளிரு. 11அதுக்கு அவ அவுருகோளொத்ர, “நன்னுன சென்னங்க மாடிதவரு, நன்னொத்ர நின்னு படுக்கென எத்திகோண்டு நெட அந்தேளிரு” அந்து பதுலு ஏளிதா. 12அதுக்கு அவுருகோளு அவுனொத்ர, “படுக்கென எத்திகோண்டு நெடது ஓகு அந்து நின்னொத்ர ஏளித ஆ ஆளு யாரு?” அந்து கேளிரு. 13ஆதர சென்னங்காதோனியெ அவுரு யாரு அந்தே தெளிலா. ஆ எடதுல ஜனகோளு கூட்டவாங்க இத்துதுனால யேசு ஏற்கெனவே ஆ எடதுல இத்து ஓய்புட்டுரு. 14அதுக்கு இந்தால யேசு அவுன்ன தேவரோட குடில நோடி, “இல்லி நோடு, நிய்யி சென்னங்காயோத. முந்தால இத்துதுனபுட மோசவாதது ஒந்துவு நினியெ பர்லாங்க இருவுக்காக இனிமேலு நிய்யி பாவமாடுலாங்க இரு” அந்தேளிரு. 15ஆ ஆளு ஓயி ஆ யூதமத தலெவருகோளொத்ர அவுன்ன சென்னங்க மாடிது யேசு அந்து ஏளிதா. 16யேசு இதுகோளுன ஓய்வு தினதுல மாடிதுனால யூதமத தலெவருகோளு அவுருன கஷ்டபடுசுவுக்கு ஆரம்புசிரு. அவுருன சாய்கொலுசுவுக்குவு வழின தேடிரு.#5:16 கிரேக்கு மாத்துல இருவுது கையில எழுதித தும்ப பிரதிகோளுல இதுன எழுதுலா. 17யேசு அதுன தெளுது அவுருகோளொத்ர, “இது வரெக்குவு நன்னு அப்பாவாத தேவரு காரியகோளுன மாடிகோண்டு பத்தார; அது மாதரயே நானுவு காரியகோளுன மாடுத்தினி” அந்து பதுலு ஏளிரு. 18அவுரு ஓய்வு தினதோட சட்டான மீறிது மட்டுவில்லாங்க தேவருன அவுரோட சொந்த அப்பா அந்து ஏளி அவுருன தேவரியெ சமவாங்க மடகிதுனால யூதமத தலெவருகோளு அவுருன சாய்கொலுசுவுக்கு இன்னுவு அதிகவாங்க வழின தேடிரு.
19ஆக யேசு அவுருகோளொத்ர, “அப்பாவாத தேவரு ஏனு மாடுத்தார அந்து அவுரோட மகா நோடுத்தாரையோ அதுன தவர அவுரு பேற ஒந்துனவு மாடுனார்ரு. அப்பா ஏனு மாடுத்தாரையோ அதுனத்தா மகனுவு மாடுவா அந்து நெஜவாங்கவே நிமியெ ஏளுத்தினி. 20ஏக்கந்துர, அப்பாவாத தேவரு மகனு மேல அன்பாங்க இத்து, அவுரு மாடுவுது எல்லாத்துனவு மகனியெ தோர்சுத்தார. அவுது, நீமு ஆச்சரியபடுவுக்காக இதுனபுட இன்னுவு தொட்டு காரியகோளுனவு அவுரியெ தோர்சுவுரு. 21அப்பாவாத தேவரு சத்தோதோருன திருசி உசுரோட எத்துருசுவுது மாதர அவுரோட மகனுவு அவுரியெ விருப்பவிருவோரியெ உசுருன கொடுத்தார. 22இன்னுவு அப்பாவாத தேவரியெ மதுப்பு கொடுவுது மாதர எல்லாருவு அவுரோட மகனியெவு மதுப்பு கொடுவுக்காக அப்பாவாத தேவரு ஒந்தொப்புருனவு நேயதீருசுலாங்க நேயதீர்சுவுது அதிகாரா முழுசுனவு அவுரோட மகனொத்ரவே ஒப்படெசி இத்தார. 23அவுரோட மகனியெ மதுப்பு கொடுனார்த எவுனுவு அவுருன கெளுசித அப்பாவாத தேவரியெவு மதுப்பு கொடுலாங்க இத்தான. 24நன்னு மாத்துன கேளி, நன்னுன கெளுசிதவருன நம்புவோனு எவுனோ, அவுனியெ ஏவாங்குவு பதுக்குவுது பதுக்கு இத்தாத. தேவரு அவுனியெ தண்டனெ தீர்ப்புன கொடுவுது இல்லா. அவ ஏற்கெனவே சாவுன தாண்டி ஏவாங்குவு பதுக்குவுது பதுக்கியெ ஓயாத்து அந்து நெஜவாங்கவே நானு நிமியெ ஏளுத்தினி.
25சத்தோதோரு தேவரோட மகனு கொரலுன கேளுவுது ஒந்து காலா பத்தாத. அவுது, அது ஈகவே பந்துயித்தாத. அவுரோட கொரலுன கேளுவோரு ஏவாங்குவு பதுக்குவுது பதுக்குன ஈசிகோம்புரு அந்து நெஜவாங்கவே நிமியெ ஏளுத்தினி. 26ஏக்கந்துர, அப்பாவாத தேவரு உசுரோட ஆதாரவாங்க இருவுது மாதர அவுரோட மகனுவு உசுரோட ஆதாரவாங்க இருவுக்கு அதிகாரா கொட்டுயித்தார. 27அவுரு சொர்கதுல இத்து பந்த மனுஷனாங்க இருவுதுனால நேயதீர்ப்பு கொடுவுது அதிகாரானவு அவுரியெ கொட்டுயித்தார. 28இதுன பத்தி ஆச்சரியபடுபேடரி. ஏக்கந்துர, காலா பத்தாத. ஆக குழிமேடுல இருவோரு எல்லாருவு அவுரோட கொரலுன கேளுவுரு. 29ஆக, ஒள்ளிதுன மாடிதோரு ஏவாங்குவு பதுக்குவுது பதுக்குன ஈசுவுக்காக உசுரோட எத்துருவுரு. மோசவாத காரியகோளுன மாடிதோரு தண்டனெ தீர்ப்புன ஈசுவுக்காக உசுரோட எத்துருவுரு.
30நானு சொந்தவாங்க எதுனவு மாடுவுது இல்லா. நன்னு அப்பாவாத தேவரு ஏளுவுது மாதரயே நானு நேயதீர்ப்பு கொடுத்தினி. நானு விரும்புவுது மாதர மாடுவுக்கு நானு விரும்புலாங்க நன்னுன கெளுசிதவரு விரும்புவுது மாதர மாடுவுக்கு விரும்புவுதுனால நானு ஏளுவுது தீர்ப்பு நேயவாங்க இத்தாத. 31நன்னுன பத்தி நானே சாச்சி ஏளிரெ, நானு ஏளுவுது சாச்சி நெஜவாங்க இருனார்து. 32நன்னுன பத்தி சாச்சி ஏளுவுக்கு இன்னொந்தொப்புரு இத்தார. அவுரு நன்னுன பத்தி ஏளுவுது சாச்சி நெஜவாத சாச்சி அந்து நனியெ தெளிவுது. 33நீமு யோவானொத்ர ஆளுகோளுன கெளுசி நன்னுன பத்தி விசாருசிரி. அவுனுவு நெஜான பத்தி சாச்சி ஏளிதா. 34நன்னுன பத்தி மனுஷரு ஏளுவுது சாச்சி நனியெ பேக்காதுயில்லா. தேவரு நிம்முன காப்பாத்துவுக்காகத்தா நானு இதுகோளுன ஏளுத்தினி. 35உருது பெளுசான கொடுவுது ஒந்து தீப்பா மாதர யோவானு இத்தா. பெளுசா மாதர இருவுது அவ ஏளித மாத்துனால நீமுவு கொஞ்ச ஒத்தியெ சந்தோஷவாங்க இருவுக்கு விரும்பிரி. 36யோவானு நன்னுன பத்தி ஏளித சாச்சினபுட, தும்ப மதுப்பாங்க இருவுது சாச்சி நனியெ இத்தாத. நானு மாடி முடுச்சுவுக்காக அப்பாவாத தேவரு நனியெ கொட்ட கெலசகோளுனத்தா நானு மாடிகோண்டு இத்தவனி. அதுகோளுத்தா அப்பாவாத தேவரு நன்னுன கெளுசிரு அந்து நன்னுன பத்தி சாச்சி ஏளுத்தாத. 37நன்னுன கெளுசித அப்பாவாத தேவரு நன்னுன பத்தி அவுரே சாச்சி ஏளியித்தார. ஏவாங்குவு நீமு அவுரோட கொரலுன கேளிதுவு இல்லா. அவுரோட உருவான நோடிதுவு இல்லா. 38அவுரு கெளுசிதவருன நீமு நம்புனார்துனால அவுரோட மாத்து நிம்மு மனசுல தங்கி இருவுது இல்லா. 39ஏவாங்குவு பதுக்குவுது பதுக்குன ஈசிகோம்புது வழின தேவரோட மாத்து எழுதி இருவுது புஸ்தகா தோர்சுத்தாத அந்து நீமு நெனசுவுதுனால அதுன சென்னங்க படிச்சு நோடுரி. ஈ தேவரோட மாத்துகோளுத்தா நன்னுன பத்திவு சாச்சி ஏளுத்தாத. 40ஆதிரிவு, ஏவாங்குவு பதுக்குவுது பதுக்குன ஈசிகோம்புக்காக நன்னொத்ர பருவுக்கு நிமியெ மனசு இல்லா. 41மனுஷரு நன்னுன புகழுவுதுன நானு ஏத்துகோம்புது இல்லா. 42ஏக்கந்துர நிம்மு மனசுல தேவரோட அன்பு இல்லா அந்து நனியெ தெளிவுது. 43நானு நன்னு அப்பாவாத தேவரோட அதிகாரதுனால பந்து இத்துரிவு நீமு நன்னுன ஏத்துகோலா. ஆதர பேற ஒந்தொப்பா அவுனோட சொந்த அதிகாரதுனால பந்துரெ, அவுன்ன ஏத்துகோம்புரி. 44தேவரொத்ர இத்து பருவுது புகழுன மட்டுவே விரும்புலாங்க, ஒந்தொப்புரொத்ர இத்து ஒந்தொப்புரியெ பருவுது புகழுன ஏத்துகோம்புது நீமு ஏங்கே நன்னு மேல நம்பிக்கெ மடகுவுரி? 45அப்பாவாத தேவரொத்ர நானு நிம்மு மேல குத்தா ஏளுவே அந்து நெனசுபேடரி. நீமு நம்பிக்கெ மடகியிருவுது மோசேத்தா நிம்மு மேல குத்தவேளுவா. 46மோசேன நீமு நம்பி இத்துரெ நன்னுனவு நம்பியிருவுரி. ஏக்கந்துர, அவ நன்னுன பத்தி எழுதி இத்தானையே. 47அவ எழுதி இருவுது மாத்துனவே நீமு நம்புலா அந்துரெ, நானு ஏளுவுதுன நீமு ஏங்கே நம்புவுரி?” அந்தேளிரு.
Currently Selected:
யோவானு 5: KFI
Highlight
Share
Copy
Want to have your highlights saved across all your devices? Sign up or sign in
@New Life Computer Institute