युहन्ना 3
3
निकोदेमस येसुआ अ़चिन्ताओ
1फरिसिचिएदाओ निकोदेमस अ़ऩङ मुवाङाओ अ़क्छा म़ना युङाङा। मो यहुदिचिओ अ़क्छा बुसुवा म़ना याआङा। 2खो अ़खाखुत येसुएदा ता, खोन्कि खोक्को लो, “रब्बि, आन्कान्का सिन्तुम्योम्का खानानिन निनाम्हाङ्एदाङ्का त़तान्ओ काचिन्पा ओ। देकिनालो निनाम्हाङ मात्द़ङ खानानिन्आ त़मुम्च़म्ओ ओ बुन्चि साङ्आछाङ मुमा ऩऱन्चिन।”
3येसुआ मो अ़लासालोवा, “अ़नुछ्याङा अ़ङ्का खाना लोना, म़ना अ़ऩङ्वा लिकि अ़लानिन्लिनिन्नालो मोसाआ निनाम्हाङ्ओ अ़चुहाङ्होन खाङ्मा अ़तोक्तुन।”
4निकोदेमस्आ खोक्को लो, “म़ना खोक्पा लिकि देत्नि लिमा ऱ? दि मो अ़माओ अ़बुक्दा ह्वादुओदु लावाङ्कि लिमा ऱ कि?”
5येसुआ अ़लासालोवा, “अ़नुछ्याङा अ़ङ्का खाना लोना, म़ना चाक्वा खोन्कि लावाआ अ़लानिन्लिनिन्नालो निनाम्हाङ्ओ अ़चुहाङ्होन्दा वाङ्मा अ़ऱनिन। 6पोक्दाङ्का लिओ पोक ओ, खोन्कि लावादाङ्का लिओ लावा ओ। 7अ़ङ्का खानानिन अ़ऩङ्वा लिमाकि झारा लिमादोत्नि लोनानिन्ओदा त़दोम्तिन्दान्मिन्ने। 8ह़क खादात्नि खात्मा स़, मोदात्निङा सोन। खाना ह़क सोन्याङ्ओ त़एनु, मेन मो खादाङ्का तायाङ खोन्कि खात्नि खात्याङ, मो खाना त़सिन्तुन। लावालाम्पा पुक्मान्चिन काचिछाङ झारा मोवात्निङा मु।”
9निकोदेमस्आ खोक्को अ़सेना, “ओ देत्नि लिमा ऱ?”
10येसुआ मो अ़लासालोवा, “खाना इस्राएल्दाओ काचिन्पा ओ, खोन्नुछाङ ओ य़ङ्चि त़तुप्तुन्चिन? 11अ़ङ्का खाना लोना, आन्कान्का दि लेसुम्योम्का, मोङा आन्कान्का य़ङिन्का, खोन्कि आन्कान्का दि खाम्युङ्सुम्का मोसोओ अ़सालुम्स़ङ आन्कान्का प़म्का, खोन्नुछाङ खानानिन आन्काओ सालुम्स़ङ त़लोइमिन। 12अ़ङ्का खानानिन हेन्खामादाओ य़ङ्चि खाएत्नानिन, खोन्नुछाङ खानानिन साकोङ्छ़ङ त़मुन्मिन, मोवात्नि निनाम्मादुओ य़ङ्चि खानानिन खाएत्नानिन्नालो देत्नि साकोङ्छ़ङ मुमा त़ऱम? 13निनाम्मादुङ्का काधा म़नाओ अ़छादाङ्का साङ्छाङ निनाम्मादु मान्वाङ्युक। 14देत्नि निनाम्हाङ्य़ङ खाकालु मोसाआ लेक्लेक्लेक्वाओदा ताबोओ प़ खाबोदा थेन्तु, मोवात्निङा म़नाओ अ़छा मोचिआ थेन्मादोत। 15मोवात्नि साङ खोक्कोएदा साकोङ्छ़ङ मु, मोसाआ अ़लुक्निन्ओ ह़ङ्म़ङ तोक्तु। 16निनाम्हाङ्आ हेन्खामा ओवात्नि सोमाअ़तुक्ता, खोक्कोसाआ आप्पिओ अ़क्छा ओन्ङा ओ अ़चुछा म़पुवा, खोन्कि खोक्कोएदा साकोङ्छ़ङ कामु साङ्छाङ अ़स़निन्ने, मेन मोसाआ अ़लुक्निन्ओ ह़ङ्म़ङ तोक्तुने।
17 निनाम्हाङ्आ हेन्खामा लाहि पाक्माओ निम्पाङ अ़चुछा हेन्खामादा मान्य़अ़दा, मेन हेन्खामा खोक्कोलाम्पा लेन्ने निकिना अ़य़सा। 18साङ खोक्कोएदा साकोङ्छ़ङ मु, मो लाहिदा अ़छुक्निन, मेन साकोङ्छ़ङ मान्मुकादा म़ना बुयाङा लाहि कामु काइसायुङ्सा, देकिनालो मो निनाम्हाङ्ओ अ़क्छा ओन्ङा ओ अ़चुछाओ अ़चुऩङ्दा साकोङ्छ़ङ मान्मुयुक। 19छ़ङ्छेन्माआ ओवात्नि काचि मु: साम हेन्खामादा तायुङ्सा, मेन म़नाचिआ साम्दाङ्का च़लोक कुइयामा ऩङाअ़नुसा, देकिनालो मोचिओ अ़चुकाचिचि अ़अ़त्पा म़मुवाङा। 20अ़त्लो काचि कामु झारासाआ साम ऩङाअ़छित, खोन्कि साम्दा ऩतानिन, देकिनालो मोचिओ अ़चुअ़अ़त्पा काचिचि म़नाचिआ ऩखान्चिन्ने। 21मेन साङ तोङ्लो च़, मो म़ना साम्दा ता, खोन्किना मोसाआ मुओ काचिचि निनाम्हाङ्लाम्पा मुवाओ निकिना झारासाआ नुलोक अ़खाङ।”
बप्तिस्मा काप़ युहन्नाओ आदेङ्ओ अ़सालुम्स़ङ
22खोन्किना येसु खोन्कि खोक्कोसोओ अ़चुकाखेङ्पाचि यहुदिया हेन्कोप्दा म़खारा, खोन्कि मोदा मोचिएनान अ़चित्का लेन म़युङाकि म़नाचि बप्तिस्मा म़प़चि। 23युहन्नाआछाङ सालिम्ओ अ़च़क एनोन्दा बप्तिस्मा प़ङुचि, देकिनालो मोदा ब़द्धे चाक्वा याआङा। मोदा म़नाचि तायाङ्सा बप्तिस्मा म़लोआङा। 24मोन्ग़रितारि युहन्ना छेक्खादा मान्छुक्युक्ता।
25खोन्किना युहन्नाओ थोरेत अ़काखेङ्पाचिएदाओचिआ अ़क्छा यहुदिएनान सेङ्मान्चिन्ओ अ़तुक्वादा दुम म़तुसा। 26खोन्ओसा युहन्नाएदा म़ताकि मोचिआ खो अ़लोवा, “काचिन्पो, यर्दन अ़ह्याउधेत्या मो खानानिन्एनान म़युङाङाओ, खोक्कोसोओ अ़तुक्वादा खानानिन्आ सालुम्स़ङ त़प़म, खानुम, खोक्कोसाआ बप्तिस्मा म़प़ङुचि खोन्कि झारा खोक्कोएदा म़खात्याङ।”
27युहन्नाआ लासुलोचि, “निनाम्हाङ्आ मान्प़माङ्तारि साङ्आछाङ दित्छाङ मुमा अ़ऱन। 28‘अ़ङ्का ख्रिस्त माआङ, मेन अ़ङ्का खोक्कोदाङ्का बुया छुत्माय़ङ ओ’ निकिना खानानिन आप्पि त़एनुम्युङ्सुम। खानानिन ओवात्निङा सालुम्स़ङ प़मा त़ऱम। 29साङ्एदा सायाकाकाम्मा युङ्याङ, सायाकाकाम्पा खोङा ओ। सायाकाकाम्पाओ अ़यावा खोसोओ अ़च़क्दा एप, खोसोओ अ़य़ङ एनुकि अ़न्नुनु अ़ऩङानु। खोन्ओसा अ़ङ्सेवाङ्नि तालायुङ्सा। 30खोक्को पोन्मादोत, मेन अ़ङ्का चुक्मादोत।”
31धानाङ्का काय़ झारादाङ्का म़झोन्याङ। हेन्खामादा लिओ म़ना हेन्खामादाओङा ओ, खोन्कि हेन्खामादाओ य़ङ्चि म़चेप। निनाम्मादुङ्का काय़ झारादाङ्का म़झोन्याङ। 32खोक्कोसाआ अ़खाओ, खोन्कि अ़एनायुङ्साओ, मोसोओ अ़सालुम्स़ङ खोक्कोसाआ अ़प़, मेन खोक्कोसोओ अ़सालुम्स़ङ साङ्आछाङ अ़लोउन। 33साङ्आ खोक्कोसोओ अ़सालुम्स़ङ लोउयुङ्सु, मोसाआ निनाम्हाङ अ़छ़ङ म़मुयाङ्निओ य़ङ अ़छ़ङ खाङ्मुसु। 34देकिनालो साङ निनाम्हाङ्आ अ़छुत्तायुङ्सा, निनाम्हाङ्ओ अ़चुय़ङ मोसाआ चेउ, देकिनालो निनाम्हाङ्आ च़लोक सेङ्लावा अ़प़। 35निनाम्हाङ पापाआ अ़चुछा सोमाअ़तुक, खोन्कि झारा सामाचि खोक्कोसोओ अ़चुछुक्दा अ़पुवायुङ्सा। 36साङ निनाम्हाङ्ओ अ़चुछाएदा साकोङ्छ़ङ मु, मोएदा अ़लुक्निन्ओ ह़ङ्म़ङ याक। साङ्आ निनाम्हाङ्ओ अ़चुछा ऩङाछिरु, मोसाआ ह़ङ्म़ङ अ़खान, मेन निनाम्हाङ्ओ अ़चुमाइसुङ मोएदा युङ्युङ।
Currently Selected:
युहन्ना 3: bap
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.