Luka 5
5
Yesu yakuwacema Wejizwa walongozi
(Mat. 4:18-22; Mlk. 1:16-20)
1Izuwa linji Yesu yali yemile ha nhumbi ye lilamba lya Genesaleti, ne wanhu wenji wali wamupilime, wakuyihuliciza Nghani yo Mulungu, 2yakawona ngalawa nyejete zili ha mwejelele we lilamba; ninga wanimula zisomba wali walawaniza wakuzikwema zinyavu zawo, 3Yesu yaza kwinjila mu ngalawa yimonga yono yali ya Simoni, yakamusaka Simoni yayitezeze mu malenga kutali hadodo no mwejelele we lilamba, yakekala mu ngalawa yakagejiza mapuga ge wanhu yekaye mu ngalawa. 4Yaza kondya kulonga, yakamutya Simoni, “Wuyitezaje i ngalawa sunga hacisolo, mukazitajile zinyavu zenyu ko wunimule we zisomba.” 5Simoni yakapitula yakatya, “Muwaha, cititilika cilo cose sunga wela cikunimula somba, hamba kutuga cinji, ninga ku so wulonje wako, nozilajila zinyavu.” 6Nawo waza noza nha vivyo, wakatuga somba nyinji muno, sunga ne zinyavu zawo zikanza kudemuka, 7wakawacema wayawo wono wali mu ngalawa yinzagwe, waze wawataze, nawo wakaza, wakazimemya zisomba mu zi ngalawa zose vyono nyejete, sunga zikawa behi no kudodomela.
8Simoni Petelo yaza kuziwona zizo, yakafugama hamwande ya Yesu, yakutya “Uwuce hono hangu, Gwe Muwaha, hambi ane nha nili munhu mubi.” 9Simoni hamonga ne wayagwe wose, wezina ku soko yo wunimule we zisomba nyinji nha vivilya.
10Yakobo na Yohana nawo nhavivyo, wana we cilume wa Zebedayo, wono wali wahanjlie na Simoni. Yesu yakamutya Simoni, “Ulece kogopa, vyono ukulawa lulu kowa kuwanimula wanhu.” 11Nawo waza kuzileta zingalawa zawo kwi sangha, wakaleka vyose, wakamutyatya.
Yesu yakumukwema mutamwa wo wukoma
(Mat. 8:1-4; Mlk. 1:40-45)
12Kukawa Yesu lono yali mu kaya yinji, mwali na munhu mutamwa wa wukoma muwili wose, nayo yaza kumuwona Yesu, yakafugama yakamunena Yesu yakutya, “Gwe go Muwaha, hono wende, kosuma kunghwema.”
13Yesu yakagolola muwoko wakwe, yakamupamiza, yakutya, “Nyendile Ukwemwe.” Lo lulolulo wukoma wukamuleka. 14Nayo Yesu yakamutya “Ulece kumulonjela yunji: langa ubite, ukelajile kuli mukohani, ukalavye cilavya so wezwe wako, nha vyono Wulajilize wa Musa wukutya, ho wuwe wuhomelezi kuli wene vyono wapona.”
15Ninga zinghani za Yesu zikacila kumanyika hanhu hose. Na wanhu wenji wakekonghola ho wamuhulicize, no kuponywa wutamwa wawo. 16Ninga mwene yakabita hanhu hono hasina wanhu no kulomba.
Yesu yakumuponya mono yadejepe muwili
(Mat. 9:1-8; Mlk. 2:1-12)
17Kukawa mwizuwa linji lono Yesu yejizaga: Wafalisayo ne wejizi wo Wulajilize, wono walawa ku vitumbi vyose vya Galilaya na Yudiya na Yelusalemi wali wekaye baho; ne vilungo vyo Mulungu vyo kuponyezya watamwa vikawa muli mwene.
18Hobaho wakaza wanhu wamudinghuye mu citanda munhu mono yali yadejepe muwili wose; wakajela kumwinjiza kugati, wamuwice hali Yesu. 19Ninga so winji we wanhu, si watuga nzila yo kwinjilila, holeka wakapula mwitembe, wakamutimizya mutamwa mwilanga, hamonga ne citanda cakwe sunga ho hali Yesu. 20Yesu yaza kuwona wihuwilo wawo vyono wuwaha, yakamutya yuyo munhu. “Mwendece, kunenelwa wubi wako.”
21Wejizi wo Wulajilize ne Wafalisayo wakanza kwihwesa, wakutya, “Yuyu yo munhu ci, mono yakumutovula Mulungu? Hasina munhu mono kosuma kunenela wubi, langa hono si Mulungu yali wene.” 22Ninga Yesu yakawalanga mahweso gawo, yakapitula yakawatya, “Alo mukwihwesa cici mu zinhumbula zenyu?” 23Ya hayi yono mhelu, kutya Kunenelwa wubi wako, hamba kutya winuce ujende? 24Ninga nyendile mumanye vyono u Mwana wo Munhu yena Wulajilize kononze kunenela wubi. Baho yakamutya munhu mono yali yadejepe, “Winuce, udinghule citanda cako ubite kukaya.” 25Hobaho munhu yuyo mono yali yadejepe, yakenuka ha mwande ya wose, yakadinghula citanda cakwe, yakabita kukaya, akuno yakumukumyo u Mulungu. 26Wose wakezina no kwibatwa no woga, wakamukumyo Mulungu, wakutya, “Nye, ciwona mezino zuwali!”
Lawi yakucemwa kuwa mwijizwa wa Yesu
(Mat. 9.9-13; Mlk. 2:13-17)
27Hanyuma yayo Yesu yakalawiila, yakamuwona mutoweza kodi yunji itagwa lyakwe Lawi yekaye mu hofisi, Yesu yakamutya “Unhyatye.” 28Nayo yakayileka vyose, yakamutyatya. 29Yuyo Lawi, yakamunozeza Yesu zindigwa mu nyumba yakwe. Hakawa ipuga iwaha lya watoweza kodi na wanji wono wali vikalane nawo ha zindigwa. 30Wafalisayo ne wejizi wo Wulajilize wakawangʼungʼulicila wejizwa wakwe; wakutya. “Alo so cici mukulizana kanyhi mukungʼwezana ne watoweza kodi ne wanyo wubi?” 31Yesu yakapitula yakawatya, “Iwanhu waswanu si wakusaka muganga; langa walya wono watamigwe. 32Hambi nha si naza kuwacema i wanhu waswanu, langa i wanyo wubi, ho wanene.”
I Nghani yo wuleka kulya ndigwa
(Mat. 9:14-17; Mlk. 2:18-22)
33Nawo wakamutya Yesu, “Kenji wejizwa wa Yohana walekaga kulya, kanyhi walombaga; ne wejizwa we Wafalisayo nawo wanozaga nhavivyo; ninga wejizwa wako, walizaga kanyhi wangʼwezaga.” 34Nayo Yesu yakawatya, “Mosuma mbi kuwasaka i walalikwa ha halusi, walece kulya lono wakali wena na bwana halusi? 35Ninga vilo vyolokuza; kolo wasolelwa bwana halusi, ho wololecela kulya mu vilo vivyo.”
36Yesu yakawalonjela cihwanicizo; “Hasina munhu mono kademulaga cilaka mu civwalo cipya yaciwicile mu civwalo cihuma, na hono yanoze nha vivyo, kowa yademula civwalo cipya, ne cilaka cico ce civwalo cipya hamba si vyosuma kwilingʼanila ne civwalo cihuma. 37Hamba hasina munhu mono katajilaga divayi mhya mu mifuko ye zinyhingo zihuma hambi divayi mhya nha yoyibahula i mifuko, nayo divayi yokwitika, na mifuko yohodanika. 38Langa divayi mhya yinojeye kutajilwa mu mifuko ye zinyhingo zimhya. 39Hamba hasina munhu mono kosulumila kanyhi kungʼwa divayi mhya, lono yakondya kungʼwa divayi huma, hambi nha yakutya, ‘divayi huma yo swanu muno.’ ”
Currently Selected:
Luka 5: GOG91
Highlight
Share
Copy
Want to have your highlights saved across all your devices? Sign up or sign in
Cigogo New Testament © Bible Society of Tanzania, 1991.