HLIMI 9
9
Nyɛʔɛlɛ lí ma nofele kon Nowe ma
1Nyɛʔɛlɛ à li frɛmɛ pa Nowe na we ní wi pii ní màʔa yo pé ma mà yo: «Ye he, ye nyɛʔɛ, ye tra tì bɛfu nyi. 2Yé bi da fyara wa ajobo pì bɛfu na ba pí nyɛ naʔa tra na de kajɛnʔɛ ní, aflolobo ní, ní fyɔɔ ní. Mí ma pi kân ye ma. 3Yraʔa kì bɛfu ga kí na kpoʔoro má po nyuwyeʔe na yé bi gban bì da pi ka. Nɛ pa mi dá akaba kan ye ma pomo ma na, mí ma ki wobo pì bɛfu kan ye ma. 4Di ki ìn yala ye da karà ta ka da tí bi bo ti nyuwyeʔe ní adi, ki na po pé yo disyan ge.#9:4 ma wèle wa Hli 7:26-27; Sraʔa 19:26; Lado 12:16,23; 15:23 ni wè.
5Ali yee yè disyan ga kí nyɛ yè nyuwyeʔe ge mí bi ba ki fwɔʔɔ yugu. Nà ajoʔo kà bí hɛn wà kpo, pa mi ba ki hɛn wi disyan fwɔʔɔ yugu ki ajoʔo ma ge. Nà hɛn wà bí wi hɛnnyɛ kpo, pa mi ba ki hɛn wi nyuwyeʔe fwɔʔɔ yugu ŋa ma wí moo kpo ge.
6Hɛn ŋa wí bi hɛn wà kpo,
pa wà bí ba wiì kpo we kpo.
Mɛjɛn Nyɛʔɛlɛ li dá hɛn hanri li lɛgɛ na.
7Di yèé be, ye pii he, ye nyɛʔɛ, ye craʔa fafaʔabaa naʔa tra na de.»
8Nyɛʔɛlɛ à liʔi yo Nowe ma we ní wi pii ní be mà yo: 9«Mí bi yoflimi nofele kon ye ma, li po nɛ yè kluʔu pii pe wolo, 10ní yrɛbɛ pì bɛfu ní ba pí nyɛ yè tanla mâ po nyuwyeʔe na, kajɛnʔɛ ní, kàʔà ajobo ní, nya wobo ní, yrɛbɛ pì bɛfu ní ba pí ma nyini wa nyumukɔrɔ ni mà plɛn ajobo pì bɛfu ní ba pí nyɛ naʔa tra na de. 11Yeʔe wèlé, mí bi yoflimi nofele kon ye ma. Mi ìn bi je ga ní bì nyufafaʔa hanri bì nyuwyeʔe yrɛbɛ tón be naʔa tra na de adi. Nyufafaʔama mɛ ìn bi je ga tra tón de adi.» 12Nyɛʔɛlɛ à li yo nɛ: «Ye wèlé, yoflimi nofele li jɛnlɛ lí la la mí bi dyɛʔɛ lí po wa mì nì, yèé ní wò kpafoʔo ni, ní nyuwyeʔe yrɛbɛ pì bɛfu ní. Mà kpe alaʔa na, lí bi bo nyiŋi kì bɛfu wolo hɛɛn bee ma pé bi bo naʔa tra na de. 13Mí bi na kpɔlɔ pa le wa fara na de li po yoflimi nofele li jɛnlɛ, yoflimi nofele la lí nyɛ wa mì nì tra woo ní wò kpafoʔo ni ge. 14Nyiŋi o nyiŋi ga mí bi fara kpoʔolo de wa namuru ní tra ní ti yugu na, kpɔlɔ pa li nyini wa kpo. 15Pa mi honri yoflimi nofele la na mi dá gan ye ma, ní ajobo tyɛnʔɛ kè bɛfu ní. Nyufafaʔa kɛ ìn bi je ga ban bì ba nyuwyeʔe yrɛbɛ tón be adi. 16Pa mi kpɔlɔ wele le bi honri bì lama to bajeja yoflimi nofele la na mi dá gon tra nyuwyeʔe yrɛbɛ pì bɛfu kala na le.» 17Nyɛʔɛlɛ à liʔi yo nɛ Nowe ma we mà yo: «Kpɔlɔ lí nyɛ yoflimi nofele li jɛnlɛ. Li na ga teri hɛɛn na be mí yo mí bi hanri nyuwyeʔe yrɛbɛ pì bɛfu ní ba naʔa tra na de.»
Nowe wi najɛɛ tanri kayoʔo
18Nowe wi pii tanri bee pe dá nyini wa nyumukɔrɔ ni pe dá bo: Sɛmu, Syamu, Jafɛte nì. Syamu wi dá bo Kana wi to. 19Nowe wi pii tanri pee bɛ pe dá he mâ tra nyi de.
20Nowe wi dá bo caflaa kplɛɛ, ŋa wi da glú na hrɛsɛn tiri fali de. 21Wɔ̀ɔ bâ dufɛn wa jɔ, wɔ̀ɔ wí co, wɔ̀ɔ wi dreʔe nì, ní bla fara mà pi tyɛʔɛ mà ko waʔafe wa wi kpasyoro go lama ni me. 22Syamu ŋa wi dá bo Kana wi to we, wɔ̀ɔ wi to nya waʔafe màʔa yo wi lɛɛ ma be. Pee bee pe dá bo wa dala na le. 23Ki nyiŋi na Sɛmu nì Jafɛte nì à pe drekpɔʔɔ kpe màʔa pa wa pe kabɔrɔ na de na sye kruʔu ní wa pe to wi kpasyoro go ni mà yɔ́ɔ̀ tonʔo ni. Pe dáa wele kruʔu ma jango pò gá pe to nya waʔafe. 24Dufɛn wi gâ jeʔele Nowe na nyiŋi ga na, wɔ̀ɔ ki loʔo ga wi pyɔ tatunŋu wi dá hanri wí na ge. 25Wɔ̀ɔ yo:
«Kana wi dànŋa.
Wi po wi lɛɛ pè bɛfu ni ŋklotanʔaŋa.»
26Wɔ̀ɔ ní mà yo nɛ:
«Kpɔʔɔmo bí da ba Bajegɔ Nyɛʔɛlɛ na la Sɛmu wi Nyɛʔɛlɛ le.
Kana wi krɛ̀ʔɛ̀ Sɛmu wi ŋklo.
27Nyɛʔɛlɛ li Jafɛte wi klo kpɔʔɔ.
Wi da gòró wa Sɛmu wi kpasyoro goro tiì ni.
Kana wi krɛ̀ʔɛ̀ Jafɛte wi ŋklo.»
28Hɔgɔ kpangbanŋa tomo kruʔu ma, Nowe wɔ̀ɔ lɛ mà ta yɛʔɛ́ saakere ní too nasyɛn ní kprɔʔɔ. 29Wɔ̀ɔ bâ gu ki ní wi ta yɛʔɛ́ saa ticɛrɛ ní too nasyɛn ní kprɔʔɔ.
Currently Selected:
HLIMI 9: NLK10
Highlight
Share
Copy
Want to have your highlights saved across all your devices? Sign up or sign in
Bible Society of Côte d'Ivoire