Sélimɛ 11
11
Babɛli kpaataʔa-tɔ́nɔgi kéele
1Tári syɛ̀ɛnnɛ myɛ si maa ni syɛɛnfele-níjanra, ní syɛɛnkan-níjanya nyuu. 2#Sél 10:10 A pe ga yìri canʔafolomɔ ma ni maa, a be baa jǐnlɔgbɔʔɔ nyaa Syineyari tári ni, a be tɛ́ɛn yaà beè. 3A be gi joo peyɛɛ ma níì jo: «Ye kàwáa wo còfáa kpúmɔn wó wi sórigo náagi ni!» A còfáaw pye be ma kàdɛnɛyi sìndɛʔɛ ni, a be i faanri. A tári kùro pye be ma póori. 4Koro kàdoʔo ma a be níì jo: «Ye kàwáa wo kàʔa tɛ́ʔɛ, wó kpaataʔa-tɔ́nɔgɔ faan fwɔɔ ki ǹjogi í sa nan nyɛ̀ʔɛni na. Kánmi bee na wolo a mɛ́ɛkpɔʔɔ taa, koro ga pye wolo a kɔ́ cariga bi kári tári myɛ yɛ́ʔɛ kurugo í.»
5Kěgee, ní kpaataʔa-tɔ́nɔgee Adami pìíbèle da ni faanri lè, a Yawe tìgi n pan bi ba yi wéle. 6A Yawe gi joo níì jo: «Wéle, àmɛɛ pe myɛ nyɛ lè syɛɛnfelege nibin, pe myɛ si i syɛɛnfele-níjanra nyuu, gee be séli ni kpéʔele lè gee, ki ga foro pe wógi na, yafyɛn a ní ba be láʔa pe nyɛnɛ kéelaa na í. 7Yaa maa wo tìgi wo sa be syɛ́ɛnri nyáʔami yaà beè, koro ga pye pe a ní kɔ́ ra peyɛɛ syɛ́ɛnri lúro í.» 8#Làlw 32:8; Kap 17:26 Tɛ́ɛgi bee ni Yawe be cariga n tórigo léelige tári myɛ yɛ́ʔɛ kurugo, a be láʔa kěgi faanna na. 9Koro na be gi yiri Babɛli. Níì cán beè Yawe tári syɛ̀ɛnnɛ myɛ syɛ́ɛnrɛ nyáʔami. Nɛɛ bee Yawe be cariga n tórigo tári tɛ́ɛyɛ myɛ yɛ́ʔɛ kurugo.
Tofɔlɛɛyi mɛ́ɛyɛ, n séli Sɛmi na n sáà nan Abirami na
10Sɛmi yòdaʔayi wéle yee.
Lǎli ni Sɛmi taa lè yɛ̀ʔɛlɛ dabata, a wi Aripakisyadi see. Koro n pye lònɛʔɛgi maa sɔ̀lɔ, a yɛ̀ʔɛlɛ siin kwɔ́ɔ. 11Aripakisyadi seeli kàdoʔo ma, a Sɛmi níì yɛ̀ʔɛlɛ saala siin ní dabata taa. Wi si maa níì nànbiigèle kèle see n fàra calipiigèlē na.
12Lǎli ni Aripakisyadi taa lè yɛ̀ʔɛlɛ toko ní kpɔrigɔ ní yɛ̀ʔɛlɛ kagunɔ, a wi Syela see. 13Syela seeli kàdoʔo ma, a Aripakisyadi níì yɛ̀ʔɛlɛ saala siin ní taanri taa. Wi si maa níì nànbiigèle kèle see n fàra calipiigèlē na.
14Lǎli ni Syela taa lè yɛ̀ʔɛlɛ toko ní kpɔrigɔ, a wi Hebɛɛri see. 15Hebɛɛri seeli kàdoʔo ma, a Syela níì yɛ̀ʔɛlɛ saala siin ní taanri taa. Wi si maa níì nànbiigèle kèle see n fàra calipiigèlē na.
16A Hebɛɛri ga yɛ̀ʔɛlɛ toko ní kpɔrigɔ ní sicɛrɛ taa, a wi Pelegi see. 17Pelegi seeli kàdoʔo ma, a Hebɛɛri níì yɛ̀ʔɛlɛ saala siin ní toko ní kpɔrigɔ taa. Wi si maa níì nànbiigèle kèle see n fàra calipiigèlē na.
18A Pelegi ga yɛ̀ʔɛlɛ toko ní kpɔrigɔ taa, a wi Erewu see. 19Erewu seeli kàdoʔo ma, a Pelegi níì yɛ̀ʔɛlɛ sirakele ní kpanjɛrɛ taa. Wi si maa níì nànbiigèle kèle see n fàra calipiigèlē na.
20A Erewu ga yɛ̀ʔɛlɛ toko ní kpɔrigɔ ní siin taa, a wi Serugi see. 21Serugi seeli kàdoʔo ma, a Erewu níì yɛ̀ʔɛlɛ sirakele ní kɔrɔsiin taa. Wi si maa níì nànbiigèle kèle see n fàra calipiigèlē na.
22A Serugi ga yɛ̀ʔɛlɛ toko ní kpɔrigɔ taa, a wi Nahɔri see. 23Nahɔri seeli kàdoʔo ma, a Serugi níì yɛ̀ʔɛlɛ sirakele taa. Wi si maa níì nànbiigèle kèle see n fàra calipiigèlē na.
24A Nahɔri ga yɛ̀ʔɛlɛ toko ní kpanjɛrɛ taa, a wi Tera see. 25Tera seeli kàdoʔo ma, a Nahɔri níì yɛ̀ʔɛlɛ dabata ní kpɔrigɔ ní kpanjɛrɛ taa. Wi si maa níì nànbiigèle kèle see n fàra calipiigèlē na.
26A Tera ga yɛ̀ʔɛlɛ togoye taanri ní kpɔrigɔ taa a wi Abirami, ní Nahɔri, ní Haran see.
27Tera yòdaʔayi wéle yee.
Tera n Abirami, ní Nahɔri, ní Haran see, á Haran Lɔti see. 28A Haran kùu wi tóow Tera nyɛ́nɛ na táree ni be wi see lè. Uri kěgi ni wi kùu ki lè Kalide ye wógi. 29A Abirami ní Nahɔri càbala pɔri. Pe maa ni Abirami céw yiri Sarayi, ní i Nahɔri wów yiri Milika. Milika maa pye Haran pyà, Haran wi da wɔ́ɔ̀ Yisika see. 30Sarayi maa pye cenaa-sìnzeeo, pyà da pye wi ma í.
31A Tera wi jáaw Abirami kɔ́ri n pínɛ ní wiyɛɛ ní n fàra wi pìinyanbiigi Lɔti na wi lè Haran jáaw, ní Sarayi wi lè wi pìíw Abirami céw. A be pínɛ n yiri Uri kěgi ni ki lè Kalide ye wógi bi kári Kanaan tári ma. A be sáà nan Karan na níì tɛ́ɛn yaà beè. 32Tera sìíw yɛ̀ʔɛlɛ myɛ nyɔ́ɔ n pye sirakele ní kagunɔ, á wi kùu Karan ni.
Currently Selected:
Sélimɛ 11: CB10
Highlight
Share
Copy
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.