Banɔkpɛkpɛ Axɔ̃ɛ 2
2
Ɔfɔfuĩa Gbangbã Tɛbaba
1Gɛ Pentekoste kiwuiɛ baa, balɛ petee bazã kitsù nɛ ɔkɔ tonikpo. 2Nɛ balɛ matìmatì mɛ, ozĩ oyì asɛ kɛlɛɛ gagalĩi tifufù ana odenɔ kititíɛ pɛ kɛyɛkɛ bɔpã petee mɛ gɛ bazãa. 3Bamɔ kɛdɔ̃ tili giyì kifu ɔɖɛklɛmɛ ana, gɛ yá pɛ badɔ ɔzã balɛ ɔmayɛ mɛ ka nyia ka abha. 4Ɔfɔfuĩa Gbangbã otsoku balɛ pete mɛ, gɛ kɛkɔ ɔsɛ bakpà beluhũ ediedi uhu asɛ gɛ Ɔfɔfuĩa nɔkɔ balɛ kidzo ana.
5Nɛ kibè ɛlɛ, Yudanɛ teli gɛ badɛmɛ nɔ nɛ̀ Owusoso Akaa bede ɛmadi ka nyia ka mɛ nɛ kesiakpa nabha abazã Yerusalem. 6Gɛ belũ ozĩ ɔlɛɛ, banɔɛza gbagbla tili bashogò kɛlɛ kɛbhɛtɛ balɛibi, ɔmɔsɛ anɔ nyia anɔ elũ ebuiɛ gɛ baɖɔɔ nɛ yɛulũhũ mɛ. 7Gɛ kɛbhɛtɛ balɛ kibi soɔ, bebisi asɛ, bagɛ baɖɔaɖɔ alɛ nyɔ̃ɔ nɔ pɔ, anɛ Galelianɛ benuɔ mɔ dza? 8Kɛlɛ kɛzã pɛ bɔlɔ ɔmayɛmɛ aka nyia aka elũ ebuiɛ mɛ nɛ yɛulũhũɔ mɛ̀ dza? 9Bededeba ede Partia, Media, nɛ̀ Elam, beteli ede Mesopotamia, Yudea nɛ̀ Kapadokia, Pontio nɛ̀ Asia, 10Frigia nɛ̀ Pamfilia, Egypte nɛ̀ Libia yɛawɔpɛ tieli gɛetso aplɛnɔ Kirene pɛ banɔ nɔ teli tsyɛ ede Roma aba, 11(bagɛ benu Yudanɛ nɛ̀ bagɛ betsyina atɔnɔ Yudanɛ ɛkɔɔ) Kretanɛ nɛ̀ Arabianɛ, bulũ baɖɔ̀ Owusoso Akaa ebui gɛ labhɛtɛ kibi nɛ bɔlɔ ahɔɛ buluhũ mɛ̀.” 12Gɛ kɛbhɛtɛ balɛ ibi pɛ betinyi kɛgɛ babà bhɛtɛ soɔ, bebisi bagɔlɔ asɛ, “Kibui ɛlɛ niesi sɛ ɛlɛ?”
13Beteli xɔnɔ aaɖɔ amɔɛbui nɛ balɛishu kɛlɛ baɖɔ asɛ, “Bunu bawɔ̃ɛ ebuku.
Petro Aɖɔ Kaɖɔ Akɔ Banɔɛza
14Petro nɛ̀ yɛɔhayɛ lɔfɔ nɛ̀ toliɛ alɔɛtití pɛ aɖɔaɖɔ etseɖe banɔɛza asɛ, “Mɛɔhayɛ Yudanɛ nɛ̀ wɔnɔ bagɛ alɛ Yerusalemuɔ petee, nɔkɔ mɛibu ebui alɛ esi ɔkɔ wɔnɔ, nɔtaatɔ tɛ̀ nolũ kɛgɛ ɛbaɖɔ tseɖe wɔnɔ piapii. 15Gɛnɛ bunu banɔ alɛ adɔ asɛ gɛ noɖiɛ, kɛvɔlɔ ɛɖa tizhita nɛlɛ ko gɛta. (ɔmɔsɛ Yudanɛ atɛ dalɛ bunu ɔwɔ̃ɛkɔ nɛ kɛvɔlɔ mɛ) 16Ao, kibui ɛlɛ baɖɔ ɔgana ebuiɖɔluanɔ Yoel abha asɛ,
17“ ‘Owusoso Akaa aɖɔ asɛ, nɛ ewui gɔgɔɛ mɛɛ,
mɛ Ɔfɔfuĩa nɔ ɔbɔdɔ banunɔ petee abha.
Wɔnɔ beyianyɛ nɛ̀ beyiadzɛ abaɖɔ ebui elu,
wɔnɔ bayɛsɔ̃ abamɔ ebui nɛ bɔlala mɛ,
wɔnɔ banɔ sheshèɛ babaza balalá.
18Ɛbalɔkɔ mɛ Ɔfɔfuĩa nɔ ɔkɔ maxɔ̃ɛdɛ gɛenu banyɛ nɛ̀ badzɛ tsyɛ,
nɛ ewui alɛ mɛ,
kɛlɛ babàɖɔ ebui elú.
19Ɛbabu bɔdɔ̃ gɛbhɛtɛ kibi ɔkasɛ baba mɔ nɛ kititíɛ,
ɛbabu ebui ɔkasɛ nɛ kesiakpa nɛ̀ kesiakpa niesi,
dzyosu, kifu nɛ̀ efutù gɛibù ɔnyɔ̃.
20Kiwuiɛ batsyina dzi otumũ
kɛlɛ woele nɔ ebetsyina edzi dzyosu,
flogo pɛ Apaleteɛ yɛiwui gbagbla nɛ̀ kiwui dadalɛ banà.
21Kɛlɛ aka nyia aka gɛekulu
Apalete neinyeɛ, babayɛkɛ yɛ elú nɛ̀ ɛkpã.
22“Israelanɛ, nɔtaatɔ̃ tɛ noɔlũ kibui ɛlɛ, Yesu Nazareteyiɛ enu anɔ gɛ Owusoso Akaa alɔkɔ akpɛ ahɔɛ akɔ wɔnɔ ɔsɛ tɛ̀ abhɛtɛ atsyindzye ebui, ebui gɛ labhɛtɛ kibì, tɛ̀ ebù ebui akasɛ, ebui alɛ enu ebui gɛ Owusoso Akaa abhɛtɛ nɛ wɔnɔɛshi ɔgana yɛabha asɛ gɛ nonyi ana. 23Owusoso Akaa yɛalɔkɔ anyɛ alɛ akpɛ ahɔɛ akɔ wɔnɔ nɛ yɛ tɛpɛpɛ nɛ̀ kɛgɛ apɛ asɛ tɛ̀ kɛba ɛlɛ mɛ̀ nulũ. Kɛlɛ wɔnɔɔ, atakpu mɛ gagalĩ elete aplɛnɔ ɔnɔ pɛ noyii ɔganà yɛ tɛkpakpalà nɛ osi shu. 24Pɔ Owusoso Akaa efeke yɛ odenɔ bekpuɔ mɛ, kɛlɛ ebui aganà butsíɛ bɔlɛ bɔtɔ mɔmɔ mɛ, ɔmɔsɛ butsí gɛmɔ kidzo tɛ bɔkɔ yɛawɔ bɔlɛ ahɔɛ mɛ. 25David aɖɔ elu nɛishu asɛ,
“ ‘Ɛɛmɔ̀ Apaleteɛ nɛ mɛotugbà kibe nyiɛ be.
Ɔmɔsɛ alɛ mɛ kɛŋã mɛ,
Kifù tɛbà yimɛ.
26Kliso mɛ kitúɔ mɔ same, kɛlɛ mɛinekeɛ zhã same ɛdzɛ,
kɛlɛ mɛishudzya baɖi otugbà mɛ tɛpɛpɛ,
27ɔmɔsɛ ɔtɛbɔ shɛnɛ ahɔɛ nɛ mɛishu ɔkɔ butsi
alo pɛ ɔbɔkɔ ɔsɛ wɔ ayɛ gɛ yɛishu dalɛ atsɔmɔ ezĩ.
28Wɔkɔ mɛitì ɛkpã kidzoɔ,
ɔbɔkɔ ɔsɛ same eyukù mɛ nɛ wɔamɛ.’
29“Mɛadzya alɛ mɔ, ɛpɛ sɛ tɛ mɛdalɛ mɛishumɛ ɔkɔ wɔnɔ tɛ̀ noti ɔsɛ ashuĩ David etsí, kɛlɛ bavɔbɔɛ, kɛlɛ yɛodzeɖe ɔlɛ ɛkɛlɛ̀ ɔmana oboɔ. 30Pɔ edzì ebuiɖɔluanɔ gɛetì asɛ Owusoso Akaa atanà bɔdɔ̃ alɔkɔ atɔɖɔ kibui elú akɔɛ asɛ abatɔɖɔ yɛeshui teli nɛ yɛukusi kegbu nabha. 31Gɛ David amɔ kɛgɛ batɔɖɔ elu akɔɛ soɔ, aɖɔaɖɔ nɛ Kristo yɛ tɛlɔlɔ nɛ bekpuɔ mɛ shu asɛ, “Batɛ bà shɛnɛ ahɔɛ nɛ Kristoɔ shu nɛ bekpuɔ mɛ alo pɛ babàkɔ asɛ tɛ atsɔmɔ. 32Owusoso Akaa efeke Yesu alɛ edenɔ bekpuɔ mɛ amana ɛkpã mɛ gɛ bɔlɔ pete zãmɔ kibui ɛlɛ ɔsɛ kɛba ɛlɛ mɛ kɛgbã. 33Gɛ befeke yɛavɛnɔ Owusoso Akaa kɛŋãa mɛ ebekeɛ, ayɛkɛ Ɔfɔfuĩa Gbangbã gɛ batɔɖɔ elu akɔɛ odenɔ Akaa ɔkɔ kɛlɛ yɛtsyɛ ashɛnɛ ahɔɛ nɛ ɔlɛ shu asɛ gɛ nɔmɔ pɛ nolũɔ ana. 34David agɛvɛ kitití, pɔ aɖɔ asɛ,
“Apaleteɛ etseɖe Mɛapalete asɛ,
“Zã kesi nɛ mɛ kɛŋãa mɛ
35ɔvɛnɔ kibeɛ gɛ ɛba lɔkɔ bagɛ atɛ adɛmɛ wɔɛbuiɛ
tɛ bedzi kɛdɔ̃ gɛ ɔbɔtɔɖɔ ɛtsɛɖɛ nɛ ɛlɛ abha.” ’
36“Kliso kɔ Israelanɛ beti kɛlɛ piapii asɛ, Owusoso Akaa abhɛtɛ Yesu alɛ̀ gɛ nɔkpalà nɛ butsi osiɛ shu yɛedzi Apalete nɛ̀ Kristo.”
37Gɛ banunɔ elũ kibui ɛlɛ, kibhui balɛ kitúɔ ohui, kɛlɛ betseɖe Petro nɛ̀ banɔkpɛkpɛ gɔgɔɛ nɔ asɛ, “Mɛadzya alɛ mɔ, kiɖe bɔbabhɛtɛ?”
38Petro ebuiliulũ asɛ, “Notsyina etúɔ mɛ, tɛ bakpɛ bulĩ akɔ wɔnɔ ɔmayɛmɛ ka nyia ka nɛ Yesu Kristo yɛinye mɛ̀, tɛ balɔkɔ wɔnɔ ebui kpa etsye wɔnɔ. Kɛlɛ nɔbɔ yɛkɛ Ɔfɔfuĩa Gbangbã ɛdɔ̃ kɔkɔ. 39Tɛtɔtɔɖɔ ɛlɛ lɛ ɔkɔ wɔnɔ nɛ̀ wɔnɔ beyi alɛ nɛ̀ bagɛ balɛ kitsí fãa nɔ, gɛ benu banɔ nɔ nyɔ̃ɔ gɛ bɔlɔ Apaleteɛ Owusoso Akaa ebekuluɔ.”
40Alɔkɔ ebui bhlatɔ etseɖe nɔ nɛ̀ balɛ, kɛlɛ akɔ balɛ kɛtakpu asɛ, “Nobu wɔnɔ ishu odenɔ kibè kpa kanɔ alɛ mɛ.” 41Batɛkpɛ bulĩ akɔ bagɛ ayɛkɛ yɛibuiɛ, kɛlɛ balɔkɔ banɔ asɛ ihotu tɛta aplɛnɔ balɛ tɛkaklà mɛ kiwui ɛlɛ.
Bagɛ Ayɛkɛ Aŋã Balɛ Ɔha Kpɛkpɛ
42Balɔkɔ balɛishu ashɔkpɛ banɔkpɛkpɛ bɔdɔ̃ kakasɛ nɛ̀ ɔha kpɛkpɛ mɛ, ɔvɛnɔ kifufulũɔ tɛyaya nɛ̀ Owusoso Akaa tikukulu mɛ. 43Kifu zã anɔ nyia anɔ mɛ, kɛlɛ banɔkpɛkpɛ abhɛtɛ atsyindzye ebui nɛ̀ ebui gɛ labhɛtɛ kibì gelee 44Bagɛ ayɛkɛ aŋã petee eshogò kɛlɛ bakpɛ ebuiɛ petee tinikpo abhɛtɛ. 45Badɛ̀ balɛ ahɔɛmɛ bɔdɔ̃, kɛlɛ balɔkɔ akɔ aka nyia aka asɛ kɛpɛɛ gɛ apɛɛ ulũ. 46Bazatɔ̃ kɛtakpu nɛ Owusoso Akaavũɔ shu kibe nyia be. Bazaŋã bɔdɔ̃ nɛ kesugba tienikpo mɛ nɛ balɛ bapãmɛ nɛ same nɛ̀ etú dadalɛ mɛ, 47pɛ bazakpɛ Owusoso Akaa nɛinyè nɛitití kɛlɛ balɛ ebuiɛ ezeku banunɔ petee awɔ̃. Kɛlɛ Apaleteɛ akɔ bagɛ ayɛkɛ elú nɛkpã abaplɛnɔ balɛ bekpè atɔɖɔ kiwui nyia wui.
Currently Selected:
Banɔkpɛkpɛ Axɔ̃ɛ 2: nyb
Highlight
Share
Copy
Want to have your highlights saved across all your devices? Sign up or sign in
© (Active), Ghana Institute of Linguistics, Literacy and Bible Translation. All rights reserved.