Lucas 24
24
Jesús a jocädou
lä co̦ono wei tä a̦
1Ö̦jö tä fena ja, domingo tä mö jalu lä cublole däjä, suwä bä jocäblou fa fenablalonö, maa maca jamö bä aa fenalayofälöma, motoca a jaba juimaö däjä. Dabö dabö toubä nö lä li̦oli wei toubä lä tano wejei, ö̦jö toubä ca̦i. 2Maa maca jamö bä fa waloicunö, yoca lä laono wei ma bada jilulano dalalema ma cujei, 3bä fa lucälönö maca bloque dalalemaje. A nomawä cuonomi.
4Ö̦jö tä ja, bä bufi wedinajamou yaio däjä, yedu bolacabö täcöbö damolaliyoma. Täcöbö camishibö mömou shi wacalaoma. 5Bä suwä fa quililalunö, mashita ajamö bä möfe deiolaliyoma. Ö̦jö däjä täcöbö lä damolaliyono wei täcöbö lä cuinö, abinaja bä nowa suwä taböma.
—¿Wedi tabä nomawä bä cuobä jamö, demi bei wama a li dayäaö? 6Calilea jamö wamacö ca̦i cuo showao däjä, wamacö malä yömölano wei. Tä a̦ nofi da jaduculeje. 7A lä yanowamöblaleyoluno wei a lä cui, wa̦lidiwä talewä bä nija a noshi nia jo̦wa ö̦jödabomaje. ¿Ö̦jö tawä? Fii balitama defi ja a nia basuamamaje. Ö̦jö däjä bolacabö tä mö fa dödölönö, a demi nia jo̦wa jocädou co̦oma —täcöbö cuma.
8Cama täcöbö a̦nö bä bufi suwä möblaliyoma. Jesús a lä cuno wei tä a̦ nofi jaducudalemaje.
9Ö̦jö däjä maa maca jamö bä faa fa co̦lufälönö, Jesús 11 ebä ma cui nija, ai bä bluca ma cui nija, tä a̦ bluca wäyäö co̦ojolomaje. 10¿Ö̦jö tawä? Jesúsnö bä lä shömöleno wei bä nija tä a̦ lä wäyäno wejei bä lä cui, ei bä a̦fa suwä cuoma. Madalateliyoma María a cuoma, Wana a ca̦i. Santiago bä nöö e ca̦i cuoma, María a wa̦fa cuo mö lä feduono wei. Ai bä ca̦i suwä. 11Ö̦jö ma cui, tä a̦ ji̦limamou nofi fa mojoduonö, bä a̦ bejedi bufinomije.
12Ö̦jö ma cui, Pedro a fa jocädalunö, maa maca jamö a läläa fe yadilayofälöma, Jesús a lä maquequeno wejei jamö. Ö̦jamö a fa lodalunö, tä möö mö wädäama. Ö̦jö ma cui cama bei a möö mlai ja, camishi acadafu au bänö a lä ya̦icoloono wei bä lä cui, ö̦jö bä shino jilaa dalalema. Ö̦jö däjä a bufi wedinajamou ca̦i co̦a co̦layofälöma.
Emausi yo jamö Jesús
a lä damolaliyono wei tä a̦
13Ö̦jö tä mö jalu showawä ja, Emausi tä a̦fa shabono lä cule jamö, Jesús nija bä lä nocaono wei ai cäcöbö alayoma. Moli tä mö jalu ja täbä blajawä juu lä culenaja, tä shabono blajadawä cuoma. 14Tä bluca lä cuaano wei tä a̦fa wayoaböfälöma. 15Ö̦jö tä a̦fa wayoaböfälöö däjä, cama Jesús a fa ajededalunö a juu boaafälöma ma cui, 16Yai Bada tänö a nö ö̦jöböamanomi. 17Ö̦jö cäcöbö nija abinaja Jesús a cuma.
—¿Wedi bei wafä tä a̦fa li wayoaö dodijia lä cuimadi, wafäcö jufälöbä jamö? —a cuma.
Cäcöbö bufi wa̦lidiwä ca̦i fa ubladalunö, 18Cleofa a wa̦fa lä cuono wei a wa̦ juoma.
—Jelusale jamö tä da cublalui ai bä fama bluca lä bälölenö tä daö ma ayaoje däjä ma cui, ¿cafä moli wanö bei wa tä li daö bashia showaa mlaa cule? —a cuma.
19Abinaja Jesús a cuu co̦oma.
—¿Wedinaja täbä lä cuaano wei tä lä cui? —a fa cunö, abinaja cäcöbö cuma.
—Nasaleteli Jesús a lä taamano wejei —cäcöbö cuma—. Yai Bada a wa̦no wäyäö nö wa̦lojaö fe balojooma. Tä nö lä quilijii tä bluca wawämaö dodijioma. ¿Ö̦jö tawä? Yai Bada tänö a nofimaö wawädooma. Yanowamö bluca bä ma cuinö a nofi ca̦i dobomaje. 20Bada bänö, Lomateli bada a nija a noshi ö̦jödadalemaje, a shämabä. Nofi bäyäalewä blowäjäwä bä ma cuinö, camiyä yamacö nija bä bada lä läle bä ma cuinö, ö̦jö nija a fa jöbäcöjenö, fii balitama defi ja a basuamaö fa bufinö a shämalemaje.
21’¿Ö̦jö tawä? —cäcöbö cuma—. Ö̦jö ma cui, ö̦jö nija yamacö mölaö fe balojooma. “Isaeli bäma ecö nija fei tä ulifi nia jo̦wa däamaö lä co̦ono wei, ö̦jö a waiquiwä”, yama a nofi tabou dodijio cublelei. ¿Ö̦jö tawä? A lä shäleno wejei bolacabö tä mö didi cublou waiquia lä cule.
22’Abinaja ca̦i —cäcöbö cuma—. Camiyä yamacö nija ai bä suwä lä culenö, fei däjä yamalecö bufi shädayaimomaö dodijiomaje. Maa maca jamö bä juu fa fenaonö, 23a jo̦wa nomawä dablanomije. Bä co̦a fa co̦bonö, a̦jele täcöbö a̦fa ca̦i wäyäö co̦ojolomaje. Suwä bä nija täcöbö jo̦wa nofi fa damolalunö, Jesús a wa̦fa jo̦wa demi jocädou taböma. 24Ai yamacö lä cui, maa maca jamö bä aa fa nomöjölöfälönö, maca bloque daa nomöjölalecölömaje, suwä bä lä cuno weinaja showawä. Ö̦jö ma cui ö̦jö bei a dablanomije —cäcöbö cuma.
25Abinaja Jesúsnö cäcöbö nowa tama.
—¡Wafäcö bufi jaducuwä lä mlai! Yai Bada a wa̦no wäyälewä bänö tä a̦fa bluca wäyäö ma balöono wejei ma cui, ¡wafä tä a̦ bejedi bufii si ijejewämi! 26Yai Bada tänö a shömabä a lä yaileno wei a lä cui, a nö bleaamabeje etä cuo waiquioma. A demi jocädamaö fa co̦lonö, cama etä shi̦i lä doblaladi jamö a döcömabou nomöjöodayobä. ¿Ö̦jö tawä? —a cuma.
27Ö̦jö däjä, cäcöbö bufi jaducublobä, Yai Bada etä a̦ oni jamö cama a wa̦fa lä tamou wei tä a̦ bluca wawämafälöma. Moisesi tä a̦ wawäa fa balömalönö, Yai Bada a wa̦no wäyälewä ai täbä a̦ bluca wawäa nomöjömalema.
28Cäcöbö lä juu wei a shabono jamö bä ajedou däjä, Jesús jai a jayublobä a cuaama. 29Ö̦jö ma cui a nacaa cadidibölema.
—Camiyä yafäcö nija a mia fe da jaluiquiyo. Tä weyade waiquiwä —cäcöbö cuma.
Ö̦jö cudeenö, cama cäcöbö nija a cublaquema.
30Bä iyaö ca̦i loobä jamö nii a fa dälönö, Yai Bada nija a bufi a̦fa doblalou wäyämoma. Ö̦jö däjä nii a fa joyolalönö, cäcöbö dobälema. 31Inaja a lä cuaale däjä, Yai Bada tänö a nö ö̦jöbömalema. A nö ö̦jöböaböö däjä, a mojodudou showalayoma.
32Ö̦jö däjä abinaja cäcöbö nowa tayou juoma.
—Bämacö juimabä jamö, cama a wa̦nö, bejedi lä bäfälecö bufi shi jalijiblamaö dodijilayoma, Yai Bada etä a̦ wawämaö lä cuaaimano wei tä a̦ ja —cäcöbö nowa tayou juoma.
33Ö̦jö däjä showawä cäcöbö mö yabaa fa co̦lufälönö, Jelusale jamö cäcöbö waloa co̦quema. Jesús 11 ebä lä nocaono wei bä yododabä jamö cäcöbö fa waloicunö, bä dabölalema, ai bä ca̦i lä yododano wei bä sho. 34Abinaja cäcöbö nowa taö mö baomaje.
—¡Bejedi lä, Bada tä demi jocädou co̦layoma! ¡Simón Pedro nija a damolaliyoma! —cäcöbö nowa taö mö baomaje.
35Ö̦jö däjä cama cäcöbö a̦ nö ca̦i wäo mö feduoma. Emausiteli bä nijamö cäcöbö jufälöö däjä, tä lä cublaliyono wei tä a̦fa wäyäböma. Jesúsnö nii a fa joyolalönö, a nö lä ö̦jöbömaleno wei tä a̦fa ca̦i.
Cama ebä nija Jesús a
damoa lä co̦laliyono wei tä a̦
36Ö̦jö tä a̦fa wäyäböö showao däjä, yedu cama Jesús a fa bädaliyonö, cama bä mötale jamö a ublaa damoa bädalaliyoma.
—Bä bufi da yanöcöicu —bä nowa tama.
37Ö̦jö ma cui, bä bufi shädayaimou ja, bä ca̦i quilii ja, “Bolebole a daanö”, bä bufii cuu dicooma. 38Abinaja bä nowa taö majöoma.
—Bä bufi wedinajamo dijä. ¿Wedi tabä wamacö bufi li jaducubloimi? 39Wamale imicö dusi da mö. Wamale mamicö da mö. Ö̦jö ya showawä. ¿Ö̦jö tawä? Wamale da juba, ö̦jö lä. Bei ya ya̦jicö ca̦i malä cule, bei ya ubä ca̦i malä cule. Inaja bolebole bä cuwä malä mlai —bä nowa tama.
40Inaja a fa cunö, bei imicö mömou wawädooma, bei mamicö ca̦i. 41Bä bufi ma doblalono wei ma cui, bä bufi ca̦i wedinajamou coyocoo showawä ja, a wa̦ bejedi bufii shalilionomije. Ö̦jö cudeenö, abinaja cama bä nija a cuma.
—Ya iyabä, ¿wama tä tabou cule? —a cuma.
42Yuli löbö acadafu fa jöböcöjenö, 43bä mamo showao däjä a walema. 44Ö̦jö däjä abinaja bä nowa ca̦i tama.
—Yai Bada etä a̦ oni ja ya wa̦fa lä tamou wei tä bluca wawäblobä cätä. Moisesi tä a̦ ma cui ja, Yai Bada a wa̦no wäyälewä bä a̦ ma cui ja, amowa bä a̦ ma cui ja, ö̦jö waiquiwä. Cafä bämacö ca̦i juu showao däjä, inaja ya mada cublei —bä nowa tama.
45Ö̦jö däjä bä bufi jaducublamalema, Yai Bada etä a̦ ja bä bufi möblobä. 46Abinaja bä nowa ca̦i tama.
—Tä a̦ oni malä cuu wei. Yai Bada tänö a shömabä a lä yaileno wei a nö nia bleaamamaje, a nomabä. A shäö fa cadidiojenö, bolacabö tä mö fa dödölönö a demi nia jocädou co̦oma. ¿Ö̦jö tawä? 47Bluca bä bälöjöwä lä yaiblai bä nija, camiyä ya wa̦ lojodenö, tä a̦ nia wäyämou blaucubloma, wa̦lidiwä tä ja bä bufi lä lädou wei, Yai Bada tänö tä nowa nia lä mladamaö wei tä a̦ lä cui. Jelusale jamö tä a̦ nia wäyämou fa balöonö, bluca bä lä bälöblai bä nija tä a̦ nia wäyämou cuaaö nomöjöoma.
48’Ya showadi lä cuaano wei wamale möma cudeenö, wamale a̦fa wäyäbä wamacö waiquiwä. 49¿Ö̦jö tawä? Fayänö tä a̦fa wäyäö lä balöono wei ya tä nia shömaö. Yai Bada tänö wamacö nö nia lä wa̦lojomabou wei wama tä nö dabou showalanö, eja Jelusale jamö bä cua da balöicu —bä nowa tama.
50Ö̦jö däjä, bä ca̦i faa fa co̦lufälönö, Bedania tä shabono ajede jamö bä lululefälöma. Bococu fa lelejeicunö, Yai Bada nija bä bayeliblamaö bufima. 51Bä bayelimaö showale a ösöfälöma. Fedu jamö a co̦molayoma. 52Cama ebä möfe bolanö a wa̦fa Bada doblao taö juomaje.
Ö̦jö däjä, Jelusale jamö, bä bufi doblalolanö bä co̦a co̦layoma. 53Yai Bada etä yafi jamö bä showadi fa jublaadinö, bä bufi doblalolanö Yai Bada a nofi shino doablamaje.
Currently Selected:
Lucas 24: GUU
Highlight
Share
Copy
Want to have your highlights saved across all your devices? Sign up or sign in
©2012, All Rights Reserved