Jɛnɛsis 7
7
Aw PAPA GƆD Mek Di Ples Flɔd
1PAPA GƆD tɛl Noa se, “Go insay di ak wit ɔl udat tap na yu os. A dɔn si se na yu wangren pan yu kɔmpin dɛn de du wetin rayt na mi yay. 2Pan ɔl dɛn animal we dɛn de it, tek sɛvin pia, bɔt pan di wan dɛn we dɛn nɔ de it, jɛs tek wan man ɛn wan uman nɔmɔ. 3Tek sɛvin pia pan dɛn bɔd dɛnsɛf, man ɛn uman. Yu fɔ du so fɔ mek ɔl di animal ɛn bɔd dɛn go bɔn dɛn yon pikin so dɛn kayn go de bak na di wɔl. 4Frɔm tide, di de we mek sɛvin a go sɛn flɔd we go kam fɔ fɔti de ɛn fɔti nɛt. I go pwɛl ɔltin we a bin dɔn mek.” 5Noa du ɔl wetin PAPA GƆD tɛl am fɔ du.
6Noa bin ol siks ɔndrɛd ia we PAPA GƆD sɛn dis flɔd kam na di wɔl. 7In, in wɛf, in bɔypikin dɛn ɛn dɛn wɛf, bin de insay di ak so di flɔd nɔ mit dɛn. 8Dɛn animal dɛn we ‘klin’, dɛn wan we ‘nɔ klin’,#7:8 Klin animal ɛn animal we nɔ klin Pan Ibru kɔlchɔ, di klin animal dɛn na animal dɛn we dɛn kin it ɛn tek mek sakrifays to PAPA GƆD, bɔt di ɔda animal dɛn nɔ klin. Bɔt dat nɔ min se na di sem animal dɛn wi go it ɔ nɔ go it tide. dɛn bɔd dɛnsɛf ɛn ɔl dɛn tin we de krip na grɔn, ɔl go insay di ak wit dɛn. 9Dɛn bin de tu-tu, wan man ɛn wan uman, jɛs lɛkɛ aw PAPA GƆD bin dɔn tɛl Noa. 10Di flɔd kam di de we mek sɛvin.
11Di flɔd kam di ia we mek Noa siks ɔndrɛd ia, ɛn i kam di sɛvintin de na di sɛkɛn mɔnt. Da de de, ɔl dɛn wata we de pas ɔnda di grɔn bɔs opin ɛn di klawd sɛf opin. 12Di flɔd bin de na di wɔl fɔ fɔti de ɛn fɔti nɛt. 13Da sem tɛm de, Noa, in wɛf ɛn in tri bɔypikin dɛn we na Shɛm, Am, ɛn Jefɛt ɛn dɛn yon wɛf, bin go insay di ak. 14Ɔlkayn animal bin de insay di ak; di wan dɛn fɔ tap wit pipul ɛn dɛn wayl bist, big ɛn smɔl, ɛn ɔlkayn bɔd. 15Tu-tu pan ɔlkayn tin we gɛt layf bin de insay di ak wit Noa, 16man ɛn uman, jɛs lɛkɛ aw PAPA GƆD bin tɛl am fɔ du. We dɛn ɔl dɔn go insay, PAPA GƆD lɔk di ak in do.
17Di flɔd kam fɔ fɔti de ebi, ebi wan, ɛn di wata bin ay we mek di ak flot. 18Di wata bin so bɔku ɛn ay, so di ak bigin fɔ drif. 19I ay sote i kɔba ɔl di ay ay mawnten dɛn; 20i kam ɔp sote i rich bɔt sɔm twɛnti-fayv fut pas ɔl di mawnten dɛn. 21Ɔltin we bin de na di wɔl day, ɔl dɛn bɔd, animal, di wan dɛn we tap wit pipul, di wayl bist, ɛn ɔl dɛn mɔtalman sɛf. 22Ɔltin we bin de na di wɔl we gɛt layf day. 23PAPA GƆD pwɛl ɔltin we gɛt layf na wɔl, mɔtalman, animal ɛn bɔd. Di wan dɛn nɔmɔ we bin lɛf, na Noa ɛn dɛn wan dɛn we bin de insay di ak wit am. 24Di wata nɔ bin bigin go dɔŋ te te wan ɔndrɛd ɛn fifti de dɔn pas.
Currently Selected:
Jɛnɛsis 7: KRIO13
Highlight
Share
Copy
Want to have your highlights saved across all your devices? Sign up or sign in
Krio Bible © The Bible Society of Sierra Leone, 2013.