Ore i mexü̃ ga Cuáü̃ ümatüxü̃ 11
11
Lácharoarü yuxchiga
1Nayexma ga wüxi ga yatü ga ida̱xawecü ga Lácharogu ãégacü. Rü naeya̱xgü ga María rü Márta rü ĩane ga Betániacüã̱x nixĩgü.
2Rü yema María iyixĩ ga Cori ga Ngechuchucutügu pumara bacü rü ñu̱xũchi ngĩyaemaxã ínapicutücü. Rü gumá Lácharo ga ida̱xawecü nixĩ ga ngĩenexẽ.
3Rü poraãcü nida̱xawe ga Lácharo. Rü yemaca̱x ga naeya̱xgü, rü Ngechuchuxü̃tawa imugagü, rü ngĩgürügügü: “Pa Corix, cumücü ya Lácharo ya nüxü̃ cungechaü̃cü rü nida̱xawe”, ngĩgürügügü.
4Rü yexguma yema orexü̃ naxĩnügu ga Ngechuchu, rü ñanagürü: —Ngẽma da̱xawe rü taxũtáma yumaxã inayacua̱x. Natürü nida̱xawe nax duü̃xü̃gü nüxü̃ nadaugüxü̃ca̱x nax aixcüma naporaxü̃ ya Tupana rü aixcüma choma i Nane rü ta nax chaporaxü̃ —ñanagürü.
5Rü Ngechuchu poraãcü Maríaxü̃ rü Mártaxü̃ rü Lácharoxü̃ nangechaü̃.
6Natürü yexguma nüxü̃ naxĩnügu ga nax yada̱xawexü̃ ga Lácharo, rü tama paxa ínayadau. Rü yema ínayexmaxü̃wa rü taxre ga ngunexü̃ yexma narüxã̱ũ̱xama.
7Rü yemawena rü norü ngúexü̃güxü̃ ñanagürü: —¡Ngĩxã rü wena Yudéaanewa taxĩ! —ñanagürü.
8Rü norü ngúexü̃gü rü ñanarügügü nüxü̃: —Pa Ngúexẽẽruxü̃x, yexwaca̱xtama nixĩ ga yémacüã̱x ga Yudíugü ga nutamaxã cuxü̃ ínamuxũchigüchaü̃xü̃. ¿Rü tü̱xcüü̃ wena ngéma cuxũxchaü̃ i ñu̱xmax? —ñanarügügü.
9Rü Ngechuchu rü norü ngúexü̃gümaxã nüxü̃ nixu rü ñanagürü nüxü̃: —¿Taux ẽ̱xna i wüxi i ngunexü̃ rü 12 i ora nüxü̃́ ngẽxmaxü̃? Ngẽxguma texé ngunecü ixũxgu rü tama ta̱xacümaxã itayarüña, erü tümaca̱x nangóone.
10Natürü ngẽxguma wüxíe chütacü ixũxgu rü ngẽmáacü ta̱xacümaxã itayarüña, erü tümaca̱x naxẽane —ñanagürü.#11.10 Rü yemaacü nanango̱xẽxẽ nax tauta nawa nanguxü̃ nax nayuxü̃ ga nümax.
11Rü yemawena ga Ngechuchu rü ñanagürü nüxü̃: —Tamücü ya Lácharo rü napemare. Natürü i ñu̱xma rü tá chayabaixãchixẽxẽ —ñanagürü.
12Rü yexguma ga norü ngúexü̃gü rü ñanarügügü: —Pa Corix, ega napemaregu, rü ngẽmawa nüxü̃ tacua̱x nax naxca̱x tá yataanexü̃ —ñanarügügü.
13Natürü ga Ngechuchu rü nüxü̃ nixu ga Lácharo rü marü nax nayuxü̃. Natürü norü ngúexü̃gü rü nagu naxĩnüegu nax napemarexü̃chigaxü̃ namaxã nixu.
14Rü yexguma ga Ngechuchu rü meama namaxã nüxü̃ nixu rü ñanagürü: —Lácharo rü marü nayu.
15Natürü choma rü chataãxẽ nax tama ngéma changexmaxü̃, erü ngẽmaãcü nixĩ i namemaexü̃ i pexca̱x nax choxü̃́ peyaxõgüxü̃ca̱x. ¡Rü ngĩxã rü ítayadaugü! —ñanagürü.
16Rü yéma nayexma ga Tumáchi ga Wüxigu Buexü̃ ga Taxree̱xpüxü̃maxã naxugüxü̃. Rü nüma ga Tumáchi rü yema namücügüxü̃ ñanagürü: —¡Ngĩxã i yixema rü ta ngéma taxĩ nax wüxigu Ngechuchumaxã iyuexü̃ca̱x! —ñanagürü.
Ngechuchu nixĩ i yuexü̃güarü Maxẽxẽxẽruxü̃
17Rü yexguma Ngechuchu Betániawa nguxgu, rü marü ãgümücü ga ngunexü̃ nangupetü nax iyata̱xgüãxü̃ ga Lácharo.
18Rü gumá Betánia rü Yerucharéü̃arü ngaicamana nayexma. Rü tomaepü̱x ga quirumétru nixĩ ga norü yáxü̃.
19Rü muxü̃ma ga Yudíugü rü Lácharoeya̱x ga Márta rü Maríaxü̃tawa naxĩ nax ngĩxü̃ yataãẽxẽẽgüaxü̃ca̱x, yerü nayu ga ngĩenexẽ.
20Rü yexguma Márta nüxü̃ cua̱xgu ga marü nax ínanguxü̃ ga Ngechuchu, rü nüxü̃ iyatüxãchi. Natürü ga María rü ĩxgutama irüxã̱ũ̱x.
21Rü Márta rü ngĩgürügü nüxü̃ ga Ngechuchu: —Pa Corix, yexguma chi cuma cunuma̱xgu rü taxũchima nayu ga chauenexẽ.
22Natürü choma nüxü̃ chacua̱x rü woo i ñu̱xma nax nayuxü̃, rü Tupana tá cuxna nanaxã i guxü̃ma i ta̱xacü i naxca̱x ícuca̱xaxü̃ —ngĩgürügü.
23Rü Ngechuchu ngĩxü̃ nangãxü̃ rü ñanagürü: —Cuenexẽ rü wena tá namaxü̃ —ñanagürü.
24Rü Márta ngĩgürügü nüxü̃: —Ngẽmáacü nüxü̃ chacua̱x rü wena tá namaxü̃ i ngẽxguma nagu̱xgu i naane rü ngẽxguma wena namaxẽgu i guxü̃ma i yuexü̃ —ngĩgürügü.
25Rü yexguma ga Ngechuchu rü ñanagürü: —Choma nixĩ i íchanadagüxẽẽxü̃ i yuexü̃gü, rü wena chanamaxẽxẽẽxü̃. Rü yíxema choxü̃́ yaxṍxe rü woo tayu̱xgu rü tá wenaxarü tamaxü̃.
26Rü guxãma ya texé ya maxü̃́xẽ rü choxü̃́ yaxṍxe, rü guxü̃gutáma tamaxü̃. ¿Cuyaxõxü̃ yixĩxü̃ i ngẽma? —ñanagürü ga Ngechuchu.
27Rü ngĩma rü ngĩgürügü nüxü̃: —Ngü̃, Pa Corix, choma rü chayaxõ nax cuma rü Tupana Nane ya Cristu ga ítanangu̱xẽẽgü nax quixĩxü̃ —ngĩgürügü.
Lácharo itáxü̃wa naxaxu ga Ngechuchu
28Rü yema ñaxguwena rü Márta rü ngĩeya̱x ga Maríaca̱x iyaca. Rü bexma ngĩmaxã nüxü̃ iyarüxu, rü ngĩgürügü: —Marü nua nangu ya Ngúexẽẽruxü̃ ya Ngechuchu, rü choxü̃ cuxca̱x nayacaxẽxẽ —ngĩgürügü.
29Rü yexguma María nüxü̃ ĩnügu ga marü yéma nax nanguxü̃ ga Ngechuchu, rü paxa ichi, rü Ngechuchuxü̃ íiyadau.
30Rü Ngechuchu rü tauta ĩanewa nangu ga yexguma, rü yema nachica ga Márta nüxü̃ ídauxü̃watama nixĩ ga nayexmaxü̃.
31Rü Maríapatawa nayexma ga ñuxre ga yémacüã̱x ga Yudíugü ga ngĩxü̃ yéma taãẽxẽẽgüxü̃. Rü yexguma ngĩxü̃ nadaugügu ga paxa nax inachixü̃ nax ínaxũxũxü̃, rü ngĩwe narüxĩ. Yerü nüma nüxü̃ nacua̱xgügu rü yéma Lácharo itáxü̃wa ixũ nax yéma yaxaxuxü̃ca̱x.
32Rü yexguma Ngechuchuxü̃tawa nanguxgu ga María, rü nape̱xegu iyacaxã́pü̱xü, rü ngĩgürügü: —Pa Corix, yexguma chi cuma cunuxmagu rü taxũchima nayu ga chauenexẽ ya Lácharo —ngĩgürügü.
33Rü yexguma Ngechuchu ngĩxü̃ da̱u̱xgu ga nax naxaxuxü̃ rü nax naxauxexü̃ ga yema Yudíugü ga ngĩwe rüxĩxü̃, rü poraãcü ngechaü̃ nüxü̃́ nangu̱x.
34Rü Ngechuchu nüxna naca rü ñanagürü: —¿Ngexta nixĩ i ipenatáxü̃? —ñanagürü. Rü nümagü nanangãxü̃ rü ñanagürügü: —Pa Corix, ¡dücax, nua naxũ rü íyadau! —ñanagürügü.
35Rü naxaxu ga Ngechuchu.
36Rü yema Yudíugü rü ñanagürügü: —¡Dücax ñuxãcü poraãcü Lácharoxü̃ nangechaü̃! —ñanagürügü.
37Natürü ñuxre ga yema Yudíugü rü ñanagürügü: —Daa nixĩ ga gumá yatü ga ngexetücüxü̃ rümexẽẽcü. ¿Rü tü̱xcüü̃ taxucürüwa ta̱xacürü mexü̃ Lácharoca̱x naxü nax tama nayuxü̃ca̱x? —ñanagürügü.
Wenaxarü namaxü̃ ga Lácharo
38Rü Ngechuchu poraãcü ngechaü̃ nüxü̃́ nangu̱x rü Lácharomaxü̃ca̱x nixũ. Rü wüxi ga ma̱xpǘnearü ãxmaxü̃ nixĩ ga yema naxma̱xü̃. Rü nayexma ga wüxi ga nuta ga tacü ga norü ngũxtaü̃ruxü̃.
39Rü Ngechuchu rü ñanagürü: —¡Ípenangũ̱xgachi̱x ya yimá nuta ya namaxã nangũxtaü̃cü! —ñanagürü. Natürü ga Márta ga Lácharoeya̱x rü ngĩgürügü: —Pa Corix, cuxá marü nayixane nixĩ, erü marü ãgümücü i ngunexü̃ naétü nixĩ nax nayuxü̃ —ngĩgürügü.
40Natürü ga Ngechuchu rü ñanagürü ngĩxü̃: —¿Taux ẽ̱xna i marü cumaxã nüxü̃ chixuchiréxü̃ rü ngẽxguma cuyaxõxgu rü tá nüxü̃ cudau i ngẽma mexü̃ ya Tupana norü poramaxã naxüxü̃? —ñanagürü.
41Rü yexguma ínananguxgachigü ga gumá nuta. Rü Ngechuchu daxũgu nadawenüãcüma ñanagürü: —Pa Chaunatü, moxẽ cuxna chaxã erü marü choxü̃ cuxĩnü.
42Choma nüxü̃ chacua̱x rü guxü̃guma choxü̃ cuxĩnü. Natürü moxẽ cuxna chaxã i ñu̱xma erü chanaxwa̱xe i ñaa duü̃xü̃gü nax yaxõgüãxü̃ nax cuma núma choxü̃ cumuxü̃ —ñanagürü.
43Rü yexguma yema ñaxguwena, rü tagaãcü ñanagürü: —Pa Lácharox, ¡ínaxũxũ i ngéma! —ñanagürü.
44Rü ínaxũxũ ga Lácharo ga ina̱i̱xgüchacüücü rü ina̱i̱xgüparacü. Rü wüxi ga naxchirumaxã nayana̱i̱xchametügü. Rü Ngechuchu ñanagürü nüxü̃ ga duü̃xü̃gü: —¡Ípeyawẽgü nax iyaxũxü̃ca̱x! —ñanagürü.
Yudíugü naxca̱x nadaugü nax Ngechuchuxü̃ yayauxgüxü̃ca̱x
(Mt. 26.1-5; Mr. 14.1-2; Lc. 22.1-2)
45Rü yema Yudíugü ga Maríawe rüxĩxü̃ rü nüxü̃ nadaugü ga yema Ngechuchu üxü̃, rü muxü̃ma nüxü̃́ nayaxõgü ga yexguma nüxü̃ nadaugügu ga yema naxüxü̃.
46Natürü ñuxre ga yema Yudíugü rü Parichéugümaxã nüxü̃ nayarüxugü ga yema Ngechuchu üxü̃.
47Rü yexguma ga yema Parichéugü rü chacherdótegüarü ãẽ̱xgacügü rü nangutaque̱xegü namaxã ga guxü̃ma ga yema yatügü ga ãẽ̱xgacügütücumüwa ügüxü̃. Rü ñanagürügü: —¿Ta̱xacü tá taxüe? Erü ñaa yatü i Ngechuchu rü nanaxü i muxü̃ma i mexü̃ i cua̱xruü̃gü.
48Ngẽxguma chi tama yayauxgügu, rü guxü̃táma i duü̃xü̃gü rü tá nüxü̃́ nayaxõgü, rü Rómacüã̱xgüarü churaragü rü núma chi naxĩ rü nagu napogüe ya tórü Tupanapata ya taxü̃ne, rü nayanaxoxẽxẽ i tachiü̃ane —ñanagürügü.
49Natürü wüxi ga yema chacherdótegütanüxü̃ ga Caipágu ãégaxü̃ rü gumá taunecügu rü chacherdótegüarü ãẽ̱xgacü nixĩ. Rü nüma rü yema togüxü̃ ñanagürü: —Pemax rü taxuxü̃ma pecua̱x.
50¿Ẽ̱xna tama nüxü̃ pecua̱x rü namemaexü̃ nax wüxitama i yatü guxü̃ma i duü̃xü̃ca̱x yuxü̃ nax tama nayuexü̃ca̱x i guxü̃ma i tachiü̃anecüã̱x i duü̃xü̃gü? —ñanagürü.
51Natürü ga Caipá rü tama nüechama yema ñanagürü, yerü gumá taunecügu rü nüma nixĩ ga chacherdótegüarü ãẽ̱xgacü yixĩxü̃. Rü yemaca̱x rü Tupana nixĩ ga Caipáwa idexacü ga yexguma nüxü̃ yaxuxgu nax Ngechuchu rü guxü̃ma i Yudíugüca̱x tá nax nayuxü̃.
52Rü yema orewa rü nanango̱xẽxẽ nax tama Yudíugüca̱xicatama tá nax nayuxü̃, natürü tá nayu naxca̱x i guxü̃ma i Tupanaarü duü̃xü̃gü i ñoma i naanegu woonexü̃, nax wüxiwa nangẽxmagüxü̃ca̱x.
53Rü yema ngunexü̃gucürüwa nixĩ ga inaxügüeãxü̃ ga yema Yudíugüarü ãẽ̱xgacügü nax nagu naxĩnüexü̃ ga ñuxãcü tá nax Ngechuchuxü̃ yama̱xgüxü̃.
54Rü yemaca̱x ga Ngechuchu rü marü tama yema Yudíugü ímuxü̃tanüwa nayexma. Rü ínaxũxũ ga Yudéaanewa, rü wüxi ga ĩanexacü ga Efraíü̃gu ãéganewa naxũ. Rü guma ĩane rü nüxna nangaicama ga yema chianexü̃ ga taxúema nagu ãpataxü̃. Rü yexma narücho namaxã ga norü ngúexü̃gü.
55Rü marü ningaica ga yema Yudíugüarü peta ga Üpetüchiga. Rü yemaca̱x muxü̃ma ga duü̃xü̃gü ga nai ga ĩanecüã̱x rü Yerucharéü̃wa naxĩ nax Tupanaca̱x nügü yamexẽẽgüxü̃ca̱x naxü̃pa ga yema peta.
56Rü Ngechuchuca̱x nadaugü ga duü̃xü̃gü. Rü Tupanapata ga taxü̃newa nügüna nicagüetanü, rü ñanagürügü: —¿Ñuxũ ñapegüxü̃ i pemax? ¿Ñoma i petawa tá naxũxü̃ rü ẽ̱xna tama? —ñanagürügü.
57Rü yema Parichéugü rü chacherdótegüarü ãẽ̱xgacügü rü duü̃xü̃güna naxãgagü, rü ñanagürügü: —Ngẽxguma ngextá nüxü̃ pedaugügu i ngẽma Ngechuchu, ¡rü tomaxã nüxü̃ peyarüxu nax tayayauxgüxü̃ca̱x! —ñanagürügü.
Currently Selected:
Ore i mexü̃ ga Cuáü̃ ümatüxü̃ 11: tcaP
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.