YOHANA 5
5
1Inyima wa yaga, liali ho ni lisavo linene lia Avayuda, kandi Yeso yazia Jerusalemi. 2Mu Jerusalemi ahimbi ni Kirivwa cha Magondi, liali ho lidavalia lia amazi ilialangangwa mu luheburaina, Bezisaza, liali nizisimbu zitano. 3Mu zisimbu yimwo avalwaye vaali mu na avanyingi; avavoku, avalema na avafogoya. [Valinda amazi gaduvulwi, 4kigira vuli ing'inga, engelosi wu Mwami yikaa mu mazi nukugaduvula. Mulwaye wukutanga kwingira mu mazi inyima wa mazi kuduvulwa, yahonaa uvulwaye vwosi vwa yaali navwo.] 5Kunangwa yaali ho numundu mulala uwaali mulwaye ku mihiga salasini na nane.
6Lwa Yeso yalora Mundu oyo naagoni hazana yaho, yamanya yaali mulwaye ku ing'inga indambi; Yamuteeva, “Wenyaa ohone?”
7Naye yamutivulira, “Mwami, inzi simbeeye nu mundu umbika mu lidavalia ing'inga ya amazi gaduvulwa mba. Lwa ngerizaa kwingira mu, mundu wundi yitaa mu imbiri wange.”
8Yeso yamuvolera, “Singira, uvugura vogono vuvwo ogeende.” 9Nonoho, mundu oyo yahona, navugura vogono vwivwe natanga kogenda.
Yaga gekoleka ku lidiku lie Lisabato. 10Kunangwa avalala ku Avayuda vavoolera mundu wahonywa oyo, “Yili ni Lisabato. Voveeye vudamanu ivi kuginga vogono vuvwo.”
11Navuzwa mundu oyo yavavolera, “Mundu ombonyie niyie omboleeye ‘Vugula vogono vuvwo, ogeende.’ ”
12Navo vamuteeva, “Nivwaha okovooleye, ‘Vugula vogono vuvwo ogeende?’ ”
13Navuzwa oyo siyamanya umundu wamuhonyia mba, kigira Yeso yaali namali kutura havundu zana, ni kiduma ekenene cha vandu chaali ho.
14Kunangwa, inyima wa yaga, Yeso yanyoora umundu zana oyo mu Litembeli, namuvolera, “Henza, kalunu ohoni! Utakola uvwoni kandi mba, gase ikindu kidamanu ligali kuvita kilakugwira.”
15Mundu oyo yazia, navolera avanene va Vayuda ndi Yeso niyie wamuhonyia. 16Kunangwa Avayuda vatanga kudambiza Yeso kigira yaali namali kohonyia umundu ku lidiku lie Lisabato. 17Yeso yavativulira, “Baba wange akolaa miyinzi kazozo, nainzi gaduukanaa kandi ngole miyinzi.”
18Livoora yili lialomba avanene va Avayuda nivakira ligali kwenya inzira ya viitira mu Yeso; kigira sigaveeye kuvunanyia vuzwa lilago lie Lisabato lieng'ine mba, navuzwa yaali kandi navooye Nyasaye aveeye Baba weve, na ndio yekolaa mwene koleng'ana na Nyasaye.
Nyasaye Yahaana vunyali ku Mwana
19Kunangwa Yeso yavavolera, “Muvooleraa agiligali: Mwana sianyala kokora kindu ku vwivwe mwene; navuzwa anyala kokora vuzwa kindu chalolaa Baba weve nakora. Kigira ku viosi via Baba akolaa, Mwana avikolaa kandi. 20Kigira Baba ayaanza Mwana, naamumanyia goosi agakolaa mwene, kandi alamumanyia miyinzi minene kuvita yiji, na munyi vosi mulagenya. 21Kuli Baba asimugukizaa avakuzu nu kuvaha livamwoyo, kandi nindio mwana ahaanaa livamwoyo ku yavo avaayaanza. 22Baba siakalagira mundu woosi mba; navuzwa vunyali vwosi vwo kuakaga yahaana ku Mwana, 23kunangwa avandu vosi vaduuki kukuminya mwana kuli mwana akuminyaa Baba. Uyu uvula kukuminya Mwana, kandi siakuminya Baba wamutuma mba.
24“Agiligali muvooleraa, uhulira likuva liange, nukusuuvira mu uyu uwanduma aveeye ni livamwoyo litahera mba. Sialikalagirwa mba, navuzwa umali kuvita kutura mulikuza nu kwingira mu livamwoyo. 25Agiligali muvooleraa; ing'inga yiza, kandi imali kuduuka, lwa avakuzu valihulira mwoyo gwu Mwana wa Nyasaye, nayavo avalimuhulira, valakaduuki mu livamwoyo. 26Kuli Baba aveeye vutangiliru vwi livamwoyo kandi ndio umali kuhaana Mwana ave vutangiliru vwi livamwoyo. 27Kandi yamali kuha Mwana uvunyali vwu kukalaga, kigira aveeye Mwana wa Adamu. 28Mutagenya ku yaga; kigira ing'inga yiza, lwa avakuzu vosi valakahuliri mwoyo gwigwe, 29kandi valakatuli mu vilindwa viavo. Yavo avakola amalungi valakasimuguki kandi valakave mwoyo, na yavo avakola uvudamanu valakasimuguki nu kukalagirwa.
Avalolekizi ku Yeso
30“Inzi sinyala kokora kindu ku vunyali vwange mwene. Inzi ngalaga kuli mbulira kutura ku Baba, na likalaga liange liveeye liu vulungi. Sinyenyaa kokora uvulariri vwange mwene, navuzwa uvulariri vwa uyu uwanduma.
31“Niiva nzelolekiza inzi mwene, lilolekiza liange silinyala kuvugilirwa kuva liagiligali mba. 32Navuzwa aveeye ho wundi ololekizaa icha manyi ku inzi, nainzi manyi vulahi goosi agavoora ku inzi gaveeye gagiligali. 33Munyi mwatuma avandu ku Yohana naye yalolekiza gaveeye gagiligali. 34Sigaveeye nyenya lilolekiza lia avandu, navuzwa mboraa yaga kunangwa muduuki kohonywa. 35Yohana yaali kuli itaya yaduuka kandi eng'ereng'anaa, na munyi ku ing'inga ngekeeke mwavugilira kusangalira uvulavu vwivwe. 36Navuzwa lilolekiza lia inzi mbeeye nalio liveeye linene kuvita lia Yohana. Kigira miyinzi ja Baba yamba malirizi, nijo miyinzi jimanyia ndi Baba niyie wanduma. 37Baba uwanduma, alolekizaa agiligali kulwa inzi. Munyi mukikiri kuhulira mwoyo gwigwe kali hakuzu, kandi mukikiri kolola ligondo liu mumoni mwimwe, 38kandi simulekaa amakuva geege gamenye mu mioyo jinyu mba, kigira si musuuviraa mu uyu uwa yatuma mba. 39Munyi musomelera mu Mang'oda Matakatifu nimuganagana ndi mulanyola livamwoyo litahera mugo; Navuzwa Mang'oda Matakatifu gene yaga amolomaa kondolekiza! 40Kali ndio, munyi simwenya kuuza ku inze muduuki konyoora livamwoyo mba.
41“Lienya liange siliveeye nduuki konyoora lizominywa kutura ku avandu mba. 42Navuzwa inzi manyi liiva lia muveeye nalio si muveeye nu vuyanzi ku Nyasaye mu mioyo jinyumba. 43Inzi mali kuuza nu vunyali vwa Baba wange, navuzwa munyi si mu nyingilizi mba. Navuzwa mundu wundi niyazaa ku vunyali vwivwe mwene, munyi mulamwingiriza vwangu. 44Munyala ndi kusuuvira inzi lwa munyi muyanzaa konyoora vukumi kutura ku munyi aveene, na simwenya konyoora vukumi kutura ku uyu oveeye Nyasaye yeng'ine mba? 45Mutaganagana ndi ninzi uli muyaara ku Baba mba. Musa uwa munyi mwaviika mu lisuuvirizwa lienyu niyie ulimuyaala. 46Niiva mu agiligali muva ni mwasuuvira Musa, ngano mwasuuvira inzi kandi, kigira Musa yang'oda kigira inzi. 47Navuzwa niiva munyi si musuuviraa aga yang'oda, munyala ndi kusuuvira amakuva gange?”
Currently Selected:
YOHANA 5: LOGOOLI
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019