YOHANA 1
1
Likuva lie livamwoyo
1Lirova nilikikiri kolombwa, liali ho Likuva, kandi likuva zana liali harara na Nyasaye, kandi likuva liali Nyasaye. 2Kutura mulitanga Likuva liali harara na Nyasaye. 3Nyasaye yalomba vindu viosi kuvitira muye. Sichaaliho ni kindu kali kilala ku vilombe viosi, ichalombwa vugira Ye. 4Likuva liali uvutangiliru vwi livamwoyo. Livamwoyo yili lialeta ku avandu. 5Uvulavu yivu vwakaa mu kisundi, navuzwa kisundi kikiri kuvuguuta kali hakuzu.
6Nyasaye yatuma mutumwa weve, mundu uwalangwa Yohana, 7yaza kuli mulolekizi, alolekize vulavu yivu, kunangwa avandu vosi vaduuki kusuuvira kuvitira muye. 8Oyo siyaali uvulavu, navuzwa yaza kulandiza uvulavu yivwo. 9Yivwo nivwo uvulavu vwi ligali; uvulavu vuzaa mu kivala kwaaka ku vuli mundu.
10Likuva liali mu lirova, kandi muye Nyasaye yalomba lirova, navuzwa lirova, siliamumanya mba. 11Yaza mu kivala chiche mwene, navuzwa avandu veve sivamuvugilira mba. 12Navuzwa ku yavo vosi avamuvugilira kandi avaasuuvira muye, yavaha uvunyali kuva avana va Nyasaye. 13Yava sivaveeye avana va Nyasaye ku liivulwa lia masahi, anoho kuzingulu ziu muviri, anoho kuvulaliri vwa avandu, navuzwa ku vulaliri vwa Nyasaye.
14Likuva liagwa mundu, namenya hagati hiitu; niyizuuyi zimbavasi na agiligali. Nakunyi kumali kolola uvukumi uvwa yanyoora kuli vwu muyaayi muderwa wa Baba.
15Yohana yamulolekiza ku avandu nahanzuka, “Uyu niye wandamuvoolera lwa ndavoora, uza inyima wange, aveeye munene ligali kumbita, kigira yaali ho ningikiri kwivulwa.”
16Kuturana kuvudukiru vwi zimbavasi zizie, umali kukugasiza kwosi, naakohezaa ligasizwa kazozo. 17Nyasaye yahaana Lilaga kuvitira ku Musa, navuzwa zimbavasi na agiligali viaza kuvitira mu Yeso Kristo. 18Siaveeyeho nu mundu kali mulala uwalola Nyasaye mba. Mwana muderwa wa Nyasaye yeng'ine, oveeye ku kiritu cha Baba, umali kumuvuura.
Lilwaza lia Yohana Mubatizi
(Mat. 3:1-12; Mar. 1:1-8; Luk. 3:1-18)
19Yili nilio, lilolekiza lia Yohana, lwa aviimiliri va Avayuda vatuma avasaalisi na vandu va Levi kutura Jerusalemi vazie koteeva Yohana ndi “Ivi nivwaha?”
20Yohana siyasuura kuvativulira, navuzwa yiyama havulavu navoora, “Inzi simbeeye Mesia mba.”
21Vamuteeva, “Kunangwa ivi nivwaha? Ivi ni Elija?”
Yohana yativura, “Awa, inzi simbeeye niye mba.”
Vamuteeva, “Ivi oveeye muporofeti?” Yavativulira, “Awa!”
22Navo vamuteeva, “Kunangwa, ivi nivwaha? Okohe mativuli kwilanyiri yavo avakutumi. Ivi mwene ovola ki?”
23Yohana yavativulira, “Inzi niyie wu muporofeti Isaya yavoola amakuva geege:
‘Mwoyo gwu mundu guhanzukaa mwigendanyama;
Lungikizi inzira yu Mwami.’ ”
24Avandu yavo vaali nivatumiywi na Avafarisayo. 25Maku, vateva Yohana, “Niiva ivi sioveeye Mesia kinga Elija, anoho muporofeti, kigira ki ubatizaa?”
26Yohana yavativulira, “Inzi mbatizaa namazi, navuzwa hagati hinyu asingiyi mulala wa munyi mutamanyi. 27Oyo yazaa inyima wange, navuzwa inzi sindukani kali kovoholora migoye ji vilatu vivie mba.”
28Yaga goosi gekoleka ha Bezani, ku lwangereka lwi ivugwi wu mugera gwa Jorodani uwa Yohana yaali nabatiziraa.
Yeso Mwana wi Ligondi lia Nyasaye
29Lidiku lialonda ku, Yohana yalora Yeso niyazaa kuye, kandi yavoola, “Henza, uyu niye Mwana wi ligondi wa Nyasaye utuliza vwoni vwa avumukivala! 30Uyu niye wa ndaamuvolera lwa ndavoora, ‘Inyima wange, yazaa mundu mulala oveeye munene ligali kumbita, kigira yaali ho ningikiri kwivulwa.’ 31Inzi mwene sindamanya alava vwaha, navuzwa ndaaza nimbatizaa na mazi, kunangwa nduuki kumukola amanyikane ku avandu va Isiraeli.”
32Yohana yahaana lilolekiza yili, “Ndaalora Roho niyiika kutura Mwigulu kuli likuulu kandi niyikara kuye. 33Inzi sindamumanya oyo niye, navuzwa Nyasaye uwanduma kubatiza avandu na mazi, yaali niyamboleye ndi ‘Mundu wo olola Roho niyazaa kuye kutura mwigulu nu kwikala kuye, uyu niyie ubatizaa na Roho Mutakatifu.’ 34Mali kolola kandi muvooleraa ndi aveeye Mwana wa Nyasaye.”
Aviigi va Yeso vu kutanga
35Lidiku lialonda ku, Yohana yaali kandi hazana harara na aviigi veve vaviri. 36Lwa yalora Yeso navitaa, yavoola, “Henza! Uyu niye Mwana wi Ligondi lia Nyasaye.”
37Lwa Aviigi vaviri yavo vahulira Yohana navoora ndio, valonda Yeso. 38Yeso yikivuka nalora aviigi zana nivamulondaa. Yavateva, “Mwenya ki?”
Navo vaamutivulira, “Rabi#1:38 Rabi: Liveeye kovora “Mwigizi.”, ivi omenyi hayi?”
39Yeso yavavolera, “Hambi mulole.” Aviigi yavo vaza, nivalora ha yamenya, nivahonga naye lidiku liosi. Yaali nidukaa saa komi zia ha mugolova.
40Mulala ku aviigi vaviri yavo vaali Andereya amwavo Simoni Petero. 41Nonoho yanyoora amwavo weve Simoni ma namuvolera, “Konyooye Mesia.” 42Kunangwa yaleeta Simoni ku Yeso.
Yeso yahenza Simoni navoora, “Ivi oveeye Simoni mwana wa Yohana. Kalunu ulalangwa Kefa#1:42 Kefa: Petero anoho Lwanda..”
Yeso alaangaa Filipo na Nazanieli vamulonde
43Lidiku lialonda ku Yeso yatovola kuzia Galilaya. Yanyoora Filipo, namuvolera, “Hamba ononde.”
44Filipo yaatulaa Bezisaida, lidaala lia Andereya na Petero. 45Filipo yanyoora Nazanieli namuvolera, “Konyooye mulala wa Musa yang'oda kuye mu kitabu chi Lilaga, kandi avaporofeti vang'oda kuye. Aveeye Yeso mwana wa Josefu, wa Nazareti.”
46Naye Nazanieli yateeva Filipo, “Kindu kilahi kinyala kutura Nazareti?” Filipo yamuvolera, “Hamba olole.”
47Lwa Yeso yalora Natanaeli niyazaa kuye, yavoola, “Heenzi, uyu aveeye Muisiraeli wiligali, sikeveeye ho ni kindu chuvugadi muye mba!”
48Naye Nazanieli yamuteeva, “Umanyi ndi?”
Yeso yamutivulira, “Nukikiri hasi hu musaala gwu mukuyu, kali Filipo nakiri kukulanga, ngololi.”
49Nazanieli yamutivulira, “Mwigizi, ivi niyie Mwana wa Nyasaye! Ivi oveeye Mwami wa Isiraeli!”
50Yeso yamuvolera, “Ivi usuuviyi kigira ngovoleeye ndi ngololi hasi hu Musaala gwu Mukuyu? Ulalola vindu vinene kuvita yivi ligali.” 51Yeso yaazizagilira kovora, “Agiligali muvooleraa, Mulalora ligulu niliguliywi nizingelosi va Nyasaye nivanina nu kwika kutura ku Mwana wa Adamu.”
Yeso Yagirung'anyia amazi kugwa iwaini ha Kana
Currently Selected:
YOHANA 1: LOGOOLI
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019