MATIUS 5
5
Khotbah di bukit
1Waktu Isa ngeliak jelma lamon udi, Ia cakak mik atas bukit. Radu jak seno Ia mejong, jelma-jelma sai nutuk Ia ratong jama Ia, 2raduni Ia mulai ngajar tian:
Kebahagiaan sai sejati
(Luk. 6:20-23)
3“Bebahagiado jelma sai ngerasa mak bedaya rik angkah begantung jama Tuhan gaoh;
tian anodo anggota umat Allah!
4 #
Yes. 61:2
Bebahagiado jelma sai besedih hati;
Allah haga ngehibur tian!
5 #
Mzm. 37:11
Bebahagiado jelma sai rendah hati;
Allah haga menepati janji-Ni jama tian!
6 #
Yes. 55:1-2
Bebahagiado jelma sai mirak ngelakuko kehaga-Ni Allah;
Allah haga muasko tian!
7Bebahagiado jelma sai mengasihi jelma bareh;
Allah haga mengasihi tian juga!
8 #
Mzm. 24:3-4
Bebahagiado jelma sai murni hatini;
tian haga mengenal Allah.
9Bebahagiado jelma sai ngusung damai di hantara manusia;
Allah haga ngaku tian sebagai anak-anak-Ni!
10 #
1Ptr. 3:14
Bebahagiado jelma sai menderita penganiayaan mani ngelakuko kehaga-Ni Allah;
tian yakdo anggota umat Allah!
11 #
1Ptr. 4:14
Bebahagiado keti kik dikerneh, dianiaya, rik difitnah demi Nyak. 12#2Taw. 36:16; Kis. 7:52 Nabi-nabi sai hurik semakkung keti pun radu dianiaya injuk reno. Besukacitado rik begembirado, mani balakdo upah di surga sai disediako Tuhan untuk keti.”
Uyah rik terang
(Mrk. 9:50; Luk. 14:34-35)
13 #
Mrk. 9:50; Luk. 14:34-35 “Keti yakdo uyah dunia. Kik uyah jadi tawar, mungkin kedo diasinko luot? Mak ngedok gunani lagi, selain ditokko rik diilik-ilikko jelma.
14 #
Yoh. 8:12, 9:5 Keti yakdo terang dunia. Kota sai rangni di atas bukit mak dapok disegokko. 15#Mrk. 4:21; Luk. 8:16, 11:33 Mak ngedok jelma sai nyalako lampu, kak raduni nyalok lampu udi jama runcung. Ia malah haga ngepikko lampu udi di rangni lampu, in ngeni terang jama unggal jelma di delom lamban. 16#1Ptr. 2:12 Injuk reno juga terangmu haga besinar dihadapni jelma, in tian ngeliak perbuatan-perbuatanmu sai betik, raduni memuji Bapamu di surga.”
Pengajaran tentang hukum agama Yahudi
17“Dang hak nganggap bahwa Nyak ratong untuk ngehapusko hukum Musa rik ajaran nabi-nabi. Nyak ratong lain hak untuk ngehapuskoni, kidang untuk nunjukko reti sai setemonni. 18#Luk. 16:17 Ingokdo! Selama langit rik bumi masih wat, sai huruf atau titik sai paling lunik pun di delom hukum udi, mak dihapusko, kik sunyinni makkung tejadi! 19Ulihni seno, sapa sai ngelanggar salah sai jak perintah-perintah ano, sekalipun sai paling lunik, rik ngajar ulun bareh bebuat injuk reno juga, haga jadi sai paling lunik di hantara umat Allah. Sebalikni, sapa sai ngejalanko perintah-perintah seno rik ngajar ulun bareh bebuat injuk reno juga, haga jadi balak di hantara umat Allah. 20Jadi, ingokdo: Keti mak mungkin jadi umat Allah, kik mak ngelebihi guru-guru agama rik ulun-ulun Farisi delom hal ngelakuko kehaga-Ni Allah!”
Petuah tentang kebutongan
(Luk. 12:57-59)
21 #
Kel. 20:13; Ul. 5:17 “Keti pandai bahwa jama nenek muyang neram wat ajaran injuk reji: Dang ngebunuh; sapa sai ngebunuh, haga diadili. 22Kidang tano Nyak cawa jama niku, sapa sai butong jama ulun bareh, haga diadili; rik sapa sai memaki ulun bareh, haga diadili di hadapan Mahkamah Agama. Rik sapa sai ngucakko jama ulun bareh, ‘Bugu,’ patut ditokko mik delom apui neraka. 23Ulihni seno, kik salah sai di hantara keti sedang mempersembahko pengenianni jama Allah, raduni ingok bahwa wat jelma sai sakik hati jama ia, 24hagani ia ninggalko pai persembahanni udi di hadap mezbah, raduni mik bedamai jama ulun udi. Radu jak seno, dapok ia muloh rik mempersembahko pengenianni jama Allah.
25Seandaini wat jelma ngaduko keti mik mahkamah, bedamai pai jama ia selama masih wat waktu semakkung sampai di mahkamah. Kik mawat, ulun udi haga nyerahko keti jama hakim, sai haga nyerahko keti jama pelisi. Kak raduni pelisi haga ngurukko keti mik delom bui. 26Rik ingokdo: Pasti keti mak dapok luah jak bui udi, semakkung sunyinni dendamu lunas sama sekali.”
Tentang perzinahan
27 #
Kel. 20:14; Ul. 5:18 “Keti pandai bahwa wat ajaran injuk reji: Dang bezinah. 28Kidang tano Nyak cawa jama niku: sapa sai ngeliak sai bebai jama nafsu birahi, jelma udi radu bezinah jama bebai udi di delom hatini. 29#Mat. 18:9; Mrk. 9:47 Kik mata kananmu nyebabko niku bedusa, cungkildo rik tokko mata ano! Lebih baik kelebonan salah sai anggota badanmu jak sunyinni badanmu ditokko mik delom neraka. 30#Mat. 18:8; Mrk. 9:43 Kik culuk kananmu nyebabko niku bedusa, pelok rik tokko culuk ano! Lebih baik kelebonan kebelah culukmu jak sunyinni badanmu kuruk neraka.”
Tentang perceraian
(Mat. 19:9; Mrk. 10:11-12; Luk. 16:18)
31 #
Ul. 24:1-4; Mat. 19:7; Mrk. 10:4 “Wat juga ajaran injuk reji: unggal jelma sai nyeraiko inggomni, haga ngeniko surat cerai jama ia. 32#Mat. 19:9; Mrk. 10:11-12; Luk. 16:18; 1Kor. 7:10-11 Kidang tano Nyak cawa jama niku: sapa sai nyeraiko inggomni padahal bebai ano mak nyeleweng, nyebabko inggomni ano bezinah, kik inggomni ano kawin luot. Rik sapa sai kawin jama bebai sai diceraiko udi, bezinah juga.”
Tentang sumpah
33 #
Im. 19:12; Bil. 30:2; Ul. 23:21 “Keti pandai bahwa jama nenek muyang neram wat ajaran injuk reji: dang mungker janji. Api sai radu niku janjiko jama sumpah di hadapan Allah, harus niku ngelakukoni. 34#Yak. 5:12; Yes. 66:1; Mat. 23:22 Kidang tano Nyak cawa jama niku: dang besumpah sama sekali, betik demi langit, mani langit yakdo takhta Allah, 35#Yes. 66:1; Mzm. 48:3 maupun demi bumi, mani bumi yakdo alas cukut-Ni; atau demi Yerusalem, mani senodo kota Raja balak. 36Dang juga besumpah demi ulumu, mani niku tenggalan mak dapok nyani buokmu jadi handak atau halom, walau angkah sai lembar. 37Ucakko gaoh ‘Ya’ atau ‘Mawat’ – lebih jak seno ratongni jak si iblis.”
Petuah tentang pembalosan
(Luk. 6:29-30)
38 #
Kel. 21:24; Im. 24:20; Ul. 19:21 “Keti pandai bahwa wat juga ajaran injuk inji: mata ganti mata, ipon ganti ipon. 39Kidang tano Nyak cawa jama niku: dang ngebalos dendam jama jelma sai ngelakuko sai jahat jama niku. Sebalikni kik ulun nampar biham kananmu, taganko ia nampar biham kirimu juga. 40Rik kik ulun ngaduko keti jama hakim rik nuntut kawaimu, keniko jama ia jubahmu juga. 41Kik sai jelma sai bekuasa memaksa keti mikul barangni sejaoh sai kilometer, pikuldo sejaoh rua kilometer. 42Kik ulun ngilu sai hal jama niku, keniko jama ia. Rik dang juga nulak jelma sai haga nginjam sai hal jak niku.”
Mengasihi musuh
(Luk. 6:27-28, 32-36)
43 #
Im. 19:18
“Keti pandai bahwa wat juga ajaran injuk reji: cintaido kantik-kantikmu rik nyuohkodo musuh-musuhmu. 44Kidang tano Nyak cawa jama niku: cintaido musuh-musuhmu, rik duako jelma-jelma sai nganiaya keti, 45in keti jadi anak-anak Bapamu sai di surga. Mani Allah nerbitko matarani-Ni untuk jelma sai betik rik untuk jelma sai jahat juga. Ia ngeni labung untuk jelma sai bebuat benor rik untuk jelma sai ngelakuko sai jahat juga. 46Mani kik keti mengasihi angkah jelma sai mengasihi keti gaoh, untuk api Allah haga ngebalos perbuatanmu ano? Bukankah unyinni penagih pajak pun bebuat injuk reno? 47Rik kik keti ngeni salam angkah jama kantik-kantikmu gaoh, api istimewani? Jelma-jelma sai mak mengenal Allah pun bebuat injuk reno! 48#Im. 19:2; Ul. 18:13 Bapamu di surga sempurna mengasihi sunyinni jelma. Keti haga injuk reno muneh.”
Currently Selected:
MATIUS 5: LAILJP
Highlight
Share
Copy
Want to have your highlights saved across all your devices? Sign up or sign in
@ LAI 2002 Indonesian Bible Society (Lembaga Alkitab Indonesia)