MARKUS 15
15
Yesus doi Pilatus salaano
(Mat. 27:1-2, 11-14; Luk. 23:1-5; Yoh. 18:28-38)
1Dodowasoono, sasaibino ko Pangadilan Agama tongusokon imam-imam kapalano, tua-tua Yahudi tukon guru-guru agama pobisalai moso-mosobit. Yanila boboiyo Yesus, doibundu Yana binaba tukon sinalakanggon doi Pilatus. 2Pilatus sadaiyo doi Yesus, “Tutuu kai Ikoo Yahudi miano Tomundo?”
3“Bunomo komubantilan,” Yesus timbiliyo.
Imam-imam kapalano badaang kona tuduhan doi Yesus. 4Maka Pilatus mansadai koidan doi Yesus, “Aki kai muyase timbiliyo? Coba kitayo bulaa kona kadaang kotuduhan yanila moatuuke doikoo!”
5Bai Yesus aki namotimbili koidan, tobikon Pilatus masainding.
Yesus inotuwongikon koukuman mate
(Mat. 27:15-26; Luk. 23:13-25; Yoh. 18:39–19:16)
6Doi samba-samba ko Lamekanano ko Paskah, Pilatus mongosodii meeng komian motinalunggu loingiyo komian badaang nalinilik. 7Doi talunggu lalomo, antara mobanggabut-banggabut mo lakukene komangakatean doi tempo nanggabutan, daano komeeng komian kosambuno Barabas. 8Mian badaang pototongi tukon kabiyo doi Pilatus sulano yana naosodiiyo komeeng komian motinalunggu buno mobiasamo. 9Pilatus mansadai doi yanila, “Komuyu kai yase, sulano ku sodiiyo do Yahudi miano natomundo motuuk doi komuyu?” 10Sabab Pilatus tingoniiyo baikon koimam-imam kapalano salakanggene Yesus doi yana sabab mosikit konoanoila.
11Bai imam-imam kapalanodoo bujukiyo domianoo badaang sulano nakabiyo doi Pilatus nasodiiyo Barabas motuuk doi yanila. 12Maka Pilatus bantile koidan doi mianoo badaang, “Kalu buno doiya, yaku sio kubaiyo oila domianoo komuyu mobantile Yahudi miano natomundo?”
13Yanila nggeleamon? “Posempangemo Yana!”
14“Bai oila kona kulokisan doi Yana?” Pilatus sadaiyo.
Maka yanila nggeleamon koidan kokobukuan, “Sempangemo Yana!”
15Pilatus yase tanaanggene do mianoo badaang, maka yana sodiiyo Barabas tuuk yanila. Doibundu yana sumboliiyo komian mobobokiiyo Yesus, maka salakanggene sulano nasinempanggon.
Suludadu-suludadu maenggene Yesus
(Mat. 27:27-31; Yoh. 19:2-3)
16Suludadu-suludadudoo babayo Yesus doi kantor pangadilan doi gubernur nakamali. Doibundu sasaibino kopasukan inuang pototongi. 17Maka yanila konoikene kojubah mosamelaon doi Yesus, tukon mokubai songgo doi kayung langa-langaano mo palatadian, doibundu sinonggoikon doi Yesus oluno. 18Lapa doiya yanila beena hormat doi Yana, “Tabea Tomundo Yahudi Miano!” yanila bantile. 19Yanila bobokiiyo Yesus oluno tukon tongkat, maka yanila tupeiyo Yana tukon sosubaiyo doi salaano. 20Salataa lapa Yesus minaenggon, yanila bukayo dojubahdoo mosamelaon maka kinonoikon koidan kona pakean susuungo. Doibundu Yana binaba doi tonggulung sulano nasinempanggon.
Yesus sinempanggon
(Mat. 27:32-44; Luk. 23:26-43; Yoh. 19:17-27)
21 #
Rm. 16:13
Doi loloon tangano yanila pakisaayo komeeng komian motanggunge Yesus nakayung sempang. Do mianoo pokokonoi sodo naluwe doi nakampung ampakon usok doi kota. (Kosambuno Simon – kona lipu doi Kirene – Aleksander tukon Lufus tamano.) 22Yesus binaba doi meeng kotampat kosambuno Golgota, koalatino, “Mangabosan Olu”. 23Idoo yanila yase beena doi Yana anggur mo sinambul gataa momotuulo, bai Yesus aki nayase moinume do angguroo. 24#Sad. 22:18 Doibundu yanila sempanggene yana, tukon inobos-obos kona pakean tukon undian sulano natatukanggene kona obos meeng-meeng. 25Dona sinempanggonanoo kona tealian jam 9 dodowa. 26Doi sinempanggonanoo bungguno tinulis kotuduhan tentang doi yana, doiyamo: “Tomundo Yahudi Miano”. 27Posinggat-singgat tukon Yesus yanila sempanggene koidan kolua komian molokis; komeeng doi bakalingano taikon komeeng koidan doi bobono taikon. [ 28#Yes. 53:12 Kalu buno doiya tealimo komo totulis doi Kitab Moliyous lalomo; doiyamo: “Yana inanggap tongusokon doi mianoo molokis.”]
29 #
Sad. 22:7, 109:25; Mrk. 14:58; Yoh. 2:19 Komian mo alon idoo sua-sualilinggene kooluno tukon totulaiyo Yesus. Yanila bantile, “He, Ikoo komo yase lubange ko Mian Bisa Na Bonua tukon kekendenge koidan tolu kooloyo lalomo. 30Coba obulus koiya musinempanggonannokon tukon salamatene kobuto-Mu!”
31Bunomo koidan imam-imam kapalano tukon guru-guru agama piadayo Yesus. Yanila bantile meeng tukon bailon, “Yana salamatene komian bailon, bai kobutongo susuungo Yana aki namoola salamatene! 32Kalu Yana tomundo Israel, Tomundo Pasalamat, tadukai Yana diabudodoo naobulus doi sempangoo, sulano kami kitayo tukon maangga doi Yana!”
Do mianoo mo sinempanggon pososinggat Yesus koidan totulaiyo Yesus.
Yesus namatean
(Mat. 27:45-46; Luk. 23:44-49; Yoh. 19:28-30)
33Doi nasuunan kooloyo, tolu kojam kona kalumbit posaapon do lipudoo teali kalipookan. 34#Sad. 22:1 Tukon batong tolu kinobian, Yesus nggeleamon tukon alalo mo babasal, “Eloi, Eloi, lama sabakhtani?” Koalatino, “Oh Ku Mian Bisa, oh Ku Mian Bisa bulaandokon Ikoo motinggale Yaku?”
35Bubula komian idoo molengele do manggadidianoo, tukon bantile, “Pondongoliiyo, Yana uange Elia!” 36#Sad. 69:21 Meeng komian doi yanila moso-mosobit ampakon mangala bunga karang, maka kemeke doi anggur momeele lalomo. Doibundu do bunga karangoo tinabokon doi meeng kokayung bunduno, maka tinutumikon doi Yesus suungo bibilo, tukon bantile, “Totiili, mai nda kitayo kai Elia lubat obulusene Yana doi nasinempanggonanoo.”
37Maka Yesus nggeleamon tukon mate.
38 #
Tob. 26:31-33
Lalanse pangantang mo tokooton doi Temeneno Na Bonua tebeak tokuakon lua doi bungguk polong doi bilit. 39Suludadu kapalano mo kokondong doi sempangoo, kitayo bulaa Yesus namatean. Suludadudoo kapalano bantile, “Takainomo bisa namian nia Mian Bisa Napau!”
40 #
Luk. 8:2-3
Idoo daano kobubula koboine mo daano mokita sasaibinodoo doi namododoonan. Doi yaniladoo daano Salome, Maria Magdalena, tukon Maria Yakobus tinano mo muda tukon Yoses. 41Yanila koboiboine mo lolainge tukon tomboniiyo Yesus, singgatoo Yana modaano doi Galilea. Tukon daano mobadaang koidan koboiboine bailon idoo mo lapamo lubat doi Yerusalem polaing-laing tukon Yesus.
Yesus nakinibulan
(Mat. 27:57-61; Luk. 23:50-56; Yoh. 19:38-42)
42-43Kooloyo lolanimo kona popookan salataa Yusuf doi Arimatea lubat. Yana anggota Pangadilan Agama mo inodotii. Yana koidan daano montotiili kotempono ko Mian Bisa namaparentaan buno Tomundo. Oloyodoo oloyo Mosinadiakon (doiyamo oloyo akiyoon nalaate kooloyo Tadean). Tobikon doiya Yusuf barani mangadap doi Pilatus tukon kabiyo Yesus bajano. 44Pilatus masainding molengele baikon Yesus momatemo. Jadi yana mosumbolii mian mouange kopasukan kapalano tukon mansadai doi yana kabudoon Yesus malumbito kona matean. 45Salataa molongol do suludadudoo kapalano nalapuran, Pilatus pataikene Yusuf moalayo Yesus bajano. 46Maka Yusuf mongoli toik lenan moalus tukon sambuno lapa obulusene Yesus bajano, yana bungusiyomo tukon do toikoo. Doibundu yana abese do bajano doi meeng kokibul lalomo mo kinubai doi bunggul batu lalomo. Lapa doiya yana nggolinggene komeeng kobatu mobabasal potutupikon do kibuloo tataapono. 47Momeeng daano Maria Magdalena tukon Maria Yoses tinano pakitooliyo nando Yesus nainabosan.
Currently Selected:
MARKUS 15: LAIBGZ
Highlight
Share
Copy
Want to have your highlights saved across all your devices? Sign up or sign in