MARKUS 13
13
Yesus basilingan tentang Temeneno Na Bonua namanasan
(Mat. 24:1-2; Luk. 21:5-6)
1Salataa Yesus tinggale ko Temeneno Na Bonua, meeng komian doi Napololaing-pololaing bantile, “Tama Guru, coba kitayo do bangunan-bangunanoo. Palaatikanggene kobatu-batuno. Bukan maen kona monondokan!”
2Yesus timbiliyo, “Ikoo kitayo do bangunan-bangunanoo mo babasal, bolikon? Akiyo komeeng kobatu doi bangunan-bangunanoo mototinggal tosusun doi natangabosan. Sasaibino naikon minanas.”
Sakisaawan tukon poloilokisan
(Mat. 24:3-14; Luk. 21:7-19)
3Doibundu Yesus ampakon doi Zaitun Bunggulo, tukon osulang doi osulangan posalaanggon tukon Temeneno Na Bonua. Maka Petrus, Yakobus, Yohanes, tukon Andreas lubat doi Yana sulano napobasilingan tukon Yana salaku peribadi. 4“Coba Tama bontiikene doi kami,” yanila bantile doi yana, “Oila kotempono sasaibinodoo naikon kona tealian? Tukon oila kopaloosano kona tokitaan kalu laatemo kotempono?”
5“Pobaingotii,” Yesus timbiliyo, “inai komuyu pokinoikolii. 6Badaang komian molubat tukon pakeyo Kosambunggu tukon bantile, ‘Yakumo Yana!’ maka kokoliiyo komian badaang. 7Kalu komuyu molongol sinapan-sinapan alalo doi paraangan tukon bilita poakatean, inai pomatakut. Do lobo-lobodoo sio nateali, bai doiya aki naberarti baikon laatemo kona kiamatan. 8Kobangsa meeng poakate tukon molawane kobangsa bailon. Negara bailon lobosio konegara bailon. Doi yayaa teali koleali tukon malaalan. Sasaibino doiya sodo natambuunan tolong, buno meeng koboine mo toupiyo kona masakitan doi namosuungan.
9 #
Mat. 10:17-20; Luk. 12:11-12 Komuyu pobaingotii, sabab komuyu naikon linako tukon sinalakanggon doi pangadilan agama. Komuyu naikon binobokii doi bonua-bonua kaleda. Komuyu naikon binaba mangadap doi sambu-sambu tukon tomundo-tomundo sabab komuyu Kupololaing. Tukon doiyamo komu kasampatan sulano mumebee teteba doi yanila tentang Yaku. 10Bilita Monondok moluwedoi Mian Bisadoo sio nabinabilitakon looluk doi sasaibino kobangsa. 11Tukon kalu komuyu linako tukon binaba doi sambu, inai pomatakut tentang oila komuyu mo bantile. Kalu laatemo kotempono komuyu mobasilingan, bantile kai oila komo pinopitoikon doikoo doiya kosinggatoo. Sabab bantilan-bantilan komuyu mo bantiledoo bolikon mubantilan susuumu, bai lubat doi Mian Bisa Na Roh. 12Mian kulokisene koutuso susuungo sulano nainakate. Doiyamo komo teali doi tama tukon napau. Pau-pau naikon apese kotinano-tamano, tukon salakanggene yanila nainakate. 13#Mat. 10:22 Komuyu minosikiton doi sasaibino komian sabab komuyu Kupololaing. Bai komian mo bataanggon polong doi napupusan, naikon sinalamaton.”
Kulokisan mobananas
(Mat. 24:15-28; Luk. 21:20-24)
14 #
Dan. 9:27, 11:31, 12:11 “Komuyu naikon kitayo ‘Kokulokisan Mobananas’ tentang doi tampat mo pinantanggon yana. (Catatan doi mobacayo: Palaatikanggene oila koalatino!) Doiya kosinggatoo komian mo daano doi Yudea sio naobulen doi bunggul. 15#Luk. 17:31 Mian moano doi nabonua bunggono inai naobulus tukon usok doi nabonua lalomo sulano naalayo kona langge-langge. 16Mian mo daano doi nalabue asino inai naabali moalayo kona jubah. 17Bukan maen kona susaan doi oloyodoo doi boi-boine mo tianan tukon tina mo daano mosusuwo konapau! 18Poberdoa sulano do lobo-lobodoo inai nateali doi timul lalomo. 19#Dan. 12:1; Ink. 7:14 Doi oloyo-oloyo mo susadoo naikon daano komeeng kosusa moakiyoon nabiasa teali, salataa ko Mian Bisa natealikanano nadunia nia polong naiya budodoo, tukon akimo koidan nateali. 20Kalu baikon ko Mian Bisa aki nakependeyo do loonudoo, maka akiyo komeeng komian mo salamat. Bai tobikon Namian, Mian Bisa kependeyo do loonudoo.
21Doiya kosinggatoo kalu meeng komian bantile doi komuyu, ‘Kitayo, Tomundodoo Pasalamat daano dimbaa!’ kai ‘Kitayo, Yana daano idoo!’ – inaikai poanggayo do mianoo. 22Sabab pasalamat-pasalamat mokala-kala tukon nabi-nabi mokala-kala naikon lubat. Yanila naikon kubaiyo kokubai-kokubai mobolikon langge tukon mominasaindinggon-minasaindinggon sulano natipuwo kalu moola, mau Mian Bisa namian koidan. 23Jadi, pobadagai! Sasaibinodoo lapamo Yaku bontiikene doikoo mau naakiyoon do lobodoo nateali.”
Manusia na Pau nalubatan
(Mat. 24:29-31; Luk. 21:25-28)
24 #
Yes. 13:10; Yeh. 32:7; Yl. 2:10, 31, 3:15; Ink. 6:12 “Salataa do loonudoo susaan, kooloyo teali kalipookan, tukon kobituwon akiyono koidan kolaango. 25#Yes. 34:14; Yl. 2:10; Ink. 6:13 Bituwon-bituwon pauno tuwong luwedoi timbu, tukon komo kuasaiyo kodapang teali nggalanggabut. 26#Dan. 7:13; Ink. 1:7 Doiya kosinggato Manusia na Pau kinita lubat doi bunom lalomo tukon kuasa mobabasal tukon nanggaanganan. 27Yana naikon utuse kona malaekat-malaekat sulano napototongikene kona mian linilik doi sangkap kolipu pasuno, doi lipu-lipu bunduno tukon doi timbu-timbu bunduno.”
Ara batango teali otunggul
(Mat. 24:32-35; Luk. 21:29-33)
28“Alayo otunggul doaradoo batango. Kalu kopanga-pangano manampal tukon mantalamuyuk, tukon tambuuno mosopii, komuyu toiyo baikon kopintal moonas loolanimo. 29Bunomo doiya kalu komuyu kitayo do langge-langgedoo moteali, komuyu toiyo baikon kotempono loolanimo tuuno. 30Potoiyo! Sasaibino nalanggenia naikon teali akiyoon komian mo tubo nia budodoo namate sasaibino. 31Timbu tukon buta naikon lapus, bai Daku bantilan tataap sidutu-posidutukon.”
Akiyo komeeng komian motoiyo kooloyono tukon kojaamo
(Mat. 24:36-44)
32 #
Mat. 24:36
“Mau kai nabuno doiya, kiyo komeeng komian motoiyo kooloyono kai kojaamo. Malaekat-malaekat doi surgaa aki tukon Paudoo aki, tongo Tama komo toiyo. 33Jadi komuyu sio pobada-badagai tukon pobaingotii, sabab komuyu aki potoiyo oila kotempono. 34#Luk. 12:36-38 Kondondoongo inandekon komeeng komian mo tinggale kona bonua maka ampakon doi lipu mo odoon. Yana mosumbolii doi napeleleani-peleleani nauluse kona bonua, tukon beena limang doi yanila suwe-suwele. Doi pototooli tataapon, yana bateteba sulano nabadagai mono-monondok. 35Tobikon doiya komuyu sio pobada-badagai, sabab komuyu aki potoiyo oila kooloyono do bonua tumbunodoo naikon kona abalian – uga-ugaate doi nakinobianan, ugaate doi popook tangano, ugaate doi oloyo naalanian komodoa, kai doi oloyo nasumbotan. 36Kalu sosinggoton Yana lubat, inai Yana nalaate komuyu daano momoolo. 37Oila Daku binantil nia doikoo, Yaku bantile koidan doi sasaibino komian: pobada-badagai!”
Currently Selected:
MARKUS 13: LAIBGZ
Highlight
Share
Copy
Want to have your highlights saved across all your devices? Sign up or sign in