LUKAS 22
22
Pomeenggonan motuuk doi Yesus
(Mat. 26:1-5; Mrk. 14:1-2; Yoh. 11:45-53)
1 #
Tob. 12:1-27
Lamekanano ko Roti Moakiyo kona Ragi mo sinombuikon tuuk doi Paskah naikon loolanimo. 2Imam-imam kapalano tukon guru-guru agama daano mounggolii loloon sulano Yesus nainakate secara aki natotoi, sabab yanila matakutene komian badaang.
Yudas yase dadaate Yesus
(Mat. 26:14-16; Mrk. 14:10-11)
3Doibundu Ibiliis usokiyo Yudas mo sinombuikon Iskariot, doiyamo meeng komian doi songulo lua do Yesus napololaing. 4Tobikon doiya Yudas ampakon tukon pobisalai tukon imam-imam kapalano tukon padagai kapalano ko Temeneno Na Bonua tentang bulaando yana namoola salakanggene Yesus doi yanila. 5Yanila sanaang tuuno tukon dandiyo sulano nabeena doy doi yana. 6Yudas yasemo tukon tambuuno moumbolii todanan sulano nasalakanggene Yesus doi yanila, tukon akiyo komian motoiyo.
Pasadiakon kinaan Paskah
(Mat. 26:17-25; Mrk. 14:12-21; Yoh. 13:21-30)
7Laatemo kooloyono ko Lamekanano ko Roti Moakiyo kona Ragi baikon kodomba kinolot sulano nakinaan doi Paskahdoo. 8Maka Yesus sumboliiyo Petrus tukon Yohanes, “Ampakono sadiayomo kokinaan Paskah motuuk doi kita.”
9“Inaando Tama nayasano komai sadiakanano?” yanila mansadai.
10Yesus timbiliyo, “Salataa komuyu usok doi kota, meeng komala-malane mo daano makanggi meeng koselekan moono paisu naikon pososuung tukon komuyu. Lainge yana doi bonua nausokan, 11tukon bontiikene doi bonuadoo tumbuno; Guru bantile, ‘Inaando kotampato sulano daku pololaing-pololaing tukon Yaku makaan kinaan Paskah?’ 12Bonuadoo tumbuno naikon tudoikene doikoo komeeng kokombiang doi papak mo babasal, motasadiamo tukon lolongguno. Sadiayomo sasaibino indaa.”
13Maka Petrus tukon Yohanes ampakono maka laate sasaibino bisa buno doi Yesus nabantilano. Maka yaniladoo sadiayomo kokinaan Paskahdoo.
Temeneno naperjamuan
(Mat. 26:26-30; Mrk. 14:22-26; 1Kor. 11:23-25)
14Salataa laatemo kotempono motuuk makaanan kinaan Paskahdoo, Yesus poosulongii tukon Napololaing-pololaing doi tampat perjamuan. 15Maka Yana bantile doi yanila, “Yaku yase tuuno momakaan kinaan Paskah nia polong komuyu akiyoon kusakisaa. 16Sabab, poanggayomo: Yaku akimo naikon kumakaan nia koidan polong doi perjamuanoo alatino nai nokitakonan doi Mian Bisa na Dunia Boolu.”
17Lapa doiya Yesus bingkate kogalaas anggur, maka sambeang doi Mian Bisa, doibundu bantile, “Alayomo naiya, tukon ebe-ebesemo; 18sabab potoiyo: tambuun diabudodoo Yaku aki naikon momonginum naanggulia koidan polong doi Mian Bisa nalapaan berkuasa tukon tutuuno.”
19Lapa doiya Yesus mangala roti. Tukon salataa lapa sambeang, Yana bisi-bisiliyo do rotidoo tukon limano maka beekene doi yanila, tukon bantile, “Naiyamo kobutonggu [mo sinalakanggon tuuk komuyu. Kubaiyo naiyo sulano poneneeke Yaku.” 20#Yer. 31:31-34 Bunomo koidan salataa lapa kaan, Yana beekene do galaas angguroo doi yanila tukon bantile, “Galaas nia daano Mian Bisa naperjanjian mo boolu, mo sinahkanggon tukon saunggu – sau mo kinundang tuuk komuyu].”
21 #
Sad. 41:9
“Bai kitayo! Mian mo dadaate yaku daano polaing yaku dimbaa! 22Manusia na Pau takainomo naikon mate pokakana komo lapamo Mian Bisa tantukanggene; bai silakamo komian mo dadaate yana!”
23Maka yanila tambuuno posada-sadai meeng tukon bailon, indee miano doi antara yaniladoo naikon komo lakukanggene do langgedoo.
Pogagaiyan tentang indee komo babasal
24 #
Mat. 18:1; Mrk. 9:34; Luk. 9:46 Doi antara pololaing-pololaing Yesus sumbot kopodangaanian tentang indee doi yanila komo sio nainaanggon babasal tuuno. 25#Mat. 20:25-27; Mrk. 10:42-44 Yesus bantile doi yanila, “Bangsa natomundo-tomundo mo aki natingoniiyo ko Mian Bisa pipike kona rayat, tukon kona pongurus-pongurus mosinombuikon ‘Padagai Rayat’. 26#Mat. 23:11; Mrk. 9:35 Bai komuyu aki namoola buno doiya. Kona tutuuwan, mian mo babasal doi antara komuyu sio nateali buno mo poipoisik tukon kopongurus sio nateali buno peleleani. 27#Yoh. 13:12-15 Indee kai komo lobian kona babasalan: mian mo osulang kaan doi meja, kai mian mo leleaniyo yana? Tantu do mian mo osulangoo. Bai yaku daano doi antara komuyu pokakana kopeleleani.
28Doi sasaibino daku kosusaan, komuyu sio posidutu polaing-laing tukon Yaku. 29Bunomo kai Tama lapamo beena doi yaku haak sulano kumaparenta, bunomo kai koidan Yaku naikon beekene doikoo do haakoo. 30#Mat. 19:28 Tukon kalu buno doiya moola tulut balasanaang tukon Yaku doi tempo Yaku teali Tomundo. Tukon komuyu naikon osulang doi bungkuk songulo lua kokulusii tuuk moparentayo songulo lua kobangsa Israel benseno.”
Nubuat tentang Petrus moakiyenggene Yesus
(Mat. 26:31-35; Mrk. 14:27-31; Yoh. 13:36-38)
31“Simon, Simon, ndongoliiyo! Ibiliis lapamo binee izin sulano naujio komuyu; buno gandum inalaas doi kulito tobikon inalaas doi mo kulokis. 32Bai Yaku lapamo sambeang tuuk ikoo, Simon, sulano komu manganggaan inai nabolii. Tukon kalu ikoo lapamo abali doi Yaku, ikoo sio mukokobukuanggene koutus-utusomu.”
33Petrus timbiliyo, “Temeneno, yaku basadia usok talunggu, tukon mate polaing-laing Temeneno!”
34“Manganggamo Petrus,” Yesus bantile, “akiyoon komanuk nakokuuwa oloyo nia, ikoo tolumo luunggon muakiyenggene Yaku.”
Dombet, kaikandi kai sabel
35 #
Mat. 10:9-10; Mrk. 6:8-9; Luk. 9:3, 10:4 Salataa lapa doiya Yesus bantile doi yanila, “Looluk salataa Yaku bintekene komuyu tukon aki kupataikene komuyu makanggi dombet, kaikandi kai sapatu, oilakai komuyu daano kopo kakurangan oioila?”
“Aki” yanila timbiliyo.
36“Bai diabudodoo,” Yesus bantile, “indee komo daano kona dompet kai kandi, sio nakanggiyo; tukon indee komo akiyo kona sabel, sio nabalukene kona jubah sulano namongoli sabel. 37#Yes. 53:12 Sabab, anggayomo, ayat Kitab Moliyous mo buno naiya konabantilan, ‘Yana inaanggon buno mian molokis,’ sio nateali doi butonggu. Sabab oila komo totulis doi Kitab Moliyous lalomo tentang Yaku lapamo teali diabudodoo.”
38“Temeneno,” pololaing-pololaing Yesus bantile, “kitayo, dimbaa daano kolua kosabel.”
“Lapamo!” Yesus timbiliyo.
Yesus sambeang doi Zaitun Bunggulo
(Mat. 26:36-46; Mrk. 14:32-42)
39Yesus tinggalemo kota tukon ampakon buno nakabiasaan doi Zaitun Bunggulo, tukon napololaing-pololaing ampakon tukon Yana. 40Salataa polong idoo Yana bantile doi yanila, “Posambeang sulano komuyu naaki pobaladosa kalu komuyu sinobai.”
41Doibundu Yana ampakon lobian dodoon soisik doi yanila, uga-ugaate pokakana kobatu sinakukon kona kododoon, maka ladanggene kotuulo tukon sambeang, 42“Tama” konabantilano, “kalu momoola, dedeenggene doi Yaku kosakisaawan mo sio kutoupiyo nia. Bai inai moloingiyo Daku mongiasan, bai loingiyo Tama namongiasan.” [ 43Meeng komalaekat lubat doi Yana tukon kokobukuanggene. 44Yesus sakisaa tuuno konoano tobikon pololokon Yana sambeang tutuuno. Kona lumbos buno sau motulo-tulo doi buta.]
45Lapamo sambeang, Yesus abali koidan doi napololaing-pololaing. Yana pososuunggene yanila daano momoolo sabab susa tuuno. 46Maka yana bantile doi yanila, “Bulaando komuyu momoola? Pobanguno tukon posambeang sulano komuyu aki pokanakon sobaan.”
Yesus linako
(Mat. 26:47-56; Mrk. 14:43-50; Yoh. 18:3-11)
47Daano Yesus mobasilingan, lubato komian meeng tambuuno. Yanila Yudas komo andane, daano komeeng komian Yesus napololaing. Doibundu Yudas ampakon doi Yesus maka umayo. 48Bai Yesus bantile doi yana, “Yudas, oilakai tukon muumaano yakudoo ikoo yase mokulokisanggene ko Manusia na Pau?”
49Salataa Yesus napololaing-pololaing mo daano idoo kitayo oila naikon komo teali, yanila bantile, “Temeneno kami lobosiyomo kai tukon sabel!” 50Maka daano komeeng komian doi yanila tabase do imam babasaloo naata tukon sabel sampe botol kotolingaino bakalingano.
51Bai Yesus bantile, “Banggalo!” Maka Yana taape do mianoo tolingaino tukon tangalinggene.
52Doibundu Yesus bantile doi imam-imam kapalano tukon suludadu-suludadu modagaiyo ko Temeneno Na Bonua, tukon katua-katua Yahudi mo lubat idoo sulano nalakoyo Yana, “Oilakai naiya Yaku nia kulokis, tobikon komuyu polubat tukon sabel maka tompide sulano polakoyo Yaku? 53#Luk. 19:47, 21:37 Samba kooloyo Yaku daano tukon komuyu doi Temeneno Na Bonua, bai komuyu aki polakoyo Yaku. Bai naiyamo kotempono kopoo kubaiyano, tempo kuasa lokis naberkuasaan.”
Petrus akiyenggene Yesus
(Mat. 26:57-58, 69-75; Mrk. 14:53-54, 66-72; Yoh. 18:12-18, 25-27)
54Yanila lakoyo Yesus tukon babayo doi imam babasal nabonua. Petrus tunduwo doi nadodoonan. 55Doi basaleanoo tanga-tangano inokoitimo koaung balalangan tukon Petrus ampakon osulang polaing tukon domianoo mo osulang potikunggon. 56Daano komeeng kopeleleani boine mokitayo Petrus moosulang doi aung balalanganoo bibilo; maka do peleleanidoo boine palatikanggene Petrus, doibundu bantile, “Namiania budodoo daano polaing-laing Yesus!”
57Bai Petrus bangakiyonggon. Yana bantile, “Yaku tutuu aki kutingoniiyo do mianoo!”
58Aki namalumbit, meeng komian bailon kitayo Petrus tukon bantile, “Ikoomo koidan komeeng komian doi yanila!”
Bai Petrus timbiliyo, “Aki, bolikon yaku!”
59Uga-ugaat meeng kojam doibundu, meeng komian bailon koidan bantile tukon kokobukuan, “Takainomo namian nia Yesus napololaing, sabab yana Galilea miano!”
60Bai Petrus timbiliyo, “Oila komu makisuut, yaku aki kutoiyo!”
Doiya kotempono, daano Petrus mobasilingan, kokuuwano komanuk. 61Yesus mbaleng tukon kitayo Petrus. Maka Petrus neneeke ko Temeneno lapamo bantile doi yana, “Akiyoon nakokuuwa komanuk oloyo nia, ikoo tolumo luunggon muakiyenggene Yaku.” 62Maka tobuato Petrus idoo tukon kokiil yodi-yodi.
Yesus minae-maenggon tukon binobokii
(Mat. 26:67-68; Mrk. 14:65)
63Komian mo daano mototooliyo Yesus, mae-maenggene tukon bobokiiyo Yana. 64Yanila kukupiyo komatano tukon sadaiyo doi Yana, “Coba bantile indee komo bobokiiyo Ikoo?” 65Badaang koidan kobantilan-bantilan sosibolii yanila mo otuuke doi Yana.
Yesus doi Pangadilan Agama salaano
(Mat. 26:59-66; Mrk. 14:55-64; Yoh. 18:19-24)
66Dodowasoono, katua-katua Yahudi, imam-imam kapalano, tukon guru-guru agama pototongi, maka Yesus binaba doi yanila na Pangadilan Agama salaano. 67“Bontiikene doi kami,” yanila bantile doi Yana, “oilakai Ikoo nia Tomundo Pasalamat?”
Yesus timbiliyo, “Kalu yaku bontiikene doikoo, komuyu aki naikon poanggayo. 68Tukon kalu Yaku mansadai doi komuyu, komuyu naikon aki potimbiliyo. 69Bai tambuuno diabudodoo, Manusia na Pau naikon osulang taalikon bakalinga doi Mian Bisa Mobabasal Konakuasa.”
70Yanila sasaibino bantile, “Kalu buno doiya, Ikoo nia Mian Bisa Napau?”
Yesus timbiliyo, “Bunomo kopoo bantilano.”
71Maka yanila bantile, “Akimo napalaluu koidan sakisii! Kita lapamo molongol doi suungo susuungo!”
Currently Selected:
LUKAS 22: LAIBGZ
Highlight
Share
Copy
Want to have your highlights saved across all your devices? Sign up or sign in