TEALIAN 7
7
Eaba
1Maka Temeneno bontiikene doi Nuh, “Yaku kitayo baikon ikoo daano meeng komian molakukanggene Daku mongiasan. Jadi, usoko doi kapaloo lalomo polaing-laing tukon sasaibino komu kaluargaa. 2-3Kanggiyo koidan pitu kopasang luwe memeeng kotomisi kaliangano tukon iyayon bailon mominoolakon, bai luwedoi mopinatanggon tolongo meeng kopasang tolong moluwedoi memeeng kokaliangano. Lakukanggene doiya sulano luwedoi memeeng koiyayon kaliangano daano komo luput doi silakaan tukon moola tosuungi badaang koidan doi dunia. 4Pitu kooloyo koidan Yaku naikon lubatene koudan moaki naikon natade-tade kona kalumbit sangkapolono kooloyo sangkapolono kopopook, sulano komahluk motubo molapamo Yaku pasitakayodoo nasilaka.” 5Maka Nuh lakukanggene sasaibino ko Temeneno napinarentahkon doi yana.
6Doi tempo natealian koeaba doi dunia Nuh naumur 600 kotaun. 7#Mat. 24:38-39; Luk. 17:27 Nuh tukon naboloki, tukon nalabuk-labuk tukon yanila nabolo-boloki, usok doi kapaloo lalomo sulano nasalamatene kobutongo doi eabadoo. 8Tanggolok meeng tukon limisano meeng luwedoi memeeng kotomisi kaliangano tukon iyayon bailon – mau mominoolakon maukai mopinatanggon – 9usok doi kapaloo lalomo polaing-laing tukon Nuh, pokokonoi tukon Mian Bisa naparentah. 10Pitu kooloyo doimbaa lubato koeaba momanase kodunia.
11 #
2Ptr. 3:6
Doiya kotempono Nuh naumur 600 kotaun, doi tanggal songulo pitu bituwon koluano, mapasamo kopaisumatano doi dunia taalikon doi bilit. Sasaibino kopaisu tataapono doi timbu tobuka, 12tukon lubato koudan sangkapolono kooloyo sangkapolono kopopook kona kalumbit. 13Doi oloyodoo koidan, Nuh tukon naboloki usoko doi kapaloo lalomo polaing-laing konapau tolu, doiyamo Sem, Yafet tukon Ham maka napoo bolo-boloki. 14Polaing-laing tukon yanila usok koidan memeeng kotomisi lupano tukon iyayon bailon, momaumalu mau mombosolo, mobabasal mau mopoipoisik. 15Meeng kotanggolok meeng kolumisa luwedoi memeeng kokaliangano komahluk motubo usok doi kapaloo lalomo polaing-laing tukon Nuh, 16pokokonoi tukon Mian Bisa naparentah doi yana. Lapa sasaibino usok, ko Temeneno tataapikene kapaldoo tataapono.
17Doeabadoo banggadudul lomba sangkapolono kooloyo kona kalumbit, tukon kopaisu teali atean tuuno tobikon kapaldoo moola lalanto. 18Kopaisu polokon atean; tukon kapaldoo mamaanuso doi paisudoo bunggono. 19Dopaisudoo tosuungi atean budoo, tobikon kobunggul motatandak tuuno totombuki. 20Kopaisu banggadudul liba polong pitu kometer doi bunggul-bunggul bunggono. 21-23Temeneno lopuwo sasaibino komahluk motubo nai dunia nia: Bangkapi, tomisi tukon iyayon doi buta mopoipoisik mau mobabasal. Komo aki namolopu tolongo Nuh tukon sasaibino komo daano polaing-laing tukon yana doi kapaloo lalomo. 24Dopaisudoo aki namooti polong 150 kooloyo.
Currently Selected:
TEALIAN 7: LAIBGZ
Highlight
Share
Copy
Want to have your highlights saved across all your devices? Sign up or sign in