TEALIAN 28
28
1Doibundu Ishak uange Yakub, maka balakaatiyo yana maka bantile, “Inaimo moosowaan tukon Kanaan boineno. 2Tauso doi Mesopotamia, doi Betuel nakaluargaa, mutauwa, tukon pokilamo komu pinatama Laban napau. 3Boliisi ko Mian Bisa Mo Babasal konakuasa nabalakaatiyo komu osowaanan tukon beekene doikoo kopau tumbu mobadaang, tobikon ikoo teali tumbunoila doi badaang kobangsa! 4#Tea. 17:4-8 Boliisi ko Temeneno nabalakaatiyo ikoo tukon mukatulunan bunomo lakon Abraham molapamo binalakaati, tukon boliisi ikoo nadaano komu buta dinungoli dimbaa, molapamo Mian Bisa beekene doi Abraham!” 5Bunomo doiya Ishak sodiiyo Yakub taus doi Mesopotamia, doi Laban, Betuel napau Aram mianodoo. Laban Ribka utuso langgongo Yakub tukon Esau tinano.
Esau osowaan koidan
6Esau lengele baikon Ishak lapamo balakaatiyo Yakub tukon sodiiyo yana taus doi Mesopotamia sulano namounggolii boloki idoo. Koidan baikon doi tempo Ishak balakaatiyo Yakub, yana pantane Yakub osowaan tukon boine Kanaan. 7Sangalaasan doiya Esau toiyo baikon Yakub taatiyo tamano tinano nabantilan tukon lapamo ampakon doi Mesopotamia. 8Esau mangalatikenemo baikon Ishak, tamano, aki naiyase komoluko Kanaan, 9tobikon doiya Esau taus doi Ismael, Abraham napau, maka osowaan tukon Ismael napau kosambuno Mahalat, Nebayot utuso pioto.
Yakub naolumon doi Betel
10Yakub tinggale ko Bersyeba tukon ampakon doi Haran. 11Salataa sosoop kooloyo yana polong doi meeng kotampat, maka moolomo idoo. Yana nggonggolonggon yase momoolo; kooluno batangunanggene komeeng kobatu. 12#Yoh. 1:51 Doibundu yana olumon baikon yana kitayo komeeng kotukal mokokondong doi buta tukon kobunduno laate kotimbu tukon malaekat-malaekat obulus liba doi tukaloo. 13#Tea. 13:14-15 Tukon doi bibilo Temeneno kokondong tukon bantile, “Yakumo ko Temeneno Abraham nangginaal tukon Ishak. Yaku naikon beekene doi koo tukon doi mukatulunan nabutania tampat ikoo nggonggolonggon. 14#Tea. 12:3, 22:18 Komu katulunan naikon kona kadaang buno ambata doi dunia. Yanila naikon kebelake yanila nawilayah doi sasaibino kona sinasalaan, tukon lolo ikoo tukon mukatulunan, Yaku naikon balakaatiyo sasaibino kobangsa doi dunia. 15Neneeke, Yaku naikon tulungiyo tukon lindungiyo ikoo, inaandomo komu tausan, tukon Yaku naikon babayo ikoo abali nai lipu nia. Yaku aki naikon otinggale ikoo polong lapa Kulakukene oila sasaibino Yaku mojanjikan doi koo.”
16Maka Yakub bangun luwedoi namooloan tukon bantile, “Temeneno daano dimbaa, doi tampatia, bai sodo diabudodoo yaku motoiyo!” 17Yana teali matakut maka bantile, “Bukamaen daku matakutanano natampatia! Tantumo naiya Mian Bisa nabonua, surgaa tataapono.”
18Modoakon kooloyo dowa-dowa soono, Yakub bangun maka mangala batu nakinubai tangunan tukon kekendenge teali batu moinonook. Yana kundongiiyo zaitun lisisono doi batudoo bunggono sulano nainalaas tongo tuuk Mian Bisa. 19Tampatoo yana sombuikene Betel. (Loluk kosambuno Lus.) 20Maka Yakub batotopi, “Kalu Temeneno tulungiyo tukon lindungiyo yaku doi kuampakonan nia tukon beena yaku kinaan tukon pakeyan 21kalu yaku abali doi tamanggu nabonua tukon salamat, Temeneno naikon teali ku Mian Bisa. 22Tukon yaku naikon beekene doi Temeneno songulo koobos luwedoi sasaibino kolobo Temeneno mobeekene doi yaku. Batu moinonook yaku mokekendenge nia naikon teali tampat nggaalano ko Temeneno.”
Currently Selected:
TEALIAN 28: LAIBGZ
Highlight
Share
Copy
Want to have your highlights saved across all your devices? Sign up or sign in