TEALIAN 12
12
Mian Bisa uange Abram
1 #
Kis. R. 7:2-3; Ibr. 11:8 Temeneno bantile doi Abram, “Tinggalemo komu lipu, mumotolutusan tukon tamamu nabonua, maka tauso doi lipu Yaku naikon motudoikonggon. 2Yaku naikon beenggon katulunan mobadaang tukon yanila naikon teali bangsa mobabasal. Yaku naikon balakaatikon tukon kubaiyo kosambumu tololongol, tobikon ikoo naikon teali balakaat.
3 #
Gal. 3:8
Yaku naikon balakaatiyo komian-mian mobalakaatikon
tukon kutuke komian-mian mokutuke ikoo.
Tukon sabab ikoo
Yaku naikon balakaatiyo sasaibino kobangsa doi dunia.”
4-5Abram naumur pitukolono lima kotaun doi tempo naotinggalano ko Haran pokokonoi tukon Temeneno naparentah doi yana. Abram taus doi lipu Kanaan polaing-laing konaboloki Sarai, tukon napinaanak Lot, tukon sasaibino kona buat polaing-laing konaata-ata yanila molaate doi Haran.
Salataa yanila polong doi Kanaan, 6Abram dadange dolipudoo polong yana lubat doi kayung karamat doi More, doiyamo tampat kaledaan doi Sikhem. (Doi tempodoo ko Kanaan miano daano modungoliyo dolipudoo.) 7#Kis. R. 7:5; Gal. 3:16 Ko Temeneno okitakene kobutongo doi Abram tukon bantile doi yana, “Naiyamo dolipudoo naikon Yaku mobeekene doi mukatulunan.” Maka Abram mokokondong meeng komezbah idoo tuuk Temeneno molapamo okitakene kobutongo doi yana. 8Lapa doiya yana banggadudukene konaambakonan doi lalom, doi lipu bunggul-bunggulo taalikon doi tolopot kokota Betel, tukon mokubai sandung doi napokalalatanan ko Betel taalikon talise tukon Ai taalikon doi tolopot. Idoo koidan yana kekendenge komezbah tukon sosubaiyo ko Temeneno. 9Doibundu yana banggadudukene koidan konaambakonan luwedoi meeng kotampat doi tampat bailonggon, kona pinakatuu taalikon doi lalom kolipu Kanaan.
Abram doi Mesir
10Bai doi Kanaan daanomo komalaalan motodudulo tuuno, tobikon Abram taus lobian odoon koidan doi lalom, doi lipu Mesir sulano nadungol imbali polong domalaalanoo akiyono. 11Doi tempo naikon napintosiiyano kopokalalatanan tukon usok doi lipu Mesir, yana bantilo doi naboloki Sarai, “Ikoo tambongan, kuboloki. 12Kalu ko Mesir miano kitayo ikoo, yanila anggenemo baikon ikoo kuboloki maka yaku tantu inakate tukon ikoo binatadikon tubo. 13#Tea. 20:2, 26:7 Jadi konamonondokan ikoo tongo bantile tolong baikon ikoo utusonggu boine sulano kusinodii tubo tukon kinita monondok sabab ikoo.” 14Tukon bisamo, salataa lapa Abram pintosiiyo kopokalala-tanan tukon polong doi lipu Mesir, ko Mesir miano kitayo baikon Sarai tambongan tuuno. 15Bubula komian pagauwe kamali kitayo yana tukon popitoikene doi tomundo boinedoo motambongan tuuno; tobikon doiya yana binaba doi tomundo nakamali. 16Tolongo Sarai, tomundo kitayo monondok Abram tukon beena doi yana ata-ata, domba-domba daango tukon mbembe, sapi, keledai tukon unta.
17Bai sabab tomundo alayo Sarai, ko Temeneno lubatene kosesel-sesel tomundo matakutene tukon mian badaang doi kamalidoo lalomo. 18Maka tomundo uange Abram tukon masadai doi yana, “Oila komo lapamo ikoo lakukene doiyaku nia? Bulaando ikoo moaki mubontiikanaku baikon yana muboloki? 19Bulaando ikoo mobantile baikon yana utusomu pioto tukon sodiikene kualayo yana teali kuboloki? Naiya yana, muboloki; alayomo tukon tauso!” 20Tomundo maparentahkene doi bubula konapagauwe tukon yanila tobuatenggene Abram doi lipudoo polaing-laing tukon naboloki tukon sasaibino komo daano doi yana.
Currently Selected:
TEALIAN 12: LAIBGZ
Highlight
Share
Copy
Want to have your highlights saved across all your devices? Sign up or sign in