PAMUNGKAAN 2
2
1Songon i ma dipasidung sudena langit dohot tano bope isina sudena. 2Di ari papituhon, dipasidung Debata ma karejoNia, lalu maradian ma Ia. 3Dipasupasu jana diparbadiai Ia ma ari papituhon i, dibaen di ari i ma dipasidung Ia karejoNia na manompa i, gabe maradian ma Ia karejo. 4On ma barita panompaon ni langit dohot tano on.
Porlak Eden
Di hatiha na nitompa ni Tuhan Debata langit dohot tano on, 5nada adong dope suan-suanan di tano on, jana nada adong dope same na martumbur, dibaen nada diparo Tuhan Debata dope udan boti jolma pe nada podo adong na giot mangkarejohon tano i. 6Tapi adong ma ombun manyorop tu ginjang sian tano i, gabe dibornohi ma sandok tano on.
7Dung i dibuat Tuhan Debata ma saotik tano i, jana dibaen Ia ma sada jolma sian tano i; jadi diombuskon Ia ma hosa hangoluan tu lubang ni igung ni jolma i, gabe mangolu ma jolma i.
8Dung i dibaen Tuhan Debata muse ma kobun di Eden, di sabola Habincaran, jana tusi ma jolma na nitompaNia i dibaen Ia maringanan. 9Dipartubuhon Debata ma disi sude ragam ni hayu na jeges-jeges, na marbatuhon parbatu na denggan panganon. Di parsitongaan ni kobun i tubu ma hayu na mangalehen ngolu, dohot hayu na mangalehen parbinotoan taringot tu na denggan dohot na jahat.
10Adong ma sada batang aek na mamolus di Eden na mangaehi kobun i; di ruar ni Eden i marbagi opat ma batang aek i. 11Batang aek na parjolo, margoar Pison; i ma batang aek na mamolus manghaliangi tano Hawila. [12Dapot do disi sere napolin dohot muse angka na huskus na jarang dapot dohot angka batu mutiha.] 13Batang aek na paduahon margoar Gihon; i ma na mamolus humaliang tano Kus. 14Batang aek na patoluhon margoar Tigris, i ma na mamolus di Habincaran ni Asur, jana batang aek na paopatkon margoar Efrat.
15Dung i dibaen Tuhan Debata ma jolma i maringanan di Kobun Eden i laho mangkarejohon bope pature-turehon kobun i. 16Didok Tuhan Debata ma tu jolma i, “Tola do panganonmu parbatu ni sude suan-suanan na di kobun on, 17asing sian hayu na mangalehen parbinotoan taringot tu na denggan dohot na jahat. Nada tola panganonmu batuna i; muda dipangan ho i, mate ma ho laing di na sadari i.”
18Dung i didok Tuhan Debata ma muse, “Nada denggan punjung jolma i mangolu. BaenonKu ma donganna na tumbuk mangurupisa.” 19Jadi dibuat Ia ma tano jana ditompa Ia ma sude binatang na di darat dohot unggas na di awang-awang. Dung i dipasahat Ia ma i sudena tu jolma i anso diidasa sanga songon dia baenonna manggoari binatang-binatang i dohot angka unggas i. I ma mulana gabe margoar be angka binatang dohot angka unggas i. 20Songon i ma digoari jolma i angka unggas dohot angka binatang sudena; tapi sada pe nada adong sian i na tumbuk mangurupi jolma i.
21Jadi dibaen Tuhan Debata ma jolma i tarpodom sinok sajo, jana di na modom jolma i, diendat Tuhan Debata ma sada rusuk sian pamatang ni jolma i, ditutupi Ia mangulahi dohot sibukna i. 22Dibaen Tuhan Debata ma sahalak dadaboru sian rusuk i, dung i dioban Ia ma i tu jolma i, 23gabe ninna jolma i ma,
“On ma da ibana na sahorong dohot au –
holi-holi sian holi-holingku, jana sibuk sian sibukku.
‘Dadaboru’ do goarna, angke na nibuat sian halaklahi do ia.”
24Hara ni i ma umbaen na nitadingkon ni halaklahi amangna dohot inangna, jana gabe sada dohot dadaboruna, gabe sada ma halahi na dua.
25Marsaemara do halaklahi i dohot dadaboru i, tapi nada maila halahi.
Currently Selected:
PAMUNGKAAN 2: LAIAKB
Highlight
Share
Copy
Want to have your highlights saved across all your devices? Sign up or sign in
Indonesian Bible Society