مزگینیا یوحەننای 9
9
ساخكرنا كەسەكێ ژ زكماك یێ كۆرە
1دەمێ عیسا دەرباز دبوو، مرۆڤەك دیت ژ زكماكی یێ كۆرە بوو. 2ئینا شاگردێن وی پرسیار ژێ كر: «رابی#9:2 ئانكو مامۆستا، كێ گونە‍‌ھ كریە: ئەڤی یان دایك و بابێن وی، كو یێ ژ دایك بووی كۆرە؟» 3عیسای بەرسڤ دا: «نە ئەوی گونە‍‌ھ كریە و نە دایك و بابێن وی، لێ ئەڤ چەندە چێبوو دا كارێن خودێ د وی دا دیار ببن. 4پێدڤیە ل سەر مە، هێشتا كو رۆژ، ئەم كارێن وی ب ج‍‌ھ بینین یێ ئەز هنارتیم. شەڤ دێ هێت و هنگی كەس نەشێت چ كاران بكەت. 5هندی كو ئەز ل جیهانێمە، ئەز رۆناهیا جیهانێمە.»
6ئەڤ چەندە گۆت و تف كرە ناڤ ئاخێ، ژ تفێ هەڕیەك چێكر و د چاڤێن وی كەسی دا 7و گۆتێ: «هەڕە و خۆ د بركا سیلوامێ دا بشوو» (وەرگێڕانا ‹سیلوام›ێ ‹هنارتی›یە). ئینا ئەو چوو و خۆ شویشت و ب چاڤ ڤەكری ڤەگەڕیا.
8ئینا هەڤسوی و ئەوێن پێشتر ئەو ددیت كو خوازۆكی دكر، گۆتن: «ئەرێ ئەڤە نە ئەو مرۆڤە یێ دروینشت و خوازۆكی دكر؟» 9هندەكان گۆت: «ئەڤە ئەوە» و هندەكێن دی گۆت: «نەخێر، لێ ئێكێ وەكو ویە.» لێ وی ب خۆ دگۆت: «ئەز ئەوم!» 10ئینا وان گۆتێ: «چەوا چاڤێن تە ڤەبوون؟» 11وی بەرسڤ دا: «ئەو زەڵامێ دبێژنێ عیسا هەڕیەك چێكر و د چاڤێن من دا و گۆتە من: ‹هەڕە بركا سیلوامێ و خۆ تێدا بشوو.› ئەز ژی چووم و من خۆ شویشت و چاڤێن من ڤەبوون.» 12ئینا وان پرسیار ژێ كر: «ئەو زەڵام ل كیرێیە؟» وی گۆت: «ئەز نزانم.»
فەریسی دویڤچوونێ ل سەر رویدانا ساخبوونێ دكەن
13وان ئەو مرۆڤێ بەری هنگی كۆرە ئینا نك فەریسیان. 14ئەو رۆژا عیسای هەڕی چێكری و چاڤێن كۆرەی ڤەكرین، شەمبی بوو. 15ئینا فەریسیان ژی پرسیار ژێ كر كا چەوا چاڤێن وی ڤەبوون. ئەوی گۆتە وان: «هەڕی د چاڤێن من دا و من خۆ شویشت و نوكە ئەز یێ دبینم!» 16ئینا هندەك فەریسیان گۆت: «ئەڤ مرۆڤە نە ژ نك خودێیە، چنكو ئەو پێگیریێ ب شەمبیێ#9:16 بۆ جوهیان رۆژەكا تایبەت و پیرۆزە و كار تێدا ناهێتە كرن. ل فەرهەنگۆكێ بنێڕە رۆژا شەمبی. ناكەت.» لێ هندەكێن دی گۆت: «چەوا زەڵامەكێ گونەهكار دشێت ڤان نیشانان بكەت؟» هۆسا د ناڤبەرا وان دا دووبەرەكی هەبوو. 17وان دیسان پرسیار ژ ئەڤێ كۆرە كر: «تۆ دەربارەی وی، ئەوێ چاڤێن تە ڤەكرین، چ دبێژی؟» ئەوی ژی گۆت: «ئەو پێغەمبەرە.»
18جوهیان#9:18 مەبەست پێ رێبەرێن جوهیانن. باوەر نەكر كو ئەو یێ كۆرە بوو و چاڤێن وی یێن ڤەبووین، تاكو گازی كریە دایك و بابێن وی یێ چاڤێن وی ڤەبووین 19و پرسیار ژێ كری: «ئایا ئەڤەیە ئەو كوڕێ هەوە، ئەوێ هوین دبێژن ژ زكماكی یێ كۆرە بوو؟ پا چەوا ئەو نوكە دبینیت؟» 20دایك و بابێن وی بەرسڤ دا: «ئەم دزانین ئەڤە كوڕێ مەیە و ژ زكماكی یێ كۆرە بوو، 21لێ ئەم نزانین چەوا نوكە دبینیت و نزانین كێ چاڤێن وی ڤەكرینە. ئەو یێ مەزنە، پرسیارێ ژێ بكەن، ئەو دێ بەرسڤا هەوە دەت.» 22دایك و بابێن وی ژ ترسا جوهیان ئەڤ چەندە گۆت، چنكو جوهی رێككەفتبوون كو هەر ئێكێ دانپێدانێ بكەت كو عیسا مەسیحە، ژ جڤاتا كنیشتەیێ بهێتە دەرئێخستن. 23لەوما دایك و بابێن وی گۆت: «ئەو یێ مەزنە، پرسیارێ ژێ بكەن.»
24ئەڤجا وان بۆ جارا دوویێ گازی وی مرۆڤێ بەری هنگی كۆرە كر و گۆتنێ: «ل بەرامبەری خودێ سویند بخۆ كو دێ راستیێ بێژی#9:24 دەقێ یونانی دبێژیت: ‹مەزناهیێ بدە خودێ›.مەبەست پێ ئەوە وی بدەنە سویندێ. ! ئەم دزانین ئەو مرۆڤ یێ گونەهكارە.» 25ئینا وی بەرسڤ دا: «ئەز نزانم ئەو یێ گونەهكارە یان نە، ئەز تشتەكێ ب تنێ دزانم: ئەز یێ كۆرە بووم و نوكە دبینم.» 26ئینا وان گۆتێ: «ئەوی چ ل تە كر؟ چەوا چاڤێن تە ڤەكرن؟» 27وی بەرسڤا وان دا: «من نوكە گۆتە هەوە، لێ هەوە گوهێ خۆ نەدایێ. بۆچی هەوە دڤێت جارەكا دی ببهیسن؟ ما هەوە ژی دڤێت ببنە شاگردێن وی؟» 28ئینا وان ئاخفتنێن كرێت لێ باراندن و گۆتێ: «تۆی شاگردێ وی! لێ ئەم شاگردێن مووساینە. 29ئەم دزانین خودێ ل گەل مووسای ئاخفتییە، لێ ئەم نزانین ئەڤە ژ كیڤە هاتیە.»
30ئینا وی مرۆڤی بەرسڤا وان دا: «ئەڤە تشتەكێ سەیرە! هوین نزانن ئەو ژ كیڤە هاتیە، لێ ئەوی چاڤێن من ڤەكرن. 31ئەم دزانین خودێ گوهێ خۆ نادەتە گونەهكاران، لێ گوهێ خۆ ددەتە وی كەسی یێ ژ خودێ ترس بیت و حەزا وی ب ج‍‌ھ بینیت. 32چ جاران كەسێ نەبهیستیە كو ئێكی چاڤێن كەسەكێ ژ زكماك یێ كۆرە ڤەكربن. 33ئەگەر ئەڤ كەسە ژ خودێ نەبا، ئەو نەدشیا چ بكەت.» 34ئینا وان بەرسڤا وی دا و گۆتێ: «تۆ ب تەمامی د گونەهێ دا یێ ژ دایك بووی. ما تۆ مە فێر دكەی؟» پاشی ئەو دەرئێخستە ژ دەرڤە#9:34 چێدبیت رامان ئەو بیت كو ئەو ژ ئەندامەتیا كنیشتەیێ دەرئێخست..
كۆرەبوونا روحانی
35عیسای بهیست كو وان ئەو كەس یێ دەرئێخستیە ژ دەرڤە، ئینا لێگەڕیا و دیت و گۆتێ: «ئەرێ تۆ باوەریێ ب كوڕێ مرۆڤ دئینی؟» 36ئەوی بەرسڤ دا و گۆت: «ئەزبەنی، ئەو كیە، دا ئەز باوەریێ پێ بینم؟» 37ئینا عیسای گۆتێ: «تە ئەو یێ دیتی و ئەوە یێ ل گەل تە دئاخڤیت.» 38ئینا وی گۆت: «خودان، ئەز باوەریێ دئینم» و سوجدە بۆ بر. 39عیسای گۆت: «ئەز بۆ دادكرنێ یێ هاتیمە ڤێ جیهانێ، داكو ئەوێن نابینن ببینن و یێن دبینن كۆرە ببن.»
40هندەك فەریسیان، كو ل نك وی بوون، دەمێ ئەڤ چەندە بهیستی، گۆتێ: «ما ئەم ژی د كۆرەینە؟!» 41عیسای گۆتە وان: «ئەگەر هوین د كۆرە بان، هەوە گونە‍‌ھ نەدبوو، لێ هوین دبێژن ‹ئەم دبینین،› ئەڤجا گونەها هەوە دمینیت.»
Currently Selected:
مزگینیا یوحەننای 9: BHD
Highlight
Share
Copy
Want to have your highlights saved across all your devices? Sign up or sign in
All rights reserved.