مزگینیا یوحەننای 6
6
عیسا پێنج هزار زەڵامان تێر دكەت
(مەتتا 14:13-21؛ مەرقۆس 6:30-44؛ لوقا 9:10-17)
1پشتی وێ چەندێ، عیسا ژ دەریاكا جەلیل، كو دبێژنێ دەریاكا تەبەریە، دەرباز بوو. 2گەلەك خەلك ب دویڤ كەفتن، چنكو وان ئەو نیشان دیتن، ئەوێن وی ژ بۆ نەساخان دكرن. 3عیسا سەركەفتە چیای و ل وێرێ ل گەل شاگردێن خۆ روینشت. 4جەژنا دەربازبوونێ یا جوهیان ژی نێزیك ببوو. 5دەمێ عیسای سەرێ خۆ بلند كری و كۆمەكا مەزن یا مرۆڤان دیتی یا بەرەڤ وی ڤە دهێت، گۆتە فیلیپۆسی: «ئەم ژ كیڤە نانی بكڕین، دا ئەڤ مرۆڤە بخۆن؟» 6وی ئەڤە گۆت، دا فیلیپۆسی تاقی بكەت، چنكو عیسای دزانی دێ چ كەت. 7فیلیپۆسی بەرسڤا وی دا: «بهایێ دوو سەد دیناران#6:7 ل وی سەردەمی هەر دینارەك، كرێیا رۆژەكێ یا پالەی بوو. ژی نان تێرا وان ناكەت، كو هەر ئێكی ژ وان پرتەكا بچویك ژی بگەهیتێ!» 8ئینا ئێك ژ شاگردێن وی، كو ئەو ژی ئەندراوسێ برایێ شەمعون پەترۆسی بوو، گۆتێ: 9«كوڕكەك یێ ل ڤێرێ پێنج نانێن جەهی و دوو ماسی یێن ڤێ هەین، لێ پا ئەڤە چیە بۆ ڤێ كۆما هندا مەزن؟» 10عیسای گۆت: «وە بكەن كو خەلك ل ئەردی بڕویننە خوارێ!» ل وێرێ گەلەك گیا هەبوو. ئینا زەڵام روینشتن و ژمارەیا وان نێزیكی پێنج هزاران بوو. 11پاشی عیسای نان وەرگرتن و سوپاسیا خودێ كر، پاشی ل سەر ئەوێن روینشتی بەڵاڤ كر، هەروەسا ماسی ژی، هندی وان ڤیای. 12دەمێ تێر بووین، گۆتە شاگردێن خۆ: «بەرمایكان خڕڤە كەن، دا تشتەك ب هەروە نەچیت.» 13ئینا وان خڕڤە كرن و ژ بەرمایكێن هەر پێنج نانێن جەهی، ئەوێن وان مرۆڤان ژێ خواری، دوازدە سەڵكێن پرتان پڕ كرن. 14دەمێ وان مرۆڤان ئەو نیشانا عیسای كری دیتی، گۆتن: «راستە، ئەڤەیە ئەو پێغەمبەرێ#6:14 مەبەست پێ ئەو پێغەمبەرە یێ مووسای بەحس كری كو دێ هێت. بنێڕە گۆتارا مووسای 18:15-17؛ یوحەننا 1:45 كو دێ هێتە جیهانێ.» 15هنگی عیسا جارەكا دی ب تنێ ڤەگەڕیا چیای، چنكو وی زانی كو وان ل بەرە بهێن و ب خورتی وی ببەن و بكەنە پاشا.
عیسا ل سەر ئاڤێ بڕێڤە دچیت
(مەتتا 14:22-27؛ مەرقۆس 6:45-52)
16دەمێ رۆژ ئاڤا بووی، شاگردێن وی خواركەفتنە دەریاكێ، 17ل بەلەمەكێ سیار بوون و ب رێ كەفتن، دا بچنە كەفەرناحومێ ل لایێ دی یێ دەریاكێ. تاری ب سەر وان دا هات و هێشتا عیسا نەگەهشتبوو نك وان. 18باڕۆڤەیەكا ب هێز هات و پێل رابوون. 19دەمێ شاگرد نێزیكی پێنج شەش كیلۆمەتران#6:19 دەقێ رەسەن دبێژیت: بیست و پێنج یان سی‍‌ھ ‹ستادی›یان. پێشڤە چووین، دیت عیسا یێ ل سەر ئاڤێ بڕێڤە دچیت و نێزیكی بەلەمێ دبیت، ئینا ترسیان. 20لێ وی گۆتە وان: «ئەزم، نەترسن!» 21ئەڤجا ئەو دلخۆش بوون كو وی ل بەلەمێ سیار بكەن، ئینا ئێكسەر بەلەم گەهشتە وی جهێ ئەو دچوونێ.
خەلك ل عیسای دگەڕن
22ل رۆژا پاشتر، ژ بۆ وی خەلكێ مایە ل رەخێ دی یێ دەریاكێ یا ئاشكرا بوو، كو بەلەمەك ب تنێ ل وێرێ هەبوو، ئەوا شاگردێن وی لێ سیار بووین، عیسا ژی ل گەل وان ل بەلەمێ سیار نەببوو، لێ شاگردێن وی ب تنێ چووبوون. 23هندەك بەلەمێن دی ژ تەبەریە هاتنە نێزیكی وی جهی، ئەوێ خەلكی نان لێ خواری، پشتی كو خودانی سوپاسیا خودێ كری. 24ئەڤجا دەمێ خەلكی دیتی، كو نە عیسا ل وێرێیە و نە شاگردێن وی، ل وان بەلەمان سیار بوون و چوونە كەفەرناحومێ، ل عیسای دگەڕیان.
عیسا نانێ ژیانێیە
25دەمێ ئەو ل رەخێ دی یێ دەریاكێ دیتی، گۆتنێ: «رابی#6:25 رابی: ئانكو مامۆستا، تۆ كەنگی گەهشتیە ڤێرێ؟» 26عیسای بەرسڤا وان دا: «ب راستی ب راستی دبێژمە هەوە: هوین ل من دگەڕیێن، نە ژ بەر كو هەوە نیشان دیتن، لێ چنكو هەوە ژ وی نانی خوار و هوین تێر بوون. 27ژ بۆ وێ خوارنا درزیت كار نەكەن، لێ ژ بۆ وێ خوارنێ كار بكەن، ئەوا بۆ ژیانا هەروهەر دمینیت، ئەو خوارنا كوڕێ مرۆڤ دێ دەتە هەوە، چنكو خودایێ باب ئەو یێ موهر كری.» 28ئینا وان پرسیار ژێ كر: «ئەم چ بكەین، دا كارێن خودێ ب ج‍‌ھ بینین؟» 29عیسای بەرسڤا وان دا و گۆت: «كارێ خودێ ئەڤەیە: هوین باوەریێ ب وی بینن، ئەوێ كو وی هنارتی.» 30ئەڤجا وان گۆتێ: «ئەگەر وەسایە، چ نیشانە تۆ دێ كەی، دا ئەم ببینین و باوەر ژ تە بكەین؟ تۆ دێ چ كەی؟ 31بابێن مە ل بیابانێ مەننا#6:31 ل فەرهەنگۆكێ بنێڕە. یا خواری، هەروەكو هاتیە نڤیسین: ‹ژ ئەسمانی نان دا وان، دا بخۆن!›»#6:31 زەبوور 78:24
32ئینا عیسای گۆتە وان: «ب راستی ب راستی دبێژمە هەوە: ئەو نە مووسا بوو یێ كو نان ژ ئەسمانی دایە هەوە، لێ بابێ من بوو. نوكە ژی ئەو نانێ راستەقینە ژ ئەسمانی ددەتە هەوە. 33چنكو نانێ خودێ ئەوە یێ ژ ئەسمانی دهێتە خوارێ و ژیانێ ددەتە جیهانێ.» 34ئینا وان گۆتێ: «ئەزبەنی، ل هەمی دەمان ڤی نانی بدە مە.» 35عیسای بەرسڤا وان دا: «ئەزم نانێ ژیانێ، ئەوێ بهێتە نك من چ جاران برسی نابیت و ئەوێ باوەریێ ب من بینیت، چ جاران تێهنی نابیت. 36لێ من گۆتە هەوە: هەوە ئەز دیتم، لێ هوین هێشتا باوەریێ نائینن. 37هەمیێن كو باب ددەتە من، دێ هێنە نك من و هەر كەسێ بهێتە نك من، ئەز چ جاران وی دەرنائێخم. 38چنكو ئەز ژ ئەسمانی هاتیمە خوارێ، نە دا ئەز ل دویڤ حەزا خۆ بكەم، لێ ل دویڤ حەزا ئەوێ ئەز هنارتیم. 39حەزا وی یێ ئەز هنارتیم ئەوە، كو هەمی كەسێن وی داینە من، ئەز كەسێ ژێ ژ دەست نەدەم، لێ ل رۆژا دویماهیێ وان ژ مرنێ راكەم. 40چنكو حەزا بابێ من ئەوە، كو هەر كەسێ كوڕی ببینیت و باوەریێ پێ بینیت، دێ ژیانا هەروهەر بۆ وی بیت و ل رۆژا دویماهیێ ئەز دێ وی ژ مرنێ راكەم.»
41ئەڤجا جوهیان#6:41 مەبەست پێ رێبەرێن جوهیانن. پتەپت دەربارەی عیسای كر، چنكو وی گۆت: «ئەزم ئەو نانێ ژ ئەسمانی هاتیە خوار.» 42وان گۆت: «ئەرێ ئەڤە نە عیسایێ كوڕێ یوسڤیە، ئەوێ ئەم دایك و بابێن وی دنیاسین؟ ئەو چەوا دبێژیت: ئەز یێ ژ ئەسمانی هاتیمە خوارێ؟» 43عیسای بەرسڤا وان دا: «د ناڤبەرا خۆ دا پتەپتێ نەكەن. 44كەس نەشێت بهێتە نك من، ئەگەر باب، ئەوێ ئەز هنارتیم، وی رانەكێشیت، ئەز ژی دێ ل رۆژا دویماهیێ وی ژ مرنێ راكەم. 45د نڤیسارێن پێغەمبەران دا هاتیە نڤیسین: ‹هەمی دێ ژ لایێ خودێ ڤە هێنە فێركرن.›#6:45 ئیشایا 54:13 هەر كەسەكێ ژ بابی ببهیسیت و ژێ فێر ببیت، دهێتە نك من. 46رامانا ڤێ نە ئەوە كو ئێكی باب یێ دیتی: كەسێ نەدیتیە، ژبلی وی یێ كو ژ خودێیە، ب تنێ وی باب یێ دیتی. 47ب راستی ب راستی دبێژمە هەوە: ئەوێ باوەریێ ب من بینیت، وی ژیانا هەروهەر هەیە. 48ئەزم نانێ ژیانێ. 49بابێن هەوە مەننا ل بیابانێ خوارن و مرن. 50لێ ئەڤە ئەو نانە، یێ ژ ئەسمانی هاتیە خوارێ، دا مرۆڤ ژێ بخۆت و نەمریت. 51ئەزم نانێ ژیانێ، یێ كو ژ ئەسمانی هاتیە خوار. ئەگەر ئێكی ژ ڤی نانی خوار، دێ هەتا هەتایێ ژیت. ئەو نانێ كو ئەز دێ بۆ ژیانا جیهانێ دەم، لەشێ منە.»
52ئەڤجا شەڕەدەڤەك د ناڤبەرا جوهیان دا چێبوو و گۆتن: «ئەڤە چەوا دشێت لەشێ خۆ بدەتە مە، كو بخۆین؟» 53ئینا عیسای گۆتە وان: «ب راستی ب راستی دبێژمە هەوە: ئەگەر هوین لەشێ كوڕێ مرۆڤ نەخۆن و خوینا وی ڤەنەخۆن، هەوە ژیان د ناخێ خۆ دا نینە. 54ئەوێ لەشێ من بخۆت و خوینا من ڤەخۆت، وی ژیانا هەروهەر هەیە و ئەز دێ وی ل رۆژا دویماهیێ ژ مرنێ راكەم. 55چنكو لەشێ من خوارنا راستەقینەیە#6:55 راستەقینە: ب عەرەبی ‹حقيقي› و خوینا من ڤەخوارنا راستەقینەیە. 56هەر كەسێ لەشێ من بخۆت و خوینا من ڤەخۆت، ئەو د ناڤ من دا یێ بنەجهە و ئەز د ناڤ وی دا. 57كا چەوا بابی، یێ كو سەرەكانیا ژیانێیە، ئەز هنارتم و ئەز ب وی دژیم، هۆسا ئەوێ من بخۆت، دێ ب من ژیت. 58ئەڤەیە ئەو نانێ ژ ئەسمانی هاتیە خوار، ئەو نە وەكو وێ مەننایێیە، ئەوا بابكالێن هەوە خواری و مرین، لێ هەر كەسێ ژ ڤی نانی بخۆت، دێ هەروهەر ژیت.» 59عیسای ئەڤە ل كنیشتەیێ#6:59 كنیشتە: جهێ پەرستنێ یێ جوهیان. ل فەرهەنگۆكێ بنێڕە. گۆت، دەمێ وی ل كەفەرناحومێ فێركرن دكر.
پەیڤێن ژیانا هەروهەر
60گەلەك ژ شاگردێن وی، دەمێ ئەڤ چەندە بهیستی، گۆتن: «ئەڤ گۆتنە یا ب زەحمەتە! كی دشێت گوهێ خۆ بدەتێ؟» 61عیسای زانی كو شاگردێن وی یێ پتەپتێ ل سەر ڤێ چەندێ دكەن، ئینا گۆتە وان: «ما ئەڤ چەندە دلێ هەوە سار دكەت؟ 62پا دێ چ بێژن، ئەگەر هوین كوڕێ مرۆڤ ببینن یێ ب سەر دكەڤیتە وی جهێ كو بەرێ لێ بوو؟ 63ئەوێ ژیانێ ددەت گیانێ پیرۆزە، لێ لەش چ مفای نادەت. ئەو ئاخفتنێن من بۆ هەوە گۆتین، ئەو ژ گیانێ خودێنە و ژیانێ ددەن. 64لێ هندەك ژ هەوە هەنە باوەریێ نائینن!» چنكو عیسای ژ دەستپێكێ دزانی ئەو كینە باوەریێ پێ نائینن و ئەو كیە دێ بێبەختیێ لێ كەت. 65پاشی گۆت: «ژ بەر وێ چەندێ من گۆتە هەوە: كەسەك نەشێت بهێتە نك من، ئەگەر باب دەستویریێ نەدەتێ.» 66ژ بەر ڤێ چەندێ گەلەك ژ شاگردێن وی زڤڕین و ئێدی ل گەل وی نەدگەڕیان. 67ئینا عیسای گۆتە هەر دوازدە شاگردان: «ما هوین ژی حەز دكەن بچن؟» 68شەمعون پەترۆسی بەرسڤا وی دا: «خودان، ئەم دێ چینە نك كێ؟ پەیڤێن ژیانا هەروهەر یێ ل نك تە، 69مە ژی باوەری ئینا و زانی كو تۆی پیرۆزێ خودێ!» 70عیسای بەرسڤا وان دا: «ما من هوین هەر دوازدە هەلنەبژارتن؟ لێ ئێك ژ هەوە ئبلیسە!» 71وی بەحسێ یەهودایێ كوڕێ شەمعونێ ئەسخەریوتی بوو، چنكو ئەو دێ بێبەختیێ ل عیسای كەت، هەر چەندە ئێك ژ دوازدان بوو.
Currently Selected:
مزگینیا یوحەننای 6: BHD
Highlight
Share
Copy
Want to have your highlights saved across all your devices? Sign up or sign in
All rights reserved.