Kîam 4
4
Kaini na Abili
1Adamu nîwamenyanire kîîmwîrî na mûka. Mûka nîwagîre îvu na agîciara Kaini. Nake nîwaugire atîrî, “Nie nîrîmûgîu na mûndûmûrûme nîûndû wa gûtethua nî Ngai-Mûnene.” 2Awa nîwacokire agîciara Abili mûrwang'ina wa Kaini. Abili aarî mûrîthi nake Kaini aarî mûrîmi. 3Mûthenya ûmwe Kaini nîwavirîre Ngai-Mûnene gîcunjî Kîam maketha kuuma mûgûndarî wake. 4#Ahib 11.4 Abili nîwavirîre Ngai îrikithathi rîmwe rîa ndîthia yake. Nîwarîthînjire na agîtegera Ngai-Mûnene nyama irîa noru. Ngai-Mûnene nîwakenirue nî Abili na agîkenua nî matega make, 5nwatî nîwaregire Kaini wa vamwe na matega make. Kwoguo Kaini nîwarakarire mûno na agîtukia ûthiû. 6Ngai-Mûnene nîwaûririe Kaini atîrî, “Ûrakarîte na ûgatukia ûthiû nîkî? 7Ethîrwa nîûrekîte ûndû mwaro, ûngîrî mûkenu; nwatî nîûndû wîkîte ûndû mûcûku, mevia marî mûrangorî makîenda gûkwatha, nwatî nwanginya ûmatorie.”
8 #
Mat 23.35; Luka 11.51; 1Joh 3.12 Kaini nîwerire mûrwang'ina Abili atîrî, “Tiga tûthiî mûgûndarî.” Na rîrîa maarî mûgûndarî, Kaini nîwarakarîre mûrwang'ina Abili na akîmûraga.
9Ngai-Mûnene nîwaûririe Kaini atîrî, “Mûrwanyûkwe Abili arîkû?”
Kaini nîwacokirie atîrî, “Nie ndiîcî. Nîkwa arî nie menyagîrîra mûrwaiya?”
10 #
Ahib 12.24
Ngai-Mûnene nîwamûririe atîrî, “Wîkîte ûguo nîkî? Nthakame ya mûrwanyûkwe nîîrandîrîrîra îrî gûkû mûtheturî. 11We nîwanyitwa nî kîrumi na ndûkaarîma mûtheturî ûrîa wathamirie na wanyua nthakame ya mûrwanyûkwe ûrîa we ûragire. 12Wana warîma mûtheturî icio, gûtirî kîndû gîgaakûraga kuo. Ndûkaagîa na wîkaro na nîûtûûra ûrûûraga gûkû nthî.”
13Kaini nîwerire Ngai-Mûnene atîrî, “Îvera rîu nî rînene mûno ndingîrîvota. 14Nîwamîngata nyume gûkû nthî wana nyume kûrî we. Nie ndikaagîa na wîkaro. Nîndûûra nthiûrûrûkaga na mbûrûraga gûkû nthî. Mûndû wa wonthe ûkaamona nîakaambûraga.”
15Nwatî Ngai-Mûnene nîwerire Kaini atîrî, “Ûguo tîguo. Ûngîkaaûragwa nî mûndû, nîûkaarîvîrîrua maita mûgwanja.” Kwoguo Ngai-Mûnene nîwekîrire Kaini rûûri rwa gûkaania mûndû wa wonthe ûrîa ûgaatûngana nake ndakaamûrage. 16Nake Kaini nîwathengutîre Ngai-Mûnene na akîthiî gûtûûra vûrûrirî wetagwa Nodi#4.16 Nodi: Kiugo gîkî nî ta kuga “Kûrûra”. mwena wa îrathîro wa Edeni.
Njiarwa cia Kaini
17Kaini nîmaamenyanire kîîmwîrî na mûka. Mûka nîwagîre îvu na agîciara Enoku. Kaini nîwatumire îtûûra na akîrîtania na mûvîcî Enoku. 18Enoku nîwaciarire Iradi, ûrîa warî îthe wa Mehujaeli. Mehujaeli aarî îthe wa Methushaeli, nake Methushaeli aarî îthe wa Lameki. 19Lameki aavikirie aka aîrî, ûmwe eetagwa Ada, na ûcio wîngî Zila. 20Ada nîke waciarire Jabali. Jabali nîke warî îthe wa andû onthe arîa matûûraga marîthagia na matûûraga magemarî. 21Mûrwang'ina eetagwa Jubali na nîke îthe wa andû arîa onthe mainaga na inanda na mîtûrirû. 22Zila nîke waciarire Tubali Kaini. Tubali Kaini nîke warî mûturi wa indo cionthe cia gîcango na cia cuuma. Mwarwang'ina na Tubali Kaini eetagwa Naama. 23Nake Lameki nîwerire aka ake atîrî,
“Ada na Zila, tanthikîrîriani,
nie nîmbûragire mûndû nîûndû nîaningire.
24Ethîrwa Kaini akaarîvîrîrua maita mûgwanja kûrî mûndû ûrîa ûkaamûraga,
nie ngaarîvîrîrua maita mîrongo mûgwanja na mûgwanja.”
Sethi na Enoshi
25Adamu nîwamenyanire kîîmwîrî na mûka na akîgîa îvu na agîciara kaana kengî ga kavîcî. Nake Awa nîwaugire atîrî, “Ngai nîmûmveu mwana wîngî wa kavîcî vandûrî va Abili, ûrîa waûragirwe nî Kaini.” Kwoguo nî wagetire Sethi. 26Sethi nîwagîre na kamwana na agîgeta Enoshi. Vîndî îo nîrîo andû maambîrîrie kûgwetaga rîîtwa Ngai-Mûnene makîgooca.
Currently Selected:
Kîam 4: KKB
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019